Si₂ carta jë₁ca₂të́₂ ꞌnɨ₅ a₂ca₂jmo₃
SAN JUAN
Dsia₅ dsa₂ dse₃ ꞌɨin₂₃ Gayo
1
Jniá₂ guiꞌ₅₄ juɨnꞌ₂ quián₅ guáꞌ₅, jmo₂₃ si₂ tsɨ́ng₂ neꞌ₅₄ ꞌne₂ Gayo a₂mei₅₄ quiáng₃, ia₁ të₃dsónꞌ₂ bá₄ ꞌnióg₃ ꞌne₂.
2 Chi₁lenꞌ₄ jniá₂ Diú₄ o₄quiánꞌ₂ ꞌne₂ rɨnꞌ₅₄ jniog₄, ia₁jaun₂ jmo₃ le₃changꞌ₂ dse₃. Juɨ₁ꞌei₅ bá₄ dse₃ ꞌauꞌ₂ ján₃, juɨ₁liaꞌ₂ ꞌei₅ ꞌauꞌ₂ të₂le₃ quianꞌ₅₄ jme₂dsí₂ quiángꞌ₂.
3 ꞌŊio₅ lɨn₃ ꞌioꞌ₂ jéin₅ jniá₂ jme₁ca₂o₃lén₂ i₂lɨn₅₄ rɨnꞌ₅₄ jniog₄. ꞌÉi₂ në́₃ ca₂dsia₃ ꞌa₂ liaꞌ₂ dse₃ ma₂changꞌ₂ rë₂tengꞌ₅₄ liaꞌ₂ conꞌ₂ lë́₅ jág₁ tí₅.
4 ꞌI₁caun₂ a₂siáꞌ₂ tsá₃ cha₂ juaꞌ₅₄ a₂lé₂ le₃jmo₃ ꞌag₃ dse₃ dsɨ₃ ꞌioꞌ₂ jéin₅, jŋiaꞌ₅₄ liaꞌ₂ a₂le₃guion₅₄ a₂i₂nio₄ bá₄ chiꞌ₂-guein₂ quiáng₃ liaꞌ₂ conꞌ₂ lë́₅ jág₁ tí₅.
5 A₂mei₅₄ quiáng₃, caun₂ a₂rë₂tiꞌ₅₄ bá₄ jaun₂ a₂jmoꞌ₂ ꞌne₂ jme₁cuëꞌ₂ gogꞌ₂-tagꞌ₅₄ o₄quióꞌ₄ rɨnꞌ₅₄ jniog₄, o₁jŋiaꞌ₅₄ tsá₃ cuɨinꞌ₂.
6 Të₃ ja₁le₁ŋɨꞌ₂ guáꞌ₅, ma₂ca₂jángꞌ₃ ꞌéi₂ jág₁ dsau₅ ꞌa₂ liaꞌ₂ ŋɨ́₄ lë₃ ꞌnióiꞌ₃. Jmo₄ dse₃ ꞌauꞌ₂ jme₁ꞌoin₁₂ a₂ꞌnióꞌ₅ quióꞌ₅, ia₁jaun₂ caun₂ dsɨ₃léin₂ bá₄ ne₄ juɨ₅ ja₁tioinꞌ₅₄ juɨ₅ dsi₁léin₂. Jmo₄ a₂të₅ dsɨ́₅ Diú₄.
7 Ia₁ tioinꞌ₅₄ juɨ₅ i₂léin₂ dsɨ₃jmó₂ ta₁ quióꞌ₅ Jesucristo, la₁ tsá₃ ꞌe₂ ma₂gue₃ ꞌi₁caun₂ quióꞌ₅ dsa₂ i₂tsá₃ ꞌén₂.
8 Jaun₂ lë₃, jniog₄ në́₃ ca₂tág₂ dsiá₁ gu₂, jme₁ꞌoin₁₂ a₂dsi₁léin₂ ja₁tioinꞌ₅₄ juɨ₅ dsɨ₃ꞌë́₃ jág₁ tí₅ quióꞌ₅ Diú₄.
Tsá₃ dse₃ jmo₅ Diótrefes
9 Ca₂jmo₃ jniá₂ caun₂ si₂ ca₂tsɨ́ng₂ ne₄ guáꞌ₅. La₁ Diótrefes tsá₃ gue₂₃ ꞌéiꞌ₃ quián₂ jniaꞌ₅₄, ia₁ ꞌnio₃ jme₃góin₃ ꞌŋiog₅ jmo₃ juɨinꞌ₂ cán₂ ne₄ juɨ₅ quióꞌ₅ guáꞌ₅.
10 Jaun₂ lë́₃, në₁juaꞌ₂ ca₂ŋó₃ jniá₂, i₁jéin₂ ia₁ ꞌe₂ lë₃ jmo₂₃ jág₁ të₂jág₁ ꞌag₂₃ jniaꞌ₅₄. Tsá₃ magꞌ₂ bá₄ guë́₄ dsɨ́₅ a₂jaun₂, ia₁ ján₃ bá₄ tsá₃ guein₂₃ rɨnꞌ₅₄ jniog₄ i₂dsɨ₂lén₂ në́₃; qui₂jné₅ bá₄ në₁juaꞌ₂ chan₂ guëꞌ₂ i₂ꞌnio₃ guei₃, ꞌuɨ́inꞌ₂ bá₄ ꞌéi₂ jë₄ quióꞌ₅ guáꞌ₅.
11 Rɨnꞌ₅₄ jniog₄, tsá₃ can₂ ꞌniaꞌ₂ juɨ₅ ꞌlɨgꞌ₅₄ quióꞌ₅ ꞌéi₂. Jmo₄ ꞌniaꞌ₂ a₂dse₃. Dsa₂ i₂jmo₅ a₂dse₃, i₂quián₅ Diú₄ bá₄ ꞌéi₂. La₁ i₂jmo₅ a₂ꞌlɨgꞌ₅₄ në́₃, tsá₃ ma₂ca₂rë₃cuɨin₂₃ Diú₄.
Caun₂ juɨ₅ dse₃ a₂rë₂jniá₂ ŋɨ₅ Demetrio
12 Ca₂le₃jɨ́n₃ bá₄ juáꞌ₂ dse₃ ꞌɨin₂₃ Demetrio. Ia₁ rë₂jniá₂ bá₄ ꞌa₂ liaꞌ₂ ŋɨ₂₃. Le₂në₅ bá₄ jniaꞌ₅₄ në́₃, dsia₂ jág₁ dse₃ ꞌɨ́n₅ ꞌéi₂, jaun₂ ŋiꞌ₅₄ ꞌniaꞌ₂, dsau₅ bá₄ jág₁ a₂jangꞌ₂ jniaꞌ₅₄.
Jág₁ jë₁ca₂tóꞌ₂
13 ꞌLióng₂ bá₄ jág₁ ꞌnio₃ jniá₂ juáꞌ₄, la₁ tsá₃ ꞌnio₃ jmo₅₄ quianꞌ₅₄ jmɨ₁jné₂ on₃ guëꞌ₂ quianꞌ₅₄ pluma;
14 ia₁ ꞌɨ́n₂ dsɨ₃ jniá₂ jag₅₄ dsi₁ne₁ ŋiꞌ₅₄ ta₁ la₂ ia₁jaun₂ dsiá₁ jág₁.
15 Juɨ₁changꞌ₂ bá₄ ꞌei₅ tei₄ ꞌauꞌ₂. Dsa₂ a₂mei₅₄ quiángꞌ₂ i₂chan₂ ja₁lá₃ chein₂₃ jág₁ a₂cuɨin₂₃ Diú₄ ꞌne₂. Jmo₄ dse₃ ꞌauꞌ₂ cuɨn₅₄ Diú₄ le₂jan₂ le₂jan₂ a₂mei₅₄ quián₂ ja₁në₅.
Co₂në₅.