Juɨ₁liaꞌ₂ jme₁tónꞌ₅ dsa₂ ꞌén₂ jmo₂₃ ján₃ a₂jmo₅ dsa₂ mɨ₂güɨ́g₃
4
¿ꞌA₂ juɨ₅ já₅ mɨꞌ₅₄ ꞌnei₂ a₂cha₂ jɨnꞌ₄ ꞌniaꞌ₂? ¿On₁juaꞌ₅₄ ꞌuɨg₅₄ ia₁ a₂ꞌniogꞌ₂ ꞌniaꞌ₂ le₃changꞌ₂ o₂ꞌŋió₃ o₂jŋia₃ ꞌauꞌ₂, cuë₅ ꞌnei₂ nɨ₁ŋɨꞌ₁ ꞌniaꞌ₂?
2 Cha₂ a₂ꞌniogꞌ₂ ꞌniaꞌ₂ juɨ₁liaꞌ₂ a₂tsá₃ cha₂ quiángꞌ₂. Uɨn₅ ꞌauꞌ₂ ꞌniaꞌ₂ lɨ́ngꞌ₅. Ia₁ tsá₃ le₃lénꞌ₂ ꞌniaꞌ₂ a₂ꞌɨ́n₅ ꞌauꞌ₂. Jmoꞌ₂ ꞌniaꞌ₂ mɨꞌ₅₄, dsiaꞌ₂ ꞌniaꞌ₂ ꞌnei₂ në́₃, la₁ tsá₃ cha₂ quiánꞌ₂ ꞌniaꞌ₂ në́₃, ia₁ tsá₃ mɨꞌ₂.
3 Juɨ₁liaꞌ₂ jme₁mɨꞌ₂ guëꞌ₂ ꞌniaꞌ₂, la₁ tsá₃ ŋɨꞌ₂ guëꞌ₂ ꞌniaꞌ₂ ꞌuɨg₅₄ ia₁ tsá₃ mɨꞌ₂ ꞌniaꞌ₂ conꞌ₂ dsi₂ten₅₄, ia₁ a₂jŋiaꞌ₅₄ ꞌniogꞌ₂ ꞌniaꞌ₂ ꞌéngꞌ₄ a₂le₃changꞌ₂ o₂ꞌŋió₃ o₂jŋia₃ ꞌauꞌ₂ bá₄.
4 ¡ꞌE₂ guë́₄ lɨ́nꞌ₅ ꞌniaꞌ₂ juɨ₁liaꞌ₂ lɨ́n₅ dsa₂ mɨ́₂ i₂tsá₃ jen₅₄ dsɨ₂i₂gu₂, qui₂ꞌnoꞌ₂ juɨ₅ dsó₅ quianꞌ₅₄ i₂siánꞌ₂! ¿Tsa₁ ŋiꞌ₅₄ ꞌniaꞌ₂, juɨ₁liaꞌ₂ dsa₂ i₂jenꞌ₂ dsɨ́₅ quianꞌ₅₄ mɨ₂güɨ́g₃, i₂le₂ꞌéi₂ të₂tsɨnꞌ₅₄ lɨ́in₅ i₂ꞌŋia₅₄ Diú₄ bá₄? Jaun₂ lë₃, juɨ₁ꞌein₂ guë́₃ i₂jenꞌ₂ quianꞌ₅₄ mɨ₂güɨ́g₃, i₂ꞌŋia₅₄ Diú₄ bá₄ ꞌéi₂.
5 ¿O₃ bá₄ lɨ́nꞌ₂ ꞌniaꞌ₂, on₃juaꞌ₅₄ ꞌe₂ cha₂ jein₅ jág₁ a₂juáꞌ₂ ne₄ Si₂: “Jme₂dsí₂ i₂ma₂cuɨin₃ i₂ꞌen₅₄ jë₄ quián₂ jniog₄, dsíꞌ₅ ꞌŋio₅ lɨn₃ ia₁ a₂ꞌnio₃ jniog₄”?a
6 La₁ të₂le₃ ꞌŋio₅ guë́₄ bén₂ a₂ꞌua₁ dsɨ́₅ Diú₄ a₂cuë₂₃ jniog₄; ꞌuɨg₅₄ jaun₂ juáꞌ₂ ne₄ Si₂:
Nau₂ Diú₄ quein₅ ne₄ dsa₂ i₂jmo₅ tánꞌ₅,
la₁ jmo₂₃ ꞌua₁ dsɨ́₅ ja₁con₂ dsa₂ i₂jmo₅ meꞌ₂.b
7 Tiónꞌ₂ ꞌniaꞌ₂ o₄gú₃ Diú₄. Tsá₃ lë₁cuɨ́n₅ ꞌniaꞌ₂ i₂së₃dsen₃, jaun₂ i₂cuɨng₃ bá₄ ꞌéi₂ ja₁conꞌ₂ ꞌniaꞌ₂.
8 Jme₁quián₄ ꞌniaꞌ₂ të₂le₃ ja₁con₂ Diú₄, jaun₂ bá₄ jme₃quián₃ ꞌéi₂ ja₁conꞌ₂ ꞌniaꞌ₂ ján₃. ꞌNiaꞌ₂ dsa₂ i₂qui₂rë₂cánꞌ₄ dso₄, rang₂ ꞌniaꞌ₂ gogꞌ₂; jmo₄ ꞌniaꞌ₂ le₁jë́₃ të₂ꞌauꞌ₂, ꞌniaꞌ₂ dsa₂ i₂le₁ꞌág₄ caun₂-tɨn₃ dsɨ́₅.
9 Tiónꞌ₂ ꞌniaꞌ₂ quian₂ o₂i₁ dsɨ₅, quɨꞌ₂-ꞌo₄. Ŋágꞌ₄ quiánꞌ₂ ꞌniaꞌ₂, juɨ₁le₂tsɨ́n₃ juɨ₁le₅₄ a₂quɨꞌ₂-ꞌáuꞌ₂ ꞌniaꞌ₂; ján₃ guëꞌ₂ le₂në₅ në₁juaꞌ₂ chanꞌ₂ ꞌniaꞌ₂ i₂ꞌioꞌ₂ jénꞌ₅, jme₁tsɨ́n₄, tiónꞌ₂ ꞌniaꞌ₂ ꞌliaꞌ₂ ꞌauꞌ₂.
10 Jmo₄ ꞌniaꞌ₂ megꞌ₂ të₂le₃ ne₄ Te₁guiꞌ₅₄, jaun₂ bá₄ chóꞌ₂ ꞌéi₂ táng₃.
Diú₄ bá₄ i₂ca₂tɨ́n₂ con₂ ꞌí₁
11 Rɨnꞌ₅₄ jniog₄, tsá₃ ꞌɨ́n₅ ꞌniaꞌ₂ ꞌlɨgꞌ₅₄ rɨ́ngꞌ₂ le₂jangꞌ₂ le₂jangꞌ₂. Ia₁ juɨ₁liaꞌ₂ i₂ꞌɨn₅ ꞌlɨgꞌ₅₄ jan₂ rɨnꞌ₅₄, o₃ ŋɨ₂₃ qui₂con₂ ꞌí₁, co₂ꞌnióꞌ₄ ꞌlɨgꞌ₅₄ bá₄ ꞌë₅ ꞌéi₂ ꞌÉiꞌ₃ quióꞌ₅ Diú₄, tonꞌ₂ jmo₂₃ dsɨ́₅ tsá₃ ꞌe₂ quen₅ ꞌÉiꞌ₃. Ia₁ në₁juaꞌ₂ cáunꞌ₂ ꞌne₂ ꞌí₁ ne₄ ꞌÉiꞌ₃, co₂ꞌnióꞌ₄ bá₄ a₂ma₂jmoꞌ₂ ꞌauꞌ₂ ján₃ a₂lɨ́ngꞌ₅ jan₂ i₂ꞌio₅ bí₂ con₂ ꞌí₁ ne₄ ꞌÉiꞌ₃ ꞌnióꞌ₄ a₂jme₁tiꞌ₄ ꞌŋiagꞌ₂.
12 Jan₂ tan₅₄ bá₄ i₂chan₂ i₂ca₂tɨ́n₂ cuë₃ ꞌéiꞌ₃; i₂ꞌéi₂ bá₄ lɨ́n₅ i₂ꞌio₅ bí₂ dsí₃ ꞌéiꞌ₃, jaun₂ ꞌŋiog₅ bá₄ ꞌéi₂ në́₃ lé₂ le₃lió₂ o₃ ꞌliogꞌ₃ ꞌe₂. La₁ ¿i₂ꞌein₂ bá₄ ꞌne₂? ¿ꞌE₂ lë₃ cáunꞌ₂ ꞌí₁ quióꞌ₅ dsa₂ mɨ₂güɨ́g₃ rɨ́ngꞌ₂?
13 Në₃ në́₃, nei₂ ꞌniaꞌ₂ a₂la₂, ꞌniaꞌ₂ i₂jag₄ juáꞌ₂: “Në₃ o₃ ꞌióg₃, dsau₅₄ ciudad në₅, o₃ ciudad ó₃; ja₁jaun₂ dsɨ₁ŋag₅₄ caun₂ ŋi₂ dsɨ₁ꞌnág₁ dsɨ₁jmó₁ ꞌmaꞌ₅₄ jaun₂ léi₂ cu₄.”
14 La₁ ꞌi₁ca₂juɨg₄ tsá₃ jaun₂ ŋiꞌ₅₄ ꞌniaꞌ₂ ꞌe₂ lé₂ ꞌióg₃, dsi₂juɨ₅ ja₁o₁nógꞌ₅. Ia₁ juɨ₁liaꞌ₂ lë́₅ caun₂ bëꞌ₅₄ jnei₅ tei₂ bá₄ lɨ́nꞌ₅ ꞌniaꞌ₂, në₃ jniá₂ ꞌei₅, në₃ cónꞌ₅ tsá₃ ma₃cha₂ táng₃.
15 ꞌNióꞌ₄ a₂jme₁dsiáꞌ₂ ꞌniaꞌ₂ jág₁ le₂në₅, le₂la₂ bá₄ ca₂tɨ́nꞌ₂ ꞌniaꞌ₂ dsiáꞌ₁: “Chi₂juaꞌ₂ le₂jaun₂ ꞌnio₃ Te₁guiꞌ₅₄ le₃chong₂ jniog₄, jaun₂ bá₄ dsɨ₁jmó₁ a₂la₂ a₂ó₃.”
16 La₁ ꞌniaꞌ₂ në́₃, tɨngꞌ₂ dsiaꞌ₂ jág₁ táꞌ₅ jmoꞌ₂ ꞌniaꞌ₂ róngꞌ₂; ca₂le₃jë́₃ a₂dsia₅ dsa₂ jág₁ le₂në₅, ꞌlɨgꞌ₅₄ bá₄.
17 Jaun₂ në́₃, dsa₂ i₂ŋi₅ a₂dse₃ a₂lé₂ le₃jmo₃, la₁ në₁juaꞌ₂ tsá₃ ca₂jmo₃ në́₃, dso₄ bá₄ jaun₂ le₃quióꞌ₅ ꞌéi₂.