A₂jme₂ti₃ dsa₂ liaꞌ₂ conꞌ₂ lë́₅ juɨ₅bí₂ a₂ma₂cuë₃ Diú₄
4
Jaun₂ lë₃, ia₁ ca₂ŋág₃ Cristo uɨg₅ juɨ₅ nɨ₁ŋɨ₁₂, le₂në₅ bá₄ ꞌniaꞌ₂ ján₃ chanꞌ₂ ꞌniaꞌ₂ rë₂lɨngꞌ₅₄ caun₂ ꞌéi₂ ꞌniaꞌ₂ ꞌauꞌ₂ a₂cánꞌ₁ jmɨ₁uɨg₅. Ia₁ juɨ₁liaꞌ₂ dsa₂ i₂ma₂ca₂ŋág₃ uɨg₅ juɨ₅ nɨ₁ŋɨ₁₂, co₂dsia₅ ma₂tí₂ bá₄ juɨ₅ jë₁jme₁ꞌno₂₃ dso₄.
2 A₂le₃chain₂ táng₃ të₂le₃ ne₄ juɨ₅ ja₁ŋó₄, a₂jme₃ti₃ a₂ꞌnio₃ Diú₄ bá₄, tsá₃ ma₃le₃chain₂ juaꞌ₅₄ a₂cuë́ꞌ₃ guë́₄ o₂ꞌŋió₃ o₂jŋia₃ dsɨ₅ conꞌ₂ niog₅ mɨ₅ nɨ₁ŋɨ₁₂.
3 Tióꞌ₅, a₂ma₂ca₂ŋɨ́₂ juɨn₅₄ qui₂ma₂jmoꞌ₅₄ ꞌniaꞌ₂ ja₁ma₂ja₂nógꞌ₅, liaꞌ₂ conꞌ₂ lë́₅ jmo₅-dsáu₅ ca₂le₃jɨ́n₃ dsa₂ i₂tsá₃ cuɨn₅ Diú₄. Ia₁ jme₁chanꞌ₂ ꞌniaꞌ₂ tsá₃ caun₂ a₂jme₁ꞌɨ́n₅ ꞌauꞌ₂; tsá₃ caun₂ a₂ꞌlɨgꞌ₅₄ a₂jme₁qui₂lë́₂ ꞌauꞌ₂ ꞌniaꞌ₂ në́₃; jme₁qui₂i₂niogꞌ₅₄ qui₂le₁ꞌengꞌ₅; jme₁qui₂quë́ꞌ₂ ꞌniaꞌ₂ tóngꞌ₂ chíꞌ₅ co₂mɨꞌ₅₄ niog₅ jmɨg₄. Jme₁ꞌágꞌ₂ ꞌniaꞌ₂ ca₂liaꞌ₂ tsá₃ cuente niog₅; jme₁jme₂juɨ́nꞌ₂ ꞌniaꞌ₂ diú₄ lag₄, caun₂ a₂ꞌioꞌ₅₄ Diú₄.
4 Dsɨ₂góꞌ₃ dsɨ́₅ dsa₂ ꞌéi₂ a₂tsá₃ jme₂quiainꞌ₅₄ ꞌniaꞌ₂ jë₄ ca₂le₃jë́₃ a₂i₂juɨn₅₄ a₂ꞌlɨgꞌ₅₄ a₂jmo₅-dsáu₅, jaun₂ ꞌlɨgꞌ₅₄ bá₄ ꞌag₂₃.
5 La₁ já₅ bá₄ jmɨg₄ ja₁jángꞌ₃ cuenta quióꞌ₅ ne₄ i₂ma₂lë́₅ co₂jŋia₅₄ con₂ ꞌí₁ liaꞌ₂ quióꞌ₅ i₂chan₂ liaꞌ₂ quióꞌ₅ i₂ma₂dsan₃ në́₃.
6 ꞌUɨg₅₄ në₅, ca₂rë₃ꞌë́₂ jág₁ dse₃ ca₂liaꞌ₂ ja₁con₂ dsa₂ i₂ma₂dsan₃: ia₁jaun₂ të₃dsɨ₅₄ ꞌéiꞌ₃ le₃quióꞌ₅ nɨ₁ŋɨ₁₂, liaꞌ₂ conꞌ₂ lë́₅ dsɨ₂jiog₅ dsɨ́₅ dsa₂ mɨ₂güɨ́g₃, ia₁jaun₂ guë́₄ le₃chain₂ juɨ₅ jme₂dsí₂ në́₃, liaꞌ₂ conꞌ₂ lë́₅ dsɨ₂jiog₅ dsɨ́₅ Diú₄.
7 La₁ ja₂quián₃ bá₄ jmɨg₄ jë₁dsian₅ ca₂le₃jë́₃. Jaun₂ në́₃ lenꞌ₅₄ ꞌniaꞌ₂ changꞌ₂, ꞌen₅₄ ꞌauꞌ₂, ia₁jaun₂ lé₂ chi₁léngꞌ₄ Diú₄.
8 La₁ a₂dsen₅₄ guë́₄ ꞌŋio₅ lɨn₃, ꞌnióꞌ₅ a₂jme₁ꞌnióꞌ₄ ꞌniaꞌ₂ rɨ́ngꞌ₂ ꞌŋio₅ lɨn₃ le₂jangꞌ₂ le₂jangꞌ₂. Ia₁ ja₁ꞌnio₃ dsa₂ rɨinꞌ₅₄, ꞌlióng₂ o₂ꞌén₂ dso₄ cha₂ ja₁con₂ rɨnꞌ₅₄ dsa₂.a
9 Guen₅₄ ꞌniaꞌ₂ rɨ́ngꞌ₂ i₂qui₂dsɨ₂jag₅₄ dsi₂néi₂ quiángꞌ₂, on₃juaꞌ₅₄ a₂qui₂dsɨ₂méꞌ₂ ꞌauꞌ₂ quiainꞌ₅₄.
10 Le₂janꞌ₂ le₂janꞌ₂ ꞌniaꞌ₂ ca₂tɨ́ngꞌ₂ jme₁ꞌongꞌ₁ rɨ́ngꞌ₂ liaꞌ₂ conꞌ₂ lë́₅ ma₂ca₂rë₃tɨ́ngꞌ₃ a₂ꞌlióng₂ ne₅₄ a₂ma₂ca₂jme₃guꞌ₅₄ Diú₄, a₂niog₅ gogꞌ₂ ꞌniaꞌ₂ jmóꞌ₂.
11 Në₁juaꞌ₂ ꞌein₂ ꞌnio₃ te₂néiꞌ₂ jág₁, juɨ₁te₂néiꞌ₂ bá₄ quianꞌ₅₄ jág₁ quióꞌ₅ Diú₄. Në₁juaꞌ₂ chan₂ guëꞌ₂ ꞌein₂ ꞌnio₃ jme₃ꞌo₅₄ juɨ₁jme₂ꞌo₅₄ bá₄ liaꞌ₂ conꞌ₂ lë́₅ juɨ₅bí₂ a₂ma₂cuë₅ Diú₄, ia₁jaun₂ le₂në₅ bá₄ le₃juɨnꞌ₂ Diú₄ ne₄ ca₂le₃jë́₃ të₂le₃ quianꞌ₅₄ Jesucristo. ꞌÉi₂ bá₄ ca₂tɨ́n₂ ŋe₂ ca₂le₃jë́₃ ti₁ꞌmagꞌ₄, ca₂le₃jë́₃ juɨ₅bí₂, ca₂le₃jë́₃ jmɨg₄ co₂tan₅₄. ¡A₂méi₃*!
A₂ŋág₅ dsa₂ uɨg₅ ne₄ ꞌuɨg₅₄ ia₁ a₂ꞌéin₂
12 ꞌNiaꞌ₂ rɨnꞌ₅₄ jniog₄ i₂ꞌnióg₃, tsá₃ lë₁jmo₂ ꞌniaꞌ₂ go₂ꞌi₃ jme₁dsɨ₂ŋɨ́gꞌ₂ táu₂ a₂lë́₅ liaꞌ₂ lë́₅ si₂ dséi₂ ja₁conꞌ₂ ꞌniaꞌ₂, juaꞌ₅₄ a₂le₃jmóꞌ₂ ꞌniaꞌ₂ ꞌauꞌ₂ juaꞌ₅₄ a₂tsá₃ ma₂cuɨnꞌ₂ ꞌniaꞌ₂, ꞌa₂ liaꞌ₂ lë́₅ dsɨ₂ŋɨ́gꞌ₂.
13 Të₂le₃ jmo₄ ꞌniaꞌ₂ ꞌioꞌ₂, ia₁ le₂në₅ bá₄ canꞌ₂ ꞌniaꞌ₂ ján₃ jmɨ₁uɨg₅ juɨ₁liaꞌ₂ a₂ca₂i₃ŋɨ́₂ Cristo, ia₁jaun₂ bá₄ cánꞌ₁ ꞌniaꞌ₂ ján₃ o₂ꞌŋió₃ ꞌauꞌ₂ ꞌŋio₅ lɨn₃ jë₁ma₂të́₂ rë₁jme₃jniai₂₃ ꞌa₂ liaꞌ₂ jláinꞌ₁.
14 ꞌE₂ guë́₄ dsenꞌ₃ ꞌniaꞌ₂ jme₁të₂ꞌoꞌ₂ ꞌein₂ të₂ꞌoꞌ₂ o₄quióꞌ₄ Cristo, ia₁ le₂në₅ bá₄ të₂ꞌŋiá₄ Jme₂dsí₂ quián₅ Diú₄ i₂tág₅ co₂ꞌnéꞌ₅ ne₄ quiánꞌ₂ ꞌniaꞌ₂.
15 Chi₂juaꞌ₂ ꞌein₂ ꞌniaꞌ₂ dsɨ₂ŋɨ́₂ uɨg₅, la₁ lag₃ në₁juaꞌ₂ tsá₃ lë́₅ dso₄ ꞌang₂, o₃ a₂ca₂jŋɨiꞌ₃ dsa₂, o₃ chan₂ i₂ca₂cuë́ꞌ₃ dsa₂ mɨ₂güɨ́g₃ rɨinꞌ₅₄, o₃ a₂qui₂tiáin₂ caun₂ ja₁tsá₃ ca₂tɨ́in₂.
16 La₁ në₁juaꞌ₂ ŋagꞌ₅₄ ꞌniaꞌ₂ uɨg₅ ca₂ne₅₄ ia₁ a₂lɨ́ngꞌ₅ dsa₂ “cristianos”, tsá₃ ꞌnióꞌ₅ jmóꞌ₂ ꞌniaꞌ₂ guengꞌ₅₄. Diú₄ bá₄ ꞌnióꞌ₅ jme₁juɨnꞌ₂ ꞌniaꞌ₂ ia₁ a₂quiong₅ dsa₂ le₂jaun₂.
17 Ia₁ ma₂të́₂ jmɨg₄ a₂të₂dsɨ₅₄ ꞌéiꞌ₃ le₂ꞌuɨg₅₄ deꞌ₂ ja₁con₂ dsa₂ dsi₂néi₂ quióꞌ₅ Diú₄. Chi₂juaꞌ₂ le₂ꞌuɨg₅₄ jme₂lióg₃ quianꞌ₅₄ jniog₄, ¿ꞌa₂ bá₄ liaꞌ₂ dsióg₄ dsi₁ŋɨ́₂ ca₂le₃jɨ́n₃ i₂tsá₃ jme₂ti₃ jág₁ dse₃ quióꞌ₅ Diú₄?
18 Chi₂juaꞌ₂ quian₅ ta₁ lɨn₃ a₂tɨ́nꞌ₅ dsa₂ dsen₃, “¿ꞌë₂ guë́₄ bá₄ dsióg₄ dsi₁ŋɨ́₂ dsa₂ i₂tsá₃ Diú₄ cuɨn₅, i₂le₁cánꞌ₄ dso₄?”b
19 Jaun₂ në́₃, i₂ŋág₅ uɨg₅ liaꞌ₂ conꞌ₂ lë́₅ ꞌŋio₂ dsɨ́₅ Diú₄, ca₂tɨ́in₂ caun₂ jmo₃ a₂dse₃ bá₄, dsia₃ o₄gú₃ Diú₄ jme₂dsí₂ quióꞌ₅, ia₁ Diú₄ bá₄ i₂ca₂jmóꞌ₂ ꞌéi₂, i₂rë₂tiꞌ₅₄ në́₃.