ꞌA₂ liaꞌ₂ dsi₂ten₅₄ le₃chan₂ dsa₂ i₂le₁jenꞌ₂ gu₂
3
Le₂në₅ bá₄ ján₃, ꞌniaꞌ₂ dsa₂ mɨ́₂ i₂le₁jenꞌ₂ gu₂, tiónꞌ₂ ꞌniaꞌ₂ ꞌéiꞌ₃ quióꞌ₅ dsɨ₂i₂gogꞌ₂, ia₁jaun₂ në₁juaꞌ₂ chan₂ i₂tsá₃ ꞌén₂, lé₂ le₃joinꞌ₅₄ ia₁jaun₂ le₃ꞌéin₂ ján₃, on₃juaꞌ₅₄ a₂ꞌnióꞌ₅ juɨgꞌ₅₄ ꞌniaꞌ₂ jág₁ ꞌlióng₂, të₂le₃ quianꞌ₅₄ juɨ₅ ꞌa₂ liaꞌ₂ lë́₅ i₂nioꞌ₄ bá₄ ꞌniaꞌ₂,
2 ia₁ të₃ ne₅₄ a₂ma₂lɨ́nꞌ₂ ꞌniaꞌ₂ dsa₂ i₂le₁jë́₃ dsɨ́₅, i₂ŋi₅ ꞌa₂ liaꞌ₂ jme₃go₃.
3 Tsá₃ juɨ₁le₅₄ juaꞌ₅₄ a₂jŋiaꞌ₅₄ tiónꞌ₂ ꞌniaꞌ₂ jláꞌ₁ jmáꞌ₃ liaꞌ₂ le₃coꞌ₅₄, quianꞌ₅₄ juɨ₁liaꞌ₂ a₂ŋɨ́₄ jláꞌ₁ qui₂rë₂lag₄ dseiꞌ₂, o₃ a₂qui₂le₁lɨnꞌ₄ ꞌniaꞌ₂ juɨ₁liaꞌ₂ quianꞌ₅₄ mɨ́g₂ cu₄nióg₄, tsɨ́nꞌ₂ jláꞌ₁ në́₃.
4 Qui₁jmoꞌ₅₄ bá₄ ꞌniaꞌ₂ jlángꞌ₁ të₂le₃ quianꞌ₅₄ a₂rë₃ꞌma₄ të₂ꞌauꞌ₂ ꞌniaꞌ₂, a₂rë₂lag₄ quianꞌ₅₄ caun₂ jme₂dsí₂ a₂jmoꞌ₂ ꞌniaꞌ₂ megꞌ₂. A₂rë₃lɨn₄ dsa₂ le₂në₅ bá₄ lë́₅ caun₂ a₂jláꞌ₁ a₂tsá₃ lɨ́gꞌ₂ jmɨg₄ dsɨ₃ꞌén₂, tonꞌ₂ quen₅ ꞌŋio₅ lɨn₃ të₂le₃ ja₁con₂ Diú₄.
5 Ia₁ le₂në₅ bá₄ jme₁qui₂le₁lɨn₄ dsa₂ mɨ́₂ i₂jme₁lë́₄ ꞌí₁ quián₅ Diú₄ ma₂lɨ́gꞌ₂: jme₁i₂nioi₅₄ caun₂ bá₄ jme₁le₁ꞌág₄ dsɨ́₅ le₃quióꞌ₅ Diú₄, tonꞌ₂ tioinꞌ₅₄ ꞌéiꞌ₃ quióꞌ₅ dsɨ₂i₂gu₂.
6 Ján₃ bá₄ le₂në₅ jme₁lɨ́n₄ Sara, ca₂nág₂ gau₂ jág₁ quióꞌ₅ Abraham, jaun₂ ca₂të₃ “Guiꞌ₅₄ quiáng₃”. Le₂në₅ bá₄ dsi₁nóꞌ₅ ꞌniaꞌ₂ léngꞌ₂ juɨ₁liaꞌ₂ jme₁lɨ́n₄ ꞌéi₂, në₂jag₄ bá₄ chiꞌ₂ quiáin₅ bá₄ ján₃, në₁juaꞌ₂ ca₂jmoꞌ₅₄ conꞌ₂ dsi₂ten₅₄, tsá₃ ma₃ꞌe₂ gau₂ jiá₃ ꞌauꞌ₂ ꞌniaꞌ₂.
7 Le₂në₅ bá₄ ján₃, ꞌniaꞌ₂ dsa₂ ŋeꞌ₂, jmo₄ ꞌniaꞌ₂ ꞌen₅₄ ꞌauꞌ₂ ꞌa₂ liaꞌ₂ tiángꞌ₄ quianꞌ₅₄ dsa₂ mɨ́₂ quiángꞌ₂, juɨ₁ŋei₂ bá₄ a₂ca₂tɨ́in₂ jme₁gainꞌ₃ ꞌniaꞌ₂, ia₁ lɨ́in₅ i₂ꞌuan₅₄ guë́₄ liaꞌ₂ conꞌ₂ guë́₄ guiongꞌ₅₄, lɨ́in₅ co₂ꞌnióꞌ₄ caun₂ nɨ₁vaso a₂goꞌ₂ guë́₄; ia₁ co₂rë₂ bá₄ lɨ́nꞌ₅ ꞌniaꞌ₂ dsa₂ i₂rë₂gonꞌ₅₄ i₂ca₂tɨ́n₂ le₃chan₂ dse₃. Le₂në₅ jmo₄ ꞌniaꞌ₂ ia₁jaun₂ ꞌi₁caun₂ tsá₃ ꞌe₂ jnág₅ cha₂ jë₁ma₂të́₂ rë₁chi₁lenꞌ₄ ꞌniaꞌ₂ Diú₄.
Dsa₂ i₂ŋág₅ uɨg₅ ne₄ ia₁ a₂jmo₂₃ a₂dse₃
8 Jë₁ca₂tóꞌ₂ rɨnꞌ₅₄ jniog₄, juɨ₁chanꞌ₂ bá₄ ꞌniaꞌ₂ ca₂le₃jɨ́ngꞌ₃ ꞌei₅ caun₂ jág₁, jengꞌ₂ quianꞌ₅₄ rɨ́ngꞌ₂; ꞌua₁ ꞌauꞌ₂ ꞌniaꞌ₂ jmo₄; jme₁ꞌnió₄ ꞌniaꞌ₂ rɨ́ngꞌ₂; juɨ₁chanꞌ₂ ꞌniaꞌ₂ ŋéi₂ ꞌauꞌ₂; jmo₄ ꞌniaꞌ₂ megꞌ₂ në́₃.
9 Tsá₃ lë₁jeinꞌ₅₄ ꞌniaꞌ₂ ꞌlɨgꞌ₅₄ quianꞌ₅₄ a₂ꞌlɨgꞌ₅₄; tsá₃ të₁ꞌóngꞌ₁ dsa₂ i₂të₂ꞌoꞌ₂. Të₂le₃ jeinꞌ₅₄ jág₁ dse₃ a₂jme₃guꞌ₅₄ Diú₄ quióꞌ₅ dsa₂ le₂ꞌéi₂. Ia₁ ta₁ në₅ bá₄ a₂ꞌnio₃ Diú₄ jmóꞌ₂ ꞌniaꞌ₂ a₂ma₂ca₂të₃, ia₁jaun₂ bá₄ tɨnꞌ₃ ꞌniaꞌ₂ jme₃guꞌ₅₄ Diú₄.
10 Ia₁:
Ca₂le₃jɨ́n₃ dsa₂ i₂ꞌnio₃ le₃chan₂ dse₃
ca₂tɨ́in₂ jmo₃ ꞌí₁ le₁tsɨꞌ₂
jaun₂ tsá₃ ꞌŋiái₃ jág₁ ꞌlɨgꞌ₅₄,
on₃ guëꞌ₂ ꞌnióꞌ₅ ꞌuë́ꞌ₃ jág₁ të₂jág₁ mɨ₂ꞌo₅₄.
11 Co₂dsia₅ ꞌnióꞌ₅ quiáꞌ₂ dsa₂ cau₅
juɨ₁liaꞌ₂ juɨ₅ ꞌlɨgꞌ₅₄, jmo₃ ca₂ne₅₄ a₂dse₃;
ꞌnióꞌ₅ ꞌnoꞌ₂ dsa₂ juɨ₅ ja₁ꞌei₅ tei₄,
jaun₂ juɨ₅ jaun₂ ꞌen₃.
12 Ia₁ jme₁ne₁ Te₁guiꞌ₅₄ tsá₃ ꞌna₂ jɨ́in₂ dsa₂ dsen₃,
tonꞌ₂ rë₂jáin₁ nag₂₃ ꞌe₂ chi₂léiꞌ₂ dsa₂ quiáin₅,
la₁ të₂le₃ quióꞌ₅ i₂jmo₅ a₂ꞌlɨgꞌ₅₄,
le₂cau₅ bá₄ jéinꞌ₅ ne₅₄.a
13 ¿I₂ꞌein₂ bá₄ lé₂ le₃jmógꞌ₂ në₁juaꞌ₂ dsen₅₄ ꞌauꞌ₂ ꞌniaꞌ₂ ca₂jmoꞌ₅₄ a₂dse₃?
14 La₁ juɨ₁ꞌa₂ guë́₃ la₂ ŋagꞌ₅₄ ꞌniaꞌ₂ uɨg₅ ne₄ ia₁ a₂jmoꞌ₂ ꞌniaꞌ₂ a₂dse₃, la₁ia₁ ꞌe₂ guë́₄ dsenꞌ₃ ꞌniaꞌ₂ changꞌ₂ juaꞌ₅₄ le₂jaun₂. Tsá₃ jmo₂ ꞌniaꞌ₂ gangꞌ₃ ꞌe₂ a₂góꞌ₅ dsa₂ ꞌéi₂ chain₂, on₃ guëꞌ₂ cánꞌ₁ ꞌniaꞌ₂ juë́ꞌ₅.b
15 Të₂le₃ jmo₄ bá₄ ꞌniaꞌ₂ ꞌauꞌ₂ a₂lɨ́n₅ Cristo juɨgꞌ₂ ꞌniaꞌ₂ i₂jŋió₅, a₂lë́₅ ꞌí₁ të₂ꞌauꞌ₂ ꞌniaꞌ₂. Chanꞌ₂ ꞌniaꞌ₂ rë₂jángꞌ₁, a₂jeinꞌ₅₄ jág₁ quióꞌ₅ dsa₂ i₂ꞌnio₃ le₃ŋi₅ ꞌa₂ liaꞌ₂ lë́₅ a₂ꞌɨ́n₂ ꞌauꞌ₂ ꞌniaꞌ₂. Jŋiaꞌ₅₄ liaꞌ₂ jmo₄ a₂në₅ jmáꞌ₃ liaꞌ₂ quianꞌ₅₄ a₂ꞌua₁ ꞌauꞌ₂, a₂jme₁ganꞌ₃ ꞌniaꞌ₂ dsa₂ në́₃, a₂qui₂le₁jë́₃ a₂qui₂dsɨ₂jŋi₅ ꞌauꞌ₂,
16 ia₁jaun₂ le₃guiꞌ₅₄ dsa₂ i₂chi₂ꞌag₅ ꞌlɨgꞌ₅₄ o₄quióꞌ₄ juɨ₅ dse₃ a₂i₂nioꞌ₄ ꞌniaꞌ₂ le₃quióꞌ₅ Cristo.
17 Në₁juaꞌ₂ le₂jaun₂ ꞌnio₃ Diú₄, ja₂lɨn₃ guë́₄ dse₃ a₂ŋág₅ dsa₂ uɨg₅ ne₄ ia₁ a₂jmo₂₃ a₂dse₃, liaꞌ₂ conꞌ₂ guë́₄ ne₄ a₂jmo₂₃ a₂ꞌlɨgꞌ₅₄.
18 Ia₁ le₂në₅ bá₄ ján₃, co₂ráun₂ bá₄ ca₂jon₃ Cristoc jme₁ca₂join₃ ne₄ ꞌuɨg₅₄ dsáu₁ jniog₄. I₂jme₁lɨ́n₄ jan₂ dsa₂ dsen₃ co₂ŋɨ́₂ bá₄ ꞌéi₂, ca₂join₃ o₄quióꞌ₄ dsa₂ cha₂ dsáu₁, ia₁jaun₂ të₂ ja₁con₂ Diú₄. Ca₂join₃ juɨ₅ nɨ₁ŋɨ₁₂, tonꞌ₂ ca₂jeinꞌ₅₄ bá₄ táng₃ të₂le₃ quianꞌ₅₄ Jme₂dsí₂.
19 Jaun₂ le₂në₅, ca₂ŋei₅₄ ca₂i₁ꞌë́₄ jág₁ ja₁con₂ jme₂dsí₂ i₂jme₁tionꞌ₅₄ le₁jnɨ́₅
20 i₂tsá₃ ca₂nág₂ gau₂ jmɨg₄ ma₂lɨ́gꞌ₂ jaun₂ liaꞌ₂ conꞌ₂ jme₁chan₂ Noé. Uë́₂ bá₄ ca₂jmo₃ Diú₄ juɨnꞌ₂ dsɨ́₅ ca₂jŋia₃ të₁liaꞌ₂ lë́₂ nɨ₁barco.d Jŋia₃ tan₅₄ dsa₂ bá₄ lë́₂ i₂ca₂lón₂ quianꞌ₅₄ a₂jaun₂ jme₁ca₂ꞌa₃ jmɨg₂ mɨ₂güɨ́g₃.
21 A₂jaun₂ jángꞌ₅ caun₂ léi₄ jme₁chó₅ jniog₄ jmɨg₂ jmɨg₄ rë₂në́₃, a₂ma₂ca₂lag₃ jniog₄ dsa₂ i₂ma₂ca₂lón₂; on₃juaꞌ₅₄ a₂jŋiaꞌ₃ a₂ꞌlian₅₄ dsa₂, të₂le₃ a₂jangꞌ₂ jniog₄ caun₂ léi₄ a₂quián₁ jniog₄ caun₂ juɨ₅ a₂le₁jë́₃ jme₂dsí₂ quián₂ të₂le₃ ne₄ Diú₄ bá₄, tonꞌ₂ ca₂ló₂ jniog₄ të₂le₃ quianꞌ₅₄ juɨ₅bí₂ a₂ca₂jenꞌ₅₄ Jesucristo.
22 Ca₂uɨ́g₂ táng₃ ŋáiꞌ₃ gueiꞌ₅₄ i₂juɨ́g₃; ja₁jaun₂ guá₅ të₂le₃ gu₂ ne₁ Diú₄; ꞌéiꞌ₃ quióꞌ₅ ꞌéi₂ bá₄ tionꞌ₅₄ ca₂le₃jɨ́n₃ ángeles quianꞌ₅₄ ca₂le₃jɨ́n₃ i₂lɨ́n₅ ta₁, ca₂le₃jɨ́n₃ guë́₄ i₂ꞌio₅ juɨ₅bí₂ në́₃.