2 Jaun₂ në́₃, né₄ jniog₄ Jesús, i₂ca₂niá₃ juɨ₅ a₂ꞌéin₂ jniog₄, ján₃ bá₄ i₂jme₂ꞌŋia₅ a₂ꞌéin₂ jniog₄. Ca₂jmo₃ ꞌéi₂ tióꞌ₃ dsɨ́₅ ne₄ cróg₄, tsá₃ ca₂tónꞌ₃ juɨ₅ a₂o₂guíꞌ₃ a₂ca₂can₃, ia₁ jme₁ma₂ŋi₅ bá₄ a₂cán₂ o₂ꞌŋió₃ dsɨ́₅ a₂ꞌioꞌ₂ jénꞌ₅ cang₂ guë́₄ jaun₂. Jaun₂ në́₃, ca₂guá₂ të₂le₃ gu₂ ne₁ ne₄ta₁ quióꞌ₅ Diú₄.

3 ꞌNióꞌ₂ ꞌniaꞌ₂ ꞌauꞌ₂ jaun₂, ꞌa₂ liaꞌ₂ ca₂jmo₃ Jesús: ca₂jmo₃ tióꞌ₃ dsɨ́₅ mɨꞌ₅₄ a₂ca₂dsia₃ dsa₂ i₂qui₂rë₂cánꞌ₄ dso₄, ja₁coin₂, ia₁ conꞌ₂ tsá₃ ŋó₅ në₁juaꞌ₂ ca₂ꞌongꞌ₃ ꞌniaꞌ₂, ca₂liaꞌ₂ ca₂ꞌuángꞌ₂.

4 Ia₁ tsá₃ guë́₄ ꞌein₂ ma₂qui₂ca₂quɨ́nꞌ₂ ꞌniaꞌ₂ ca₂liaꞌ₂ ca₂tang₂ jmɨ₂ ꞌanꞌ₅₄ ꞌniaꞌ₂ quianꞌ₅₄ mɨꞌ₅₄ a₂jmoꞌ₂ quianꞌ₅₄ dsáu₁.

5 Jaun₂ ma₂ca₂ꞌen₃ bá₄ ꞌauꞌ₂ ꞌniaꞌ₂ jág₁ a₂ma₂chi₂ca₂léiꞌ₁ Diú₄ juɨ₁liaꞌ₂ jan₂ chiꞌ₂-guein₂ quiáin₅. Le₂la₂ juáꞌ₂ ne₄ Si₂:

7 Tiangꞌ₃ ꞌniaꞌ₂ jmo₄ ca₂le₃jë́₃ uɨg₅ a₂ŋagꞌ₅₄, ia₁ le₂jaun₂ jme₂tag₅ Diú₄ jme₂tɨin₂₃ ꞌniaꞌ₂ juɨ₁liaꞌ₂ jan₂ chiꞌ₂-guein₂ quiáin₅. ¿ꞌEin₂ bá₄ ja₁ŋiꞌ₅₄ chan₂ i₂tsá₃ jme₂tag₅ jmei₂?

8 Cheiꞌ₅ Diú₄ caun₂ juɨ₅ rë₂ cheinꞌ₂₃ ca₂le₃jɨ́n₃ chiꞌ₂-guein₂ quiáin₅. Jaun₂ në́₃, juaꞌ₅₄ meiꞌ₂ guë́₃ Diú₄ tsá₃ cheinꞌ₂₃ ꞌniaꞌ₂ caun₂ juɨ₅ dse₃, tsá₃ lé₂ le₃juaꞌ₅₄ a₂lɨ́nꞌ₅ ꞌniaꞌ₂ chiꞌ₂-guein₂ quiáin₅ të₃dsónꞌ₂, jŋiaꞌ₅₄ liaꞌ₂ a₂jaun₂ bá₄ lɨ́nꞌ₅ ꞌniaꞌ₂ juɨ₁liaꞌ₂ jan₂ chiꞌ₂-guein₂ i₂lë₁ca₂rë₃chán₃.

9 Ján₃ bá₄ le₂jaun₂ jniog₄ në́₃, liaꞌ₂ conꞌ₂ jme₁lág₄ jniog₄ guein₂, jme₁të₂jí₂ chog₅₄-jmei₂ jniog₄ i₂chan₂ guaꞌ₅₄ ꞌuë₃. Jaun₂ jme₁jme₂gain₃ bá₄ jniog₄ në́₃. ¿Tsa₁ dse₃ néi₁ jniog₄ gau₂ ja₁con₂ Diú₄? Të₂le₃ ꞌë₂ guë́₄ ꞌnióꞌ₅ jme₁gan₃ bá₄ jniog₄ Diú₄ Jmei₂ jniog₄ të₂le₃ quióꞌ₅ jme₂dsí₂, ia₁jaun₂ le₂në₅ bá₄ le₃chong₂.

10 Jme₁ca₂cuë₃ ca₂tiá₂ uɨg₅ chog₅₄-jmei₂ jniog₄ i₂chan₂ guaꞌ₅₄ ꞌuë₃, liaꞌ₂ conꞌ₂ lë́₅ ca₂i₃jiog₅ dsɨ́₅ a₂dse₃. La₁ia₁ Diú₄ në́₃ cuë₂₃ jniog₄ uɨg₅ a₂dse₃ quián₂ jniog₄ guio₅₄, ia₁jaun₂ queinꞌ₅₄ jniog₄ a₂jŋió₅ a₂lɨ́n₅ ꞌéi₂.

11 Dsónꞌ₂ bá₄ jaun₂, liaꞌ₂ ꞌi₁caun₂ uɨg₅ tsá₃ të₅ dsɨ₅ jniog₄, të₂le₃ ꞌŋio₅ uɨg₅ bá₄ lág₂ jniog₄. La₁ia₁ cang₂ guë́₄ jaun₂, juɨ₁liaꞌ₂ i₂rë₂tɨn₂ të₂le₃ quianꞌ₅₄ uɨg₅ a₂ŋág₅, në₂jag₄ bá₄ caun₂ nɨ₁ꞌma₂ a₂le₁ꞌág₄ mɨ́g₂ dse₃, léi₄ bá₄ rë₂jniá₂ të₂le₃ ꞌa₂ liaꞌ₂ dse₃ chain₂ ꞌei₅ tei₄ dsɨ́₅.

12 ꞌUɨg₅₄ jaun₂ chogꞌ₅₄ ꞌniaꞌ₂ táng₃ gogꞌ₂ a₂qui₂le₁taꞌ₅₄, ján₃ bá₄ chíꞌ₁ táng₃ ꞌniaꞌ₂ tiá₂ mɨ₂jneꞌ₅₄ a₂jlen₅.

13 “Jmo₄ ꞌniaꞌ₂ caun₂ juɨ₅ dsau₅ quióꞌ₅ mɨ₂tagꞌ₅₄ guiongꞌ₅₄,”^b ia₁jaun₂ tsá₃ ꞌe₂ qui₃nió₃ i₂siánꞌ₂ juɨ₁liaꞌ₂ i₂guianꞌ₅₄, të₂le₃ ꞌlóin₂ bá₄.

14 Quenꞌ₂ ꞌniaꞌ₂ bí₂ a₂i₁nioꞌ₄ ꞌniaꞌ₂ ꞌei₅ tei₄ quianꞌ₅₄ ca₂le₃jɨ́n₃, a₂le₃chanꞌ₂ ꞌniaꞌ₂ jŋió₅ në́₃. Ia₁ ca₂liaꞌ₂ ꞌi₁jan₂ tsá₃ lé₂ le₃jɨ́n₃ Te₁guiꞌ₅₄ në₁juaꞌ₂ tsá₃ jŋiói₅.

15 Quion₂ ꞌniaꞌ₂ ꞌí₁ ia₁jaun₂ ca₂liaꞌ₂ ꞌi₁jan₂ juaꞌ₅₄ a₂tsá₃ tɨin₃ a₂jme₃guꞌ₅₄ Diú₄ a₂ꞌua₁ dsɨ́₅, ia₁jaun₂ tsá₃ ꞌiá₃ jɨnꞌ₄ ꞌniaꞌ₂ co₂ꞌnióꞌ₄ caun₂ tsɨn₅ nɨ₁nau₂ dsiꞌ₃ jmo₅ jan₂ i₂quian₅ o₂meꞌ₅₄ dsɨ₅ jmo₅ dain₅₄ a₂rë₂ꞌlɨnꞌ₅₄ juɨn₅.

16 Jmo₄ ꞌniaꞌ₂ ꞌí₁ ia₁jaun₂ tsá₃ ꞌein₂ ꞌniaꞌ₂ i₃nio₄ liaꞌ₂ conꞌ₂ lë́₅ mɨ₅ nɨ₁ŋɨ₁₂, on₃ guëꞌ₂ i₃nioi₅₄ juaꞌ₅₄ a₂tsá₃ tónꞌ₂ juɨ₅ jág₁ quióꞌ₅ Diú₄. Le₂në₅ bá₄ ca₂jmo₃ Esaú.^c O₄quióꞌ₄ caun₂ má₃ bá₄ ca₂ꞌnag₃ ca₂le₃jë́₃ a₂jme₁ca₂tɨ́in₂ a₂lɨ́in₅ chiꞌ₂ dsa₂ ŋeꞌ₂ i₂ne₅₄.

17 Ma₂ŋiꞌ₅₄ bá₄ ꞌniaꞌ₂, cang₂ guë́₄ jaun₂ liaꞌ₂ conꞌ₂ jme₁ꞌnio₃ táng₃ Esaú gue₃ a₂jme₁ca₂tɨ́in₂, a₂jme₃guꞌ₅₄ jmei₂, tsá₃ ca₂guéiꞌ₂ jmei₂. Jaun₂ në́₃, tsá₃ ma₃ca₂dsóꞌ₂ ꞌa₂ liaꞌ₂ tɨ́inꞌ₄ táng₃ juɨ₁liaꞌ₂ a₂jme₁ca₂tɨ́in₂, o₁jŋiaꞌ₅₄ ca₂ꞌnáuꞌ₃ ꞌŋio₅ lɨn₃ ca₂le₃jë́₃ ca₂ꞌo₃.

18 Quion₂ ꞌniaꞌ₂ ꞌí₁ jaun₂ në́₃, ia₁ on₃juaꞌ₅₄ a₂ma₂ca₂jme₁quiánꞌ₄ ꞌniaꞌ₂ máꞌ₂ ŋei₅ jaun₂ a₂jniá₂, a₂cau₂ quianꞌ₅₄ si₂, ja₁lë́₄ qui₁néꞌ₃ ꞌei₅ nei₂, dsí₂ në́₃, qui₃lë́₂ gau₂ ꞌŋio₅ lɨn₃.

19 On₃ guëꞌ₂ ca₂neiꞌ₂ ꞌniaꞌ₂ a₂i₂ꞌein₅₄ ŋí₁ trompeta, on₃ guëꞌ₂ jág₁ quióꞌ₅ Diú₄ a₂juáꞌ₂ jág₁ gau₂ tsɨ́ꞌ₅ dsa₂ ꞌéi₂, ca₂liaꞌ₂ i₂ca₂nág₂ jág₁ jaun₂ ca₂mɨ₃ a₂tsá₃ ma₂juáꞌ₂ ꞌéi₂ jág₁.

20 Ia₁ tsá₃ jme₁tióꞌ₅ nag₃ ꞌéiꞌ₃ quióꞌ₅ Diú₄ a₂juáꞌ₂: “Në₁juaꞌ₂ jan₂ jáꞌ₂ ca₂ꞌë₃ máꞌ₂ jaun₂, ꞌnióꞌ₅ jóin₂ qui₃dsag₅ dsa₂ cang₄.”^d

21 ꞌUɨg₅₄ ia₁ a₂ŋɨ́₄ lë₃ gau₂ a₂jniá₂ ja₁jaun₂, ca₂liaꞌ₂ ŋiog₅ Moisés ca₂juáꞌ₂, “ꞌŊio₅ lɨn₃ jlen₅ jniá₂ a₂gó₅.”^e

22 La₁ia₁ ꞌniaꞌ₂ në́₃, ma₂ca₂jme₁quiánꞌ₄ Máꞌ₂ Sión, co₂ꞌnióꞌ₄ Jerusalén a₂niog₅ gueiꞌ₅₄ i₂juɨ́g₃, ciudad quióꞌ₅ Diú₄ jénꞌ₃. Ma₂ca₂jme₁quiánꞌ₄ ꞌniaꞌ₂ ja₁con₂ ꞌlióng₂ lɨn₃ mei₅ ángeles i₂ŋɨꞌ₂ jmo₂₃ ꞌioꞌ₂.

23 Ma₂ca₂jme₁quiánꞌ₄ ꞌniaꞌ₂ ja₁con₂ dsa₂ i₂tionꞌ₅₄ loꞌ₂ a₂jme₃juɨinꞌ₂ Diú₄, quianꞌ₅₄ ca₂le₃jɨ́n₃ chiꞌ₂-guein₂ quián₅ Diú₄ i₂ca₂tɨ́n₂ ca₂le₃jë́₃ liaꞌ₂ jë₁ca₂tɨ́n₂ ja₁ŋiꞌ₅₄ i₂ne₅₄, i₂ma₂qui₂le₁ton₅ gueiꞌ₅₄ i₂juɨ́g₃. Ma₂ca₂jme₁quiánꞌ₄ ꞌniaꞌ₂ ja₁con₂ Diú₄ i₂qui₃dsɨ₅ ꞌéiꞌ₃ quióꞌ₅ ca₂le₃jɨ́n₃, ja₁con₂ jme₂dsí₂ quióꞌ₅ dsa₂ dsen₃ i₂ma₂qui₂le₁ꞌŋia₅,

24 quianꞌ₅₄ ja₁con₂ Jesús i₂chénꞌ₅ ne₄ jág₁ ꞌmɨ́₂ a₂lɨꞌ₅₄ quianꞌ₅₄ Diú₄, quianꞌ₅₄ ja₁con₂ jmɨ₂ a₂rë₃séi₂, a₂quen₅ guë́₄ a₂jángꞌ₅ léi₄ a₂ꞌua₁ dsɨ́₅ conꞌ₂ guë́₄ quen₅ jmɨ₄ Abel.

25 Jmo₄ ꞌniaꞌ₂ ꞌí₁ a₂tsá₃ jmóꞌ₂ ꞌniaꞌ₂ juaꞌ₅₄ tsá₃ guénꞌ₄ ꞌniaꞌ₂ Diú₄ i₂juáꞌ₂ tság₅ jniog₄. Ia₁ chi₂juaꞌ₂ tsá₃ ca₂lón₂ juɨ₁liaꞌ₂ i₂tsá₃ ca₂guénꞌ₂ i₂ꞌéi₂ i₂ca₂ꞌë́₂ jág₁ guaꞌ₅₄ ꞌuë₃ la₂, ꞌë₂ guë́₄ bá₄ jniog₄ tsá₃ lé₂ le₃lió₂, në₁juaꞌ₂ tsá₃ ca₂guén₄ jniog₄ i₂juáꞌ₂ të₂ gueiꞌ₅₄ i₂juɨ́g₃.

26 Jmɨg₄ jaun₂, ca₂i₁bi₅₄ ꞌuë₃ jme₁ca₂juáꞌ₂ Diú₄. La₁ia₁ rë₂në́₃ në́₃, ma₂cuë₃ jág₁ quióꞌ₅, a₂juáꞌ₂: “jmo₅₄ guë́₄ jniá₂ conꞌ₂ siáꞌ₂ a₂dsɨ₃bi₅₄, la₁ia₁ on₃juaꞌ₅₄ jmáꞌ₃ guaꞌ₅₄ ꞌuë₃, le₂jiog₅ gueiꞌ₅₄ dsi₂güɨg₂ bá₄ ján₃.”^f

27 Juɨ₁liaꞌ₂ a₂juáꞌ₂, “conꞌ₂ siáꞌ₂”, dsɨ₂jein₃ jág₁ a₂jŋiáꞌ₂ ca₂le₃jë́₃ a₂jniá₂ a₂dsɨ₂bi₅₄ a₂lé₂ qui₂le₃jŋiaꞌ₃, ia₁jaun₂ të₃gua₄ co₂tan₅₄ a₂tsá₃ lé₂ dsɨ₃bi₅₄, on₃ guëꞌ₂ lé₂ le₃jŋiaꞌ₃.

28 Jaun₂ ꞌuɨg₅₄ ia₁ a₂tsá₃ ma₃lé₂ qui₂dsɨ₃bi₅₄ ja₁gon₂ Diú₄, ja₁cuë₃ jniog₄, jaun₂ cuëꞌ₅₄ jniog₄ ti₁ꞌmagꞌ₄ jaun₂ në́₃, o₄quióꞌ₄ ca₂le₃jë́₃ a₂la₂, jme₁ti₁ jniog₄ ne₄ Diú₄ në́₃ ꞌa₂ liaꞌ₂ ꞌŋio₂ dsɨ́₅, jme₁ꞌnió₄ jniog₄ Diú₄ a₂ꞌei₅ gau₂ dsɨ₅ jniog₄.

29 Ia₁ lɨ́n₅ Diú₄ quián₂ jniog₄ liaꞌ₂ lë́₅ caun₂ si₂ a₂ꞌéin₂ le₃jë́₃.^g