Jág₁ a₂chen₅ ne₄ le₂guion₃ guáꞌ₅: Jág₁ a₂ŋó₃ ne₄ guáꞌ₅ chan₂ Efeso
2
ꞌJmo₄ si₂ ne₄ dsa₂ i₂ꞌë́₂ jág₁ guáꞌ₅ i₂chan₂ juɨg₂ Efeso, cheiꞌ₅₄ le₂la₂:
Le₂la₂ juáꞌ₂ i₂chanꞌ₂ le₃guio₃ nei₅ quianꞌ₅₄ gu₂ ne₁, i₂ŋɨ₅ jë₄ ta₁guio₃ tag₄ a₂lë́₅ jmáꞌ₃ cu₄nióg₄ ja₁le₁guíꞌ₂ si₂:
2 Guion₄ bá₄ jniá₂ ca₂le₃jë́₃ ta₁ ꞌuaꞌ₂ a₂jmoꞌ₂ ꞌniaꞌ₂, ꞌa₂ liaꞌ₂ juɨnꞌ₂ ꞌauꞌ₂ në́₃. Guion₅₄ bá₄ ján₃ a₂tsá₃ ma₃tiangꞌ₃ quiangꞌ₅₄ dsa₂ i₂jmo₅ a₂ꞌlɨgꞌ₅₄. Guion₅₄ bá₄ ján₃ ꞌa₂ liaꞌ₂ ma₂quionꞌ₂ ꞌí₁ ja₁con₂ dsa₂ i₂i₂nio₄ a₂juáꞌ₂ lɨ́in₅ dsa₂ i₂chen₄ quián₅ Jesús, la₁ tsá₃ guëꞌ₂ lɨ́in₅. Ma₂ca₂jme₁jniaiꞌ₂ a₂lɨ́in₅ dsa₂ të₂jɨ́n₁.
3 Juɨnꞌ₂ bá₄ ꞌauꞌ₂ lɨ́ngꞌ₅ ma₂ja₂nógꞌ₅ qui₂ŋagꞌ₅₄ uɨg₅ jmoꞌ₂ ta₁ ꞌŋio₅ lɨn₃ o₄quió₃ jniá₂, tsá₃ ma₂qui₂ca₂ꞌúꞌ₃ ꞌauꞌ₂ ꞌniaꞌ₂.
4 La₁ia₁ cha₂ guë́₄ caun₂ ja₁congꞌ₂, a₂tsá₃ të₅ dsɨ₃: ia₁ tsá₃ ma₃ꞌniógꞌ₃ jniá₂ liaꞌ₂ jme₁ꞌniógꞌ₃ le₂ne₁.
5 Jaun₂ në́₃, dsá₂ ꞌauꞌ₂ ꞌniaꞌ₂ jmo₄, a₂jáꞌ₄ ma₂qui₂ma₂sénꞌ₂ ꞌniaꞌ₂. Juɨ₁dsi₂quénꞌ₅ táng₃ ꞌauꞌ₂ ꞌniaꞌ₂, jmo₄ táng₃ liaꞌ₂ jme₁jmoꞌ₂ le₂ne₁. Ia₁ në₁juaꞌ₂ tsá₃ le₂jaun₂ në́₃, ŋiꞌ₅₄ ta₁ la₂ dsióg₄ i₁jŋiáꞌ₃ tag₄ si₂ quiángꞌ₂ ja₁chíꞌ₄, në₁juaꞌ₂ tsá₃ ca₂jme₁tsɨ́ngꞌ₄ ꞌauꞌ₂.
6 Jŋiaꞌ₅₄ liaꞌ₂ caun₂ a₂dse₃ la₂ bá₄ cha₂ ja₁congꞌ₂: a₂ꞌŋiaꞌ₅₄ ꞌniaꞌ₂ ꞌa₂ liaꞌ₂ lë́₅ jmo₅-dsáu₅ dsa₂ nicolaítas,* a₂jaun₂ bá₄ ꞌio₄ guëꞌ₂ jniá₂ ján₃.
7 Juɨ₁liaꞌ₂ i₂le₁dsɨ₅₄ rë₂gua₄, juɨ₁nei₅₄ a₂juáꞌ₂ Jme₂dsí₂ tsɨ́ꞌ₅ ca₂le₃jɨ́n₃ guáꞌ₅. Juɨ₁liaꞌ₂ i₂ca₂tióꞌ₃, ŋei₂ guë́ꞌ₃ mɨ́g₂ ꞌma₂ a₂chan₂ dsa₂ co₂tan₅₄, a₂chíꞌ₅ Ja₁jláꞌ₁a quióꞌ₅ Diú₄.
Jág₁ a₂ŋó₃ ne₄ guáꞌ₅ chan₂ Esmirna
8 ꞌJmo₄ si₂ ne₄ dsa₂ i₂ꞌë́₂ jág₁ guáꞌ₅ i₂chan₂ juɨg₂ Esmirna cheiꞌ₅₄ le₂la₂:
Le₂la₂ juáꞌ₂ i₂le₂ꞌuɨg₅₄, i₂lɨ́n₅ jë₁ca₂tóꞌ₂ guëꞌ₂ táng₃; i₂ca₂jon₃ ꞌéi₂, i₂ma₂ca₂jenꞌ₅₄ guëꞌ₂ táng₃:
9 Guion₅₄ bá₄ ca₂le₃jë́₃ ꞌa₂ liaꞌ₂ lë́₅ changꞌ₂ ŋagꞌ₅₄ uɨg₅, tonꞌ₂ a₂te₂ŋégꞌ₂ guëꞌ₂ ján₃. La₁ on₃juaꞌ₅₄ a₂dsɨ₂jóꞌ₃ te₂ŋégꞌ₂ jme₁né₄, ia₁ changꞌ₂ bá₄ dse₃ ján₃. Guion₅₄ bá₄ ján₃ ꞌa₂ liaꞌ₂ ꞌag₅ ꞌlɨgꞌ₅₄ dsa₂ i₂juáꞌ₂ lɨ́n₅ judíos*, la₁ tsá₃ guëꞌ₂ lɨ́in₅. Dsa₂ i₂tén₅ guáꞌ₅ sinagoga quióꞌ₅ Satanás bá₄ ꞌéi₂.
10 Tsá₃ jmo₂ ꞌniaꞌ₂ gangꞌ₃ ꞌe₂ niog₅ a₂dsi₁ŋɨ́gꞌ₂, ia₁ tsáunꞌ₂ i₂së₃dsen₃ toinꞌ₂ néꞌ₃ ꞌmá₃ i₂lɨn₅₄ ꞌniaꞌ₂ co₂ꞌnióꞌ₄ a₂cáun₂ táu₂, jaun₂ ŋagꞌ₅₄ ꞌniaꞌ₂ uɨg₅ guia₃ jmɨg₄. La₁ tiá₂ nau₂ ꞌniaꞌ₂ o₁jŋiaꞌ₅₄ ca₂quɨ́n₂ ꞌmú₃, ia₁ jniá₂ bá₄ cuë₅₄ ja₁le₃chanꞌ₂ ꞌniaꞌ₂ co₂tan₅₄ co₂ꞌnióꞌ₄ caun₂ corona.
11 Juɨ₁liaꞌ₂ i₂le₁dsɨ₅₄ rë₂gua₄, juɨ₁nei₅₄ a₂juáꞌ₂ Jme₂dsí₂ tsɨ́ꞌ₅ ca₂le₃jɨ́n₃ guáꞌ₅. Juɨ₁liaꞌ₂ i₂ca₂tióꞌ₃, ꞌi₁caun₂ uɨg₅ tsá₃ jénꞌ₄ jë₁ca₂të́₂ tɨn₂ ꞌmú₃.
Jág₁ a₂ŋó₃ ne₄ guáꞌ₅ chan₂ Pérgamo
12 ꞌJmo₄ si₂ ne₄ dsa₂ i₂ꞌë́₂ jág₁ guáꞌ₅ i₂chan₂ juɨg₂ Pérgamo, cheiꞌ₅₄ le₂la₂:
Le₂la₂ juáꞌ₂ i₂ꞌio₅ ŋi₁tág₂ ꞌmu₃ le₃tɨn₃ ton₂:
13 Guion₄ bá₄ jniá₂ ja₁tiánꞌ₅ ꞌniaꞌ₂,b ja₁lë́₄ ne₄ta₁ ja₁gon₂ Satanás. La₁ liaꞌ₂ tiónꞌ₂ jaun₂ bá₄ ꞌniaꞌ₂ tiá₂ quianꞌ₅₄ jág₁ quió₃. Tsá₃ ma₂tíꞌ₃ a₂ꞌéngꞌ₂ le₃quió₃, ca₂liaꞌ₂ jŋiaꞌ₅₄ jmɨg₄ liaꞌ₂ conꞌ₂ jme₁ca₂jŋɨꞌ₃ dsa₂ Antipas, dsa₂ i₂rë₂tiꞌ₅₄ quiáng₃ i₂jme₁jángꞌ₅ jág₁ dsau₅, ca₂lë₃ jë₄ quiánꞌ₂ ꞌniaꞌ₂, caun₂ juɨg₂ ja₁guá₄ Satanás.
14 La₁ia₁ cha₂ a₂lɨn₅₄ ja₁congꞌ₂, a₂tsá₃ të₅ dsɨ₃: jë₄ në₅ quiánꞌ₂ ꞌniaꞌ₂ tionꞌ₅₄ i₂lɨn₅₄ i₂tsá₃ tí₂ a₂ꞌlɨgꞌ₅₄ liaꞌ₂ jme₁jmo₅ Balaꞌama a₂ca₂toinꞌ₂ jág₁ ca₂tsɨ́ꞌ₃ Balacc , ca₂jmo₃ ca₂tsɨ₁sénꞌ₂ dso₄ dsa₂ israelitas* a₂ca₂guë́ꞌ₃ má₃ a₂rë₂jenꞌ₅₄ ne₄ diú₄ lag₄ quiáin₅; ca₂jmo₃ ca₂can₃ dsa₂ ꞌéi₂ juɨ₅ qui₂ca₂nióꞌ₃ jág₁ ꞌlɨgꞌ₅₄.
15 Le₂në₅ bá₄ ján₃, tionꞌ₅₄ jë₄ quiánꞌ₂ ꞌniaꞌ₂ i₂lɨn₅₄ i₂jme₂tag₅ jág₁ quióꞌ₅ dsa₂ nicolaítas*.
16 Juɨ₁dsi₂quénꞌ₅ ꞌauꞌ₂ jaun₂ në́₃; ia₁ në₁juaꞌ₂ tsá₃ ca₂tionꞌ₂ ꞌniaꞌ₂ juɨ₅, ŋiꞌ₅₄ ta₁ la₂ dsióg₄ jniá₂ ja₁congꞌ₂ i₁quɨ́ngꞌ₃ quianꞌ₅₄ dsa₂ ꞌéi₂ quianꞌ₅₄ ŋi₁tág₂ a₂ꞌia₂ mɨ₂ꞌo₃.
17 Juɨ₁liaꞌ₂ i₂le₁dsɨ₅₄ rë₂gua₄, juɨ₁nei₅₄ a₂juáꞌ₂ Jme₂dsí₂ tsɨ́ꞌ₅ ca₂le₃jɨ́n₃ guáꞌ₅. Juɨ₁liaꞌ₂ i₂ca₂tióꞌ₃, ŋei₂ maná a₂rë₂ꞌma₄, tonꞌ₂ ŋei₂ jma₃ca₂mɨ́g₂ nɨ₁cang₁ tiog₂ ja₁chi₁ton₅ jág₁ ꞌmɨ́₂ ꞌa₂ liaꞌ₂ chein₂, a₂tsá₃ ꞌein₂ cuɨ́ꞌ₅; jmáꞌ₃ liaꞌ₂ conꞌ₂ i₂gue₃ bá₄ ŋɨ́ꞌ₂.
Jág₁ a₂ŋó₃ ne₄ guáꞌ₅ chan₂ Tiatira
18 ꞌJmo₄ si₂ ne₄ dsa₂ i₂ꞌë́₂ jág₁ guáꞌ₅ i₂chan₂ juɨg₂ Tiatira, cheiꞌ₅₄ le₂la₂:
Le₂la₂ juáꞌ₂ Ja₁ŋiꞌ₅₄ Diú₄ i₂tág₅ jme₁ne₁₂ liaꞌ₂ tág₅ joꞌ₅₄ si₂, i₂lë́₅ mɨ₂tag₄ liaꞌ₂ lë́₅ ŋí₁ nióg₂ a₂rë₂ta₄:
19 Guion₅₄ bá₄ ca₂le₃jë́₃ ꞌe₂ a₂jmoꞌ₂, ꞌa₂ liaꞌ₂ ꞌniógꞌ₃ rɨ́ngꞌ₂, ꞌa₂ liaꞌ₂ lë́₅ a₂ꞌéngꞌ₂ në́₃, ta₁ quiángꞌ₂ a₂jme₂tíꞌ₁, juɨnꞌ₂ bá₄ ꞌauꞌ₂ changꞌ₂ në́₃; guion₄ bá₄ jniá₂, ꞌŋio₅ guë́₄ jmoꞌ₂ ꞌniaꞌ₂ liaꞌ₂ conꞌ₂ guë́₄ le₂ne₁.
20 La₁ia₁ cha₂ guë́₄ caun₂ ja₁congꞌ₂ a₂tsá₃ të₅ dsɨ₃: ia₁ cuëꞌ₂ ꞌniaꞌ₂ jmɨg₄ ꞌen₅₄ jɨnꞌ₄ ꞌniaꞌ₂ ꞌio₅₄ Jezabel i₂juáꞌ₂ i₂ꞌë́₂ jág₁ o₄quióꞌ₄ Diú₄. Jme₂tag₂₃ a₂jŋiaꞌ₅₄ qui₂jme₂gain₂₃ dsa₂ quiáng₃ i₂jme₂ti₃ ne₃ ia₁jaun₂ cán₂ juɨ₅ jmo₃ dsáu₃ qui₃nióꞌ₃ jág₁ ꞌlɨgꞌ₅₄, ia₁jaun₂ ján₃ guë́₄ qui₃guë́ꞌ₃ má₃ a₂rë₂jenꞌ₅₄ ne₄ diú₄ lag₄ quiáin₅.
21 Ma₂cuë́₃ jniá₂ ꞌio₅₄ ꞌéi₂ jmɨg₄ ne₄ tsa₁ dsi₁quénꞌ₅ dsɨ́₅ ꞌlɨgꞌ₅₄ a₂jmo₂₃, la₁ tsá₃ ꞌnio₃.
22 ¡Jag₄! Tóin₂ jniá₂ ne₄ tsɨ₁cama jaun₂ le₃dsoꞌ₅₄, ján₃ guëꞌ₂ jmo₅₄ ŋág₃ uɨg₅ dsa₂ i₂qui₂ꞌno₅ dso₄ quiainꞌ₅₄, në₁juaꞌ₂ tsá₃ ca₂dsi₃quénꞌ₅ dsɨ́₅ a₂jmo₅-dsáu₅ ꞌio₅₄ ꞌéi₂,
23 tonꞌ₂ jme₁dsian₅ jniá₂ chiꞌ₂ quián₅ ꞌio₅₄ ꞌéi₂ në́₃. Jaun₂ bá₄ le₃ŋi₅ ca₂le₃jɨ́n₃ guáꞌ₅, jniá₂ i₂con₂ ꞌí₁ ꞌa₂ liaꞌ₂ lë́₅ jme₂dsí₂ quióꞌ₅ dsa₂, ca₂le₃jë́₃ a₂qui₂dsɨ₂jiog₅ dsɨ́₅ dsa₂ në́₃; jaun₂ jniá₂ bá₄ cuë́₄ ꞌlianꞌ₅₄ ꞌniaꞌ₂ liaꞌ₂ conꞌ₂ lë́₅ qui₂ca₂jmoꞌ₅₄.
24 La₁ juɨ́g₂ jniá₂ ca₂le₃jɨ́n₃ guë́₄ ꞌniaꞌ₂ i₂tiánꞌ₅ juɨg₂ Tiatira i₂tsá₃ ma₂gue₃ jág₁ a₂jme₂tag₅ ꞌio₅₄ ꞌéi₂, on₃ guëꞌ₂ cuɨ́ꞌ₅ a₂të́ꞌ₂ dsa₂ ꞌéi₂ jág₁ caꞌ₅₄ a₂rë₂ꞌma₄ quióꞌ₅ Satanás: co₂në₅ bá₄ guei₂ a₂cuë́₄ jniá₂ ꞌniaꞌ₂.
25 Jŋiaꞌ₅₄ liaꞌ₂ caun₂ jmoꞌ₂ ꞌniaꞌ₂ a₂dse₃ a₂ma₂ja₂nógꞌ₅ jmoꞌ₂, ca₂liaꞌ₂ ca₂të́₂ jmɨg₄ i₁dsióg₄ táng₃.
26 Juɨ₁liaꞌ₂ i₂ca₂tióꞌ₃, i₂qui₂jmo₅ ꞌa₂ conꞌ₂ ꞌnio₃ jniá₂ lé₂, ca₂liaꞌ₂ i₁ca₂të́₂ jmɨg₄ jë₁ca₂tóꞌ₂, cuë́₄ jniá₂ bí₂ jaun₂ jmo₃ ꞌéiꞌ₃ ne₄ juɨg₂ a₂te₁ꞌi₁ guaꞌ₅₄ ꞌuë₃.
27 Goin₃ ne₄ quióꞌ₅ quianꞌ₅₄ ꞌma₂ꞌɨꞌ₅₄
a₂lë́₅ quianꞌ₅₄ nɨ₁ŋí₁;
qui₃dsia₃ le₁juɨg₁ në₂jag₄ bá₄ nɨ₁tɨꞌ₂,d