3 ꞌNiaꞌ₂ rɨnꞌ₅₄ jniog₄ i₂ꞌnióg₃, lë́₂ dsɨ₃ ꞌŋio₅ lɨn₃ a₂jmo₅₄ si₂ tsɨng₅₄ ja₁conꞌ₂ ꞌniaꞌ₂ ja₁juáꞌ₄ juɨ₁liaꞌ₂ jág₁ a₂lión₂ dsa₂ a₂ma₂le₁ne₁ jniog₄. La₁ia₁, në₃ në́₃, ꞌnióꞌ₅ jmo₅₄ si₂ a₂chi₁lengꞌ₄ ꞌniaꞌ₂, a₂ꞌnióꞌ₅ quɨnꞌ₅₄ ꞌniaꞌ₂ bí₂ o₄quióꞌ₄ jág₁ a₂ꞌéin₂ jniog₄, jág₁ a₂ma₂dsia₃ Diú₄ o₄gú₃ dsa₂ i₂lë́₅ ꞌí₁ quiáin₅.^a

4 Ia₁ ma₂ca₂i₃tonꞌ₅₄ i₂lɨn₅₄ conꞌ₂ të₃coꞌ₅₄ jë₄ quiánꞌ₂ ꞌniaꞌ₂, dsa₂ i₂ma₂ja₂lén₂ rë₂ꞌɨ́n₄ ne₄ Si₂ ca₃ma₂lɨ́gꞌ₂ i₂ma₂tionꞌ₅₄ juɨ₅ dsɨ₃ꞌén₂. Lɨ́in₅ dsa₂ i₂tsá₃ Diú₄ cuɨn₅, i₂ꞌnio₃ jme₃tsɨ́n₃ jág₁ a₂ꞌua₁ dsɨ́₅ Diú₄ quián₂ jniog₄ conꞌ₂ tsá₃ o₁jau₅₄ juɨ₅ a₂tóinꞌ₃ jmo₃-dsáu₅ a₂ꞌlɨgꞌ₅₄ a₂ja₂ dsɨ́₅; tsá₃ tioin₂₃ a₂lɨ́n₅ Jesucristo i₂jan₂ tan₅₄ juɨg₅₄ jniog₄ Te₁guiꞌ₅₄ quián₂.

5 Juɨ₁la₂ ma₂le₁ŋiꞌ₅₄ ꞌniaꞌ₂, la₁ ꞌnio₃ jniá₂ juáꞌ₄ táng₃ ia₁jaun₂ dsiogꞌ₂ ꞌauꞌ₂, ia₁ liaꞌ₂ conꞌ₂ jme₁ca₂ꞌuɨ́nꞌ₂ Te₁guiꞌ₅₄^b dsa₂ juɨg₂ Israel ma₂lɨ́gꞌ₂ liaꞌ₂ conꞌ₂ jme₁tioinꞌ₅₄ ꞌuë₃ Egipto, la₁ ca₂jme₃dsiain₂₃ bá₄ i₂lɨn₅₄ dsa₂ ꞌéi₂ ia₁ tsá₃ ca₂ꞌéin₃.

6 Le₂jaun₂ bá₄ táng₃ quianꞌ₅₄ ángeles i₂tsá₃ ꞌí₁ ca₂lɨ́ꞌ₃ ta₁ a₂jme₁lɨ́in₄, të₂le₃ ca₂tí₂ bá₄ ja₁jme₁tiáinꞌ₄. ꞌÉi₂ në́₃ rë₂në́₃ tioinꞌ₅₄ le₁jnɨ́i₅ jë₄ qui₁néꞌ₃, ja₁ma₂le₁ꞌŋeiꞌ₅₄ co₂tan₅₄ quianꞌ₅₄ ŋí₁ cadenas, lë́₅ ꞌí₁ quióꞌ₅ Jmɨg₄ Juëꞌ₂ jaun₂.

7 Le₂në₅ bá₄ ján₃ juɨ₁liaꞌ₂ ca₂jmo₃ dsa₂ i₂jme₁chan₂ juɨg₂ Sodoma quianꞌ₅₄ Gomorra*, ca₂le₃jë́₃ guë́₄ juɨg₂ i₂jén₂ ma₂quián₅ jaun₂, ca₂jɨ́inꞌ₂ qui₂ca₂nióꞌ₃ ca₂le₃jë́₃ ne₅₄ jág₁ ꞌlɨgꞌ₅₄, qui₂i₃léin₂ chi₁coꞌ₅₄ quióꞌ₅ a₂ꞌɨ́n₅ dsɨ́₅ nɨ₁ŋɨ₁ i₂siánꞌ₂ a₂tsá₃ dsi₂ten₅₄ jmo₃. Uɨg₅ a₂ŋág₅ jë₄ si₂ a₂jiog₅ co₂tan₅₄ a₂ca₂gue₃ jaun₂, ꞌë́₂ jág₁ ja₁con₂ dsa₂ i₂chan₂ jmɨg₄ në₃.

8 Le₂në₅ bá₄ ján₃, të₂le₃ quianꞌ₅₄ ꞌe₂ a₂niog₅ quɨ₅ dsa₂ ꞌéi₂, qui₂jme₂ꞌióg₃ nɨ₁ŋɨ₁ guioin₅₄ quianꞌ₅₄ dso₄ a₂qui₂ꞌno₂₃, tsá₃ jiꞌ₅₄ ꞌéiꞌ₃, ꞌlɨgꞌ₅₄ bá₄ táun₂ le₃quióꞌ₅ i₂jlánꞌ₁ chan₂ quián₅ Diú₄.

9 Ia₁ ca₂liaꞌ₂ jŋiaꞌ₅₄ ángel Mi₂gue₅₄ i₂lɨ́n₅ i₂dsen₅₄ guë́₄ quián₅ Diú₄, liaꞌ₂ conꞌ₂ jme₂ca₂tsɨ́in₂ quianꞌ₅₄ i₂së₃dsen₃ ne₄ o₄quióꞌ₄ nɨ₁ŋɨ₁ ꞌlag₄ Moisés, tsá₃ ca₂tiá₂ dsɨ́₅ ꞌéi₂ juaꞌ₅₄ ꞌag₃ ꞌlɨgꞌ₅₄ a₂ꞌnag₃, të₂le₃ ca₂juáꞌ₂: “Te₁guiꞌ₅₄ bá₄ juɨ₁qui₂dsɨ₅ ꞌéiꞌ₃ ja₁congꞌ₂.”

10 La₁ dsa₂ ꞌéi₂ në́₃ ꞌë₂₃ ꞌlɨgꞌ₅₄ ꞌe₂ caun₂ a₂lë́₂, të₃ tsá₃ ma₂ŋi₅ rë₂; jmo₂₃-dsáu₅ liaꞌ₂ ja₁jmo₅ jáꞌ₂ náu₂ i₂tsá₃ ꞌe₂ ŋɨ́ꞌ₂ dsɨ́₅, ia₁ juɨ₁liaꞌ₂ a₂cuɨ́ꞌ₅ conꞌ₂ lë́₅ a₂ŋɨ́ꞌ₂ dsɨ́₅ guioin₅₄ a₂cha₂ mɨ₂güɨ́g₃ la₂, quianꞌ₅₄ a₂jaun₂ bá₄ dsɨ₃ꞌéin₂.

11 ¡ꞌE₂ guë́₄ juɨ́g₂ dsa₂ ꞌéi₂! Ia₁ ma₂ja₂léin₂ quian₅ juɨ₅ quióꞌ₅ Caín; ne₄ ꞌuɨg₅₄ ia₁ a₂dsɨꞌ₅₄ cu₄ bá₄ ca₂i₁nioi₁₂ të₂le₃ dséi₂, ꞌein₂₃ juɨ₅ ja₁tsá₃ dsau₅ a₂ca₂can₃ Balaꞌam. La₁ ca₂i₃ꞌéin₂ juɨ₁liaꞌ₂ ca₂i₃ꞌén₂ Coré^c jme₁ca₂nau₂ quein₅.

12 Co₂ꞌnióꞌ₄ caun₂ ꞌméꞌ₅ a₂quian₅ o₂guíꞌ₃ bá₄ a₂jmo₅-dsáu₅ dsa₂ ꞌéi₂ jɨnꞌ₄ ꞌniaꞌ₂ jme₁tóngꞌ₅ quë́ꞌ₂ jmoꞌ₂ ꞌniaꞌ₂ jmɨg₄ a₂ꞌniógꞌ₃ rɨ́ngꞌ₂. La₁ dsa₂ ꞌéi₂ queinꞌ₅₄ jɨnꞌ₄ ꞌniaꞌ₂ qui₂guë́ꞌ₅ qui₂ꞌɨ́nꞌ₂ ꞌioꞌ₂ jénꞌ₅ ca₂liaꞌ₂ tsá₃ ꞌe₂ góꞌ₃ jmo₂₃. Lɨ́in₅ juɨ₁liaꞌ₂ jan₂ dsa₂ i₂jmo₅ ꞌí₁ jáꞌ₂ chaꞌ₂, la₁ jŋiaꞌ₅₄ conꞌ₂ dse₃ jme₂tain₅₄ guioin₅₄ bá₄. Lɨ́in₅ juɨ₁liaꞌ₂ lë́₅ jnei₅ a₂lë₁qui₂ŋag₅ quianꞌ₅₄ dsí₂ tsá₃ ꞌe₂ jmɨ́₅ cha₂ guëꞌ₂; o₃ lɨ́in₅ táng₃ juɨ₁liaꞌ₂ nɨ₁ꞌma₂ a₂lë₁le₁dsɨ₅₄ tóꞌ₅ lí₁ jein₂ quióꞌ₅, la₁ tsá₃ ꞌe₂ mɨ́g₂ cha₂ guëꞌ₂ jaun₂ në́₃. Lɨ́in₅ co₂ꞌnióꞌ₄ nɨ₁ꞌma₂ a₂ma₂ca₂cang₅ le₂jiog₅ jmú₄, le₃juaꞌ₅₄ a₂ma₂quian₅ tɨn₃ ne₅₄ ꞌmú₃.

13 Lɨ́in₅ juɨ₁liaꞌ₂ lë́₅ jmɨg₂ a₂lë₁qui₂jnáꞌ₅ tiá₂ ne₄ jmɨ₁ŋíꞌ₄ a₂ráun₂ quianꞌ₅₄ dsí₂, qui₂le₁ꞌág₄ ne₄ jan₅ ca₂le₃jë́₃ a₂lë₁ꞌiog₅ o₂guíꞌ₃ quióꞌ₅. Tioinꞌ₅₄ juɨ₅ i₂nioi₅₄ lɨ́in₅ juɨ₁liaꞌ₂ lë́₅ nei₅ a₂lë₁ma₂i₂nio₄, tsá₃ ma₃juɨ₅ co₂dsau₅ le₁quian₅. Ma₂tioinꞌ₅₄ juɨ₅ a₂dsi₁lein₃ jë₄ qui₁néꞌ₃ ꞌŋio₅ lɨn₃, ja₁ma₂lë́₅ co₂jŋia₅₄ ja₁dsi₁toinꞌ₄ co₂tan₅₄.

14 Le₂jaun₂ bá₄ Enoc ján₃, dsa₂ i₂jë₁ca₂të́₂ jŋé₂ tsɨ₁jon₂ Adán i₂ca₂rë₃chán₃; ꞌéi₂ ca₂ꞌë́₂ jág₁ të₃jŋiá₅ ca₂ꞌɨin₃ dsa₂ le₂ꞌéi₂ jme₁ca₂juáꞌ₂: “Ca₂jɨng₅₄ Te₁guiꞌ₅₄ jóinꞌ₅ ca₂sióin₃ quiainꞌ₅₄ të₂le₃ mei₅ bá₄ i₂jŋió₅ quiáin₅,

15 a₂qui₃dsɨ₂₃ ꞌéiꞌ₃ ne₄ quióꞌ₅ ca₂le₃jɨ́n₃, a₂ꞌliainꞌ₃ ca₂le₃jɨ́n₃ dsa₂ ꞌlɨnꞌ₅₄, ne₄ ꞌuɨg₅₄ ca₂le₃jë́₃ ne₅₄ a₂ꞌlɨgꞌ₅₄ a₂qui₂ma₂jmo₃, ne₄ ca₂le₃jë́₃ jág₁ lë₁ꞌiog₅ a₂qui₂ma₂ꞌɨin₃ Diú₄ në́₃.”

16 Dsa₂ le₂ꞌéi₂ në́₃ ca₂le₃jë́₃ bá₄ ꞌi₄ dsɨ́₅ jmo₂₃, qui₂ꞌnoꞌ₂ dsáu₁ dsa₂, jmáꞌ₃ liaꞌ₂ juɨ₅ ja₁le₃chain₂ dse₃ ja₁magꞌ₂ dsɨ́₅ guioin₅₄ bá₄ ꞌnoꞌ₂. Tɨin₂ dsia₃ jmáꞌ₃ liaꞌ₂ jág₁ táꞌ₅, tonꞌ₂ ꞌŋioi₅₄ ꞌa₂ liaꞌ₂ jme₃ꞌuáin₂ dsɨ́₅ dsa₂ ia₁jaun₂ líꞌ₂ ꞌe₂ a₂ꞌnio₃.

17 La₁ ꞌniaꞌ₂ në́₃ rɨnꞌ₅₄ jniog₄, juɨ₁dsiogꞌ₂ ꞌauꞌ₂ ꞌniaꞌ₂, ca₂le₃jë́₃ jág₁ a₂ma₂cuë₃ dsa₂ i₂chen₄* quián₅ Te₁guiꞌ₅₄ Jesucristo quián₂ jniog₄,

18 ca₂juáꞌ₂ ca₂tsɨ́ꞌ₃ ꞌniaꞌ₂: “Jmɨg₄ jë₁ca₂tóꞌ₂ le₃chan₂ dsa₂ i₂jŋiaꞌ₅₄ lë₁qui₃táun₂ ꞌlɨgꞌ₅₄, a₂le₃chain₂ tiainꞌ₃ conꞌ₂ lë́₅ mɨ₅ dsɨ́₅ guioin₅₄, ia₁ tsá₃ Diú₄ cuɨin₂₃.”

19 Dsa₂ le₂ꞌéi₂ bá₄ i₂jmo₃ le₁dsonꞌ₅₄ ꞌniaꞌ₂; i₂nioi₅₄ conꞌ₂ dsɨ₂jiog₅ dsɨ́₅ guioin₅₄, tsá₃ Jme₂dsí₂ quián₅ Diú₄ quiainꞌ₅₄.

20 La₁ ꞌniaꞌ₂ në́₃ rɨnꞌ₅₄ jniog₄, caun₂ juɨ₁dsi₂cónꞌ₃ bá₄ ꞌniaꞌ₂ quianꞌ₅₄ a₂ꞌéngꞌ₂ a₂lë́₅ a₂jŋió₅ guë́₄ lɨn₃. Chi₁lenꞌ₅₄ ꞌniaꞌ₂ Diú₄ conꞌ₂ lë́₅ jiog₅ Jme₂dsí₂ Jŋió₅.

21 Juɨ₁chanꞌ₂ bá₄ ꞌniaꞌ₂ lë́₅ ꞌí₁ ja₁ꞌnio₃ Diú₄ ꞌniaꞌ₂; qui₂le₁janꞌ₄ a₂dsia₃ ŋéi₂ dsɨ́₅ Te₁guiꞌ₅₄ Jesucristo quián₂, ca₂liaꞌ₂ ca₂të́₂ jmɨg₄ i₁cuë₃ ja₁le₃chanꞌ₂ ꞌniaꞌ₂ co₂tan₅₄.

22 Dsia₄ ꞌniaꞌ₂ ŋéi₂ ꞌauꞌ₂ ja₁con₂ juɨ₁liaꞌ₂ dsa₂ i₂qui₂le₁ꞌág₄ caun₂-tɨn₃ dsɨ́₅,

23 lion₅₄ ꞌniaꞌ₂ i₂lɨn₅₄ në₂jag₄ bá₄ a₂ꞌuɨinꞌ₅₄ jë₄ si₂. Dsia₄ ꞌniaꞌ₂ ŋéi₂ ꞌauꞌ₂ ja₁con₂ i₂siánꞌ₂, të₃ gangꞌ₃, të₃ ꞌŋiagꞌ₅₄ ca₂le₂jiog₅ nɨ₁tsɨnꞌ₅₄ a₂rë₂ꞌióg₄ quianꞌ₅₄ nɨ₁ŋɨ₁₂.

24 Në₃ në́₃, të₂le₃ quióꞌ₅ i₂quɨꞌ₅₄ jmɨg₄ jmo₃ ꞌí₁ ꞌniaꞌ₂ ia₁jaun₂ tsá₃ tsɨ₃séngꞌ₂, jme₃jniai₂₃ ꞌniaꞌ₂ ján₃, ja₁jláꞌ₁ lɨn₃ ja₁guá₄ Diú₄ a₂tsá₃ ma₂ꞌe₂ dso₄ rë₂cángꞌ₄, ja₁jiá₃ ꞌauꞌ₂ ꞌniaꞌ₂ ꞌioꞌ₂ jénꞌ₂ guë́₄ lɨn₃,

25 le₃quióꞌ₅ Diú₄ i₂jan₂ tan₅₄ [i₂ŋɨ́ꞌ₂ dsɨ́₅]^d i₂lió₂ jniog₄, ¡ꞌéi₂ bá₄ i₂ca₂tɨ́n₂ ca₂le₃jë́₃ ti₁ꞌmagꞌ₄, ca₂le₃jë́₃ a₂jme₂juagꞌ₂ dsa₂, ca₂le₃jë́₃ guë́₄ juɨ₅bí₂, ca₂le₃jë́₃ ꞌéiꞌ₃ në́₃, [të₂le₃ quianꞌ₅₄ Jesucristo Te₁guiꞌ₅₄ quián₂ jniog₄],^e ca₂le₃jë́₃ jmɨg₄ ja₁ma₂já₅, jmɨg₄ rë₂në́₃, liaꞌ₂ co₂tan₅₄ në́₃! ¡A₂méi₃*!