2 Ia₁ le₂në₅ bá₄ ca₂rë₃ꞌén₂ dsa₂ canꞌ₅₄ ma₂lɨ́gꞌ₂, jaun₂ ca₂ꞌag₃ dse₃ Diú₄.

3 Të₂le₃ a₂ꞌéin₂ bá₄ jniog₄, ŋágꞌ₂ jniog₄ a₂ca₂jmo₃ Diú₄ bá₄ mɨ₂güɨ́g₃ të₂le₃ quianꞌ₅₄ jág₁ quióꞌ₅. Jaun₂ lë₃, juɨ₁liaꞌ₂ a₂jniá₂ rë₂në́₃ ca₂lë₃ të₂le₃ quianꞌ₅₄ a₂tsá₃ jme₁rë₂jniá₂.

4 Të₂le₃ a₂ꞌén₂ bá₄ Abel,^a ca₂jénꞌ₃ ne₄ Diú₄ caun₂ a₂dse₃ guë́₄ conꞌ₂ guë́₄ a₂ca₂jénꞌ₃ Caín rɨinꞌ₅₄. ꞌUɨg₅₄ jaun₂ ca₂ꞌag₃ dse₃ Diú₄ co₂ꞌnióꞌ₄ dsa₂ dsen₃, liaꞌ₂ conꞌ₂ jme₁ca₂gue₃ a₂ca₂jénꞌ₃ jaun₂. Jaun₂ në́₃, o₁jŋiaꞌ₅₄ guë́₄ ma₂rë₂jon₅₄ Abel, në₂jag₄ bá₄ a₂caun₂ jángꞌ₅ jág₁ dsau₅ rë₂në́₃, ia₁ a₂ca₂rë₃ꞌéin₂.

5 Të₂le₃ a₂ꞌén₂ bá₄ Enoc,^b ca₂ŋáiꞌ₃ mɨ₂güɨ́g₃ caun₂ të₃ tsá₃ ca₂join₃, tsá₃ ma₂ꞌein₂ ca₂dsáuꞌ₂ quióꞌ₅, ia₁ Diú₄ bá₄ i₂ca₂tág₃ quióꞌ₅. Ne₄ si₂ juáꞌ₂ a₂ca₂ꞌag₃ dse₃ Diú₄ néꞌ₃ guë́₄ a₂të₂, ia₁ liaꞌ₂ conꞌ₂ jme₁chain₂ ca₂jmo₃ a₂ca₂të́₂ dsɨ́₅ Diú₄.

6 La₁ia₁ liaꞌ₂ o₁lɨ́gꞌ₂ jmɨg₄ tsá₃ lé₂ le₃jmo₃ dsa₂ a₂jme₂ꞌŋio₂ dsɨ́₅ Diú₄ në₁juaꞌ₂ tsá₃ ꞌéin₂, ia₁ juɨ₁liaꞌ₂ dsa₂ i₂ꞌnio₃ jme₃quián₃ ja₁con₂ Diú₄, tion₅₄ ꞌnióꞌ₅ le₃ꞌéin₂ deꞌ₂ a₂chan₂ Diú₄, ján₃ bá₄ ꞌnióꞌ₅ le₃ꞌéin₂ a₂quí₅ Diú₄ ꞌlianꞌ₅₄ juɨ₁liaꞌ₂ i₂ꞌnauꞌ₂ a₂dsen₅₄ dsɨ́₅.

7 Të₂le₃ a₂ꞌén₂ bá₄ Noé,^c liaꞌ₂ conꞌ₂ jme₁ca₂jmo₃ Diú₄ jág₁ ꞌe₂ niog₅ lé₂, juɨ₁liaꞌ₂ a₂tsá₃ jniá₂ guë́₄, ca₂tónꞌ₃ bá₄ juɨ₅ a₂ca₂juáꞌ₂ Diú₄, ca₂jmo₃ bá₄ nɨ₁barco ja₁lióin₃ le₂jiog₅ dsa₂ dsi₂néi₂ quiáin₅ në́₃. Jaun₂ le₂në₅ në₂jag₄ bá₄ a₂ca₂qui₃dsɨ₂₃ ꞌéiꞌ₃ ja₁con₂ dsa₂ mɨ₂güɨ́g₃, jaun₂ le₂në₅ bá₄ ca₂tɨ́in₂ a₂lió₂ Diú₄ co₂ꞌnióꞌ₄ dsa₂ dsen₃, të₂le₃ a₂ꞌéin₂ bá₄ ján₃.

8 Të₂le₃ a₂ꞌén₂ Abraham,^d liaꞌ₂ conꞌ₂ jme₁ca₂të₃ Diú₄, ca₂nág₂ bá₄. Ca₂o₃ꞌɨ́in₃ ca₂ꞌí₃ juɨ₅ a₂dsó₃ ja₁juáꞌ₂ Diú₄ cuë₃ caun₂ ꞌuë₃ a₂ca₂tɨ́in₂ lé₂ quióꞌ₅. Ca₂o₃ꞌɨ́in₃ ꞌuë₃ go₅₄ të₃ tsá₃ ŋi₅ a₂jáꞌ₄ ŋó₃.

9 ꞌUɨg₅₄ ia₁ a₂jme₁ꞌéin₂, ca₂guá₂ guaꞌ₅₄ ꞌuë₃ a₂ca₂juáꞌ₂ Diú₄ cuë₃, co₂ꞌnióꞌ₄ a₂lɨ́in₅ dsɨ₂nau₂ jë₄ ꞌuë₃ siáꞌ₂. Ca₂guá₂ tsɨ₁ꞌné₅ a₂lë́₅ quianꞌ₅₄ tsɨ₁ꞌmɨꞌ₂; ján₃ bá₄ le₂jaun₂ ca₂jmo₃ Isaac quiainꞌ₅₄ Jacob në́₃, ia₁ ján₃ bá₄ ca₂tɨ́in₂ le₂jiog₅ quianꞌ₅₄ ꞌéi₂ a₂jme₁ca₂juáꞌ₂ Diú₄ cuë₃.

10 Ia₁ jme₁chi₁jŋia₅ Abraham juɨg₂ ciudad jaun₂ a₂chíꞌ₅ tiá₂, ꞌuɨg₅₄ ia₁ Diú₄ bá₄ i₂ca₂ꞌnáuꞌ₃ dsɨ́₅ jmo₃, ján₃ bá₄ i₂ca₂jmógꞌ₃.

11 Ján₃ bá₄ të₂le₃ a₂ꞌén₂ ꞌŋiog₅ Sara,^e të₃ ma₂gueinꞌ₂ a₂le₃chan₂ guein₂ quiáin₅, ca₂gue₃ bá₄ juɨ₅bí₂ a₂léin₂ chog₅₄ guein₂ ia₁ lɨ́in₂ i₂rë₂tiꞌ₅₄ bá₄ Diú₄ i₂ma₂cuë₃ jág₁ quióꞌ₅.

12 Jaun₂ në́₃ Abraham, o₁jŋiaꞌ₅₄ a₂ma₂i₁jóin₂, ca₂rë₃chán₃ bá₄ guë́₄ tsɨ₁jon₂ i₂juɨn₅ guë́₄ lɨn₃ juɨ₁liaꞌ₂ nei₅ a₂jniá₂ gueiꞌ₅₄ mɨ₂güɨ́g₃, juɨ₁liaꞌ₂ mɨ₂tsag₄ a₂cha₂ cheiꞌ₅₄ jmɨ₁ŋíꞌ₄ a₂tsá₃ lé₂ le₃ꞌɨ₃ dsa₂.

13 Ca₂dsan₃ bá₄ le₃jɨ́n₃ ꞌéi₂ të₃ tsá₃ ca₂gue₃ juɨ₁liaꞌ₂ a₂jme₁ca₂juáꞌ₂ Diú₄ cuë₃. La₁ia₁ jme₁ꞌéin₂ bá₄, jaun₂ në₂jag₄ bá₄ a₂ca₂jág₃ të₂ uɨ́ng₂ a₂jaun₂ a₂ꞌéin₂, të₅ bá₄ dsɨ́₅ a₂ca₂jág₃. Jaun₂ le₂në₅ bá₄ ca₂jmo₃ jág₁ a₂lɨ́in₅ dsɨ₂nau₂ i₂conꞌ₂ ca₂ŋɨ₅ mɨ₂güɨ́g₃ la₂.

14 Jaun₂ juɨ₁liaꞌ₂ i₂dsia₅ jág₁ le₂në₅, jángꞌ₅ léi₄ a₂i₂nioi₅₄ bá₄ guë́₄ a₂qui₂ꞌnoꞌ₂ caun₂ juɨg₂ jë₁tiainꞌ₃.

15 Juaꞌ₅₄ meiꞌ₂ guë́₃ caun₂ qui₂dsauꞌ₂ bá₄ guë́₄ dsɨ́₅ guaꞌ₅₄ ꞌuë₃ ja₁ca₂ꞌuɨin₂, jme₁lé₂ bá₄ jme₁dsɨ₂lein₃ táng₃ ja₁jaun₂.

16 La₁ të₂le₃ jme₁ꞌɨ́n₂ dsɨ́₅ caun₂ ꞌuë₃ a₂dse₃ guë́₄, co₂ꞌnióꞌ₄ a₂ꞌë₂₃ ꞌuë₃ a₂cha₂ gueiꞌ₅₄ i₂juɨ́g₃. ꞌUɨg₅₄ jaun₂ tsá₃ o₂guíꞌ₃ cán₂ Diú₄ a₂quiong₅ dsa₂ Diú₄ quián₅ dsa₂ ꞌéi₂, ia₁ ma₂ca₂jmo₃ co₂jŋia₅₄ caun₂ juɨg₂ ciudad quióꞌ₅ ꞌéi₂.

17 Të₂le₃ a₂ꞌén₂ bá₄ Abraham, liaꞌ₂ conꞌ₂ jme₁ca₂caun₃ Diú₄ táu₂, ca₂jéinꞌ₂ bá₄ Isaac^f quiáin₅, ne₄ Diú₄. Jme₁ma₂chéinꞌ₅ co₂jŋia₅₄ a₂jme₁jŋɨiꞌ₃ ja₁ŋiꞌ₅₄ i₂jan₂ tan₅₄ quiáin₅,

18 o₁jŋiaꞌ₅₄ jme₁ca₂juáꞌ₂ Diú₄ cuag₃ a₂ca₂juáꞌ₂: “Të₂le₃ quianꞌ₅₄ Isaac le₃chan₂ tsɨ₁jon₂ quiángꞌ₂.”^g

19 Ca₂i₃jiog₅ dsɨ́₅ Abraham, a₂ꞌio₅ Diú₄ juɨ₅bí₂ a₂jme₃jeinꞌ₅₄ le₂jiog₅ jɨn₄ ꞌlag₄. Jaun₂ dsónꞌ₂ bá₄ ca₂guéinꞌ₂ táng₃ ja₁ŋiꞌ₅₄, në₂jag₄ bá₄ a₂ca₂jeinꞌ₅₄ táng₃ jɨn₄ ꞌlag₄.

20 Të₂le₃ a₂ꞌén₂ Isaac, ca₂jme₃guꞌ₅₄ quióꞌ₅ Jacob quiainꞌ₅₄ Esaú, ca₂cuë₃ jág₁ quióꞌ₅ a₂cuë₃ Diú₄ a₂dse₃ të₂le₃ ne₄ juɨ₅ jmɨg₄ a₂le₃chain₂.^h

21 Ján₃ bá₄ të₂le₃ a₂ꞌén₂ Jacob,ⁱ jme₁ma₂ja₂quián₃ jóin₂, ca₂jme₃guꞌ₅₄ quióꞌ₅ le₂jan₂ le₂jan₂ chiꞌ₂ ja₁ŋiꞌ₅₄ José. Jaun₂ ca₂jme₃juɨinꞌ₂ Diú₄, a₂chéinꞌ₅ rë₂dsɨ́in₂ ne₄ ꞌma₂ꞌɨ₅₄ quióꞌ₅.

22 Të₂le₃ a₂ꞌén₂ José,^j liaꞌ₂ conꞌ₂ jme₁ma₂ja₂quián₃ jóin₂, ca₂juáꞌ₂ ca₂ꞌɨin₃ dsa₂ juɨg₂ Israelitas* a₂ꞌuɨ́in₃ cang₂ guë́₄ jaun₂ ꞌuë₃ Egipto, jaun₂ ca₂quiog₂ ꞌéiꞌ₃ ꞌe₂ ꞌnióꞌ₅ jmo₃ dsa₂ quianꞌ₅₄ nɨ₁mu₁₂.

23 Të₂le₃ a₂ꞌén₂ bá₄ chog₅₄-jmei₂ Moisés, jme₁ca₂rë₃chán₃ ꞌéi₂, ca₂ꞌmog₃ conꞌ₂ ꞌnɨ₅ tsɨꞌ₂. Ia₁ ca₂jág₃ a₂ꞌŋioꞌ₂ guein₂ ꞌéi₂, tsá₃ juaꞌ₅₄ ca₂ja₃góꞌ₃ ꞌa₂ liaꞌ₂ lë́₅ ꞌéiꞌ₃ quióꞌ₅ rag₅₄ a₂jŋagꞌ₃ quióꞌ₅.^k

24 Të₂le₃ a₂ꞌén₂ bá₄ Moisés,^l liaꞌ₂ con₂ jme₁ma₂lɨ́in₅ dsa₂ ma₂juɨnꞌ₂, tsá₃ ca₂gue₃ quiong₃ dsa₂ ja₁ŋiꞌ₅₄ quián₅ ja₁mɨ́g₄ rag₅₄ quián₅ Egipto.

25 Co₂ŋeiꞌ₅₄ guë́₄ ca₂ꞌnáuꞌ₃ dsɨ́₅ ŋág₃ uɨg₅ quiainꞌ₅₄ dsa₂ juɨg₂ quián₅ Diú₄, conꞌ₂ guë́₄ a₂le₃chain₂ o₂ꞌŋió₃ dsɨ́₅ ca₂tiá₂ a₂ꞌno₃ dso₄.

26 ꞌŊio₅ guë́₄ quen₅, lɨ́in₂, a₂ŋág₃ uɨg₅ a₂të₃ꞌoꞌ₂ dsa₂, liaꞌ₂ te₃ꞌonꞌ₂ I₂rë₂ꞌɨ́n₁* quián₅ Diú₄, conꞌ₂ guë́₄ quen₅ ca₂le₃jë́₃ cu₄nióg₄ a₂rë₂ꞌma₄ ꞌuë₃ Egipto. Ia₁ ꞌliainꞌ₅₄ a₂cuë₃ Diú₄, co₂dsau₅ jaun₂ bá₄ ca₂jág₃.

27 Të₂le₃ a₂ꞌén₂ Moisés, ca₂o₃ꞌɨ́in₃ ꞌuë₃ Egipto,c tsá₃ ca₂rë₃góꞌ₅ a₂ꞌne₂ rag₅₄; ca₂nau₂ bá₄ tiá₂ në₂jag₄ bá₄ a₂jɨ́in₂ Diú₄ i₂tsá₃ jniá₂.

28 Të₂le₃ a₂ꞌén₂ Moisés, ca₂jmo₃ Jmɨg₄ Të₂ꞌɨn₅₄*,^m ca₂tsáng₂ jmɨ₂ o₄ꞌné₄ në́₃, ia₁jaun₂ i₂niog₅ ne₄ jme₃dsiain₂₃ juɨ₁liaꞌ₂ chiꞌ₂ dsa₂ ŋeꞌ₂ i₂le₂ne₁ quián₅ dsa₂, tsá₃ téin₂ gu₂-tag₅₄ chiꞌ₂ i₂le₂ne₁ quián₅ dsa₂ juɨg₂ Israel.

29 Të₂le₃ a₂ꞌén₂ dsa₂ juɨg₂, ca₂ŋɨ́i₃ Jmɨ₁ŋíꞌ₄ Guéin₂,ⁿ ne₄ ꞌuë₃ quein₂. La₁ liaꞌ₂ conꞌ₂ jme₁ꞌnio₃ jmo₃ le₂jaun₂ dsa₂ juɨg₂ Egipto, ca₂dsain₃ bá₄, ca₂ꞌɨnꞌ₃ jmɨg₂.

30 Të₂le₃ a₂ꞌén₂ bá₄ dsa₂ israelitas, ca₂liaꞌ₂ ca₂gon₃ nɨ₁ꞌiaꞌ₂ quióꞌ₅ juɨg₂ Jericó,^o jme₁ma₂ca₂lë₃ i₂nioi₅₄ guio₃ jmɨg₄ le₃lágꞌ₃ quióꞌ₅.

31 Ján₃ bá₄ të₂le₃ a₂ꞌén₂ ꞌio₅₄ Rahab^p i₂jme₁ꞌnag₅ quióꞌ₅ në́₃, tsá₃ ca₂join₃ co₂lë₅ quiainꞌ₅₄ dsa₂ i₂tsá₃ ca₂néꞌ₂,^q ia₁ ca₂guein₃ bá₄ rë₂ dsa₂ israelitas i₂jme₁i₂nio₄ tiog₅.

32 ¿ꞌE₂ guë́₄ juáꞌ₄ jniá₂? Tsá₃ jë₄ jmɨg₄ juaꞌ₅₄ juáꞌ₄ jniá₂ a₂ꞌɨ́ng₄ Gedeón,^r quianꞌ₅₄ Barac,^s Sansón,^t Jefté,^u David,^v Samuel,^w quianꞌ₅₄ dsa₂ i₂jme₁ꞌë́₂ jág₁ quián₅ Diú₄ në́₃.

33 Të₂le₃ a₂ꞌéin₂ bá₄ ján₃, ca₂lɨ́ꞌ₃ juɨg₂ siáꞌ₂ ja₁gon₂ rag₅₄, rë₂ bá₄ ca₂qui₃dsɨ₂₃ ꞌéiꞌ₃ në́₃, ján₃ bá₄ ca₂ꞌióꞌ₃ a₂ca₂jme₃ꞌo₅₄ Diú₄ conꞌ₂ lë́₅ jág₁ a₂ca₂cuë₃ a₂jme₃ꞌo₅₄. Ján₃ bá₄ le₂në₅ ca₂jnéi₃ i₂lɨn₅₄ ꞌo₄ dsɨ₂ꞌiaꞌ₂,

34 ca₂ei₃ si₂ cau₂ ca₂joꞌ₅₄, qui₂ca₂lón₂ i₂lɨn₅₄ a₂jme₁dsiáin₃ quianꞌ₅₄ ꞌo₄ ŋi₁tág₂ në́₃. Ján₃ bá₄ le₂jaun₂ ca₂quɨ́nꞌ₃ bí₂ dsa₂ ꞌuan₅₄ ca₂jme₃ꞌuáinꞌ₃, ján₃ bá₄ ca₂rë₃béin₂ quɨ́inꞌ₂ ja₁niog₅ ꞌnei₂, jaun₂ ca₂tióꞌ₃ bá₄ jme₁ca₂quɨ́inꞌ₂ quianꞌ₅₄ ꞌlióg₂ dsa₂ i₂ꞌiog₅₄ quióꞌ₅.

35 Ján₃ bá₄ le₂në₅ chan₂ dsa₂ mɨ́₂ ca₂guein₃ táng₃ ꞌlag₄ quiáin₅ jme₁ca₂jeinꞌ₅₄ táng₃. I₂siánꞌ₂ guëꞌ₂ qui₂ca₂jmógꞌ₂ dsa₂, la₁ tsá₃ ca₂gue₃ a₂lióin₂, ia₁jaun₂ tɨin₅₄ a₂jeinꞌ₅₄ a₂le₃chain₂ guë́₄ dse₃.

36 I₂siánꞌ₂ guëꞌ₂ ca₂ŋág₃ le₃jë́₃ jág₁ qui₂ca₂jnáuꞌ₂ dsa₂ qui₂ca₂bóg₂ dsa₂; ca₂liaꞌ₂ ca₂ꞌneiꞌ₂ dsa₂ quianꞌ₅₄ ŋí₁ cadenas, ca₂toꞌ₂ dsa₂ néꞌ₃ ꞌmá₃ në́₃.

37 I₂lɨn₅₄ guëꞌ₂ ca₂dsan₃ qui₂ca₂jnáuꞌ₂ dsa₂ cang₄, i₂siánꞌ₂ në́₃ ca₂ti₃ dsa₂ ca₂ꞌnói₁ quianꞌ₅₄ ŋí₁ chi₁jan₁,^x ca₂jme₃dsiog₅ dsa₂ quianꞌ₅₄ ŋi₁tág₂ në́₃. Qui₂i₁nioi₁₂ i₁jnaiꞌ₅₄ a₂la₂-ó₃ le₁quiꞌ₂ jmáꞌ₃ nɨ₁lo₄ jáꞌ₂ chaꞌ₂ quianꞌ₅₄ nɨ₁lo₄ chein₄ lau₂ në́₃; të₂ŋéi₂, tsá₃ dse₃ qui₂le₁ꞌág₄ dsɨ́₅, ján₃ bá₄ qui₂ca₂jmógꞌ₂ dsa₂.

38 Tsá₃ lé₂ le₃juaꞌ₅₄ juaꞌ₅₄ jme₁ca₂tɨ́n₂ dsa₂ mɨ₂güɨ́g₃ le₃chan₂ dsa₂ ꞌéi₂ quiongꞌ₅₄. Jme₁i₂nioi₅₄ ꞌuë₃ co₂ꞌŋiog₅, le₂con₂ máꞌ₂ në́₃, néꞌ₃ cang₄ të₂ꞌlau₂, néꞌ₃ tau₂ a₂niog₅ néꞌ₃ ꞌuë₃ në́₃.

39 Le₃jɨ́n₃ dsa₂ ꞌéi₂, ca₂ꞌag₃ Diú₄ dse₃ ꞌuɨg₅₄ ia₁ a₂ꞌéin₂, la₁ia₁ tsá₃ ca₂ꞌióꞌ₃ a₂jme₁ca₂juáꞌ₂ Diú₄ cuë₃.

40 Jme₁ma₂i₃jiog₅ dsɨ́₅ Diú₄ jmo₃ co₂jŋia₅₄ caun₂ a₂dse₃ guë́₄ quián₂ jniog₄, ia₁jaun₂ tsá₃ le₃ꞌŋia₅ dsa₂ ꞌéi₂ juaꞌ₅₄ tsá₃ le₃ꞌŋiai₂₃ co₂lë₅ quianꞌ₅₄ jniog₄.