10
Ia₁ Si₂ ꞌÉiꞌ₃ quióꞌ₅ Moisés në́₃, co₂ꞌnióꞌ₄ caun₂ ꞌenꞌ₂ quióꞌ₅ a₂dse₃ a₂ja₃lé₂, on₃juaꞌ₅₄ rëꞌ₂ ꞌa₂ liaꞌ₂ lë́₅ dsónꞌ₂. ꞌUɨg₅₄ jaun₂, liaꞌ₂ o₁lɨ́gꞌ₂ jmɨg₄ tsá₃ tióꞌ₅ ꞌÉiꞌ₃ jaun₂ juaꞌ₅₄ a₂jme₃ꞌŋiai₂₃ juɨ₁liaꞌ₂ dsa₂ i₂ja₂quián₃ ja₁con₂ Diú₄ të₂le₃ quianꞌ₅₄ a₂caun₂ qui₂jénꞌ₃ jmɨ₄ jáꞌ₂ le₂jaun₂, liaꞌ₂ ꞌí₂ ŋi₂.
2 Juaꞌ₅₄ meiꞌ₂ guë́₃ tióꞌ₅ le₂jaun₂, ¿tsa₁ jme₁ma₂ꞌná₃ a₂jénꞌ₃ dsa₂ jáꞌ₂ ne₄ Diú₄, lɨ́nꞌ₂ ꞌniaꞌ₂? Ia₁ tsá₃ ma₃ꞌe₂ qui₂dsɨ₂jŋi₅ dsɨ́₅ dsa₂ dsáu₁ i₂jme₂ti₃ le₂jaun₂ jë₁ma₂ca₂rɨnꞌ₂ jme₂dsí₂ quióꞌ₅.
3 Të₂le₃ qui₂dsauꞌ₂ dsɨ́₅ bá₄ dsa₂ liaꞌ₂ ꞌí₂ ŋi₂ a₂jéinꞌ₂ jáꞌ₂ a₂qui₂rë₂cáinꞌ₄ dso₄,
4 ia₁ tsá₃ lé₂ jŋiáꞌ₂ dsáu₁ dsa₂ juɨ₁liaꞌ₂ jmɨ₄ ca₁juɨ₅ quianꞌ₅₄ jmɨ₄ chein₄ lau₂.
5 ꞌUɨg₅₄ jaun₂, liaꞌ₂ conꞌ₂ jme₁ca₂ꞌí₃ Cristo mɨ₂güɨ́g₃, ca₂juáꞌ₂ ca₂tsɨ́ꞌ₃ Diú₄:
Tsá₃ ꞌniogꞌ₂ a₂qui₃jénꞌ₂ dsa₂ jáꞌ₂ neꞌ₅₄,
on₃ guëꞌ₂ ꞌniogꞌ₂ ꞌe₂ jme₁cuë́ꞌ₅ dsa₂ ꞌne₂.
La₁ ca₂jmoꞌ₅₄ co₂jŋia₅₄ quió₃
caun₂ ŋɨ₄ dsa₂ mɨ₂güɨ́g₃.
6 Tsá₃ ca₂të́₂ ꞌauꞌ₂ a₂qui₂dsɨ́nꞌ₂ dsa₂ jáꞌ₂,
on₃ guë́₄ ca₂të́₂ ꞌauꞌ₂ ꞌe₂ a₂qui₂ca₂cuë́ꞌ₃ dsa₂ ꞌne₂
o₄quióꞌ₄ dsáu₁ dsa₂.
7 ꞌUɨg₅₄ jaun₂ ca₂juáꞌ₃:
“Jag₄, la₂ guio₃, jmo₅₄ a₂ꞌŋio₂ ꞌauꞌ₂ ꞌne₂,
Diú₄ quiáng₃,
juɨ₁liaꞌ₂ chi₁ton₅ ne₄ si₂ a₂rë₂bɨn₅,
a₂ꞌag₂₃ jniá₂.”a
8 Le₂ꞌuɨg₅₄, juáꞌ₂: “Tsá₃ ꞌnio₃ Diú₄ on₃ guëꞌ₂ të₅ dsɨ́₅ a₂qui₃jénꞌ₂ dsa₂ jáꞌ₂ ne₅₄, on₃ guëꞌ₂ juɨ₁liaꞌ₂ a₂jme₁cuë́ꞌ₅ dsa₂ Diú₄ o₄quióꞌ₄ dsáu₁ dsa₂”, (o₁jŋiaꞌ₅₄ jénꞌ₃ dsa₂ liaꞌ₂ conꞌ₂ quíꞌ₅ ꞌÉiꞌ₃ a₂ꞌnióꞌ₅ jmo₃ dsa₂).
9 Jaun₂ në́₃, cang₂ guë́₄ jaun₂, juáꞌ₂: “La₂ guio₃ jmo₅₄ a₂ꞌŋio₂ ꞌauꞌ₂ ꞌne₂, Diú₄ quiáng₃.” Co₂ꞌnióꞌ₄ a₂juáꞌ₂ ca₂dsia₃ cau₅ a₂le₂ꞌuɨg₅₄ jaun₂, ia₁jaun₂ ca₂chiꞌ₃ jág₁ jë₁ca₂të́₂ táng₃.
10 ꞌUɨg₅₄ ia₁ a₂ca₂jmo₃ Jesucristo a₂ꞌŋio₂ dsɨ́₅ Diú₄ jaun₂, ma₂ca₂rë₃jŋió₄ jniog₄ jme₁ca₂jénꞌ₃ nɨ₁ŋɨ₁₂ ꞌŋiog₅ co₂ráun₂ tan₅₄.
11 Caun₂ tión₂ bá₄ jme₂dsa₂ liaꞌ₂ ꞌí₂ jmɨg₄ a₂qui₂jmo₂₃ ta₁ a₂lɨ́in₅, liaꞌ₂ ma₂jmo₂₃ jaun₂ bá₄ a₂qui₂jéinꞌ₂ jáꞌ₂ ꞌlióng₂ ráun₂, tonꞌ₂ tsá₃ tióꞌ₅ guëꞌ₂ ꞌéin₂ dsáu₁ dsa₂.
12 La₁ Jesucristo në́₃, jme₁ma₂ca₂jéinꞌ₂ ꞌŋiog₅ co₂ráun₂ tan₅₄ jaun₂ o₄quióꞌ₄ dsáu₁ dsa₂, jaun₂ guë́₄ ca₂guá₂ të₂le₃ gu₂ ne₁ Diú₄.
13 Ja₁jaun₂ guá₅ chi₁jŋia₂₃ ca₂liaꞌ₂ ca₂jmo₃ Diú₄ co₂ꞌnióꞌ₄ caun₂ ja₁chiꞌ₃ tag₅₄ quianꞌ₅₄ quióꞌ₅ dsa₂ i₂ꞌiog₅₄ quióꞌ₅.
14 Ia₁ të₂le₃ quianꞌ₅₄ a₂ca₂jéinꞌ₂ co₂ráun₂ jaun₂, ca₂rë₃ꞌŋia₅ co₂tan₅₄ dsa₂ i₂lë₅ ꞌí₁ quiáin₅.
15 Ján₃ bá₄ le₂jaun₂ jángꞌ₅ jág₁ dsau₅ Jme₂dsí₂ Jŋió₅. Ca₂juáꞌ₂ le₂ꞌuɨg₅₄:
16 Jág₁ a₂jmo₅₄ jniá₂ a₂lɨꞌ₅₄ quianꞌ₅₄ dsa₂ ꞌéi₂
cang₂ jmɨg₄ jaun₂,
lé₂ le₂la₂, juáꞌ₂ Te₁guiꞌ₅₄.
Co₅₄ jniá₂ ꞌéiꞌ₃ quió₃ të₂dsɨ́₅ dsa₂ ꞌéi₂.
Ján₃ bá₄ taun₅₄ jniá₂ ja₁ꞌi₄ dsi₅₄ táng₃.b
17 Cang₂ guë́₄ jaun₂ juáꞌ₂ táng₃:
Liaꞌ₂ o₁lɨ́gꞌ₂ jmɨg₄ tsá₃ ma₃dsiogꞌ₂ dsɨ₃ jniá₂
dso₄ a₂jme₁rë₂cáinꞌ₄,
on₃ guëꞌ₂ ꞌe₂ a₂ꞌlɨgꞌ₅₄ a₂ma₂jmo₃.c
18 Jaun₂ në́₃, chi₂juaꞌ₂ ma₂ca₂ꞌen₃ dsáu₁ dsa₂, jaun₂ tsá₃ ma₂ꞌe₂ ꞌnióꞌ₅ jénꞌ₃ guë́₄ dsa₂ o₄quióꞌ₄ dsáu₁.
Ma₃ jme₁quián₄ jniog₄ ja₁con₂ Diú₄
19 Jaun₂ lë₃, rɨnꞌ₅₄ jniog₄, ꞌuɨg₅₄ ia₁ a₂ma₂lé₂ dsɨ₁tióꞌ₄ jniog₄ caun₂ bá₄ ꞌei₅ dsɨ₅ ca₂të₂ ja₁jŋió₅ lɨn₃ guë́₄ të₂le₃ quianꞌ₅₄ jmɨ₄ Jesucristo,
20 të₂le₃ quianꞌ₅₄ juɨ₅ ꞌmɨ́₂ jénꞌ₃ a₂ca₂niá₃ ꞌéi₂ në₂jag₄ bá₄ të₂le₃ quianꞌ₅₄ ꞌmɨꞌ₂ cortina*, co₂ꞌnióꞌ₄ le₃juaꞌ₅₄ të₂le₃ quianꞌ₅₄ nɨ₁ŋɨ₁₂ ꞌŋiog₅,
21 ján₃ bá₄ ꞌuɨg₅₄ ia₁ a₂chan₂ jme₂dsa₂ dsen₅₄ juɨnꞌ₂ quián₂ jniog₄ i₂niog₅ gu₂ dsa₂ quián₅ Diú₄,
22 ꞌuɨg₅₄ jaun₂ në́₃, ma₃ jme₁quián₄ jniog₄ ja₁con₂ Diú₄ ca₂le₃jë́₃ dsɨ₅ jniog₄, caun₂ bá₄ ꞌei₅ dsɨ₅ a₂ꞌéin₂, a₂tsá₃ ma₃ꞌe₂ qui₂dsɨ₂jŋi₅ dsɨ₅ jniog₄, në₂jag₄ bá₄ a₂ma₂qui₂le₁chí₄ a₂ma₂qui₂le₁séi₂ dsɨ₅ jniog₄. Ján₃ bá₄ le₂jaun₂ co₂ꞌnióꞌ₄ a₂ma₂ca₂rɨnꞌ₂ nɨ₁ŋɨ₁ jniog₄ quianꞌ₅₄ jmɨg₂ le₁jë́₃.
23 Juɨ₁náu₂ jniog₄ tiá₂ a₂ꞌéin₂, tsá₃ juɨ₁ꞌéi₂ jniog₄ caun₂-tɨn₃ dsɨ₅ juɨ₁liaꞌ₂ jág₁ a₂ꞌɨ́n₂ dsɨ₅. Ia₁ i₂rë₂tiꞌ₅₄ bá₄ Diú₄ i₂ma₂cuë₃ jág₁ quióꞌ₅.
24 Ján₃ bá₄ juɨ₁ꞌniogꞌ₅₄ jniog₄ dsɨ₅ ꞌa₂ liaꞌ₂ tionꞌ₅₄ jniog₄ jág₁ rɨnꞌ₅₄ le₂jau₂ le₂jau₂ a₂jme₁ꞌnio₃ jniog₄ dsa₂, a₂jmó₁ jniog₄ a₂dse₃.
25 Tsá₃ juɨ₁tí₄ jniog₄ a₂ŋagꞌ₂ jniog₄ co₂lë₅, juɨ₁liaꞌ₂ ma₂tɨn₂ i₂lɨn₅₄, të₂le₃ ꞌnióꞌ₅ cuëꞌ₅₄ jniog₄ bí₂ rɨnꞌ₅₄ le₂jau₂ le₂jau₂, të₂le₃ lë́₅ guë́₄ ia₁ ma₂léi₄ a₂ma₂ja₂quián₃ jmɨg₄ jaun₂.
26 Ia₁ në₁juaꞌ₂ a₂ta₁ dsɨ₅ jniog₄ caun₂ qui₂ꞌniog₂ dso₄ të₃ ma₂ne₅₄ jág₁ dsau₅, jaun₂ tsá₃ ma₂ꞌe₂ cha₂ guë́₄ juaꞌ₅₄ lé₂ le₃jenꞌ₄ jniog₄ o₄quióꞌ₄ dsáu₁.
27 Jŋiaꞌ₅₄ liaꞌ₂ a₂jaun₂ bá₄ ꞌei₅ guë́₄ a₂jŋia₅ jniog₄ a₂ꞌei₅ gau₂ jë₁qui₃dsɨ₅ Diú₄ ꞌéiꞌ₃, juɨ₁liaꞌ₂ jë₁cau₂ si₂ a₂quión₃ i₂ꞌiog₅₄ quióꞌ₅ Diú₄.
28 Juɨ₁liaꞌ₂ dsa₂ i₂tsá₃ dsáu₅ dsɨ́₅ ꞌÉiꞌ₃ quióꞌ₅ Moisés, tion₅₄ bá₄ jóin₂ tsá₃ o₂ꞌén₂ dso₄ cha₂ quióꞌ₅, ꞌuɨg₅₄ jág₁ dsau₅ a₂jángꞌ₅ on₃-ún₂.d
29 Jaun₂ në́₃, ¿ꞌe₂ guë́₄ uɨg₅ ca₂tɨ́n₂, lɨ́nꞌ₂ ꞌniaꞌ₂, juɨ₁liaꞌ₂ dsa₂ i₂qui₂tsónꞌ₁ Ja₁ŋiꞌ₅₄ Diú₄, juɨ₁liaꞌ₂ dsa₂ i₂tsá₃ jiꞌ₅₄ jmɨ₄ ꞌéi₂ a₂ca₂lɨ́ꞌ₃ jág₁ a₂conꞌ₂ ca₂cheinꞌ₃ ꞌéi₂, juɨ₁liaꞌ₂ dsa₂ i₂të₂ꞌonꞌ₂ Jme₂dsí₂ quián₅ Diú₄ i₂ꞌua₁ dsɨ́₅?
30 Ma₂ne₄ bá₄ jniog₄ a₂ca₂juáꞌ₂ Te₁guiꞌ₅₄: “Jniá₂ bá₄ ca₂tɨ́ng₂ ꞌë́₄ uɨg₅ dsa₂; ján₃ bá₄ jniá₂ quɨ́₄.”e Conꞌ₂ siáꞌ₂ ca₂juáꞌ₂: “Qui₃dsɨ₅ Te₁guiꞌ₅₄ ꞌéiꞌ₃ ja₁con₂ dsa₂ juɨg₂ quiáin₅.”f
31 ¡A₂gau₂ bá₄ jaun₂ a₂tiánꞌ₃ dsa₂ o₄gú₃ Diú₄ jénꞌ₃!
32 La₁ dsá₂ ꞌauꞌ₂ ꞌniaꞌ₂ jmo₄ jmɨg₄ le₂jŋiá₅, liaꞌ₂ conꞌ₂ le₂ꞌuɨg₅₄ jme₁ca₂rë₃ŋɨ́ꞌ₂ ꞌauꞌ₂ ꞌniaꞌ₂, ján₃ bá₄ ꞌa₂ liaꞌ₂ juɨnꞌ₂ ꞌauꞌ₂ ꞌniaꞌ₂ ca₂tiangꞌ₃ ca₂guengꞌ₅₄ mɨꞌ₅₄ o₂i₁ dsɨ₅ quianꞌ₅₄ uɨg₅ a₂ca₂i₃ŋɨ́gꞌ₂.
33 I₂lɨn₅₄ ꞌniaꞌ₂ qui₂ca₂jnáuꞌ₂ dsa₂ jág₁ qui₂ca₂jmógꞌ₂ të₃jɨn₄ dsa₂ juɨg₂. I₂lɨn₅₄ guëꞌ₂ ca₂jme₃quiongꞌ₅₄ ca₂jme₃quiainꞌ₅₄ dsa₂ i₂qui₂ca₂ŋág₃ uɨg₅ le₂në₅.
34 ꞌNiaꞌ₂ në́₃ ca₂dsiaꞌ₅₄ ŋéi₂ ꞌauꞌ₂ i₂jme₁tionꞌ₅₄ néꞌ₃ ꞌmá₃. Ján₃ bá₄ ca₂jmoꞌ₅₄ ꞌniaꞌ₂ ꞌioꞌ₂ ca₂tiangꞌ₃ liaꞌ₂ conꞌ₂ jme₁qui₂ca₂jŋiáꞌ₂ dsa₂ le₃jë́₃ ꞌe₂ a₂jme₁cha₂ quiánꞌ₂ ꞌniaꞌ₂. Ia₁ ŋiꞌ₅₄ bá₄ ꞌniaꞌ₂ a₂cha₂ gueiꞌ₅₄ i₂juɨ́g₃ caun₂ a₂dse₃ guë́₄ a₂jiog₅ co₂tan₅₄ a₂ca₂tɨ́ngꞌ₂.
35 Jaun₂ lë₃, tsá₃ lë₁dsia₂ cau₅ a₂caun₂ ꞌei₅ ꞌauꞌ₂, ia₁ ꞌŋio₅ lɨn₃ bá₄ quen₅ a₂quí₃ Diú₄ ꞌliaꞌ₅₄ a₂ꞌéngꞌ₂.
36 Ia₁ ꞌnióꞌ₅ quiánꞌ₂ ꞌniaꞌ₂ a₂jmóꞌ₂ tióꞌ₃ ꞌauꞌ₂, ia₁jaun₂ lé₂ le₃jmóꞌ₂ ꞌniaꞌ₂ a₂ꞌŋio₂ dsɨ́₅ Diú₄, ia₁jaun₂ guéiꞌ₁ ꞌniaꞌ₂ a₂ma₂ca₂juáꞌ₂ ꞌéi₂ cuë₃.
37 Ia₁ ŋiꞌ₅₄ ta₁, ꞌŋio₅ ŋiꞌ₅₄ ta₁:
Jiá₃ i₂ma₂lë́₅ jág₁ jiá₃,
tsá₃ le₃ꞌɨin₅₄.
38 La₁ dsa₂ i₂ŋɨ₅ juɨ₅ co₂rë₂ ia₁ a₂ꞌéin₂,
ꞌéi₂ bá₄ le₃chan₂.g
Jaun₂ në₁juaꞌ₂ dsɨ₂lein₃ le₃caꞌ₃,
tsá₃ dse₃ ꞌag₃ dsɨ₃ jniá₂ quianꞌ₅₄ ꞌéi₂.h
39 La₁ jniog₄ në́₃, tsá₃ tióng₂ quianꞌ₅₄ dsa₂ i₂dsɨ₂len₃ le₃caꞌ₃ i₂qui₂dsɨ₂ꞌén₂ quióꞌ₅. Le₃jaun₂ bá₄ tióng₂ jniog₄ le₃quióꞌ₅ dsa₂ i₂ꞌén₂, jaun₂ le₂në₅ bá₄ tɨ́nꞌ₄ jme₂dsí₂ quián₂.