2
Jaun₂ në́₃, co₂dsia₅ tí₃ ꞌniaꞌ₂ ca₂le₃jë́₃ ne₅₄ a₂ꞌlɨgꞌ₅₄, quianꞌ₅₄ ꞌa₂ liaꞌ₂ lë́₅ jme₁chanꞌ₂ ꞌniaꞌ₂ jmoꞌ₂ o₁neꞌ₄, o₁gangꞌ₂, jme₁chanꞌ₂ ꞌniaꞌ₂ jmoꞌ₂ uɨg₅ ꞌauꞌ₂, ca₂le₃jë́₃ guë́₄ a₂lë₁chi₂dsiaꞌ₂ ꞌniaꞌ₂ ꞌɨ́ngꞌ₅ rɨ́ngꞌ₂.
2 Jmo₄ ꞌniaꞌ₂ në₂jag₄ bá₄ guein₂ píꞌ₁ i₂ꞌɨ́n₅ dsɨ́₅ ꞌɨ́nꞌ₂ dsiꞌ₅₄ jmáꞌ₅ a₂gu₂dsí₂, jaun₂ të₂le₃ quianꞌ₅₄ a₂jaun₂ qui₂dsɨ₃canꞌ₅₄ ꞌniaꞌ₂ ca₂liaꞌ₂ ca₂ꞌŋia₅ i₁liónꞌ₂ ꞌniaꞌ₂,
3 chi₂juaꞌ₂ të₃dsónꞌ₂ bá₄ ma₂ca₂rë₃lenꞌ₄ ꞌniaꞌ₂ jmá₂ a₂dse₃ dsɨ́₅ Te₁guiꞌ₅₄.a
Cristo bá₄ i₂lɨ́n₅ nɨ₁ꞌlau₂ jénꞌ₃
4 Jme₁quián₄ ꞌniaꞌ₂ ja₁con₂ Te₁guiꞌ₅₄ i₂lɨ́n₅ nɨ₁cang₁ jénꞌ₃. Dsa₂ mɨ₂güɨ́g₃ në́₃ tsá₃ ca₂rë₃jei₅₄, la₁ të₂le₃ quióꞌ₅ Diú₄ në́₃ lë́₅ nɨ₁cang₁ rë₂quioꞌ₅₄ a₂jláꞌ₁ a₂quen₅ guë́₄ lɨn₃.
5 Le₂në₅ bá₄ ꞌniaꞌ₂ ján₃, jmo₄ ꞌniaꞌ₂ ꞌauꞌ₂ a₂lɨ́ngꞌ₅ co₂ꞌnióꞌ₄ nɨ₁cang₁ jénꞌ₃ a₂jmóꞌ₂ Diú₄ ta₁ a₂juɨ₂₃ jmógꞌ₅ caun₂ ꞌné₅ a₂gu₂dsí₂, ia₁jaun₂ dsi₁nóꞌ₅ ꞌniaꞌ₂ léngꞌ₂ co₂ꞌnióꞌ₄ jme₂dsa₂ i₂lë́₅ ꞌí₁ quiáin₅ i₂qui₂jénꞌ₅ ꞌe₂ qui₂jénꞌ₅ ne₄ Diú₄ a₂gu₂dsí₂ a₂lë́₅ a₂ꞌŋio₂ dsɨ́₅ ꞌéi₂ gue₂₃ të₂le₃ quianꞌ₅₄ Jesucristo.
6 Ia₁ ne₄ Si₂ juáꞌ₂ ján₃:
la₂ dsián₄ jniá₂ ciudad Sión i₂lɨ́n₅ nɨ₁cang₁
quióꞌ₅ quiꞌ₅₄ ꞌuɨg₅₄ ꞌiaꞌ₂.
Ca₂le₃jɨ́n₃ i₂ꞌén₂ le₃quióꞌ₅,
o₁lɨ́gꞌ₂ tsá₃ ꞌag₃ caun₂-tɨn₃ dsɨ́₅.b
7 Të₂le₃ quiánꞌ₂ ꞌniaꞌ₂ i₂ꞌéngꞌ₂, nɨ₁ꞌlau₂ jaun₂ lë́₅ a₂quen₅ ꞌŋio₅ lɨn₃. La₁ të₂le₃ quióꞌ₅ i₂tsá₃ ꞌén₂ në́₃, rë₂ti₃ juɨ₁liaꞌ₂ juáꞌ₂ ne₄ Si₂:
Nɨ₁cang₁ a₂tsá₃ ca₂rë₃jiꞌ₅₄ dsa₂ i₂jme₁jmógꞌ₅ ꞌné₅,
ca₂lë₃ nɨ₁cang₁ a₂dsen₅₄ guë́₄ quióꞌ₅ quiꞌ₅₄ ꞌiaꞌ₂.c
8 Rë₂ti₃ ján₃ ja₁juáꞌ₂ ne₄ Si₂:
nɨ₁cang₁ a₂qui₂nió₅ dsa₂,
nɨ₁ꞌlau₂ a₂jmo₅ a₂dsɨ₂ganꞌ₅₄ dsa₂.d
ꞌUɨg₅₄ ia₁ a₂tsá₃ ꞌnio₃ jme₃ti₃ jág₁ dse₃, qui₂niói₅ juɨ₁liaꞌ₂ ma₂ꞌi₄ ꞌéiꞌ₃ dsɨ₃ŋɨ́i₂.
Dsa₂ i₂tén₅ le₃quióꞌ₅ Diú₄
9 Ma₂lɨ́nꞌ₅ bá₄ ꞌniaꞌ₂ në́₃, jon₂ dsa₂ i₂rë₂quionꞌ₅₄ quián₅ Diú₄. Lɨ́ngꞌ₅ co₂nióꞌ₃ jme₂dsa₂ i₂jme₂ti₃ ta₁ ne₄ Rag₅₄, caun₂ juɨg₂ jŋió₅, dsa₂ juɨg₂ quián₅ Diú₄ ꞌŋiog₅. Ca₂le₃jë́₃ a₂në₅ lɨ́nꞌ₅ ꞌniaꞌ₂, ia₁jaun₂ qui₂jme₁jniaꞌ₅ ꞌniaꞌ₂, ca₂le₃jë́₃ a₂jláꞌ₁ a₂ma₂jmo₃ Diú₄. Ia₁ ꞌéi₂ bá₄ ma₂ca₂ꞌuíinꞌ₂ ꞌniaꞌ₂ jë₄ qui₁néꞌ₃, ca₂tág₃ të₂le₃ ja₁jniá₂ si₂ jláꞌ₁ quióꞌ₅.
10 Le₂jŋiá₅ në́₃, tsá₃ dsa₂ juɨg₂ jme₁lɨ́nꞌ₄ ꞌniaꞌ₂; la₁ rë₂në́₃ në́₃ ma₂ca₂dsi₃nóꞌ₅ ꞌniaꞌ₂ ma₂lɨ́ngꞌ₅ dsa₂ juɨg₂ quián₅ Diú₄. Ca₂le₂jŋiá₅, ꞌi₁jan₂ tsá₃ ꞌein₂ jme₁ŋéi₂ dsɨ́₅ ꞌniaꞌ₂; la₁ rë₂në́₃, Diú₄ ma₂ca₂táꞌ₂ ŋéi₂ dsɨ́₅.
Tiánꞌ₂ ꞌniaꞌ₂ a₂jme₁tiꞌ₄ ne₄ Diú₄
11 ꞌNiaꞌ₂ rɨnꞌ₅₄ jniog₄ i₂ꞌnióg₃, ꞌniaꞌ₂ i₂tiángꞌ₅ uɨ́ng₂ i₂ma₂lɨ́ngꞌ₅ në₂jag₄ bá₄ dsɨ₂nau₂, chi₂lenꞌ₄ jniá₂ ꞌniaꞌ₂ co₂dsia₅ tí₃ ꞌniaꞌ₂ ca₂le₃jë́₃ a₂ꞌlɨgꞌ₅₄ a₂ꞌɨ́n₅ dsɨ́₅ nɨ₁ŋɨꞌ₁ a₂jmo₅ ꞌnei₂ ja₁con₂ jme₂dsí₂ quiánꞌ₂ ꞌniaꞌ₂.
12 I₂nio₄ bá₄ ꞌniaꞌ₂ conꞌ₂ dsi₂ten₅₄ jɨn₄ dsɨ₂nau₂ juɨg₂ ja₁tiángꞌ₄, ia₁jaun₂ juɨ₁la₂ ꞌag₂₃ ꞌɨin₂₃ ꞌniaꞌ₂ ꞌlɨgꞌ₅₄ a₂jág₂ jɨ́in₂ ꞌniaꞌ₂ në₂jag₄ bá₄ dsa₂ i₂le₁cánꞌ₄ dso₄, la₁ jë₁ma₂ca₂të́₂ ne₅₄ a₂dse₃ jmoꞌ₂ ꞌniaꞌ₂, jme₃juɨinꞌ₂ bá₄ Diú₄ jë₁ma₂të́₂ rë₁të₃dsɨ₅₄ ꞌéiꞌ₃.
13 Ia₁ a₂ganꞌ₃ ꞌniaꞌ₂ Te₁guiꞌ₅₄, tiónꞌ₂ ꞌniaꞌ₂ ca₂le₃jë́₃ ꞌéiꞌ₃ quíꞌ₅ juɨ₁ꞌein₂ guë́₃ dsɨ₂tan₅₄ i₂dsián₁ quián₅ dsa₂ ne₄ guaꞌ₅₄ ꞌuë₃ la₂; tiónꞌ₂ ꞌniaꞌ₂ ꞌéiꞌ₃ quíꞌ₅ juɨ₁liaꞌ₂ guiꞌ₅₄ dsɨ₂tan₅₄ emperador
14 liaꞌ₂ ꞌéiꞌ₃ quióꞌ₅ i₂lɨ́n₅ dsi₄máꞌ₂ i₂dsián₁ quiáin₅, a₂cuë́ꞌ₃ uɨg₅ dsa₂ i₂jmo₅ ꞌlɨgꞌ₅₄, la₁ dse₃ ꞌɨin₃ dsa₂ i₂jmo₅ a₂dse₃.
15 Ia₁ a₂në₅ bá₄ a₂ꞌnio₃ Diú₄: a₂jmóꞌ₂ ꞌniaꞌ₂ ca₂ne₅₄ a₂dse₃, ia₁jaun₂ dsɨ₃lén₂ tei₄ dsa₂ co₄ i₂ꞌɨn₅ ꞌlɨgꞌ₅₄ ꞌniaꞌ₂ ia₁ a₂tsá₃ ŋi₅.
16 I₂nioꞌ₄ bá₄ ꞌniaꞌ₂ jaun₂, liaꞌ₂ jë₁i₂nio₄ dsa₂ i₂ma₂ca₂lón₂ i₂ma₂ca₂niá₃ juɨ₅ quióꞌ₅, la₁ tsá₃ o₁lengꞌ₅₄ juaꞌ₅₄ a₂ma₂rë₂na₄ juɨ₅ ia₁jaun₂ ꞌnáuꞌ₁ dso₄. Juɨ₁le₂chanꞌ₂ ꞌniaꞌ₂ a₂lɨ́ngꞌ₅ dsa₂ i₂jme₂ti₃ ta₁ ne₄ Diú₄.
17 Jme₁gan₃ ꞌniaꞌ₂ ca₂le₃jɨ́n₃ dsa₂; jme₁ꞌnió₄ ꞌniaꞌ₂ rɨ́ngꞌ₂ në́₃. Jme₁gan₃ ꞌniaꞌ₂ Diú₄, tonꞌ₂ jme₁gan₃ ꞌniaꞌ₂ dsɨ₂tan₅₄ dsa₂ juɨnꞌ₂.e
Caun₂ jág₁ dsau₅ ꞌa₂ liaꞌ₂ lë́₅ jmɨ₁uɨg₅ a₂ca₂i₃ŋɨ́₂ Cristo
18 ꞌNiaꞌ₂ guëꞌ₂ dsa₂ i₂jme₂ti₃ ta₁ ne₄ dsa₂, tiónꞌ₂ ꞌniaꞌ₂ ꞌei₅ gau₂ ca₂le₃jë́₃ ꞌe₂ te₂néiꞌ₂ juɨgꞌ₂ ꞌniaꞌ₂. Ca₂tɨ́nꞌ₂ ꞌniaꞌ₂ jme₁tiꞌ₄, on₃juaꞌ₅₄ jmáꞌ₃ ne₄ dsa₂ dsen₃ i₂juɨnꞌ₂ dsɨ́₅; ca₂tɨ́nꞌ₂ bá₄ ꞌniaꞌ₂ jme₁tiꞌ₄ le₂jiog₅ ne₄ dsa₂ i₂tsau₂ dsɨ́₅ në́₃.
19 Ia₁ ja₂lɨn₃ guë́₄ dse₃ të₂tsɨnꞌ₅₄ dsa₂ ne₄ Diú₄ jme₁jmo₂₃ tióꞌ₃ dsɨ́₅ ŋág₅ uɨg₅ on₃juaꞌ₅₄ a₂cha₂ rɨin₂, ne₄ ia₁ a₂líꞌ₄ dsɨ́₅ a₂ꞌŋio₂ dsɨ́₅ Diú₄ bá₄.
20 Ia₁ në₁juaꞌ₂ jmoꞌ₂ ꞌniaꞌ₂ tióꞌ₃ ꞌauꞌ₂ jme₁qui₂dsɨ₂bangꞌ₅₄ ne₄ ꞌuɨg₅₄ dsáuꞌ₂ ꞌniaꞌ₂ guiongꞌ₅₄, ¿ꞌe₂ a₂dse₃ a₂lé₂ le₃guéiꞌ₁ ꞌniaꞌ₂ në₁juaꞌ₂ le₂jaun₂? La₁ në₁juaꞌ₂ ŋagꞌ₅₄ ꞌniaꞌ₂ uɨg₅ ne₄ ꞌuɨg₅₄ a₂dse₃ a₂jmoꞌ₂, tonꞌ₂ jmoꞌ₂ ꞌniaꞌ₂ tióꞌ₃ ꞌauꞌ₂, ia₁ le₂në₅ bá₄ dsióg₄ të₃tsɨnꞌ₅₄ ꞌniaꞌ₂ dse₃ ne₄ Diú₄.
21 Ia₁ ta₁ jaun₂ ma₂ca₂rë₃të́₄ ꞌniaꞌ₂, ia₁ ján₃ bá₄ ca₂ŋág₃ Cristo uɨg₅ o₄quiánꞌ₂ ꞌniaꞌ₂, a₂ca₂quiog₂ caun₂ juɨ₅ ia₁jaun₂ le₂në₅ i₁nioꞌ₄ ꞌniaꞌ₂ juɨ₁liaꞌ₂ ca₂ŋɨ₃ ꞌŋiog₅.
22 ꞌI₁caun₂ dso₄ tsá₃ ꞌe₂ ca₂ꞌnáu₂,
on₃ guëꞌ₂ ꞌi₁ca₂mɨ́g₂ jág₁ a₂juɨ₁gain₂ ca₂o₃ꞌág₃ mɨ₂ꞌo₅₄;f
23 jme₁qui₂ca₂jnáuꞌ₂ dsa₂ jág₁ uɨg₅, tsá₃ le₂jaun₂ ca₂jéin₃ jág₁ juaꞌ₅₄ a₂ca₂quiain₃ dsa₂ juë́ꞌ₅. Të₂le₃ caun₂ bá₄ ca₂ꞌág₂ dsɨ́₅ ca₂dsiain₃ o₄gú₃ i₂qui₃dsɨ₅ ꞌéiꞌ₃ liaꞌ₂ tí₅.
24 Le₂në₅ bá₄ ca₂cáun₃ Cristo juɨ₅ nɨ₁ŋɨ₁₂ ꞌŋiog₅ dsáu₁ jniog₄ jme₁ca₂ŋó₃ ne₄ cróg₄ ia₁jaun₂ dsióg₃ jniog₄ ne₄ dso₄, a₂le₃chong₂ táng₃, quián₁ caun₂ juɨ₅ co₂dsau₅; ne₄ a₂qui₂ca₂cuɨ́nꞌ₂ Cristo ca₂ꞌlónꞌ₂ bá₄ ꞌniaꞌ₂.
25 Ia₁ le₂jŋiá₅ jme₁i₂nioꞌ₄ ꞌniaꞌ₂ liaꞌ₂ ja₁i₂nio₄ jáꞌ₂ chaꞌ₂ i₂ma₂i₂cónꞌ₅,g la₁ rë₂në́₃ ma₂ca₂jénꞌ₃ bá₄ táng₃ ꞌniaꞌ₂ le₃quióꞌ₅ Cristo. ꞌÉi₂ bá₄ i₂jiog₅, niog₅ gu₂, jmo₅ ꞌí₁h jme₂dsí₂ quiánꞌ₂ ꞌniaꞌ₂.