2
Rɨnꞌ₅₄ jniog₄, i₂ꞌén₂ le₃quióꞌ₅ Te₁guiꞌ₅₄ Jesucristo i₂jlánꞌ₁ quián₂ jniog₄, tsá₃ ca₂tɨ́nꞌ₂ ꞌniaꞌ₂ jɨngꞌ₅₄ jma₃quén₅ i₂la₂ i₂ó₃.
2 Juɨ₁liaꞌ₂ të₃jë₄ tionꞌ₅₄ ꞌniaꞌ₂ le₁ŋɨgꞌ₂, dsióg₄ jan₂ dsa₂ cha₂ cu₄ i₂ꞌi₄ anillo cu₄nióg₄ gu₂, i₂chénꞌ₅ jláꞌ₁, la₁ në₁juaꞌ₂ ján₃ guëꞌ₂ të₃jë₄ jaun₂ dsióg₄ jan₂ dsa₂ te₂ŋé₂ i₂chénꞌ₅ ꞌlɨgꞌ₅₄,
3 në₁juaꞌ₂ ca₂guenꞌ₅₄ ꞌniaꞌ₂ rë₂ lɨn₃ i₂quiꞌ₂ tsɨnꞌ₅₄ jláꞌ₁, në₁juaꞌ₂ ca₂cheiꞌ₅₄ ꞌniaꞌ₂: “Ŋia₅ i₂né₂ ja₁dse₃ la₂”, la₁ i₂te₂ŋé₂ guëꞌ₂ në́₃ juɨgꞌ₅₄ ꞌniaꞌ₂: “ꞌNe₂ jó₄ nau₂”, o₃ “ja₁lá₃ i₂né₂ ꞌuë₃ cau₅ ja₁tióng₂ tag₃”;
4 në₁juaꞌ₂ le₂në₅ jmoꞌ₂ ꞌniaꞌ₂, ma₂jɨngꞌ₅₄ jma₃quén₅ rɨ́ngꞌ₂, ma₂qui₂cáunꞌ₂ ꞌniaꞌ₂ ꞌí₁, a₂ma₂dsɨ₂jiog₅ ꞌlɨgꞌ₅₄ ꞌauꞌ₂.
5 ꞌNiaꞌ₂ rɨnꞌ₅₄ jniog₄, nei₂ ꞌniaꞌ₂ a₂la₂: Diú₄ ma₂ca₂quióinꞌ₂ i₂lɨ́n₅ i₂te₂ŋé₂ mɨ₂güɨ́g₃ la₂, ia₁jaun₂ léin₂ dsa₂ jlánꞌ₁ quianꞌ₅₄ a₂ꞌéin₂, ia₁ tɨin₃ ja₁gon₂ Diú₄ ja₁ma₂lë́₅ jág₁ cuë́ꞌ₃ ca₂le₃jɨ́n₃ i₂ꞌnio₃ quióꞌ₅.
6 La₁ ꞌniaꞌ₂ në́₃ të₂le₃ o₂guíꞌ₃ bá₄ tsɨ́ngꞌ₂ dsa₂ te₂ŋé₂. ¿Ia₁ on₁juaꞌ₅₄ dsa₂ cha₂ cu₄ guëꞌ₂ i₂jmógꞌ₂ ꞌang₂ quiánꞌ₂ ꞌniaꞌ₂, qui₂tsɨinꞌ₂ ꞌniaꞌ₂ dsɨ₂cheiꞌ₂ ne₄ dsɨ₂tan₅₄ në́₃?
7 ¿On₁juaꞌ₅₄ dsa₂ le₂ꞌéi₂ guëꞌ₂ i₂táun₂ ꞌlɨgꞌ₅₄ jmáꞌ₅ ꞌɨin₂₃ i₂chen₂ jlánꞌ₁, i₂le₃quióꞌ₅ ja₁ténꞌ₄ ꞌniaꞌ₂?
8 Në₁juaꞌ₂ dsɨ₂jóꞌ₃ jme₂tíꞌ₁ ꞌniaꞌ₂ ꞌéiꞌ₃ dsen₅₄ liaꞌ₂ conꞌ₂ lë́₅ juáꞌ₂ ne₄ Si₂: “Jme₁ꞌnió₄ dsa₂ mɨ₂güɨ́g₃ rɨ́ngꞌ₂ juɨ₁liaꞌ₂ ꞌniógꞌ₃ ꞌŋiagꞌ₂”,a dse₃ bá₄ në₁juaꞌ₂ jmoꞌ₂ ꞌniaꞌ₂ le₂jaun₂.
9 La₁ në₁juaꞌ₂ jɨnꞌ₄ ꞌniaꞌ₂ jma₃quén₅ i₂la₂ i₂ó₃, ꞌnauꞌ₂ ꞌniaꞌ₂ dso₄, ia₁ ma₂të₁dsɨ₅₄ ꞌÉiꞌ₃ ja₁conꞌ₂ ꞌniaꞌ₂ guiongꞌ₅₄; ma₂të₁tsɨnꞌ₅₄ ꞌniaꞌ₂ ma₂le₁cángꞌ₄ bá₄.
10 Ia₁ juɨ₁liaꞌ₂ dsa₂ i₂jme₂ti₃ ca₂le₃jë́₃ ꞌÉiꞌ₃, la₁ në₁juaꞌ₂ ca₂ꞌliainꞌ₂ caun₂ ꞌéiꞌ₃ tioꞌ₅₄ në́₃, ja₁jaun₂ ca₂rë₃cáinꞌ₂ ca₂le₃jë́₃ bá₄ ꞌéiꞌ₃ a₂tioꞌ₅₄ ne₄ Si₂ jaun₂.
11 Ia₁ Diú₄ ꞌéi₂ bá₄ i₂ca₂juáꞌ₂ jme₁ca₂juáꞌ₂: “Tsá₃ nióꞌ₄ ꞌniaꞌ₂ jág₁ quianꞌ₅₄ dsa₂ i₂tsá₃ lɨ́n₅ dsɨ₂i₂gogꞌ₂”,b ján₃ bá₄ i₂ꞌéi₂ ca₂juáꞌ₂: “Tsá₃ jŋɨ́gꞌ₄ dsa₂ mɨ₂güɨ́g₃ rɨ́ngꞌ₂.”c Jaun₂ le₂në₅ chi₂juaꞌ₂ tsá₃ ca₂tángꞌ₂ guëꞌ₂ dso₄ quianꞌ₅₄ i₂tsá₃ lɨ́n₅ dsɨ₂i₂gogꞌ₂, la₁ në₁juaꞌ₂ ca₂jŋɨ́gꞌ₃ guëꞌ₂ dsa₂ mɨ₂güɨ́g₃ rɨ́ngꞌ₂ në́₃, ja₁jaun₂ ca₂rë₃cángꞌ₂ bá₄ ta₁jë₂ ꞌÉiꞌ₃.
12 Ca₂tɨ́nꞌ₂ ꞌniaꞌ₂ jmóꞌ₂ tonꞌ₂ dsiáꞌ₁ juɨ₁liaꞌ₂ dsa₂ i₂në₃ guë́₄ të₃dsɨ₅₄ ꞌéiꞌ₃ quióꞌ₅ conꞌ₂ lë́₅ ꞌéiꞌ₃ a₂lió₂.
13 Ia₁ juɨ₁liaꞌ₂ dsa₂ i₂tsá₃ ca₂dsia₃ ŋéi₂ dsɨ́₅ rɨnꞌ₅₄, ján₃ bá₄ le₂jaun₂ tsá₃ ŋéi₂ dsɨ́₅ Diú₄ dsia₃ ja₁con₂ ꞌéi₂ jë₁ma₂të́₂ rë₁të₃dsɨ₅₄ ꞌéiꞌ₃ quióꞌ₅; la₁ juɨ₁liaꞌ₂ i₂ca₂dsia₃ ŋéi₂ dsɨ́₅ rɨnꞌ₅₄, a₂ŋéi₂ dsɨ́₅ jaun₂ bá₄ líꞌ₂ jë₁ma₂të́₂ rë₁të₃dsɨ₅₄ ꞌéiꞌ₃ quióꞌ₅.
ꞌNióꞌ₅ le₃jniá₂ a₂ꞌén₂ dsa₂
14 ꞌNiaꞌ₂ rɨnꞌ₅₄ jniog₄, ¿ꞌe₂ bá₄ ta₁ jmo₃ në₁juaꞌ₂ chan₂ i₂juáꞌ₂ ma₂ꞌéin₂, në₁juaꞌ₂ tsá₃ guëꞌ₂ ꞌe₂ a₂ꞌua₁ dsɨ́₅ jmo₂₃? ¿Lé₂ le₃juaꞌ₅₄ jniog₄ a₂tɨ́nꞌ₄ dsa₂ le₂ꞌéi₂ quianꞌ₅₄ a₂ꞌéin₂ le₂jaun₂?
15 Juaꞌ₅₄ meiꞌ₂ guë́₃ chan₂ jan₂ dsa₂ ŋeꞌ₂, o₃ jan₂ dsa₂ mɨ́₂ rɨnꞌ₅₄ jniog₄, ꞌɨn₂ tsɨnꞌ₅₄, ꞌɨn₂ a₂guë́ꞌ₃, ꞌoin₅₄ ŋɨ₂₃ le₂o₃ jmɨg₄;
16 në₁juaꞌ₂ chanꞌ₂ ꞌniaꞌ₂ i₂ca₂cheiꞌ₅₄: “Guanꞌ₂ caun₂ dse₃ quiángꞌ₂”, o₃ “Guanꞌ₂ o₂jme₁dsionꞌ₂”, o₃ “Guanꞌ₂ o₂jme₁tan₅₄ ja₁quiángꞌ₂”, në₁juaꞌ₂ tsá₃ ca₂cuëꞌ₅₄ guëꞌ₂ ꞌniaꞌ₂ a₂dsen₅₄ a₂ꞌnióꞌ₅ quióꞌ₅ nɨ₁ŋɨ₁₂, ¿ꞌe₂ bá₄ ta₁ jmo₃ a₂ꞌénꞌ₂ ꞌniaꞌ₂ le₂në₅?
17 Le₂në₅ bá₄ lë́₅ quianꞌ₅₄ a₂ꞌén₂ dsa₂: në₁juaꞌ₂ tsá₃ léi₄ qui₂rë₂jniá₁ a₂jmo₅ dsa₂ a₂ꞌua₁ dsɨ́₅, tsá₃ ꞌe₂ ta₁ tí₄ a₂ꞌéin₂ jaun₂, lë́₅ caun₂ co₂ꞌnióꞌ₄ a₂ꞌlag₄ bá₄ jaun₂.
18 ꞌAn₁ chan₂ bá₄ i₂juáꞌ₂ në́₃: “ꞌÉnꞌ₂ bá₄ ꞌne₂, la₁ jniá₂ guëꞌ₂ jmo₂₃ a₂dse₃.” Jniá₂ juáꞌ₅: ꞌË₄ a₂ꞌéngꞌ₂, on₃juaꞌ₅₄ quianꞌ₅₄ a₂dse₃ a₂jmoꞌ₂, jaun₂ jniá₂ në́₃ jme₁jniag₅ a₂ꞌéng₂ të₂le₃ quianꞌ₅₄ a₂dse₃ a₂jmo₂₃.
19 ꞌÉnꞌ₂ bá₄ ꞌne₂ a₂chan₂ jan₂ Diú₄; ¿ꞌe₂ a₂dse₃ jmoꞌ₂ në₁juaꞌ₂ le₂jaun₂? Ján₃ bá₄ le₂në₅ guëꞌ₂ je₂naꞌ₅₄ ꞌéin₂ a₂chan₂ Diú₄, la₁ jlein₂₃ bá₄.
20 La₁ ꞌne₂ në́₃ dsa₂ co₄, ¿ꞌniogꞌ₂ cuë₅₄ jniá₂ caun₂ léi₄ a₂tsá₃ ꞌe₂ quen₅ a₂ꞌén₂ dsa₂ në₁juaꞌ₂ tsá₃ ꞌe₂ a₂dse₃ a₂qui₂rë₂jniá₁ jmo₂₃?
21 ¿On₁juaꞌ₅₄ ca₂të₁tsɨnꞌ₅₄ rë₂ Abraham ne₄ Diú₄ të₂le₃ quianꞌ₅₄ a₂dse₃ a₂jme₁jme₂jniai₂₃ liaꞌ₂ conꞌ₂ jme₁ca₂jéinꞌ₂ Isaac ja₁ŋiꞌ₅₄ quiáin₅ ne₄ Diú₄ a₂jme₁jŋagꞌ₃ ne₄ ne₄chei₂?
22 Rë₂ deꞌ₂ quion₂ ꞌniaꞌ₂ ꞌí₁ ꞌa₂ liaꞌ₂ ca₂lë₃ quianꞌ₅₄ Abraham: ja₁jaun₂ ca₂rë₃jniá₂ a₂ꞌéin₂ të₂le₃ quianꞌ₅₄ a₂ca₂jmo₃ jaun₂, ja₁jaun₂ ca₂jáuꞌ₃ ꞌí₁ ca₂ꞌŋia₅ a₂ꞌéin₂ të₂le₃ quianꞌ₅₄ a₂ca₂rë₃jniá₂ a₂ca₂jmo₃ jaun₂.
23 Le₂në₅ bá₄ ca₂rë₃ti₃ a₂juáꞌ₂ ne₄ Si₂ ꞌɨin₂₃ Abraham ja₁juáꞌ₂: “Ca₂rë₃ꞌén₂ Abraham ja₁con₂ Diú₄; a₂ca₂rë₃ꞌéin₂ le₂jaun₂ në́₃, ca₂guéiꞌ₂ Diú₄ të₁tsɨinꞌ₅₄ lɨ́in₅ dsa₂ dsen₃.”d Jaun₂ Diú₄ në́₃ ca₂caun₃ ca₂lɨn₃ ꞌéi₂ a₂mei₅₄ quiáin₅.
24 Ja₁në₅ bá₄ rë₂jniá₂ jaun₂ në́₃, ꞌa₂ liaꞌ₂ të₂tsɨnꞌ₅₄ dsa₂ rë₂ ne₄ Diú₄ të₂le₃ quianꞌ₅₄ a₂dse₃ a₂jmo₂₃, on₃juaꞌ₅₄ rëꞌ₂ a₂jŋiaꞌ₅₄ ꞌnióꞌ₅ juáꞌ₂ a₂ꞌéin₂.
25 Ján₃ bá₄ le₂në₅ ca₂lë₃ quianꞌ₅₄ Rahab i₂jme₁ꞌnag₅ quióꞌ₅;e ca₂të₁tsɨinꞌ₅₄ rë₂ ne₄ Diú₄ të₂le₃ quianꞌ₅₄ a₂dse₃ a₂ca₂jmo₃: ca₂cuë₃ dsi₂néi₂ quióꞌ₅ ca₂jŋia₃ dsa₂ quián₅ Diú₄, ján₃ guëꞌ₂ ca₂jme₃ꞌoin₅₄ dsa₂ ꞌéi₂ ca₂ꞌuágꞌ₂ juɨ₅ siáꞌ₂.
26 Jaun₂ le₂në₅ bá₄ juɨ₁liaꞌ₂ nɨ₁ŋɨ́₅ a₂tsá₃ jme₂dsí₂ ꞌi₄, lë́₅ caun₂ nɨ₁ŋɨ́₅ ꞌlag₄, ján₃ bá₄ le₂në₅ lë́₅ a₂ꞌén₂ dsa₂, në₂jag₄ bá₄ ꞌlag₄ ján₃ në₁juaꞌ₂ tsá₃ rë₂jniá₂ a₂dse₃ a₂jmo₂₃.