Juɨ₁liaꞌ₂ le₁tsɨꞌ₂ dsa₂
3
Rɨnꞌ₅₄ jniog₄, tsá₃ ꞌnióꞌ₅ juaꞌ₅₄ juɨn₅ i₂lén₂ të₅ jɨnꞌ₄ ꞌniaꞌ₂, ia₁ ma₂ŋiꞌ₅₄ bá₄ ꞌniaꞌ₂, ꞌŋio₅ guë́₄ bén₂ ꞌéiꞌ₃ të₃dsɨ₅₄ ja₁con₂ jniog₄ conꞌ₂ lág₅ i₂jme₂tɨ́n₁ rɨnꞌ₅₄.
2 Ia₁ ca₂le₃jág₃ bá₄ jniog₄ co₂dsɨ₂ꞌéinꞌ₅ ne₄ ꞌlióng₂ ne₅₄. Në₁juaꞌ₂ chan₂ i₂tsá₃ ma₃dso₄ ꞌno₅ ꞌi₁ca₂juɨg₄ ja₁dsia₂₃ jág₁, dsa₂ le₂ꞌéi₂ lɨ́n₅ dsa₂ rë₂ꞌŋia₅, i₂ꞌio₅ bí₂ ne₄ nɨ₁ŋɨ₁₂ ꞌŋiog₅, ta₁jain₂.
3 Juɨ₁liaꞌ₂ jme₁tóꞌ₅ dsa₂ nɨ₁ŋí₁ mɨ₂ꞌo₄ dsɨ₂cua₁ ia₁jaun₂ jme₃ti₃, lé₂ jéinꞌ₂ dsa₂ ta₁jain₂ ꞌa₂ juɨ₅ ꞌnio₃ dsa₂ jiog₃.
4 Ŋí₂ deꞌ₂ ꞌniaꞌ₂ ján₃ juɨ₁liaꞌ₂ nɨ₁barco juɨ₁ꞌa₂ guëꞌ₂ liaꞌ₂ caꞌ₅₄ pa₁ lɨn₃, qui₂ꞌliaꞌ₂ dsí₂ tiá₂, dsa₂ i₂quian₅ në́₃ lé₂ le₃cán₂ ꞌa₂ juɨ₅ ꞌnio₃, quianꞌ₅₄ caun₂ timón píꞌ₁ bá₄.
5 Le₂në₅ bá₄ lë́₅ quianꞌ₅₄ le₁tsɨꞌ₂ dsa₂ ján₃; le₁tsɨꞌ₂ dsa₂ lë́₅ caun₂ nɨ₁ŋɨ́₅ píꞌ₁ ton₅ nɨ₁ŋɨ₁ dsa₂; ꞌe₂ bá₄ lɨ́in₂ lé₂ le₃jmo₃ ꞌlióng₂ jág₁ caꞌ₅₄. ¡Ŋí₂ deꞌ₂ ꞌniaꞌ₂ ján₃, ꞌe₂ guë́₄ pa₁ ꞌŋa₁ máꞌ₂ lé₂ le₃dsɨꞌ₂ quianꞌ₅₄ ca₂mɨ́g₂ si₂ píꞌ₁!
6 Jaun₂ le₁tsɨꞌ₂ dsa₂ në́₃, lë́₅ co₂ꞌnióꞌ₄ caun₂ si₂ a₂quianꞌ₅₄ quióꞌ₅ dsa₂. A₂lë́₅ co₂ꞌnióꞌ₄ caun₂ mɨ₂güɨ́g₃ ꞌlɨgꞌ₅₄ a₂ton₅ nɨ₁ŋɨ₁ jniog₄, a₂jmo₅ ta₁ a₂qui₂rë₂ꞌŋio₅ dsa₂ ta₁jain₂. Quianꞌ₅₄ jág₁ dséi₂ a₂ꞌŋiog₂ jniog₄, në₂jag₄ bá₄ a₂guíꞌ₂ si₂ le₁tsɨꞌ₂ jniog₄ juɨ₅ quián₂ të₁liaꞌ₂ chong₂, lë́₅ në₂jag₄ bá₄ si₂ a₂ca₂tɨ́n₂ bí₂ quianꞌ₅₄ tsɨꞌ₅₄ si₂ a₂já₅ guio₃-juɨ́g₃.
7 Quɨꞌ₅₄ jmɨg₄ dsa₂ mɨ₂güɨ́g₃ jme₃ꞌuáin₂ dsɨ́₅ ca₂le₃jë́₃ ne₅₄ jáꞌ₂ i₂tsau₂ dsɨ́₅, jáꞌ₂ i₂ꞌɨn₅, jáꞌ₂ i₂tsë́ꞌ₅ quióꞌ₅, jáꞌ₂ i₂chan₂ jmɨ₁ŋíꞌ₄ në́₃,
8 la₁ ꞌi₁jan₂ dsa₂ tsá₃ ꞌein₂ ma₂tióꞌ₃ jme₃ꞌuáin₂ le₁tsɨꞌ₂ guioin₅₄. Lë́₅ caun₂ a₂ꞌlɨgꞌ₅₄ a₂tsá₃ tei₄ lé₂ le₃jmo₃, qui₂rë₂canꞌ₂ jág₁ dséi₂ në₂jag₄ bá₄ mɨ́₅ ꞌlɨgꞌ₅₄ a₂dsan₂ dsa₂.
9 Quianꞌ₅₄ le₁tsɨꞌ₂ jniog₄ jme₂juɨ́nꞌ₁ Te₁guiꞌ₅₄ quián₂ i₂lɨ́n₅ Jmei₂ jniog₄, tonꞌ₂ ján₃ guëꞌ₂ ꞌɨ́n₅ ꞌlɨgꞌ₅₄ dsa₂ mɨ₂güɨ́g₃ i₂ma₂ca₂jmóꞌ₂ Diú₄ liaꞌ₂ lë́₅ nióꞌ₄ quióꞌ₅ ꞌŋiog₅.
10 Quianꞌ₅₄ mɨ₂ꞌo₄ jniog₄ la₂, ꞌuë₂ jág₁ a₂jme₂juɨ́nꞌ₁ Diú₄, ján₃ guëꞌ₂ ꞌuë₂ jág₁ ꞌlɨgꞌ₅₄ a₂ꞌɨ́n₅ dsa₂ rɨnꞌ₅₄. Rɨnꞌ₅₄ jniog₄, tsá₃ dsi₂ten₅₄ le₂në₅.
11 ¿ꞌA₂ bá₄ liaꞌ₂ chi₂juaꞌ₂ caun₂ o₄tu₁ jmɨg₂ lé₂ le₃ꞌiá₃ jmɨg₂ ráu₂ liaꞌ₂ jmɨg₂ dsiꞌ₃ në́₃?
12 ꞌNiaꞌ₂ rɨnꞌ₅₄ jniog₄, ¿lé₂ le₃lé₂ juaꞌ₅₄ caun₂ nɨ₁ꞌma₂ a₂ꞌag₅ mɨ́g₂ higo, juaꞌ₅₄ a₂jaun₂ ꞌag₃ táng₃ mɨ́g₂ aceitunas? O₃, ¿lé₂ le₃lé₂ juaꞌ₅₄ ca₂choꞌ₅₄ uɨng₂ uvas, a₂jaun₂ ꞌag₃ táng₃ mɨ́g₂ higos? Ján₃ bá₄ le₂në₅, ꞌi₁caun₂ tu₄ jmɨg₂ ja₁ꞌia₂ jmɨg₂ ŋiꞌ₅₄ tsá₃ lé₂ le₃ꞌiá₃ jmɨg₂ ráu₂ në́₃.
Le₂la₂ dsónꞌ₂ bá₄ lë́₅ a₂dse₃ liaꞌ₂ conꞌ₂ dsi₂ten₅₄ le₃ŋɨ́ꞌ₂ dsɨ́₅ dsa₂
13 Në₁juaꞌ₂ chan₂ jë₄ quiánꞌ₂ ꞌniaꞌ₂ jan₂ i₂ŋɨ́ꞌ₂ dsɨ́₅, juɨ₁jme₂jniai₂₃ juɨ₅ dse₃ ꞌa₂ liaꞌ₂ ŋɨ₂₃ të₂le₃ quianꞌ₅₄ a₂jmo₃ a₂dse₃, a₂jmo₃ meiꞌ₂ liaꞌ₂ conꞌ₂ lë́₅ ŋɨ́iꞌ₂.
14 La₁ në₁juaꞌ₂ tionꞌ₅₄ ꞌniaꞌ₂ jmoꞌ₂ uɨn₅ ꞌauꞌ₂ cha₂ a₂dsiꞌ₃ të₂ꞌauꞌ₂ ꞌniaꞌ₂, tiongꞌ₅₄ cha₂ a₂ma₂ꞌɨ́n₅ ꞌauꞌ₂ guiongꞌ₅₄; në₁juaꞌ₂ le₂në₅, tsá₃ ca₂tɨ́nꞌ₂ ꞌniaꞌ₂ jmóꞌ₂ tángꞌ₅, on₃ guëꞌ₂ jmóꞌ₂ të₂jɨ́ngꞌ₁ quianꞌ₅₄ jág₁ tí₅.
15 Ia₁ a₂ŋɨ́ꞌ₂ dsɨ́₅ dsa₂ le₂në₅, on₃juaꞌ₅₄ a₂já₅ gueiꞌ₅₄ në₅; quióꞌ₅ mɨ₂güɨ́g₃ bá₄. A₂lë́₂ dsɨ́₅ nɨ₁ŋɨ₁ dsa₂ guioin₅₄, ta₁ quióꞌ₅ je₂naꞌ₅₄ bá₄ në₅.
16 Ia₁ juɨ₁liaꞌ₂ ja₁tionꞌ₅₄ dsa₂ uɨn₅ dsɨ́₅ quianꞌ₅₄ rɨinꞌ₅₄, tonꞌ₂ co₂tan₅₄ cha₂ a₂ma₂ꞌɨ́n₅ dsɨ́₅ dsa₂ a₂líꞌ₂ jmáꞌ₃ guioin₅₄, ja₁le₂jaun₂ tsá₃ ꞌe₂ dse₃ chíꞌ₅ tionꞌ₅₄ dsa₂, tonꞌ₂ jmo₅-dsáu₅ dsa₂ ca₂le₃jë́₃ ne₅₄ a₂ꞌlɨgꞌ₅₄.
17 La₁ juɨ₁liaꞌ₂ ja₁ŋɨ́ꞌ₂ dsónꞌ₂ dse₃ dsɨ́₅ dsa₂ a₂já₅ gueiꞌ₅₄ i₂juɨ́g₃, jë₁le₂ꞌuɨg₅₄ deꞌ₂ chan₂ dsa₂ quian₅ caun₂ juɨ₅ le₁jë́₃; ŋó₅ jaun₂ táng₃ ꞌnoꞌ₂ juɨ₅ ja₁ꞌag₃ tei₄; ꞌen₅₄ dsɨ́₅ dsa₂ lɨ́in₅ në́₃; caun₂ dsáu₅ dsɨ́₅ bá₄ ꞌe₂ caun₂ a₂lë́₂; chain₂ ŋéi₂ dsɨ́₅ dsa₂ mɨ₂güɨ́g₃ rɨinꞌ₅₄; jmo₂₃ jmáꞌ₃ liaꞌ₂ a₂dse₃; tonꞌ₂ tsá₃ ꞌe₂ qui₂co₂₃ jág₁ quióꞌ₅; tonꞌ₂ tsá₃ juaꞌ₅₄ a₂lë₁co₂jmo₂₃ o₁ne₁ në́₃.
18 Dsa₂ i₂quɨ́nꞌ₅ bí₂ jne₂₃ a₂ꞌag₃ tei₄, jaun₂ roꞌ₂ a₂le₃chain₂ caun₂ juɨ₅ co₂dsau₅.