A₂rë₂ꞌë́₂ jág₁ ja₁con₂ dsa₂ cha₂ cu₄
5
¡Nei₂ ꞌniaꞌ₂ a₂la₂, ꞌniaꞌ₂ dsa₂ i₂cha₂ cu₄! Quɨꞌ₂-ꞌo₄, guioꞌ₅₄ ꞌniaꞌ₂ o₄quióꞌ₄ ca₂le₃jë́₃ ne₅₄ jmɨ₁uɨg₅ a₂dsɨ₃ŋɨ́ꞌ₂ ꞌniaꞌ₂.
2 Ca₂le₃jë́₃ a₂cha₂ quiánꞌ₂ ꞌniaꞌ₂ ma₂ꞌáu₁, le₂jaun₂ guëꞌ₂ ꞌmɨꞌ₂ a₂quɨ́ꞌ₂ ꞌniaꞌ₂ ma₂quíꞌ₅ i₁cá₁.
3 Cu₄nióg₄ cu₄tiog₂ quiánꞌ₂ ꞌniaꞌ₂ qui₂ma₂ꞌio₂ juɨ́ꞌ₅. Já₅ caun₂ jmɨg₄ jángꞌ₃ léi₄ juɨ́ꞌ₅. A₂në₅ bá₄ a₂co₃dsag₅₄ quiánꞌ₂ ꞌniaꞌ₂, a₂dsiá₃ nɨ₁ŋɨꞌ₁ ꞌniaꞌ₂ guiongꞌ₅₄, lé₂ në₂jag₄ bá₄ si₂. Ia₁ ꞌŋio₅ lɨn₃ qui₂ma₂dsiaꞌ₅₄ ꞌniaꞌ₂ le₁máꞌ₂ ca₂le₃jë́₃ ne₅₄ a₂cha₂ quiángꞌ₂, jmɨg₄ jë₁ca₂tóꞌ₂ la₂.
4 ¡Jag₄! ꞌLianꞌ₅₄ dsa₂ i₂qui₂ma₂jmo₃ ta₁ ja₁nau₂ quiánꞌ₂ ꞌniaꞌ₂ ꞌlianꞌ₅₄ dsa₂ a₂tsá₃ ca₂quiꞌ₅₄ ꞌniaꞌ₂, guióꞌ₅ ꞌo₂₃; le₂jaun₂ guëꞌ₂ jág₁ quióꞌ₅ guion₅₄ dsa₂ ꞌéi₂, ma₂dsi₃lé₂ gua₄ Te₁guiꞌ₅₄ Juɨg₅₄ ꞌLióg₂.
5 Ia₁ ꞌŋio₅ lɨn₃ dse₃ jláꞌ₁ ma₂ca₂rë₃chán₃ ꞌniaꞌ₂ ne₄ guaꞌ₅₄ ꞌuë₃ la₂, ma₂qui₂ma₂quianꞌ₂ ꞌniaꞌ₂ o₂ꞌŋió₃ o₂jŋia₃ dsɨ₅. Ma₂ca₂jme₁ꞌonꞌ₁ ꞌniaꞌ₂ liaꞌ₂ ꞌonꞌ₅₄ ca₁juɨ₅; la₁ já₅ jmɨg₄ ja₁dsiánꞌ₃ ꞌniaꞌ₂ juɨ₁liaꞌ₂ dsan₂ ca₁juɨ₅.
6 ꞌNiaꞌ₂ ma₂qui₂ma₂ꞌliángꞌ₃ ma₂ca₂jme₁dsiangꞌ₂ dsa₂ i₂tsá₃ ꞌe₂ rɨn₂; ¿tsa₁ lɨ́nꞌ₂ ꞌniaꞌ₂ jŋiaꞌ₅₄ dsa₂ ꞌéi₂ mɨ₃ të₃dsɨ₅₄ ꞌéiꞌ₃ jmɨg₄ jaun₂?a
A₂chan₂ dsa₂ juɨnꞌ₂ dsɨ́₅ lɨ́in₅ caun₂ chi₁jŋia₂₃ a₂jéinꞌ₃ Diú₄ ꞌe₂ ma₂mɨ₃
7 Jaun₂ në́₃, rɨnꞌ₅₄ jniog₄, jmo₄ ꞌniaꞌ₂ juɨnꞌ₂ ꞌauꞌ₂ ca₂liaꞌ₂ ca₂të́₂ jmɨg₄ i₁guanꞌ₂ Te₁guiꞌ₅₄. Juɨ₁liaꞌ₂ jan₂ dsa₂ i₂jmo₅ ta₁ ja₁nau₂ chi₁jŋia₂₃ ráu₃ dse₃ lɨn₃ ta₁ quióꞌ₅, jaun₂ caun₂ jmo₂₃ juɨnꞌ₂ dsɨ́₅ bá₄ chi₁jŋia₂₃ a₂guá₂ le₂ꞌuɨg₅₄ jmɨ́₅ tiá₄, a₂të₅₄ jein₂ jmɨ́₅ në́₃.
8 Le₂në₅ bá₄ ꞌniaꞌ₂ ján₃, jmo₄ ꞌniaꞌ₂ juɨnꞌ₂ ꞌauꞌ₂, caun₂ ꞌéi₂ ꞌniaꞌ₂ ꞌauꞌ₂, ia₁ ja₂quián₃ bá₄ jmɨg₄ a₂guanꞌ₂ Te₁guiꞌ₅₄.
9 Rɨnꞌ₅₄ jniog₄, tsá₃ ma₃o₁le₅₄ ꞌauꞌ₂ ꞌniaꞌ₂ juaꞌ₅₄ a₂caun₂ qui₁ꞌnɨ́ꞌ₄ guë́₄ ꞌniaꞌ₂ rɨ́ngꞌ₂ le₂jangꞌ₂ le₂jangꞌ₂, ia₁jaun₂ bá₄ tsá₃ të₃dsɨ₅₄ ꞌéiꞌ₃ ja₁conꞌ₂ ꞌniaꞌ₂ guiongꞌ₅₄. Ia₁ juë́₄ i₂qui₃dsɨ₅ ꞌéiꞌ₃ në₂jag₄ i₂ma₂chénꞌ₅ o₄ꞌné₄ bá₄ ꞌéi₂.
10 ꞌNiaꞌ₂ rɨnꞌ₅₄ jniog₄, quian₂ ꞌniaꞌ₂ juɨ₅ juɨ₁liaꞌ₂ juɨ₅ a₂ca₂can₃ dsa₂ i₂ca₂ꞌë́₂ jág₁ quián₅ Te₁guiꞌ₅₄ ma₂lɨ́gꞌ₂. Ca₂rë₃juɨ́nꞌ₃ dsɨ́₅ ne₄ ca₂le₃jë́₃ jmɨ₁uɨg₅ a₂ca₂i₃ŋɨ́i₂.
11 Jag₄ jaun₂, jmo₂ jniog₄ dsɨ₅, ꞌe₂ guë́₄ dsen₃ dsa₂ i₂ca₂nau₂ tiá₂ ꞌéi₂. Ján₃ bá₄ ŋiꞌ₅₄ ꞌniaꞌ₂ ꞌa₂ liaꞌ₂ ca₂rë₃juɨ́nꞌ₃ dsɨ́₅ Job, ca₂nau₂ tiá₂, tonꞌ₂ ŋiꞌ₅₄ bá₄ ꞌniaꞌ₂ ján₃ ꞌa₂ liaꞌ₂ ca₂jme₃guꞌ₅₄ táng₃ Te₁guiꞌ₅₄ quióꞌ₅ ꞌéi₂ jë₁ca₂tóꞌ₂. Ia₁ le₂në₅ bá₄ jauꞌ₂ ꞌí₁ i₂ꞌua₁ dsɨ́₅ lɨn₃ bá₄ Te₁guiꞌ₅₄, tonꞌ₂ ŋéi₂ dsɨ́₅.
12 Le₂në₅ bá₄, jmo₄ ꞌniaꞌ₂ ne₄ ca₂le₃jë́₃, rɨnꞌ₅₄ jniog₄, juɨ₁liaꞌ₂ jme₁dsiaꞌ₂ ꞌniaꞌ₂ jág₁, tsá₃ lë₁ꞌë₂ ꞌniaꞌ₂ gueiꞌ₅₄ i₂juɨ́g₃, on₃ guëꞌ₂ ꞌë₂ ꞌniaꞌ₂ guaꞌ₅₄ ꞌuë₃, on₃ guëꞌ₂ ꞌi₁caun₂ cosa siáꞌ₂ a₂lë₁ꞌë́ꞌ₁ ꞌniaꞌ₂ juaꞌ₅₄ a₂ꞌɨ́ngꞌ₄ Diú₄. Jë₁ma₂të́₂ rë₁dsiáꞌ₁ ꞌniaꞌ₂ jág₁, juaꞌ₅₄ ꞌniaꞌ₂ “ján₅”, juɨ₁le₂ti₃ bá₄ “ján₅” jaun₂; ján₃ bá₄ le₂në₅ juɨ₁liaꞌ₂ jme₁juaꞌ₂ ꞌniaꞌ₂ “jan₂ꞌón₄”, juɨ₁le₂ti₃ bá₄ “jan₂ꞌón₄” jaun₂, ia₁jaun₂ tsá₃ të₃dsɨ₅₄ ꞌéiꞌ₃ ja₁conꞌ₂ ꞌniaꞌ₂.
13 Në₁juaꞌ₂ ꞌein₂ ꞌniaꞌ₂ chan₂ o₂i₁ dsɨ₅, juɨ₁chi₂lénꞌ₂ ne₄ Diú₄. Në₁juaꞌ₂ ꞌein₂ guëꞌ₂ chan₂ i₂ꞌei₅ dse₃ dsɨ́₅, juɨ₁ꞌë₁₂ son₅₄ a₂rë₂juɨnꞌ₂ Diú₄.
14 Në₁juaꞌ₂ chan₂ ꞌein₂ i₂dsoꞌ₅₄, ca₂tɨ́in₂ të́ꞌ₂ dsa₂ canꞌ₅₄ quián₅ guáꞌ₅,b ia₁jaun₂ chi₃lénꞌ₂ ꞌéi₂ Diú₄ ne₄ quióꞌ₅, jaun₂ tsáng₂ noꞌ₅₄ liaꞌ₂ conꞌ₂ lë́₅ ꞌéiꞌ₃ quióꞌ₅ Te₁guiꞌ₅₄.
15 Ia₁ jë₁chi₂lénꞌ₂ dsa₂ Diú₄ a₂ꞌéin₂ të₃dsónꞌ₂, ꞌlión₂ dsa₂ dsoꞌ₅₄; chóꞌ₂ bá₄ Te₁guiꞌ₅₄. Në₁juaꞌ₂ ꞌe₂ dso₄ ma₂táinꞌ₂ në́₃, ꞌén₂ bá₄ dsáu₁.
16 Jaun₂ lë₃, jme₁jnia₅ ꞌniaꞌ₂ ne₄ rɨ́ngꞌ₂ ꞌe₂ ma₂qui₂ma₂ꞌlianꞌ₂ ꞌniaꞌ₂, ján₃ guëꞌ₂ chi₂lenꞌ₄ ꞌniaꞌ₂ Diú₄ o₄quióꞌ₄ rɨ́ngꞌ₂ le₂jangꞌ₂ le₂jangꞌ₂ ia₁jaun₂ ꞌliónꞌ₂ ꞌniaꞌ₂. Ia₁ juɨ₁liaꞌ₂ dsa₂ i₂tión₂ rë₂ ne₄ Diú₄, ꞌio₅ bí₂ jág₁ quióꞌ₅ ꞌe₂ caun₂ a₂mɨ₂₃ ne₄ Diú₄.
17 Elías jme₁lɨ́n₄ jan₂ dsa₂ liaꞌ₂ lág₅ jniog₄; jme₁ca₂mɨ₃ jë₄ chi₂léinꞌ₂ Diú₄ a₂co₂ŋeiꞌ₅₄ tsá₃ ma₃téin₃ jmɨ́₅, jaun₂ ꞌnɨ₅ ŋi₂ të₂ ca₂dsio₄ tsá₃ ma₃jmɨ́₅ ca₂tang₂ ne₄ guaꞌ₅₄ ꞌuë₃.
18 Cang₂ jaun₂, ca₂mɨ₃ táng₃ ne₄ Diú₄, jaun₂ ca₂tang₂ táng₃ jmɨ́₅, ca₂rau₂ táng₃ ne₄ guaꞌ₅₄ ꞌuë₃.
19 ꞌNiaꞌ₂ rɨnꞌ₅₄ jniog₄, në₁juaꞌ₂ chan₂ ꞌniaꞌ₂ i₂dsɨ₂cónꞌ₅ dsɨ́₅ juɨ₅ dsau₅, në₁juaꞌ₂ jan₂ guëꞌ₂ i₂ca₂jéinꞌ₂ táng₃,
20 dsá₂ ꞌauꞌ₂ ꞌniaꞌ₂ jmo₄ a₂la₂: juɨ₁ꞌein₂ guë́₃ i₂jénꞌ₂ jan₂ dsa₂ i₂rë₂cánꞌ₄ dso₄ juɨ₅ ꞌlɨgꞌ₅₄ a₂jme₁ma₂ŋó₅, lióin₂ jme₂dsí₂ quióꞌ₅ ꞌéi₂ ne₄ ꞌmú₃, jaun₂ le₂në₅ jlë́₂ ꞌlióng₂ dso₄ dsɨ₂ꞌén₂ në́₃.
Co₂në₅.