Jág₁ a₂ca₂jme₃jnia₅ Jesucristo ne₄ San Juan₅₄
Jág₁ a₂ca₂jme₃jnia₅ Diú₄
1
A₂la₂ bá₄ jág₁ a₂ca₂jme₃jnia₅ Diú₄ ne₄ Jesucristo, ia₁jaun₂ ꞌéi₂ në́₃ ꞌë́ꞌ₃ táng₃ dsa₂ i₂jme₂ti₃ ne₅₄, ca₂juáꞌ₂ ca₂le₃jë́₃ a₂tion₅₄ niog₅ lé₂ ŋiꞌ₅₄ ta₁. Jaun₂ ꞌŋiog₅ bá₄ ꞌéi₂ ca₂jmo₃ ca₂rë₃ŋi₅ ma₂ca₂jme₃jniai₂₃ të₂le₃ quianꞌ₅₄ ángel* quiáin₅ ne₄ Juan₅₄, jan₂ dsa₂ i₂jme₂ti₃ ta₁ ne₅₄.
2 Jniá₂ bá₄ ꞌéi₂ i₂jángꞌ₅ jág₁ dsau₅ la₂, ca₂le₃jë́₃ liaꞌ₂ conꞌ₂ lë́₅ a₂ca₂jág₃ ca₂të́₂ ne₃; tonꞌ₂ jángꞌ₅ bá₄ jniá₂ jág₁ dsau₅ ꞌa₂ liaꞌ₂ lë́₅ jág₁ dse₃ quióꞌ₅ Diú₄, quianꞌ₅₄ ꞌa₂ liaꞌ₂ lɨ́n₅ Jesucristo.
3 ꞌE₂ guë́₄ dsen₃ i₂ꞌɨ₅ si₂ la₂, a₂chi₁ton₅ jág₁ a₂ꞌë́₂ Diú₄. Le₂jaun₂ guëꞌ₂ táng₃ juɨ₁liaꞌ₂ i₂nag₅ jág₁ la₂ a₂ꞌë́₂ Diú₄; dsen₃ i₂tónꞌ₂ juɨ₅ jág₁ a₂chi₁ton₅, ia₁ ma₂ja₂quián₃ jmɨg₄.
Jmo₅ Juan₅₄ si₂ a₂ca₂chein₃ ne₄ ta₁guion₃ guáꞌ₅
4 Jniá₂ Juan₅₄ jmo₂₃ si₂ a₂dsiangꞌ₅₄ ne₄ ta₁guion₃ guáꞌ₅ i₂chan₂ le₂tan₅₄ ꞌuë₃ Asia. Juɨ₁jme₂guꞌ₅₄ Diú₄ ꞌniaꞌ₂, juɨ₁chanꞌ₂ bá₄ ꞌniaꞌ₂ ꞌei₅ tei₄ të₂le₃ quianꞌ₅₄ Diú₄ i₂lɨ́n₅ jmɨg₄ në₃, i₂jme₁lɨ́n₄ tián₂ le₂jŋiá₅, i₂lén₂ ca₂liaꞌ₂ co₂tan₅₄; ján₃ bá₄ juɨ₁jme₂guꞌ₅₄ Diú₄ ꞌniaꞌ₂ të₂le₃ quianꞌ₅₄ ta₁guion₃ jme₂dsí₂ i₂tionꞌ₅₄ le₃ne₄ ne₄ta₁ ja₁guá₄;
5 ján₃ guëꞌ₂ juɨ₁jme₂guꞌ₅₄ Diú₄ ꞌniaꞌ₂ të₂le₃ quianꞌ₅₄ Jesucristo, i₂tí₅ jág₁ dsau₅ quióꞌ₅, i₂le₂ne₁ ma₂ca₂jenꞌ₅₄ ne₄ ꞌmú₃, i₂gon₂ ne₄ rag₅₄ chan₂ guaꞌ₅₄ ꞌuë₃. Le₃quióꞌ₅ ꞌéi₂ bá₄ i₂ca₂rë₃ꞌnio₃ jniog₄ tonꞌ₂ ma₂rángꞌ₂ jniog₄ ne₄ ꞌuɨg₅₄ dsáu₁ jniog₄ quianꞌ₅₄ jmɨ₂ ꞌain₅₄ ꞌŋiog₅;
6 le₃quióꞌ₅ ꞌéi₂ në́₃ i₂ma₂jmo₃ a₂lág₅ jniog₄ rag₅₄, jme₂dsa₂ në́₃, a₂jme₁ti₁ jniog₄ ne₄ Diú₄ quiáin₅ i₂lɨ́n₅ Jmei₂. ¡Le₃quióꞌ₅ ꞌéi₂ bá₄ ca₂tɨ́in₂ jme₃juagꞌ₂ dsa₂, ca₂tɨ́in₂ goin₃ co₂tan₅₄! A₂méi₃.
7 ¡Jag₄! ¡Ma₂já₅ jë₄ jnei₅!
Ca₂le₃jɨ́n₃ bá₄ dsa₂ të₃ ne₅₄,
ca₂le₂jiog₅ dsa₂ juɨg₂ i₂ca₂ꞌágꞌ₂;
ca₂le₃jɨ́n₃ dsa₂ chan₂ juɨg₂ ta₁caun₂ mɨ₂güɨ́g₃
tóinꞌ₃ quɨꞌ₃-ꞌo₃ jë₁ma₂ca₂jág₂.
¡Le₂jaun₂ lé₂, a₂méi₃*!
8 “Jniá₂ bá₄ ꞌéi₂ i₂lɨ́ng₅ le₂ꞌuɨg₅₄ juɨ₁liaꞌ₂ letra Alfa jë₁ca₂rë₃lióg₃; jniá₂ bá₄ ꞌéi₂ i₂lɨ́ng₅ jë₁ca₂tóꞌ₂ në́₃ juɨ₁liaꞌ₂ letra Omega”, juáꞌ₂ Te₁guiꞌ₅₄ Diú₄. “Jniá₂ bá₄ lɨ́ng₅ rë₂në́₃, i₂lɨ́ng₅ ma₂i₁jáun₃, i₂lɨ́ng₅ co₂tan₅₄ ne₄ juɨ₅,a i₂ꞌuanꞌ₂ guë́₄ lɨn₃.”b
Jan₂ i₂lɨ́n₅ liaꞌ₂ lɨ́n₅ Jaun₅ dsa₂ mɨ₂güɨ́g₃
9 Jniá₂ Juan₅₄, lɨ́ng₅ rɨ́nꞌ₂ ꞌniaꞌ₂, ia₁ queinꞌ₅₄ jniog₄ co₂dsia₅ ŋag₄ uɨg₅, le₂jaun₂ chi₁jŋia₁ jniog₄ ja₁gon₂ Diú₄, tonꞌ₂ co₂dsia₅ guei₂ bí₂ a₂tián₂ jniog₄ juɨnꞌ₂ dsɨ₅ le₃quióꞌ₅ Jesús. Jme₁ꞌeng₅₄ rë₂jnɨ́g₅ caun₂ ꞌuë₃ a₂rë₂quɨ́ꞌ₅ jë₄ jmɨ₁ŋíꞌ₄ ja₁chei₂ Patmos, ne₄ ꞌuɨg₅₄ ia₁ a₂ma₂ca₂ꞌë́₃ jág₁ dse₃ quióꞌ₅ Diú₄, tonꞌ₂ ia₁ ꞌuɨg₅₄ a₂ma₂cuë₃ jniá₂ jág₁ dsau₅ ꞌɨ́ng₅ Jesucristo.
10 Co₂ráun₂ në́₃ co₂jmɨg₄ quióꞌ₅ Te₁guiꞌ₅₄ ja₁ꞌeng₅₄ jaun₂, ca₂lë₃ a₂jme₁ꞌen₅₄ jniá₂ le₃quióꞌ₅ Jme₂dsí₂. Jaun₂ ca₂nag₃ jág₁ a₂ca₂néꞌ₂ le₃coꞌ₅₄ lag₃ ca₂juáꞌ₂ tiá₂ lɨn₃ juɨ₁liaꞌ₂ jë₁i₂ꞌein₅₄ ŋí₁ trompeta,
11 ca₂juáꞌ₂ tság₅ jniá₂:
―Jniá₂ bá₄ ꞌéi₂ i₂lɨ́ng₅ le₂ꞌuɨg₅₄ juɨ₁liaꞌ₂ letra Alfa jë₁ca₂rë₃lióg₃; jniá₂ bá₄ ꞌéi₂ i₂lɨ́ng₅ jë₁ca₂tóꞌ₂ në́₃ juɨ₁liaꞌ₂ letra Omega. Ne₄ si₂ rë₂bɨn₅, tiong₅ a₂jágꞌ₂ ia₁jaun₂ qui₁dsiangꞌ₅₄ ne₄ ta₁guion₃ guáꞌ₅ ja₁tén₄ ꞌuë₃ Asia, co₂ꞌnióꞌ₄ le₃juaꞌ₅₄ quióꞌ₅ guáꞌ₅ i₂chan₂ juɨg₂ Efeso, Esmirna, Pérgamo, Tiatira, Sardis, Filadelfia, quianꞌ₅₄ Laodicea në́₃.
12 Ca₂jenꞌ₄ jniá₂ jaun₂ në́₃, a₂jɨng₅₄ ꞌein₂ ꞌéi₂ i₂juáꞌ₂ jág₁ tság₅ jniá₂. Jme₁ca₂jengꞌ₅₄, ca₂jág₃ tióng₂ guio₃ tag₄ a₂lë́₅ jmáꞌ₃ cu₄nióg₄ ja₁le₁guíꞌ₂ si₂.
13 Jë₄ ta₁guio₃ mɨ₂tag₄ si₂ jaun₂ në́₃, jme₁chénꞌ₄ jan₂ i₂lɨ́n₅ liaꞌ₂ lɨ́n₅ Jaun₅* dsa₂ mɨ₂güɨ́g₃,c i₂quiꞌ₂ ꞌmɨꞌ₂ chenꞌ₅₄ jang₄, meiꞌ₂ tsá₃ tsáng₂ coꞌ₅₄ tag₁₂. A₂jme₁rë₂jénꞌ₅ le₁dsɨ́₅ guëꞌ₂ në́₃, jme₁lë́₄ jmáꞌ₃ cu₄nióg₄.
14 Jŋi₂ dsi₅₄ guëꞌ₂ në́₃, jme₁tiog₂ liaꞌ₂ ja₁tiog₂ jŋí₂ jáꞌ₂ chaꞌ₂, a₂tiog₂ juɨ₁liaꞌ₂ tiog₂ ꞌmu₂. Jme₁ne₁₂ guëꞌ₂ në́₃ jme₁jniá₂ tág₅ juɨ₁liaꞌ₂ jniá₂ ca₂joꞌ₅₄ si₂.
15 Mɨ₂tag₅₄ guëꞌ₂ në́₃ jme₁jniá₂ tág₅ liaꞌ₂ lë́₅ jmáꞌ₃ nɨ₁ŋí₁ nióg₂ a₂rë₂ta₄ a₂ma₂jmág₂ néꞌ₃ táu₃ si₂. Jág₁ quióꞌ₅ guëꞌ₂ në́₃ jme₁néꞌ₂ tiá₂ lɨn₃ juɨ₁liaꞌ₂ néꞌ₂ caun₂ ja₁taꞌ₂ laꞌ₅₄ pa₁ lɨn₃.d
16 Gu₂ ne₁ guëꞌ₂ në́₃ jme₁chanꞌ₂ guio₃ nei₅; mɨ₂ꞌo₅₄ guëꞌ₂ në́₃ jme₁jniá₂ ꞌia₂ liaꞌ₂ lë́₅ caun₂ ŋi₁tág₂ chenꞌ₂ a₂ꞌmu₃ le₃tɨn₃ ton₂. Ne₅₄ guëꞌ₂ në́₃ tág₅ jmáꞌ₅, juɨ₁liaꞌ₂ tág₅ ꞌiog₂.
17 Jme₁ca₂jág₃, ca₂tón₂ jniá₂ ja₁tióng₂ mɨ₂tag₅₄, liaꞌ₂ tsá₃ léi₄ meiꞌ₂. Jaun₂ ca₂quiog₂ gu₂ ne₁ ne₄ quió₃, jaun₂ ca₂juáꞌ₂:
―Tsá₃ jmo₂ gangꞌ₃, ia₁ jniá₂ bá₄ lɨ́ng₅ i₂le₂ne₁, tonꞌ₂ jniá₂ bá₄ lɨ́ng₅ i₂jë₁ca₂tóꞌ₂.
18 Jniá₂ bá₄ ꞌéi₂ i₂chan₂; jme₁rë₂ꞌlɨn₄ bá₄ jniá₂, la₁ ¡jag₄! ma₂chang₂ bá₄ táng₃ ca₂le₃jë́₃ jmɨg₄, ca₂liaꞌ₂ co₂tan₅₄.e Jniá₂ bá₄ chanꞌ₄ ŋí₁ llaves quióꞌ₅ ꞌmú₃ quianꞌ₅₄ guëꞌ₂ tau₂ ꞌŋio₅.f
19 Jaun₂ lë₃, ne₄ si₂, tiong₅ juɨ₁liaꞌ₂ ꞌe₂ a₂në₂jagꞌ₅₄, ꞌa₂ liaꞌ₂ niog₅ lë́₅ rë₂në́₃ quianꞌ₅₄ guëꞌ₂ a₂në₃ guë́₄ niog₅ lé₂.
20 A₂la₂ bá₄ jág₁ dsau₅ a₂jme₁rë₂ꞌma₄ le₂jŋiá₅: juɨ₁liaꞌ₂ guio₃ nei₅ a₂në₂jagꞌ₅₄ chi₁chanꞌ₄ gu₃ ne₁, quianꞌ₅₄ guëꞌ₂ ta₁guio₃ tag₄ a₂lë́₅ quianꞌ₅₄ cu₄nióg₄ ja₁le₁guíꞌ₂ si₂. Jángꞌ₅ jág₁ ta₁guio₃ nei₅ co₂ꞌnióꞌ₄ guion₃ dsa₂ i₂i₃quian₄ jág₁g quián₅ ta₁guion₃ guáꞌ₅; guio₃ tag₄ ja₁le₁guíꞌ₂ si₂ guëꞌ₂ në́₃, co₂ꞌnióꞌ₄ ta₁guion₃ guáꞌ₅.