2 ꞌNiaꞌ₂ rɨnꞌ₅₄ jniog₄, jmo₄ ꞌniaꞌ₂ ꞌauꞌ₂ a₂dsengꞌ₃ guë́₄ lɨn₃, jme₁dsɨ₂ŋɨ́ꞌ₂ ꞌniaꞌ₂ ca₂le₃jë́₃ ne₅₄ táu₂ a₂jauꞌ₂ ꞌí₁ ja₁conꞌ₂ ꞌniaꞌ₂.

3 Ia₁ ma₂ŋiꞌ₅₄ bá₄ ꞌniaꞌ₂ jë₁ma₂ca₂jáuꞌ₃ ꞌí₁ ꞌa₂ liaꞌ₂ ꞌénꞌ₂ ꞌniaꞌ₂, dsióg₄ liaꞌ₂ ma₂tiónꞌ₂ jaun₂ bá₄ ꞌniaꞌ₂ tiá₂.

4 La₁ cuɨn₅₄ ꞌniaꞌ₂ jmɨg₄ a₂le₃ꞌŋia₅ a₂në₅ ja₁congꞌ₂, tióꞌ₃ ꞌauꞌ₂ ꞌniaꞌ₂ jmo₄, jaun₂ dsi₁nógꞌ₅ léngꞌ₂ dsa₂ i₂ma₂ca₂canꞌ₅₄, i₂ma₂rë₂ꞌŋia₅ liaꞌ₂ ŋɨ́ꞌ₂ dsi₄, tsá₃ ma₃ꞌe₂ ꞌnióꞌ₅ quiánꞌ₂ ꞌniaꞌ₂.

5 Chi₂juaꞌ₂ chanꞌ₂ ꞌniaꞌ₂ i₂ꞌnióꞌ₅ le₃ŋɨ́ꞌ₂ dsɨ́₅, juɨ₁mɨ₁₂ ja₁con₂ Diú₄, jaun₂ ꞌéi₂ bá₄ cuë₃. Ia₁ Diú₄ i₂ꞌua₁ dsɨ́₅ jmo₂₃ qui₂rë₂tɨn₂ ca₂le₃jɨ́n₃, on₃juaꞌ₅₄ a₂të₂jí₂.

6 La₁ ca₂tɨ́nꞌ₂ ꞌniaꞌ₂ a₂mɨ́ꞌ₁ a₂ꞌéngꞌ₂ të₃dsónꞌ₂ on₃juaꞌ₅₄ a₂ꞌágꞌ₁ ꞌniaꞌ₂ caun₂-tɨn₃ ꞌauꞌ₂; ia₁ juɨ₁liaꞌ₂ dsa₂ i₂ꞌag₅ caun₂-tɨn₃ dsɨ́₅, lɨ́in₅ juɨ₁liaꞌ₂ lë́₅ jmɨg₂ a₂qui₂ráun₂ ne₄ jmɨ₁ŋíꞌ₄, a₂qui₂jnáꞌ₅ can₂ dsí₂ ca₂taun₂ ca₂taun₂.

7 Dsa₂ i₂lɨ́n₅ le₂jaun₂, tsá₃ juɨ₁dsi₂jiog₅ dsɨ́₅ juaꞌ₅₄ cha₂ a₂gue₃ quióꞌ₅ Te₁guiꞌ₅₄.

8 Ia₁ juɨ₁liaꞌ₂ dsa₂ i₂ꞌei₅ tɨn₃ dsɨ́₅ tsá₃ ꞌe₂ tiá₂ chénꞌ₅ i₂le₂ꞌéi₂ ca₂le₃jë́₃ guë́₄ ꞌe₂ a₂jmo₂₃, o₃ ꞌe₂ jág₁ quióꞌ₅ cuë₂₃.

9 Dsa₂ rɨnꞌ₅₄ jniog₄ i₂te₂ŋé₂, ca₂tɨ́in₂ jmo₃ dsɨ́₅ ꞌioꞌ₂ jénꞌ₅, ia₁ të₃dsónꞌ₂ bá₄ quein₅ le₃ja₁con₂ Diú₄.

10 Juɨ₁liaꞌ₂ i₂cha₂ cu₄ guëꞌ₂, ca₂tɨ́in₂ bá₄ jmo₃ ꞌioꞌ₂ ján₃ ia₁ tsá₃ ꞌe₂ quein₅ ja₁con₂ Diú₄ quianꞌ₅₄ cú₁. Ia₁ i₂lɨ́n₅ juɨ₁liaꞌ₂ lë́₅ lí₁ nɨ₁nau₂ bá₄ dsa₂ i₂cha₂ cu₄ ia₁ i₂dsɨ₃ŋɨ́₂ bá₄ ꞌéi₂ juɨ₁la₂ ꞌióg₃.

11 Jë₁ma₂ca₂ꞌia₂^a ꞌiog₂ dséi₅ ꞌŋio₅ lɨn₃ rë₂juɨng₅ bá₄ nɨ₁nau₂, rë₂quein₂, taꞌ₂ bá₄ lí₁ ján₃, ꞌén₂ bá₄ ꞌa₂ liaꞌ₂ jláꞌ₁ jme₁jniá₂. Le₂në₅ bá₄ lë́₅ quianꞌ₅₄ dsa₂ cha₂ cu₄: qui₂dsɨ₃ŋɨ́i₂ bá₄ të₃ ja₁ꞌno₂₃ cu₄.

12 ꞌE₂ guë́₄ dsen₃ dsa₂ i₂tióꞌ₅ jmo₅ juɨnꞌ₂ dsɨ́₅ jë₁ma₂qui₂i₂ŋɨ́i₂ ꞌe₂ táu₂ i₂ŋɨ́i₂; ia₁ jë₁ma₂ca₂ŋɨi₅ jaun₂, gue₃ ja₁le₃chain₂ dse₃, a₂lë́₅ në₂jag₄ bá₄ caun₂ corona a₂cuë₃ Diú₄ cuë́ꞌ₃ ca₂le₃jɨ́n₃ i₂ꞌnio₃ quióꞌ₅.

13 Chi₂juaꞌ₂ chan₂ i₂lɨn₅₄ qui₂ja₂ bí₂ ꞌlɨgꞌ₅₄ dsɨ́₅, tsá₃ juɨ₁dsi₂jiog₅ dsɨ́₅ juaꞌ₅₄ Diú₄ i₂jmo₅ a₂dsɨ₂jiog₅ dsɨ́₅ le₂jaun₂; ia₁ ꞌi₁caun₂ a₂ꞌlɨgꞌ₅₄ tsá₃ quɨꞌ₅₄ jmɨg₄ juaꞌ₅₄ a₂cáin₂ táu₂ Diú₄, on₃ guëꞌ₂ cáun₂ Diú₄ táu₂ quióꞌ₅ ꞌi₁jan₂ ia₁jaun₂ jmo₃ dsa₂ a₂ꞌlɨgꞌ₅₄.

14 Le₂la₂ bá₄ lë́₅: guion₅₄ bá₄ dsa₂ tsɨ₂cuɨinꞌ₂ juɨ₅ ja₁ꞌɨ́n₅ dsɨ́₅ jmo₃ a₂ꞌlɨgꞌ₅₄, ja₁tiáinꞌ₃ dso₄, lɨ́in₅ në₂jag₄ bá₄ juɨ₁liaꞌ₂ jan₂ i₁ju₁ i₂nágꞌ₅ mɨ₂cu₄.

15 Ne₄ ja₁ꞌɨ́n₅ dsɨ́₅ jmo₃ a₂ꞌlɨgꞌ₅₄ në́₃, të₂le₃ ne₄ ja₁ŋó₄ jaun₂ rë₂jniá₂ dso₄ bá₄ ja₁coin₂; jë₁ma₂ca₂ꞌŋia₅ dso₄ në́₃, rë₃cha₂ ꞌmú₃.

16 ꞌNiaꞌ₂ rɨnꞌ₅₄ jniog₄ i₂ꞌnióg₃, tsá₃ juɨ₁le₂ganꞌ₂ ꞌniaꞌ₂,

17 ia₁ ca₂le₃jë́₃ a₂lë́₅ a₂dse₃ lɨn₃ a₂guei₂ jniog₄ já₅ gueiꞌ₅₄ quióꞌ₅ Diú₄ Jmei₂ jniog₄ i₂ca₂jmo₃ ca₂le₃jë́₃ si₂ cha₂ gueiꞌ₅₄ dsi₂güɨg₂. La₁ ja₁con₂ Diú₄ ꞌi₁caun₂ tsá₃ ꞌe₂ juaꞌ₅₄ a₂qui₂rë₂tsɨ́n₃, juɨ₁la₂ qui₂rë₂tsɨ́n₃ si₂ le₁ꞌág₄ gueiꞌ₅₄, ꞌag₅ ꞌenꞌ₂.

18 Liaꞌ₂ ma₂lë́₅ jaun₂ bá₄ conꞌ₂ lë́₅ ma₂ca₂rë₃ꞌŋió₃ dsɨ́₅ ꞌŋiog₅, ma₂ca₂jmo₃ a₂ma₂ca₂rë₃chóng₃ jniog₄ të₂le₃ quianꞌ₅₄ jág₁ dse₃ a₂tí₅ quióꞌ₅, ia₁jaun₂ léi₂ jniog₄ i₂le₂ꞌuɨg₅₄ juɨ₁liaꞌ₂ caun₂ a₂ca₂rau₂ ca₂le₃jë́₃ a₂ma₂jmo₃ ꞌéi₂.

19 Juɨ₁le₂ŋiꞌ₅₄ ꞌniaꞌ₂ a₂la₂, rɨnꞌ₅₄ jniog₄: le₂janꞌ₂ le₂janꞌ₂ ꞌniaꞌ₂ rë₂jángꞌ₁ a₂jŋiaꞌ₅₄ nágꞌ₁ deꞌ₂, tsá₃ ꞌnióꞌ₅ juaꞌ₅₄ a₂ma₂të₂chanꞌ₅₄ ꞌniaꞌ₂ jág₁ a₂ŋagꞌ₅₄ dsɨ₂juɨ₅, on₃ guëꞌ₂ ꞌnióꞌ₅ tɨnꞌ₃ ꞌniaꞌ₂ dséngꞌ₂ në₃ cónꞌ₅.

20 Ia₁ juɨ₁liaꞌ₂ quianꞌ₅₄ a₂dsén₂ dsa₂ tsá₃ lé₂ le₃jmo₃ a₂ꞌŋio₂ dsɨ́₅ Diú₄.

21 Jaun₂ lë₃, tí₃ ꞌniaꞌ₂ ca₂le₃jë́₃ a₂ꞌlɨgꞌ₅₄ a₂lë́₅ dso₄ a₂ŋɨ́₄ ꞌŋio₅ cha₂ jmɨg₄ në₃, jmo₄ ꞌniaꞌ₂ megꞌ₂ guen₅₄ co₂ŋeiꞌ₅₄ jág₁ dse₃ a₂ma₂jnia₄ të₂ꞌauꞌ₂ ꞌniaꞌ₂; ia₁ jág₁ dse₃ në₅ bá₄ a₂ꞌio₅ juɨ₅bí₂ a₂lió₂ jme₂dsí₂ quiánꞌ₂ ꞌniaꞌ₂.

22 La₁ juɨ₁le₂chanꞌ₂ ꞌniaꞌ₂ liaꞌ₂ conꞌ₂ lë́₅ jág₁, on₃juaꞌ₅₄ rëꞌ₂ a₂jŋiaꞌ₅₄ ꞌnióꞌ₅ nágꞌ₁ ꞌniaꞌ₂. Ia₁ në₁juaꞌ₂ tsá₃ jme₂tíꞌ₁ ꞌniaꞌ₂, guionꞌ₅₄ bá₄ ꞌniaꞌ₂ jme₂gángꞌ₁.

23 Ia₁ juɨ₁liaꞌ₂ dsa₂ i₂jŋiaꞌ₅₄ të₅ dsɨ́₅ nag₂₃, tsá₃ jmo₂₃ guëꞌ₂ a₂nag₂₃, lɨ́in₅ liaꞌ₂ lɨ́n₅ jan₂ dsa₂ i₂jɨ́n₂ ꞌŋiog₅ ne₄ nɨ₁ꞌɨ₂;

24 la₁ jë₁ma₂ŋó₅ cau₅ në́₃, dsɨ₂ꞌén₂ bá₄ táng₃ dsɨ́₅ ꞌa₂ liaꞌ₂ jniái₂.

25 La₁ ꞌe₂ guë́₄ dsen₃ dsa₂ i₂tsá₃ dsɨ₂ꞌén₂ dsɨ́₅ ꞌe₂ nag₂₃ të₂le₃ ꞌŋio₅ lɨn₃ guë́₄ tónꞌ₂ juɨ₅ rë₂ jág₅ ꞌéiꞌ₃ dse₃ a₂lión₂ dsa₂. Ia₁ jme₃guꞌ₅₄ bá₄ Diú₄ chi₂juaꞌ₂ jmo₅ dsa₂ ꞌe₂ ta₁ quíꞌ₅ ꞌéiꞌ₃ jaun₂, caun₂ nau₂ tiá₂ bá₄.

26 Chi₂juaꞌ₂ chan₂ i₂lɨn₅₄ lɨ́in₂ ꞌŋio₅ lɨn₃ jme₂ti₃ ne₄ Diú₄, la₁ në₁juaꞌ₂ tsá₃ con₂ guëꞌ₂ dsɨ́₅ ꞌa₂ liaꞌ₂ dsia₂₃ jág₁ në́₃, ján₃ bá₄ guion₅₄ i₂le₂ꞌéi₂ jme₂gain₂₃, ia₁ a₂ꞌéin₂ jaun₂ tsá₃ ꞌe₂ ta₁ tí₄.

27 Juɨ₁liaꞌ₂ dsa₂ i₂ꞌén₂ të₃dsónꞌ₂ liaꞌ₂ dsi₂ten₅₄ ꞌnio₃ Diú₄ Jmei₂ jniog₄, le₂la₂ bá₄ jmo₂₃: a₂jme₂ꞌoin₅₄ chiꞌ₂ ꞌnág₂ quianꞌ₅₄ ꞌio₅₄ ꞌnág₂ në́₃, ꞌe₂ caun₂ o₂i₁ dsɨ₅ chan₂ ꞌéi₂, tonꞌ₂ jmo₂₃ ꞌí₁ a₂tsá₃ jme₃ꞌŋioi₂₃ quianꞌ₅₄ a₂ꞌlɨgꞌ₅₄ cha₂ mɨ₂güɨ́g₃.