Si₂ carta jë₁ca₂të́₂ tɨn₃ a₂ca₂jmo₃
SAN JUAN
Jág₁ dsau₅, quianꞌ₅₄ ꞌa₂ liaꞌ₂ ꞌnióꞌ₅ jme₃ꞌnio₃ dsa₂ rɨinꞌ₅₄
1
Jniá₂ i₂lɨ́ng₅ guiꞌ₅₄ juɨnꞌ₂ quián₅ guáꞌ₅ jmo₂₃ si₂ la₂ tsɨ́ng₂ neꞌ₅₄ ꞌne₂ ꞌio₅₄a rɨnꞌ₅₄ jniog₄ i₂ma₂quionꞌ₅₄ quián₅ Diú₄, quianꞌ₅₄ chiꞌ₂ quiángꞌ₂ i₂ꞌnióg₃ guë́₄ lɨn₃. On₃juaꞌ₅₄ jmáꞌ₃ jniá₂ ꞌnióg₃ ꞌniaꞌ₂, ján₃ bá₄ ꞌnio₃ ca₂le₃jɨ́n₃ i₂ma₂le₁ŋi₅ jág₁ tí₅.
2 O₄quióꞌ₄ jág₁ dsau₅ bá₄ ꞌnióg₃ ꞌniaꞌ₂, jág₁ a₂ma₂të₁ꞌŋiá₄ të₂dsɨ₅ jniog₄, tonꞌ₂ jiog₅ co₂tan₅₄ ja₁con₂ jniog₄.
3 Diú₄ Jmei₂ quianꞌ₅₄ Te₁guiꞌ₅₄ Jesucristo Ja₁ŋiꞌ₅₄, juɨ₁jme₂guꞌ₅₄, dsia₃ ŋéiꞌ₂ dsɨ́₅, jmo₃ ꞌag₃ tei₄ ꞌauꞌ₂ ꞌniaꞌ₂, ia₁ a₂dsónꞌ₂ bá₄ ꞌnioi₃ ꞌniaꞌ₂.
4 ꞌŊio₅ të₅ dsɨ₃ ia₁ ma₂jɨng₅₄ i₂lɨn₅₄ chiꞌ₂ quiángꞌ₂ tiáinꞌ₅ bá₄ liaꞌ₂ conꞌ₂ lë́₅ jág₁ tí₅, liaꞌ₂ conꞌ₂ lë́₅ juáꞌ₂ Diú₄ Jmei₂ jniog₄, ꞌéiꞌ₃ a₂ma₂cuë₃.
5 Në₃ në́₃ ꞌio₅₄ rɨnꞌ₅₄ jniog₄, mɨ₅ jniá₂ juɨ́g₂ ꞌne₂, a₂jme₁ꞌnió₄ jniog₄ rɨnꞌ₅₄ le₂jau₂ le₂jau₂. A₂juáꞌ₅ jniá₂ ne₄ si₂ la₂, on₃juaꞌ₅₄ ꞌéiꞌ₃ ꞌmɨ́₂ la₂, ꞌéiꞌ₃ jaun₂ bá₄ la₂ juɨ₁liaꞌ₂ ꞌéiꞌ₃ a₂jme₁ma₂ron₅ quián₂ jniog₄ le₂ꞌuɨg₅₄.
6 Le₂në₅ bá₄ jme₁ꞌnió₄ jniog₄ rɨnꞌ₅₄: a₂i₂nio₄ jniog₄ liaꞌ₂ conꞌ₂ lë́₅ ꞌéiꞌ₃ quióꞌ₅ Diú₄. ꞌÉiꞌ₃ a₂ma₂neiꞌ₂ ꞌniaꞌ₂ le₂ꞌuɨg₅₄ bá₄ jaun₂, a₂le₃changꞌ₂ jme₁ꞌniógꞌ₄ rɨ́ngꞌ₂.
Juɨ₁liaꞌ₂ dsa₂ i₂jme₂gau₅
7 Le₂con₂ mɨ₂güɨ́g₃ bá₄ i₂nio₄ juɨn₅ dsa₂ i₂jme₂gau₅, tsá₃ jág₁ jmo₂₃ juaꞌ₅₄ a₂juáꞌ₂ a₂ca₂guan₃ Te₁guiꞌ₅₄ chi₁dsáin₃. Dsa₂ le₂ꞌéi₂ bá₄ lɨ́n₅ i₂jme₂gau₅, i₂ꞌŋia₅₄ Cristo në́₃.
8 Jmo₄ ꞌniaꞌ₂ ꞌí₁ ia₁jaun₂ tsá₃ lë₁dsɨ₃ꞌén₂ ta₁ quiánꞌ₂ ꞌniaꞌ₂ a₂jmoꞌ₂ ia₁ ꞌéngꞌ₂, jaun₂ bá₄ tɨnꞌ₃ ꞌniaꞌ₂ liaꞌ₂ ꞌŋia₅ ꞌliangꞌ₅₄ cuë₃ Diú₄.
9 Ia₁ juɨ₁ꞌein₂ guë́₃ i₂dsɨ₂jŋiá₄ jmo₂₃ ŋag₅₄ guë́₄ jme₂tag₂₃ conꞌ₂ jág₁ a₂ma₂ca₂jme₃tag₅ Cristo, tsá₃ Diú₄ quianꞌ₅₄ dsa₂ ꞌéi₂. La₁ juɨ₁liaꞌ₂ i₂juáꞌ₂ jme₂tag₂₃ conꞌ₂ lë́₅ ca₂jme₃tag₅ Cristo, chan₂ Diú₄ Jmei₂ ja₁coin₂, ján₃ guëꞌ₂ quiainꞌ₅₄ bá₄ Ja₁ŋiꞌ₅₄ Diú₄ në́₃.
10 Në₁juaꞌ₂ chan₂ i₂ca₂dsióg₃ ja₁conꞌ₂ ꞌniaꞌ₂, la₁ në₁juaꞌ₂ tsá₃ jme₂tag₂₃ liaꞌ₂ conꞌ₂ lë́₅ jág₁ në₅, tsá₃ lë₁guéin₅ ꞌniaꞌ₂ dsi₂néi₂ quiángꞌ₂, ca₂liaꞌ₂ jŋiaꞌ₅₄ Diú₄ tsá₃ ꞌnióꞌ₅ cuɨ́inꞌ₄ ꞌniaꞌ₂.
11 Ia₁ në₁juaꞌ₂ chan₂ i₂ca₂cuɨn₃ Diú₄ dsa₂ le₂ꞌéi₂, co₂ꞌnióꞌ₄ queinꞌ₅₄ ꞌe₂ a₂ꞌlɨgꞌ₅₄ a₂jmo₅-dsáu₅ ꞌéi₂.
Jág₁ jë₁ca₂tóꞌ₂
12 ꞌLióng₂ bá₄ jág₁ a₂ꞌnio₃ jniá₂ juɨg₅₄ ꞌniaꞌ₂, la₁ tsá₃ ꞌnio₃ jniá₂ juaꞌ₅₄ a₂juáꞌ₄ të₂le₃ quianꞌ₅₄ si₂, on₃ guëꞌ₂ quianꞌ₅₄ jmɨ₁jné₂. Ia₁ ꞌɨ́n₂ dsɨ₃ jniá₂ dsióg₄ bá₄ ꞌŋió₃ ia₁jaun₂ dsiá₁ jniog₄ jág₁ dsi₁ne₁, ia₁jaun₂ le₃ꞌŋia₅ a₂ꞌioꞌ₂ jein₂ jniog₄.
13 Chiꞌ₂ quián₅ ꞌio₅₄ rɨ́ngꞌ₂ i₂ma₂quionꞌ₅₄ quián₅ Diú₄, dsiáinꞌ₂ jág₁ a₂cuɨin₂₃ Diú₄ ꞌniaꞌ₂.
Co₂në₅.