Si₂ carta le₂ꞌuɨg₅₄ a₂ca₂jmo₃
SAN PEDRO
Jmo₅ Pe₄ si₂ a₂chein₃ ne₄ dsa₂ ꞌén₂ i₂tiánꞌ₅ tsɨ₁rë₂jan₅₄ uɨ́ng₂
1
Jniá₂ Pe₄, lɨ́ng₅ dsa₂ i₂chen₄ quián₅ Jesucristo jmo₂₃ si₂ la₂ tsɨ́ng₂ ne₄ ca₂le₃jɨ́n₃ dsa₂ i₂tsɨ₁rë₂jan₅₄ i₂ma₂lɨ́n₅ co₂ꞌnióꞌ₄ dsɨ₂nau₂ i₂tiánꞌ₅ uɨ́ng₂, le₂tan₅₄ ꞌuë₃ Ponto, quianꞌ₅₄ Galacia, Capadocia, Asia, Bitinia në́₃,
2 ne₄ ca₂le₃jɨ́n₃ dsa₂ i₂ma₂quionꞌ₅₄ quián₅ Diú₄ Jmei₂ jniog₄ liaꞌ₂ conꞌ₂ lë́₅ ma₂i₃jiog₅ dsɨ́₅ ca₂le₂jŋiá₅. Ca₂quióꞌ₂ Diú₄ të₂le₃ quianꞌ₅₄ ta₁ quióꞌ₅ Jme₂dsí₂ quiáin₅ ia₁jaun₂ ma₂lë́₅ ꞌí₁ ꞌniaꞌ₂, ia₁jaun₂ le₃changꞌ₂ jme₁tiꞌ₄ ne₅₄, chanꞌ₂ ꞌniaꞌ₂ qui₂le₁jë́₃ jme₂dsí₂ quiángꞌ₂ në́₃, rë₂jŋiógꞌ₄ le₁séngꞌ₅ jmɨ₂ ꞌan₅₄ Jesucristo. Jaun₂ juáꞌ₅ jniá₂, juɨ₁chanꞌ₂ bá₄ ꞌniaꞌ₂ dse₃ ne₄ ca₂le₃jë́₃ ne₅₄ a₂dse₃ jme₂guꞌ₅₄ Diú₄, ꞌei₅ tei₄ ja₁conꞌ₂ ꞌniaꞌ₂ ca₂le₃jɨ́ngꞌ₃.
ꞌA₂ liaꞌ₂ chan₂ dsa₂ caun₂ bá₄ a₂le₁ꞌág₄ dsɨ́₅ a₂ma₂rë₂ꞌén₄ dsáu₁, tɨ́inꞌ₄ gueiꞌ₅₄ i₂juɨ́g₃
3 Juɨ₁le₂juɨnꞌ₂ bá₄ Diú₄ Jmei₂ Te₁guiꞌ₅₄ Jesucristo quián₂, ia₁ ca₂dsia₃ ŋéi₂ dsɨ́₅ ꞌŋio₅ lɨn₃ jniog₄, ca₂cuë₃ jme₂dsí₂ ꞌmɨ́₂, ma₂jmo₃ bá₄ a₂ma₂ca₂rë₃chóng₃ táng₃ jniog₄ të₂le₃ quianꞌ₅₄ juɨ₅bí₂ a₂ca₂jenꞌ₅₄ táng₃ Jesucristo jɨn₄ ꞌlag₄. ꞌUɨg₅₄ në₅ bá₄ a₂chong₂ jniog₄ caun₂ bá₄ qui₂le₁ꞌág₄ dsɨ₅ a₂dsi₁no₃ tágꞌ₄ gueiꞌ₅₄ i₂juɨ́g₃.
4 Tonꞌ₂ jmo₃ a₂guéiꞌ₁ ꞌniaꞌ₂ a₂ma₂lë́₅ jág₁ a₂tɨngꞌ₅₄ cuë₃ Diú₄, a₂lë́₅ caun₂ a₂tsá₃ ton₅ jmɨg₄ dsɨ₃ꞌén₂, on₃ guëꞌ₂ lé₂ le₃ꞌlɨgꞌ₅₄, on₃ guëꞌ₂ ton₅ jmɨg₄ le₃juɨng₅ në́₃. Ca₂le₃jë́₃ a₂në₅ ma₂lë́₅ co₂jŋia₅₄ rë₂ꞌma₄ gueiꞌ₅₄ i₂juɨ́g₃ quiánꞌ₂ ꞌniaꞌ₂.
5 Të₂le₃ ia₁ a₂ꞌénꞌ₂ ꞌniaꞌ₂ ma₂jmo₂₃ ꞌí₁ quianꞌ₅₄ juɨ₅bí₂ quióꞌ₅ a₂dsi₁noꞌ₃ ꞌniaꞌ₂ tɨ́ngꞌ₄ a₂le₃jniá₂ jmɨg₄ jë₁ca₂tóꞌ₂ i₁liónꞌ₂ ꞌniaꞌ₂.
6 ꞌUɨg₅₄ në₅ bá₄ në́₃ juɨ₁chanꞌ₂ ꞌniaꞌ₂ qui₂le₁ꞌág₄ dse₃ ꞌauꞌ₂, ꞌioꞌ₂ jéngꞌ₂, tsá₃ a₂léi₂ juɨ₁la₂ ꞌlióng₂ táu₂ a₂qui₂dsɨ₃ŋɨ́ꞌ₂ ꞌniaꞌ₂ co₂ꞌna₂.
7 Ia₁ liaꞌ₂ lë́₅ cu₄nióg₄ bá₄ lë́₅ ꞌénꞌ₂ ꞌniaꞌ₂: jaun₂ tion₅₄ ꞌnióꞌ₅ cáu₃, ŋag₅ si₂, jiógꞌ₂ ꞌí₁ le₃léi₄ chi₂juaꞌ₂ të₃dsónꞌ₂ bá₄ dse₃. Juɨ₁liaꞌ₂ jauꞌ₂ ꞌí₁ cu₄nióg₄ të₂le₃ quianꞌ₅₄ si₂, ján₃ bá₄ le₂në₅ jiógꞌ₂ ꞌí₁ a₂ꞌénꞌ₂ ꞌniaꞌ₂ të₂le₃ quianꞌ₅₄ uɨg₅ a₂niog₅ qui₂dsɨ₂ŋɨ́gꞌ₂. Ia₁ a₂ꞌénꞌ₂ ꞌniaꞌ₂ në₅, quen₅ guë́₄ ꞌŋio₅ lɨn₃ liaꞌ₂ conꞌ₂ guë́₄ cu₄nióg₄, ia₁ cu₄nióg₄ në́₃, a₂dsɨ₂ꞌén₂ bá₄ jaun₂. Jaun₂ në́₃ jë₁ma₂ca₂o₃ꞌág₃ jág₁ a₂ꞌénꞌ₂ ꞌniaꞌ₂ të₃dsónꞌ₂, jaun₂ guë́₄ ꞌag₃ Diú₄, ꞌénꞌ₂ bá₄ ꞌniaꞌ₂ dse₃ lɨn₃, tonꞌ₂ qui₂jme₃go₃ bá₄ dsa₂, jaun₂ guéinꞌ₂ bá₄ ꞌniaꞌ₂ gueiꞌ₅₄ i₂juɨ́g₃ jë₁ma₂ca₂rë₃jniá₂ Jesucristo.
8 ꞌNióꞌ₃ bá₄ ꞌniaꞌ₂ Cristo juɨ₁la₂ tsá₃ ma₂ca₂të́₂ neꞌ₅₄ ꞌniaꞌ₂. Caun₂ bá₄ qui₂le₁ꞌág₄ ꞌauꞌ₂ ꞌniaꞌ₂ le₃quióꞌ₅ ꞌéi₂, jŋiaꞌ₅₄ la₂ tsá₃ ma₂ca₂jɨinꞌ₅₄ ꞌniaꞌ₂ dsónꞌ₂ dsi₁ne₁ la₁ ꞌŋio₅ lɨn₃ bá₄ ꞌioꞌ₂ jénꞌ₂ ꞌniaꞌ₂ ca₂liaꞌ₂ tsá₃ ne₄ ꞌa₂ liaꞌ₂ le₃juaꞌ₅₄,
9 ia₁ le₂në₅ bá₄ ma₂lɨnꞌ₂ ꞌniaꞌ₂ juɨ₅ ja₁ma₂lón₂ jme₂dsí₂ quiángꞌ₂; ia₁ ja₁jaun₂ dsi₁noꞌ₃ dsónꞌ₂ bá₄ ꞌniaꞌ₂ liaꞌ₂ conꞌ₂ lë́₅ ꞌéngꞌ₂.
10 Juɨ₁liaꞌ₂ jág₁ a₂lió₂ Diú₄ në₅, liaꞌ₂ conꞌ₂ lë́₅ jme₁ꞌë́₂ dsa₂ quián₅ Diú₄ jág₁ ma₂lɨ́gꞌ₂, ca₂juáꞌ₂ të₃jŋiá₅ ꞌa₂ liaꞌ₂ jmo₃ ꞌua₁ dsɨ́₅ jme₃goinꞌ₅₄ ꞌniaꞌ₂, jaun₂ dsa₂ ꞌéi₂ në́₃ ca₂ꞌnáuꞌ₃ jág₁ dsau₅ ca₂cáun₃ ꞌí₁ rë₂ lɨn₃,
11 ꞌein₂ dsónꞌ₂ ꞌéi₂, o₃ ꞌe₂ ꞌióꞌ₄ a₂ŋág₃ uɨg₅, a₂le₃juɨinꞌ₂ táng₃ cang₂ jaun₂. Ca₂jmo₃ bá₄ dsa₂ ꞌéi₂ në́₃ liaꞌ₂ conꞌ₂ lë́₅ ca₂ꞌë₃ Jme₂dsí₂ quián₅ Cristo juɨ₅ të₂dsɨ́₅.
12 Ca₂jme₃jnia₅ Diú₄ jág₁ a₂qui₂ca₂ŋɨ́ꞌ₂ dsɨ́₅ dsa₂ ꞌéi₂, la₁ on₃juaꞌ₅₄ a₂dse₃ ja₁coin₂ guioin₅₄, a₂dse₃ të₂le₃ ja₁conꞌ₂ ꞌniaꞌ₂ bá₄ a₂ca₂jme₃ti₃ ꞌéi₂ liaꞌ₂ conꞌ₂ jme₁ca₂ꞌë́₂ jág₁, co₂rë₂ bá₄ liaꞌ₂ conꞌ₂ lë́₅ jág₁ a₂ma₂ca₂rë₃ꞌë́₂ ja₁conꞌ₂ ꞌniaꞌ₂ të₂le₃ quianꞌ₅₄ Jme₂dsí₂ Jŋió₅ i₂chen₄ já₅ gueiꞌ₅₄ i₂juɨ́g₃. Ca₂le₂jiog₅ ángeles në́₃, jme₁ꞌɨ́n₅ dsɨ́₅ të₃ ne₅₄ ca₂le₃jë́₃ a₂në₅.
Diú₄ ma₂ca₂të₃ jniog₄ a₂le₃chong₂ le₁jë́₃ jme₂dsí₂ quián₂
13 Jaun₂, rë₂jánꞌ₁ ꞌniaꞌ₂ jmo₄, a₂le₃ŋɨ́ꞌ₂ dseiꞌ₂ a₂le₃ꞌen₅₄ ꞌauꞌ₂ ꞌniaꞌ₂. Caun₂ bá₄ le₁ꞌág₄ ꞌauꞌ₂ ꞌniaꞌ₂ jmo₄ a₂le₁janꞌ₄ a₂jme₃guꞌ₅₄ Diú₄ jmɨg₄ jë₁ma₂të́₂ rë₁jme₃jnia₅ Jesucristo.
14 La₁ juɨ₁lenꞌ₅₄ ꞌniaꞌ₂ chiꞌ₂-guein₂ dsen₃ quián₅ Diú₄ i₂qui₂rë₂tiꞌ₅₄. Tsá₃ ma₃tiánꞌ₂ ꞌniaꞌ₂ juaꞌ₅₄ a₂qui₂dsɨ₂jŋia₅ guë́₄ ꞌlɨgꞌ₅₄ ꞌauꞌ₂, liaꞌ₂ jme₁lɨ́ngꞌ₄ le₂jŋiá₅ liaꞌ₂ conꞌ₂ tsá₃ ꞌe₂ jme₁ma₂ŋiꞌ₅₄ ꞌniaꞌ₂ le₃quióꞌ₅ Diú₄.
15 Të₂le₃ juɨ₁le₂chanꞌ₂ bá₄ ꞌniaꞌ₂ qui₂le₁jë́₃ të₂ꞌauꞌ₂ qui₂rë₂jŋió₄ co₂ŋeiꞌ₅₄ jme₂dsí₂ quiángꞌ₂ quianꞌ₅₄ ca₂le₃jë́₃ guë́₄ a₂jmoꞌ₂ ꞌniaꞌ₂. Ia₁ i₂jŋió₅ lɨn₃ bá₄ Diú₄ i₂ma₂ca₂të₃ ꞌniaꞌ₂.
16 Ia₁ juáꞌ₂ ne₄ Si₂: “Juɨ₁le₂jŋióꞌ₄ bá₄ ꞌniaꞌ₂, ia₁ i₂jŋió₅ bá₄ jniá₂ ꞌŋió₃.”a
17 Chi₂juaꞌ₂ tëꞌ₂ ꞌniaꞌ₂ “Tia₅₄” i₂qui₂con₂ ꞌí₁ quióꞌ₅ le₂jan₂ le₂jan₂ dsa₂ liaꞌ₂ conꞌ₂ lë́₅ ma₂jmo₃, la₁ tsá₃ jma₃quén₅ jɨ́in₂ ca₂le₃jɨ́n₃, jaun₂ ca₂tɨ́nꞌ₂ ꞌniaꞌ₂ jme₁gainꞌ₃ ca₂le₃jë́₃ jmɨg₄ të₁liaꞌ₂ chanꞌ₂ ꞌniaꞌ₂ lɨ́ngꞌ₅ në₂jag₄ bá₄ dsɨ₂nau₂ ne₄ guaꞌ₅₄ ꞌuë₃ la₂.
18 Ia₁ ma₂ŋiꞌ₅₄ bá₄ ꞌniaꞌ₂, on₃juaꞌ₅₄ a₂ca₂quɨin₃ quianꞌ₅₄ cosa a₂tsá₃ uë́₂ jiog₅, quianꞌ₅₄ juɨ₁liaꞌ₂ cu₄nióg₄ cu₄tiog₂ a₂ca₂lióin₂ ꞌniaꞌ₂ ne₄ juɨ₅ a₂tsá₃ ta₁ tí₄ a₂jme₁le₁quianꞌ₄ ꞌniaꞌ₂, a₂ca₂rë₂tɨ́ngꞌ₃ ca₂ŋág₃ dsa₂ canꞌ₅₄ quiángꞌ₂.
19 Ca₂quɨ́nꞌ₂ ꞌniaꞌ₂ të₂le₃ quianꞌ₅₄ jmɨ₂ ꞌan₅₄ Cristo a₂quen₅ guë́₄ lɨn₃, a₂ca₂ŋó₃ qui₂rë₂jeinꞌ₅₄ ne₄ Diú₄ në₂jag₄ bá₄ jáꞌ₂ chaꞌ₂ i₂tsá₃ ꞌe₂ ꞌlɨgꞌ₅₄ lɨ́n₅ ꞌi₁caun₂.
20 Ia₁ liaꞌ₂ conꞌ₂ néꞌ₃ a₂nio₃ mɨ₂güɨ́g₃, jme₁ma₂rë₂ꞌɨ́in₁ bá₄ a₂lióin₂ dsa₂ mɨ₂güɨ́g₃. Ia₁ ma₂ca₂rë₃jniái₂ jmɨg₄ jë₁ca₂tóꞌ₂ rë₂në́₃, a₂dse₃ o₄quiánꞌ₂ ꞌniaꞌ₂.
21 Ia₁ të₂le₃ quianꞌ₅₄ ꞌéi₂ bá₄ ꞌénꞌ₂ ꞌniaꞌ₂ le₃quióꞌ₅ Diú₄ i₂ca₂jme₃jenꞌ₅₄ Cristo ja₁jme₁rë₂ꞌlɨin₅₄, jaun₂ ca₂jme₃jláuꞌ₁ në́₃. ꞌUɨg₅₄ jaun₂, juɨ₁le₁ꞌág₄ ꞌauꞌ₂ ꞌniaꞌ₂ ꞌéngꞌ₂ të₂le₃ quióꞌ₅ Diú₄.
22 Në₃ në́₃ ma₂le₁jɨ́nꞌ₃ bá₄ ꞌniaꞌ₂ ia₁ ma₂jme₂tíꞌ₁ ꞌniaꞌ₂ jág₁ tí₅, ia₁ të₃dsónꞌ₂ bá₄ ma₂ꞌnióꞌ₃ ꞌniaꞌ₂ rɨ́ngꞌ₂, jme₁ꞌnió₄ ꞌniaꞌ₂ rɨ́ngꞌ₂ le₂jangꞌ₂ le₂jangꞌ₂ jaun₂ në́₃ ca₂le₃jë́₃ ꞌauꞌ₂.b
23 Ia₁ ma₂ca₂rë₃chánꞌ₃ ꞌniaꞌ₂ táng₃, la₁ on₃juaꞌ₅₄ liaꞌ₂ lë́₅ rë₃chan₂ jaun₅ dsa₂ i₂dsan₂. A₂ca₂lɨngꞌ₃ jaun₅ Diú₄ bá₄ i₂tsá₃ lɨ́gꞌ₂ jmɨg₄ dsián₃. Ca₂rë₃chángꞌ₃ të₂le₃ quianꞌ₅₄ jág₁ jénꞌ₃ quióꞌ₅ Diú₄ bá₄ a₂jiog₅ co₂tan₅₄.
24 Ia₁ ne₄ Si₂ juáꞌ₂:
Ca₂le₃jɨ́n₃ dsa₂ mɨ₂güɨ́g₃
lɨ́in₅ juɨ₁liaꞌ₂ lë́₅ nɨ₁nau₂,
ca₂le₃jë́₃ ꞌa₂ liaꞌ₂ jláinꞌ₁
lë́₅ liaꞌ₂ lë́₅ lí₁ jláꞌ₁ quióꞌ₅ nɨ₁nau₂.
Jë₁ma₂ca₂rë₃quéin₃ nɨ₁nau₂,
ca₂táꞌ₂ bá₄ lí₁ ján₃.
25 La₁ jág₁ quióꞌ₅ Te₁guiꞌ₅₄ jiog₅ co₂tan₅₄ bá₄.c
Jaun₂ jág₁ dse₃ a₂lión₂ dsa₂ në₅ ma₂ca₂rë₃ꞌë́₂ jɨnꞌ₄ ꞌniaꞌ₂.