Guáꞌ₅ a₂cha₂ guaꞌ₅₄ ꞌuë₃ la₂, quianꞌ₅₄ guáꞌ₅ a₂cha₂ gueiꞌ₅₄ i₂juɨ́g₃
9
Në₃ në́₃, juɨ₁liaꞌ₂ jág₁ a₂jme₁lɨꞌ₅₄ le₂ꞌuɨg₅₄, jme₁quianꞌ₅₄ ꞌéiꞌ₃ juɨ₁liaꞌ₂ ꞌa₂ liaꞌ₂ jme₃ti₃ dsa₂ ne₄ Diú₄, ján₃ bá₄ jme₁cha₂ caun₂ ja₁jŋió₅ a₂ca₂jmo₃ dsa₂ mɨ₂güɨ́g₃.
2 Juɨ₁liaꞌ₂ guáꞌ₅ tabernáculo* jaun₂: dsi₂néi₂ le₂ꞌuɨg₅₄ jaun₂ jme₁chíꞌ₄ nɨ₁ŋí₁ a₂le₁dsɨ₅₄ tag₄ ja₁le₁guíꞌ₂ si₂, quianꞌ₅₄ nɨ₁mesa ja₁niog₅ i₁ŋíꞌ₄ jŋió₅; “ja₁jŋió₅” jme₁chei₂ dsi₂néi₂ le₂ꞌuɨg₅₄ jaun₂.
3 Le₃coꞌ₅₄ ꞌmɨꞌ₂ cortina* ja₁ca₂të́₂ táng₃, jme₁lë́₄ ja₁chei₂ Ja₁jŋió₅ Lɨn₃ Guë́₄.
4 Ja₁jaun₂ jme₁chíꞌ₄ caun₂ ne₄chei₂ a₂lë́₅ jmáꞌ₃ quianꞌ₅₄ cu₄nióg₄ ja₁qui₂dsɨꞌ₂ chen₂, quianꞌ₅₄ tsɨ₁gu₅ quióꞌ₅ jág₁ a₂lɨꞌ₅₄ quianꞌ₅₄ Diú₄. Rë₂lióg₃ ta₁caun₂ tsɨ₁gu₅ quianꞌ₅₄ cu₄nióg₄. ꞌŊióꞌ₃ jaun₂ jme₁chíꞌ₄ nɨ₁dsɨg₁ cu₄nióg₄ a₂jme₁tioꞌ₅₄ i₁ŋíꞌ₄ maná*, quianꞌ₅₄ ꞌma₂ꞌɨ₅₄ quióꞌ₅ Aarón a₂ca₂ꞌia₂ tsɨn₅ në́₃. Ján₃ bá₄ jme₁tioꞌ₅₄ nɨ₁cang₁ ꞌɨ́₂ a₂le₁ton₅ jág₁ a₂lɨꞌ₅₄ quianꞌ₅₄ Diú₄.
5 Ne₄ tsɨ₁gu₅ jaun₂ jme₁tión₂ le₁jné₅ querubines*, co₂ꞌnióꞌ₄ léi₄ a₂tág₅ co₂ꞌnéꞌ₅ quióꞌ₅ Diú₄. Jme₁le₁jné₅ qui₂rë₂jlë₅ quianꞌ₅₄ tsɨ₁rë₂cu₅ ja₁ꞌén₂ Diú₄ dsáu₁ dsa₂. La₁ia₁ tsá₃ jë₄ juaꞌ₅₄ le₃juaꞌ₅₄ guë́₄ jniaꞌ₅₄ jág₁ ꞌlióng₂ juɨ₁liaꞌ₂ ca₂le₃jë́₃ a₂në₅, ne₄ si₂ la₂.
6 Jme₁ma₂lë₅ co₂jŋia₅₄ le₃jë́₃ a₂jaun₂ në́₃, jaun₂ guë́₄ qui₂dsɨ₂tonꞌ₅₄ i₂gúꞌ₃ jme₂dsa₂ dsi₂néi₂ le₂ꞌuɨg₅₄ qui₂dsɨ₂jmó₂ liaꞌ₂ conꞌ₂ lë́₅ ta₁ a₂lɨ́in₅.
7 La₁ia₁ jë₁ca₂të́₂ táng₃ dsi₂néi₂, dsɨ₂ꞌí₂ jŋiaꞌ₅₄ liaꞌ₂ jme₂dsa₂ dsen₅₄ co₂ráun₂ liaꞌ₂ caun₂ ŋi₂, la₁ tsá₃ ꞌí₂ juaꞌ₅₄ tsá₃ quian₅ jmɨ₄ jáꞌ₂ a₂qui₂dsɨ₃jenꞌ₅₄ o₄quióꞌ₄ dsáu₁ ꞌŋiog₅ quianꞌ₅₄ dsáu₁ dsa₂ juɨg₂ a₂ca₂ꞌnáu₂ të₃ tsá₃ ŋi₅.
8 Le₂në₅ jme₁jme₂jniá₂ Jme₂dsí₂ Jŋió₅, a₂tsá₃ jme₁ma₂rë₂na₄ guë́₄ juɨ₅ ja₁dsɨ₃tonꞌ₅₄ dsa₂ ja₁jŋió₅ lɨn₃ guë́₄, të₁liaꞌ₂ jme₁chíꞌ₄ guë́₄ guáꞌ₅ le₂ꞌuɨg₅₄.
9 Co₂ꞌnióꞌ₄ a₂jángꞌ₅ léi₄ a₂la₂, juɨ₁liaꞌ₂ quióꞌ₅ jmɨg₄ rë₂në́₃, ia₁ le₃jë́₃ a₂cuë́ꞌ₃ dsa₂ Diú₄, quianꞌ₅₄ le₃jɨ́n₃ jáꞌ₂ a₂qui₂jénꞌ₅ dsa₂ ne₄ Diú₄ në́₃, tsá₃ a₁jaun₂ tióꞌ₅ le₃ꞌŋia₅ dsa₂ juaꞌ₅₄ a₂jŋiáꞌ₂ a₂qui₂dsɨ₂jŋi₅ dsɨ́₅.
10 Jŋiaꞌ₅₄ liaꞌ₂ jaun₂ bá₄ ta₁ quíꞌ₅ le₃jë́₃ a₂jaun₂ juɨ₁liaꞌ₂ ꞌa₂ liaꞌ₂ lë́₅ má₃ a₂guë́ꞌ₅ dsa₂, a₂ꞌɨ́nꞌ₂ dsa₂, quianꞌ₅₄ le₃jë́₃ guë́₄ ꞌe₂ a₂jmo₂₃ a₂le₁jɨ́in₃, jmáꞌ₃ ꞌéiꞌ₃ quióꞌ₅ le₃coꞌ₅₄, jaun₂ quen₅ ca₂tiá₂, ca₂liaꞌ₂ jme₃rë́₃ Diú₄ le₃jë́₃.
Ta₁ a₂quíꞌ₅ jmɨ₄ Cristo
11 La₁ia₁ ma₂guan₅ Cristo, jaun₂ ꞌéi₂ bá₄ ma₂lɨ́n₅ jme₂dsa₂ dsen₅₄ i₂quióꞌ₅ le₃jë́₃ a₂dse₃ a₂ma₂o₂lé₂. Ma₂ca₂ꞌí₃ guáꞌ₅ jláꞌ₁ guë́₄ a₂rë₂ꞌŋia₅, on₃juaꞌ₅₄ a₂ca₂jmo₃ dsa₂ mɨ₂güɨ́g₃. Co₂ꞌnióꞌ₄ le₃juaꞌ₅₄, on₃juaꞌ₅₄ quióꞌ₅ mɨ₂güɨ́g₃ la₂.
12 On₃juaꞌ₅₄ a₂ca₂ꞌí₃ të₂le₃ quianꞌ₅₄ jmɨ₄ chein₄ lau₂ on₃ guë́₄ quianꞌ₅₄ jmɨ₄ guein₂ ca₁juɨ₅ në́₃, la₁ të₂le₃ quianꞌ₅₄ jmɨ₂ ꞌain₅₄ ꞌŋiog₅ bá₄ ca₂ꞌí₃ ja₁jŋió₅ guë́₄ co₂ráun₂ tan₅₄, jaun₂ le₂në₅ bá₄ ca₂ꞌnáu₂ a₂lió₂ jniog₄ co₂tan₅₄.
13 Dsónꞌ₂ bá₄ dsau₅ quíꞌ₅ ta₁ juɨ₁liaꞌ₂ jmɨ₄ ca₁juɨ₅, quianꞌ₅₄ jmɨ₄ chein₄ lau₂, quianꞌ₅₄ ti₁juá₃ quióꞌ₅ guein₂ ca₁juɨ₅ i₂qui₂dsɨnꞌ₂ ne₄chei₂, a₂qui₂rë₂séi₂ ne₄ quióꞌ₅ dsa₂ i₂tsá₃ le₁jɨ́n₃. Quíꞌ₅ ta₁ a₂jme₃jŋió₃ juɨ₁liaꞌ₂ dsa₂ i₂ma₂le₁jɨ́n₃ le₃coꞌ₅₄.
14 La₁ ja₂lɨn₃ guë́₄ quen₅ jmɨ₄ Cristo i₂ca₂jéinꞌ₂ ꞌŋiog₅ ne₄ Diú₄ të₂le₃ quianꞌ₅₄ Jme₂dsí₂ i₂chan₂ co₂tan₅₄, ca₂join₃ të₃ tsá₃ ꞌe₂ rë₂cáinꞌ₄. Quianꞌ₅₄ juɨ₅bí₂ jmɨ₄ Cristo a₂jmo₅ le₁jë́₃ të₂dsɨ₅ jniog₄, a₂tsá₃ ma₃jmo₂ jniog₄ a₂jiog₅ juɨ₅ ꞌmú₃ ia₁jaun₂ lé₂ jme₁ti₁ jniog₄ ne₄ Diú₄ jénꞌ₃.
15 ꞌUɨg₅₄ jaun₂, Jesucristo bá₄ lɨ́n₅ i₂chénꞌ₅ ne₄ jág₁ ꞌmɨ́₂ a₂lɨꞌ₅₄a quianꞌ₅₄ Diú₄, ia₁jaun₂ juɨ₁liaꞌ₂ i₂ma₂ca₂tág₃ Diú₄, lé₂ le₃gue₃ a₂ca₂tɨ́in₂ a₂jiog₅ co₂tan₅₄ conꞌ₂ lë́₅ jág₁ a₂ma₂cuë₃ Diú₄ a₂cuë₃. Ia₁ quianꞌ₅₄ ꞌmú₃ quióꞌ₅ Cristo, ca₂lón₂ dsa₂ i₂ca₂ꞌnáu₂ dso₄ liaꞌ₂ conꞌ₂ jme₁lɨꞌ₅₄ guë́₄ jág₁ le₂ꞌuɨg₅₄.
16 Juɨ₁liaꞌ₂ ja₁ron₅ jág₁ a₂ma₂quiog₂ dsa₂ néꞌ₃ guë́₄ a₂jóin₂, tion₅₄ ꞌnióꞌ₅ con₂ dsa₂ jág₁ dsau₅ chi₂juaꞌ₂ ma₂jon₅ bá₄ dsa₂ i₂ca₂jmo₃, ia₁jaun₂ bá₄ lé₂ le₃ti₃ jág₁ a₂ca₂quiog₂ jaun₂.
17 Jaun₂ lë₃, tsá₃ ta₁ tí₄ jág₁ le₂jaun₂ të₁liaꞌ₂ në₅ bá₄ chan₂ dsa₂ i₂ca₂jmo₃; jŋiaꞌ₅₄ liaꞌ₂ jë₁ma₂ca₂join₃ bá₄ quíꞌ₅ ta₁.
18 ꞌUɨg₅₄ jaun₂, jág₁ a₂jme₁lɨꞌ₅₄ në́₃, tsá₃ ca₂quíꞌ₃ ta₁ juaꞌ₅₄ tsá₃ ca₂tang₂ jmɨ₂.
19 Ia₁ cang₂ jme₁ma₂ca₂ꞌë́₂ Moisés ca₂le₃jë́₃ jág₁ quióꞌ₅ ꞌÉiꞌ₃ Juáꞌ₅ ca₂ꞌë́ꞌ₃ dsa₂ juɨg₂, jaun₂ guë́₄ ca₂can₃ nɨ₁jŋi₂ guéin₂ quióꞌ₅ jáꞌ₂ chaꞌ₂, quianꞌ₅₄ caun₂ nɨ₁guꞌ₂ nɨ₁ꞌma₂ hisopo*, jaun₂ ca₂jme₃jléꞌ₃ quianꞌ₅₄ jmɨ₄ guein₂ ca₁juɨ₅ quianꞌ₅₄ jmɨ₄ chein₄ lau₂ a₂rë₂cónꞌ₅ quianꞌ₅₄ jmɨg₂,b jaun₂ guë́₄ ca₂séi₂ liaꞌ₂ ne₄ si₂ a₂rë₂bɨn₅ ja₁le₁ton₅ ꞌéiꞌ₃, liaꞌ₂ ne₄ quióꞌ₅ le₃jɨ́n₃ dsa₂ në́₃.
20 Jaun₂ guë́₄ ca₂tsɨ́ꞌ₃ dsa₂ juɨg₂: “A₂la₂ bá₄ jmɨ₂ quióꞌ₅ jág₁ a₂ma₂lɨꞌ₅₄ quianꞌ₅₄ Diú₄, liaꞌ₂ conꞌ₂ lë́₅ ꞌéiꞌ₃ a₂ma₂jmo₃ Diú₄ quiánꞌ₂ ꞌniaꞌ₂.”c
21 Ján₃ bá₄ ca₂séi₂ Moisés quianꞌ₅₄ jmɨ₂ jaun₂, guáꞌ₅ tabernáculo quianꞌ₅₄ le₃jë́₃ guë́₄ a₂jmóꞌ₂ dsa₂ ta₁ guáꞌ₅.
22 Dsónꞌ₂ bá₄ jaun₂, conꞌ₂ lë́₅ ta₁ quíꞌ₅ Si₂ ꞌÉiꞌ₃, meiꞌ₂ tsá₃ le₃jë́₃ bá₄ ꞌnióꞌ₅ qui₂le₃chí₂ quianꞌ₅₄ jmɨ₂. Jaun₂ tsá₃ o₂ꞌén₂ dso₄ cha₂ juaꞌ₅₄ tsá₃ qui₂i₂ꞌo₅₄ jmɨ₂.
Jmɨ₂ a₂ca₂jénꞌ₃ Cristo bá₄ jŋiáꞌ₂ dsáu₁ dsa₂
23 Jaun₂ lë₃, tion₅₄ bá₄ qui₂le₃chí₂ le₂në₅ quianꞌ₅₄ jmɨ₄ jáꞌ₂ ca₂le₃jë́₃ a₂jaun₂ a₂qui₂rë₂ꞌuɨn₄ juɨ₁liaꞌ₂ quióꞌ₅ gueiꞌ₅₄ i₂juɨ́g₃. La₁ia₁ ca₂le₃jë́₃ a₂në₅ a₂cha₂ gueiꞌ₅₄ i₂juɨ́g₃ në́₃, tion₅₄ ꞌnióꞌ₅ séi₂ quianꞌ₅₄ jmɨ₂ a₂dse₃ guë́₄ conꞌ₂ guë́₄ a₂jaun₂.
24 Ia₁ on₃juaꞌ₅₄ a₂ca₂ꞌí₃ Cristo dsi₂néi₂ ja₁jŋió₅ jaun₂ a₂rë₂lag₄ quianꞌ₅₄ gu₂-tag₄ dsa₂ mɨ₂güɨ́g₃, a₂rë₂ꞌuɨn₄ quióꞌ₅ ja₁jŋió₅ ꞌŋiog₅ dsónꞌ₂, la₁ të₂le₃ co₂dsau₅ gueiꞌ₅₄ i₂juɨ́g₃ ꞌŋiog₅ dsónꞌ₂ bá₄ ca₂ꞌí₃, ja₁qui₂jme₂jniai₂₃ jmɨg₄ rë₂në́₃ ne₄ Diú₄ o₄quián₂ jniog₄.
25 Tsá₃ jaun₂ qui₂ca₂ꞌí₃ i₂gúꞌ₃ juaꞌ₅₄ qui₂ca₂jéinꞌ₂ ꞌŋiog₅ juɨ₁liaꞌ₂ dsɨ₂ꞌí₂ jme₂dsa₂ dsen₅₄ ja₁jŋió₅ guë́₄ liaꞌ₂ caun₂ ŋi₂ a₂qui₂dsɨ₂jenꞌ₅₄ jmɨ₄ i₂siánꞌ₂.
26 Juaꞌ₅₄ meiꞌ₂ guë́₃ le₂jaun₂ në́₃, tion₅₄ bá₄ jme₁ꞌnióꞌ₅ jóin₂ ꞌlióng₂ ráun₂ ca₂le₃ ca₂nio₃ mɨ₂güɨ́g₃. La₁ia₁ le₂la₂ bá₄ lë́₅ juɨ₁liaꞌ₂ rë₂në́₃, a₂jë₁ma₂ca₂dsɨn₃ jmɨg₄, ca₂jme₃jniá₂ Cristo co₂ráun₂ tan₅₄ bá₄ ia₁jaun₂ lé₂ le₃jŋiáꞌ₂ dsáu₁ dsa₂ të₂le₃ quianꞌ₅₄ a₂ca₂jéinꞌ₂ ꞌŋiog₅.
27 Jaun₂ juɨ₁liaꞌ₂ co₂ráun₂ bá₄ ca₂tɨ́n₂ dsa₂ mɨ₂güɨ́g₃ dsiáin₃, jaun₂ cang₂ jaun₂ jiá₃ jmɨg₄ jë₁të₃dsɨ₅₄ ꞌéiꞌ₃,
28 ján₃ bá₄ le₂jaun₂, co₂ráun₂ tan₅₄ bá₄ ca₂jon₃ Cristo ia₁jaun₂ qui₃cán₂ dsáu₁ dsa₂ mɨ₂güɨ́g₃. Cang₂ guë́₄ jaun₂ jme₃jniai₂₃ jë₁ca₂të́₂ táng₃, la₁ on₃juaꞌ₅₄ ꞌuɨg₅₄ dsáu₁ dsa₂, a₂ja₃lioin₅₄ juɨ₁liaꞌ₂ i₂qui₂le₁jŋiog₅ bá₄.