ꞌA₂ liaꞌ₂ jmo₃ a₂të₅ dsɨ́₅ Diú₄
13
Tsá₃ lë₁tí₅ ꞌniaꞌ₂ a₂ꞌniógꞌ₃ le₂jangꞌ₂ le₂jangꞌ₂ juɨ₁liaꞌ₂ rɨ́ngꞌ₂ ꞌniaꞌ₂.
2 Tsá₃ juɨ₁dsi₂ꞌén₂ ꞌauꞌ₂ ꞌniaꞌ₂ a₂guéngꞌ₄ dsi₂néi₂ quiángꞌ₂ juɨ₁liaꞌ₂ dsa₂ i₂chan₂ ja₁siáꞌ₂, ia₁ le₂në₅ bá₄ ma₂jmo₃ i₂lɨn₅₄ ma₂ca₂guein₃ ángeles të₃ tsá₃ líꞌ₄.
3 Dsauꞌ₂ ꞌauꞌ₂ ꞌniaꞌ₂ jmo₄, juɨ₁liaꞌ₂ dsa₂ i₂tionꞌ₅₄ néꞌ₃ ꞌmá₃, në₂jag₄ bá₄ a₂tionꞌ₅₄ ꞌniaꞌ₂ guiongꞌ₅₄ co₂lë₅ quiainꞌ₅₄. ꞌNioꞌ₂ ꞌauꞌ₂ juɨ₁liaꞌ₂ i₂ŋɨ́₄ lë₃ qui₂ma₂jmógꞌ₂ dsa₂, ia₁ ján₃ bá₄ dsa₂ chi₁dsánꞌ₃ bá₄ ꞌniaꞌ₂ i₂lé₂ le₃ŋág₃ uɨg₅.
4 Juɨ₁jme₂góꞌ₃ bá₄ le₃jɨ́n₃ juɨ₁liaꞌ₂ a₂jénꞌ₂ dsa₂ gu₂, ján₃ bá₄ juɨ₁le₅₄ bá₄ ꞌí₁ juɨ₁liaꞌ₂ ja₁tianꞌ₃ dsɨ₂i₂gu₂ co₂lë₅, ia₁ qui₃dsɨ₅ bá₄ Diú₄ ꞌéiꞌ₃ ja₁con₂ dsa₂ i₂qui₂ꞌno₅ dso₄, juɨ₁liaꞌ₂ i₂nióꞌ₅ jág₁ quianꞌ₅₄ i₂siánꞌ₂ on₃juaꞌ₅₄ dsɨ₂i₂gu₂.
5 Tsá₃ juɨ₁chanꞌ₂ ꞌniaꞌ₂ a₂qui₂chi₁ꞌŋegꞌ₁ ꞌniaꞌ₂ juaꞌ₅₄ a₂ŋɨ́₄ lë₃ ꞌɨ́n₅ ꞌauꞌ₂ ꞌniaꞌ₂ cu₄. Dsáu₅ ꞌauꞌ₂ ꞌniaꞌ₂ jmo₄ liaꞌ₂ conꞌ₂ tí₅ a₂cha₂ quiánꞌ₂ ꞌniaꞌ₂, ia₁ ma₂ca₂juáꞌ₂ Diú₄:
liaꞌ₂ o₁lɨ́gꞌ₂ jmɨg₄ tsá₃ tón₂ jniá₂ ꞌniaꞌ₂,
on₃ guëꞌ₂ tén₄ jniá₂ ꞌniaꞌ₂.a
6 Jaun₂ në́₃ lé₂ le₃juaꞌ₅₄ a₂ma₂ꞌei₅ caun₂ dsɨ₅:
Te₁guiꞌ₅₄ bá₄ i₂jme₂ꞌo₅₄ jniá₂;
tsá₃ gó₅ juɨ₁liaꞌ₂ ꞌe₂ lé₂ le₃jmógꞌ₂
dsa₂ mɨ₂güɨ́g₃.b
7 Dsá₂ ꞌauꞌ₂ ꞌniaꞌ₂ jmo₄, juɨ₁liaꞌ₂ dsa₂ i₂ma₂jiog₃ ne₄ juɨ₅, i₂ma₂juáꞌ₂ jág₁ quióꞌ₅ Diú₄ ca₂tsɨ́ꞌ₃ ꞌniaꞌ₂. Quion₄ ꞌniaꞌ₂ ꞌí₁ ꞌa₂ liaꞌ₂ lë́₅ ca₂dsióg₃ juɨ₅ a₂chan₂ dsa₂ ꞌéi₂, jaun₂ ꞌénꞌ₄ ꞌniaꞌ₂ juɨ₅ jaun₂ juɨ₁liaꞌ₂ ꞌén₂ ꞌéi₂.
8 Liaꞌ₂ ma₂lɨ́n₅ jaun₂ bá₄ Jesucristo, dsióg₂, jmɨg₄ në₃, liaꞌ₂ conꞌ₂ tan₅₄ bá₄ lɨ́in₅.
9 Tsá₃ lë₁cuë₂ ꞌniaꞌ₂ jmɨg₄ juaꞌ₅₄ jiog₃ i₂siánꞌ₂ i₂jme₂tag₅ ꞌlióng₂ ne₅₄ juáꞌ₅ siáꞌ₂, a₂tsá₃ lë́₅ conꞌ₂ lë́₅ juáꞌ₂ jág₁ quióꞌ₅ Diú₄. Co₂ŋeiꞌ₅₄ guë́₄ dse₃ a₂gue₃ të₂dsɨ₅ jniog₄ juɨ₅bí₂ të₂le₃ quianꞌ₅₄ a₂ꞌua₁ dsɨ́₅ Diú₄, conꞌ₂ guë́₄ të₂le₃ quianꞌ₅₄ ꞌéiꞌ₃ juɨ₁liaꞌ₂ ꞌa₂ liaꞌ₂ ꞌnióꞌ₅ guë́ꞌ₃ dsa₂. Ia₁ tsá₃ ta₁ tí₄ ꞌéiꞌ₃ jaun₂ juaꞌ₅₄ a₂jme₃ꞌo₅₄ quióꞌ₅ juɨ₁liaꞌ₂ dsa₂ i₂i₂nio₄ le₂jaun₂.
10 La₁ia₁ cha₂ bá₄ caun₂ ne₄chei₂ quián₂ jniog₄ ja₁tsá₃ ca₂tɨ́n₂ guë́ꞌ₃ juɨ₁liaꞌ₂ i₂jme₂ti₃ ta₁ guáꞌ₅ tabernáculo*.
11 Ia₁ ne₄ bá₄ jniog₄, a₂dsɨ₂can₅ jme₂dsa₂ dsen₅₄ jmɨ₄ jáꞌ₂ dsi₂néi₂ ja₁jŋió₅ lɨn₃ guë́₄, a₂jénꞌ₄ o₄quióꞌ₄ dsáu₁ dsa₂. La₁ia₁ nɨ₁ŋɨ₄ jáꞌ₂ ꞌéi₂ qui₂dsɨ́ꞌ₂ dsa₂ ꞌnɨꞌ₂ ja₁tiánꞌ₄ dsa₂ juɨg₂ Israel*.
12 Ján₃ bá₄ le₂jaun₂ ca₂ŋág₃ Jesús uɨg₅ ꞌnɨꞌ₂ juɨg₂, ia₁jaun₂ qui₂jme₃jŋió₃ dsa₂ juɨg₂ quiáin₅ të₂le₃ quianꞌ₅₄ jmɨ₄ ꞌŋiog₅.
13 Dsɨ₁náu₄ jniog₄ jaun₂ në́₃ ja₁con₂ Jesús, co₂ꞌnióꞌ₄ cau₅ ja₁tión₂ dsa₂ juɨg₂ Israel, a₂quian₂ jniog₄ o₂guíꞌ₃ o₄quióꞌ₄ Jesús.
14 Ia₁ mɨ₂güɨ́g₃ la₂, ꞌi₁caun₂ juɨg₂ tsá₃ cha₂ quián₂ jniog₄ juaꞌ₅₄ a₂jiog₅ co₂tan₅₄, la₁ a₂jaun₂ bá₄ ꞌniogꞌ₂ jniog₄ ciudad jaun₂ a₂në₃ guë́₄ jiá₃.
15 Të₂le₃ quianꞌ₅₄ Jesucristo jaun₂ në́₃, ma₃ jme₁juɨnꞌ₂ jniog₄ Diú₄ co₂tan₅₄, co₂ꞌnióꞌ₄ a₂jenꞌ₄ jniog₄ ne₄ ꞌéi₂ jág₁ a₂ꞌuëꞌ₂ mɨ₂ꞌo₄ jniog₄ conꞌ₂ dsi₂ten₅₄ jmo₃ dsa₂ i₂tión₂ le₃quióꞌ₅ ꞌéi₂.
16 Ján₃ bá₄ tsá₃ o₁ló₄ dsɨ₂ꞌén₂ ꞌauꞌ₂ ꞌniaꞌ₂ a₂dse₃ a₂qui₁cuëꞌ₅₄ ꞌniaꞌ₂ ca₂la₂ rɨ́ngꞌ₂, ꞌe₂ a₂cha₂ quiángꞌ₂. Ia₁ juɨ₁liaꞌ₂ a₂jenꞌ₅₄ ꞌniaꞌ₂ le₂jaun₂ bá₄ a₂të₅ dsɨ́₅ Diú₄.
17 Néꞌ₂ ꞌniaꞌ₂ jmo₄ ja₁con₂ juɨ₁liaꞌ₂ i₂quian₅ ne₄ juɨ₅, jme₁gan₃ ꞌniaꞌ₂ ꞌéi₂. Ia₁ jmo₂₃ ꞌí₁ jme₂dsí₂ quiánꞌ₂ ꞌniaꞌ₂, a₂lɨ́in₅ dsa₂ i₂ca₂tɨ́n₂ dsɨ₃jangꞌ₅₄ cuenta ja₁con₂ Diú₄. Juɨ₁le₅₄ bá₄ dse₃ ta₁ a₂niog₅ gu₂ ꞌéi₂ ia₁jaun₂ jmo₃ ꞌioꞌ₂, on₃juaꞌ₅₄ ꞌliaꞌ₂ dsɨ́₅, ia₁ tsá₃ ta₁ tí₄ ja₁conꞌ₂ ꞌniaꞌ₂ në₁juaꞌ₂ le₂jaun₂ ca₂ꞌliaꞌ₂ dsɨ́₅.
18 Chi₁lenꞌ₄ ꞌniaꞌ₂ Diú₄ o₄quián₂ jniaꞌ₅₄, ia₁ caun₂ bá₄ ꞌei₅ dsɨ₅ jniaꞌ₅₄ a₂qui₂le₁jë́₃ jme₂dsí₂ quián₂, ia₁ ꞌniog₂ bá₄ jniaꞌ₅₄ qui₂i₁nio₁ liaꞌ₂ dsi₂ten₅₄ jë₄ ca₂le₃jë́₃.
19 Ja₂lɨn₃ guë́₄ dsen₅₄ mɨ₅ jniá₂ a₂chi₁lenꞌ₄ ꞌniaꞌ₂ Diú₄ ia₁jaun₂ lé₂ nei₅₄ a₂i₁ꞌú₃ táng₃ ja₁conꞌ₂ ꞌniaꞌ₂ ŋiꞌ₅₄ ta₁.
ꞌÁgꞌ₅ jág₁ jë₁ca₂tóꞌ₂, cuɨin₂₃ Diú₄
20 Juɨ₁jmo₅₄ Diú₄ i₂jmo₅ ꞌei₅ tei₄, i₂ca₂tág₃ táng₃ të₂le₃ quianꞌ₅₄ jmɨ₂ a₂lɨꞌ₅₄ jág₁ a₂jiog₅ co₂tan₅₄, ca₂tág₃ Te₁guiꞌ₅₄ Jesucristo quián₂ jniog₄ ja₁jme₁rë₂ꞌlɨin₅₄, dsa₂ juɨnꞌ₂ ꞌéi₂ juɨg₅₄ jáꞌ₂ chaꞌ₂,
21 juɨ₁jmo₅₄ bá₄ Diú₄ juɨ₁jmoiꞌ₅₄ ꞌniaꞌ₂ dsa₂ rë₂ꞌŋia₅ jë₄ ca₂le₃jë́₃ a₂dse₃ ia₁jaun₂ jmóꞌ₂ a₂ꞌŋio₂ dsɨ́₅ ꞌéi₂. Ján₃ bá₄ juɨ₁jmo₅₄ ꞌéi₂ ꞌe₂ ꞌnio₃ jmo₃ quianꞌ₅₄ ca₂le₃jág₃ jniog₄ të₂le₃ quianꞌ₅₄ Jesucristo. Juɨ₁le₂juɨnꞌ₂ bá₄ ꞌéi₂ liaꞌ₂ co₂tan₅₄. A₂méi₃.
22 Rɨnꞌ₅₄ jniog₄, mɨ₅ jniá₂ quiánꞌ₂ ꞌniaꞌ₂, jmo₄ bá₄ ꞌniaꞌ₂ juɨnꞌ₂ ꞌauꞌ₂ quianꞌ₅₄ jág₁ dse₃ la₂ a₂chi₁lenꞌ₄ jniá₂ ꞌniaꞌ₂, ia₁ tsá₃ juaꞌ₅₄ ŋɨ́₄ lë₃ ꞌlióng₂ jág₁ ma₂në₂táun₂ jniá₂ ne₄ si₂.
23 Juɨ₁le₂ŋiꞌ₅₄ ꞌniaꞌ₂ jág₁ juɨ₁liaꞌ₂ rɨnꞌ₅₄ jniog₄ Timoteo: ma₂dsei₅ bá₄ dsa₂ néꞌ₃ ꞌmá₃. Në₁juaꞌ₂ ca₂guáin₂ ŋiꞌ₅₄ ta₁, jaun₂ jain₅₄ jniá₂ jë₁ma₂të́₂ rë₁nei₅₄ jniá₂ i₁jɨng₁₂ ꞌniaꞌ₂.
24 Cuɨn₅₄ ꞌniaꞌ₂ Diú₄ ca₂le₃jɨ́n₃ juɨ₁liaꞌ₂ i₂jiog₅ quiánꞌ₂ ꞌniaꞌ₂, quianꞌ₅₄ ca₂le₃jɨ́n₃ guëꞌ₂ dsa₂ juɨg₂ quián₅ Diú₄.c Rɨnꞌ₅₄ jniog₄ i₂chan₂ Italia cuɨin₂₃ Diú₄ ꞌniaꞌ₂.
25 Juɨ₁jme₂guꞌ₅₄ bá₄ Diú₄ ca₂le₃jɨ́nꞌ₃ ꞌniaꞌ₂. A₂méi₃*.d
Co₂në₅.