Toinꞌ₂ jág₁ dse₃ dsa₂ ꞌén₂
5
Jaun₂ në́₃, jág₁ la₂ cuë́₅ jniá₂ ca₂le₃jɨ́n₃ dsa₂ canꞌ₅₄ i₂quian₅ ne₄ juɨ₅a quiánꞌ₂ ꞌniaꞌ₂, ia₁ le₂në₅ bá₄ jniá₂ ꞌŋió₃ ján₃ lɨ́ng₅ jan₂ dsa₂ juɨnꞌ₂ i₂niog₅ ne₄ guáꞌ₅, tonꞌ₂ lɨ́ng₅ jan₂ i₂ca₂të́₂ ne₄ ꞌa₂ liaꞌ₂ lë́₅ jmɨ₁uɨg₅ a₂ca₂i₃ŋɨ́₂ Cristo. Jaun₂ le₂në₅ bá₄ ján₃, lɨ́ng₅ jan₂ i₂jme₃quiainꞌ₅₄ jë₁ma₂të́₂ rë₁jme₃jniai₂₃ a₂jláinꞌ₁. Jág₁ la₂ juɨ́g₂ jniá₂ ꞌniaꞌ₂:
2 Dse₃ jmo₄ ꞌniaꞌ₂ ꞌí₁ guáꞌ₅ quián₅ Diú₄ i₂lɨ́n₅ co₂nióꞌ₃ jáꞌ₂ chaꞌ₂ i₂niog₅ gogꞌ₂. Jmo₄ ꞌniaꞌ₂ ta₁ në₅ a₂ꞌŋio₂ ꞌauꞌ₂, liaꞌ₂ conꞌ₂ lë́₅ ꞌnio₃ Diú₄. Tsá₃ jmo₂ ꞌniaꞌ₂ ꞌauꞌ₂ juaꞌ₅₄ a₂chan₂ i₂chi₂quióng₂ jmɨg₄, on₃ guëꞌ₂ jmo₂ ꞌniaꞌ₂ ꞌauꞌ₂ juaꞌ₅₄ a₂ŋɨ́₄ ꞌɨ́n₅ ꞌauꞌ₂ cu₄ në́₃. Jmo₄ ꞌniaꞌ₂ ta₁ quióꞌ₅ Diú₄ a₂dsen₅₄ ꞌauꞌ₂.
3 Tsá₃ jmo₂ ꞌniaꞌ₂ juaꞌ₅₄ guionꞌ₅₄ ꞌniaꞌ₂ ca₂tɨ́ngꞌ₂ jmóꞌ₂ gongꞌ₂ ne₄ quióꞌ₅ guáꞌ₅ i₂niog₅ gogꞌ₂, të₂le₃ ca₂tɨ́nꞌ₂ bá₄ ꞌniaꞌ₂ cuëꞌ₅₄ caun₂ juɨ₅ dse₃ jáꞌ₂ chaꞌ₂ quián₅ Diú₄.
4 Jaun₂ bá₄ jë₁ma₂të́₂ jmɨg₄ i₁jme₃jnia₅ i₂lɨ́n₅ juɨg₅₄ dsen₅₄ i₂quián₅ juɨg₅₄ jáꞌ₂ chaꞌ₂, ŋeꞌ₂ ꞌniaꞌ₂ jma₃cáun₃ corona a₂tsá₃ lɨ́gꞌ₂ jmɨg₄ le₃juɨng₅.
5 Le₂në₅ bá₄ ꞌniaꞌ₂ dsa₂ chiꞌ₂ ján₃, tiónꞌ₂ ꞌniaꞌ₂ ꞌéiꞌ₃ quióꞌ₅ dsa₂ canꞌ₅₄ quiánꞌ₂ ꞌniaꞌ₂. Tonꞌ₂ juɨ₁qui₂rë₂lɨngꞌ₅₄ quianꞌ₅₄ a₂megꞌ₂ ja₁con₂ rɨ́ngꞌ₂ le₂jangꞌ₂ le₂jangꞌ₂, ia₁:
Tsá₃ jen₅₄ Diú₄ juɨ₁liaꞌ₂ dsa₂ i₂jmo₅ rón₂,
la₁ jme₂ꞌoin₅₄ a₂ꞌua₁ dsɨ́₅ dsa₂ i₂jmo₅ meꞌ₂.b
6 Jaun₂ në́₃, le₂në₅ jmo₄ ꞌniaꞌ₂ megꞌ₂ o₄gú₃ bén₂ quióꞌ₅ Diú₄ ia₁jaun₂ bá₄ chóꞌ₂ ꞌéi₂ jmɨg₄ jaun₂ quióꞌ₅.
7 O₄gú₃ ꞌéi₂ dsia₄ ꞌniaꞌ₂ ca₂le₃jë́₃ ꞌe₂ o₂i₁ dsɨ₅ a₂chanꞌ₂ ꞌniaꞌ₂, ia₁ dsan₂ bá₄ dsɨ́₅ ꞌéi₂ ꞌniaꞌ₂ ján₃.
8 ꞌEn₅₄ ꞌauꞌ₂ ꞌniaꞌ₂ jmo₄, changꞌ₂ rë₂jángꞌ₁, ia₁ i₂së₃dsen₃ i₂ꞌŋia₅₄ ꞌniaꞌ₂ ŋɨ₂₃ lɨ́in₅ liaꞌ₂ lɨ́n₅ ꞌiaꞌ₂ i₂ŋɨ₅ i₂jme₂ꞌne₅₄ ꞌŋióg₂ a₂ꞌnaiꞌ₂ ꞌein₂ i₂ꞌnio₃ quɨinꞌ₂.
9 Quianꞌ₅₄ a₂ꞌénꞌ₂ ꞌniaꞌ₂, nau₂ tiá₂ quengꞌ₂ ne₅₄, ia₁ ŋiꞌ₅₄ bá₄ ꞌniaꞌ₂ ta₁caun₂ mɨ₂güɨ́g₃ bá₄ qui₂dsɨ₂ŋɨ́₂ rɨ́ngꞌ₂ jmɨ₁uɨg₅ le₂në₅ ján₃.
10 Ia₁ jë₁ma₂ca₂ŋɨꞌ₂ ꞌniaꞌ₂ co₂ꞌna₂ uɨg₅ le₂në₅, ꞌŋiog₅ bá₄ Diú₄ i₂ꞌua₁ dsɨ́₅ lɨn₃ cheiꞌ₃ táng₃ rë₂ a₂jme₃ꞌŋiai₂₃ a₂ꞌnióꞌ₅ guë́₄ quiánꞌ₂ ꞌniaꞌ₂, cuë₃ bí₂ náuꞌ₁ ꞌniaꞌ₂ tiá₂. Jme₃guꞌ₅₄ bá₄ ꞌéi₂ jniog₄ ne₄ ca₂le₃jë́₃ ne₅₄ a₂dse₃. Ia₁ ma₂ca₂të₃ jniog₄ le₃quióꞌ₅ Cristo Jesús, a₂jme₁quiainꞌ₄ jniog₄ co₂tan₅₄ ja₁co₂tág₅ co₂ꞌnéꞌ₅ quióꞌ₅.
11 ꞌÉi₂ bá₄ ca₂tɨ́n₂ juɨ₅bí₂ ca₂le₃jë́₃ jmɨg₄ co₂tan₅₄. A₂méi₃.*
Cuag₂₃ Diú₄ jë₁ca₂tóꞌ₂ jë₁ꞌágꞌ₅ jág₁
12 Të₂le₃ quianꞌ₅₄ Silvanoc i₂jɨng₅₄ liaꞌ₂ ja₁jɨng₁₂ jan₂ rɨ́ngꞌ₃ i₂rë₂tiꞌ₅₄, ma₂jmo₃ si₂ la₂ ja₁juáꞌ₅ tɨn₃-ꞌnɨ₅ jon₂ jág₁ a₂cuë́₃ bí₂ ꞌniaꞌ₂. Jág₁ a₂ma₂në₂juáꞌ₃ jniá₂ në₅, jángꞌ₅ léi₄ ꞌa₂ liaꞌ₂ dsónꞌ₂ ꞌua₁ dsɨ́₅ Diú₄. Jaun₂ nau₂ ꞌniaꞌ₂ tiá₂ juɨ₅ në₅.
13 Guáꞌ₅ i₂chan₂ ja₁të́ꞌ₂ dsa₂ juɨg₂ “Babilonia” la₂, dsa₂ i₂ma₂ca₂quiónꞌ₂ Diú₄ juɨ₁liaꞌ₂ ma₂ca₂quióinꞌ₂ ꞌniaꞌ₂, dsiáinꞌ₂ jág₁ a₂cuɨin₂₃ Diú₄ ꞌniaꞌ₂, le₂jaun₂ bá₄ Marcos jón₃ quiáng₃ në́₃.
14 Cuɨn₅₄ ꞌniaꞌ₂ Diú₄ rɨ́ngꞌ₂ le₂jangꞌ₂ le₂jangꞌ₂, chenꞌ₅₄d ꞌniaꞌ₂ júꞌ₅ rɨ́ngꞌ₂ ia₁ a₂ꞌniógꞌ₃ rɨ́ngꞌ₂.
Tiánꞌ₂ bá₄ ꞌniaꞌ₂ ꞌei₅ tei₄ ca₂le₃jɨ́nꞌ₃ ꞌniaꞌ₂ i₂tén₅ le₃quióꞌ₅ Cristo.
Co₂në₅.