2 Jme₁jnio₂ neꞌ₅₄, tiongꞌ₂ táng₃ bí₂ a₂jme₁ma₂i₁jón₂ quiángꞌ₂, ia₁ tsá₃ ma₂dsóꞌ₂ jniá₂ juaꞌ₅₄ a₂rë₂tán₄ a₂qui₂ma₂jmoꞌ₅₄ ꞌniaꞌ₂ le₃ne₄ Diú₄ quiáng₃.

3 Dsiogꞌ₂ ꞌauꞌ₂ ꞌniaꞌ₂ jmo₄ jaun₂ në́₃, a₂qui₂ma₂gueꞌ₅₄ ꞌniaꞌ₂, a₂qui₂ma₂neiꞌ₂ ꞌniaꞌ₂, juɨ₁dsi₂quénꞌ₅ ꞌauꞌ₂. La₁ në₁juaꞌ₂ tsá₃ ca₂jme₁jnioꞌ₂ neꞌ₅₄, ŋiꞌ₅₄ ta₁ dsióg₄ jniá₂ ja₁congꞌ₂ conꞌ₂ tsá₃ rë₂jángꞌ₁, në₂jag₄ bá₄ jan₂ ꞌang₂, ca₂liaꞌ₂ jŋiaꞌ₅₄ tsá₃ ŋiꞌ₅₄ ꞌniaꞌ₂ ꞌe₂ hora dsióg₄.

4 La₁ chan₂ bá₄ guë́₄ i₂lɨn₅₄ jɨnꞌ₄ ꞌniaꞌ₂ guáꞌ₅ Sardis në₅ i₂tsá₃ ma₂ca₂jme₃ꞌióg₃ tsɨnꞌ₅₄; i₂ꞌéi₂ në́₃ jme₃quiongꞌ₅₄ jniá₂ i₃nioi₅₄ le₁quiꞌ₂ ꞌmɨꞌ₂ tiog₂, ia₁ le₂jaun₂ ca₂tɨ́in₂.

5 Juɨ₁liaꞌ₂ i₂ca₂tióꞌ₃, tsɨnꞌ₅₄ tiog₂ bá₄ qui₃quɨ́ꞌ₃, jaun₂ liaꞌ₂ o₁lɨ́gꞌ₂ tsá₃ ꞌén₄ liaꞌ₂ chein₂ ja₁le₁toin₂₃ ne₄ si₂ a₂chan₂ dsa₂ co₂tan₅₄. Jaun₂ ꞌɨ́n₄ jniá₂ ꞌéi₂ jme₁jniai₂₃ jniá₂ ne₄ Ŋeꞌ₃, ne₄ ángeles quiáin₅ në́₃.

6 Juɨ₁liaꞌ₂ i₂le₁dsɨ₅₄ rë₂gua₄, juɨ₁nei₅₄ a₂juáꞌ₂ Jme₂dsí₂ tsɨ́ꞌ₅ ca₂le₃jɨ́n₃ guáꞌ₅.

7 ꞌJmo₄ si₂ ne₄ dsa₂ i₂ꞌë́₂ jág₁ guáꞌ₅ i₂chan₂ juɨg₂ Filadelfia, cheiꞌ₅₄ le₂la₂:

8 Guion₅₄ bá₄ jë₂ a₂jmoꞌ₂. ¡Jag₄! Caun₂ o₄ꞌné₄ a₂rë₂na₄ ma₂ca₂tsɨ́ꞌ₂ jniá₂ neꞌ₅₄; ꞌi₁jan₂ tsá₃ ꞌein₂ lé₂ le₃jnéi₃. O₁jŋiaꞌ₅₄ la₂ tsá₃ ma₃lɨn₄ béngꞌ₂,^a ma₂ca₂tionꞌ₂ juɨ₅ jág₁ quió₃, on₃juaꞌ₅₄ jaun₂ a₂tsá₃ ma₂ꞌagꞌ₅₄ jniá₂.

9 ¡Jag₄! Juɨ₁liaꞌ₂ dsa₂ quián₅ guáꞌ₅ sinagoga quióꞌ₅ Satanás, dsa₂ i₂juáꞌ₂ lɨ́in₅ judíos la₁ tsá₃ guëꞌ₂ lɨ́in₅, jmo₅₄ jniá₂ chi₃jné₃ ꞌéi₂ neꞌ₅₄, ia₁jaun₂ le₃ŋi₅ a₂ꞌnió₃ jniá₂ ꞌniaꞌ₂.

10 ꞌUɨg₅₄ ia₁ a₂ma₂jmoꞌ₅₄ ꞌniaꞌ₂ ꞌí₁ ꞌéiꞌ₃ quió₃ a₂tionꞌ₅₄ ꞌniaꞌ₂ juɨnꞌ₂ ꞌauꞌ₂, jmo₅₄ bá₄ jniá₂ ꞌí₁ ꞌniaꞌ₂ a₂tsá₃ jiógꞌ₂ ꞌí₁ ja₁congꞌ₂ juɨ₁liaꞌ₂ a₂dsɨ₃ŋɨ́₂ dsa₂ i₂chan₂ ta₁caun₂ guaꞌ₅₄ ꞌuë₃.

11 Ŋiꞌ₅₄ ta₁ bá₄ guióng₄. Jmo₄ ꞌí₁ a₂ma₂tɨngꞌ₂ ia₁jaun₂ tsá₃ ꞌein₂ jŋiáꞌ₂ corona quiángꞌ₂.

12 Juɨ₁liaꞌ₂ i₂ca₂tióꞌ₃, jmo₅₄ jniá₂ a₂léin₂ në₂jag₄ bá₄ nɨ₁dsɨ₅ a₂chíꞌ₅ dsi₂néi₂ guáꞌ₅ templo quióꞌ₅ Diú₄ quiáng₃. O₁lɨ́gꞌ₂ jmɨg₄ tsá₃ ma₃ꞌuɨ́in₃ ja₁jaun₂. Ne₄ quióꞌ₅ ꞌéi₂, taun₅₄ liaꞌ₂ chen₂ Diú₄ quiáng₃, quianꞌ₅₄ guëꞌ₂ ꞌa₂ liaꞌ₂ chei₂ juɨg₂ quióꞌ₅ Diú₄ quiáng₃ në́₃: juɨg₂ Jerusalén ꞌmɨ́₂ a₂sió₃ gueiꞌ₅₄ i₂juɨ́g₃ quióꞌ₅ Diú₄ quiáng₃. Ján₃ guëꞌ₂ le₂jaun₂ taun₅₄ jniá₂ ne₄ ꞌéi₂ jág₁ ꞌmɨ́₂ liaꞌ₂ cheng₂.

13 Juɨ₁liaꞌ₂ i₂le₁dsɨ₅₄ rë₂gua₅₄, juɨ₁nei₅₄ a₂juáꞌ₂ Jme₂dsí₂ tsɨ́ꞌ₅ ca₂le₃jɨ́n₃ guáꞌ₅.

14 ꞌJmo₄ si₂ ne₄ dsa₂ i₂ꞌë́₂ jág₁ guáꞌ₅ i₂chan₂ juɨg₂ Laodicea, cheiꞌ₅₄ le₂la₂:

15 Guion₄ bá₄ jniá₂ ca₂le₃jë́₃ ꞌa₂ liaꞌ₂ lë́₅ jmoꞌ₂ ꞌniaꞌ₂. Guion₅₄ bá₄, a₂tsá₃ güɨ́ngꞌ₂, on₃ guëꞌ₂ dséngꞌ₂ në́₃. ¡Juaꞌ₅₄ co₂ŋeiꞌ₅₄ bá₄ guëꞌ₂ güɨ́ngꞌ₂, o₃ co₂ŋeiꞌ₅₄ bá₄ guëꞌ₂ dséngꞌ₂!

16 La₁ ꞌuɨg₅₄ ia₁ a₂jŋiaꞌ₅₄ dsiónꞌ₂ ꞌniaꞌ₂, ia₁ tsá₃ güɨ́ngꞌ₂ guëꞌ₂ co₂ŋeiꞌ₅₄, on₃ guëꞌ₂ dséngꞌ₂ në́₃, jaun₂ ráun₂ i₁ŋí₄ jniá₂ ꞌniaꞌ₂ juɨ₅ mɨ₂ꞌo₃.

17 Ia₁ juáꞌ₂ ꞌniaꞌ₂ a₂ma₂changꞌ₂ dse₃ a₂ma₂qui₂ma₂dsiaꞌ₅₄ ꞌniaꞌ₂ ꞌlióng₂ rë₂máꞌ₂, tonꞌ₂ tsá₃ ꞌe₂ ꞌnióꞌ₅ quiángꞌ₂; la₁ tsá₃ jaun₂ lenꞌ₅₄ ꞌniaꞌ₂ a₂lɨ́ngꞌ₅ dsa₂ i₂lë₁ŋéi₂ dsɨ́₅, i₂te₂ŋé₂, i₂ten₄, i₂rë₂cuánꞌ₃ në́₃.

18 ꞌUɨg₅₄ jaun₂ tonꞌ₂ jniá₂ jág₁ ꞌniaꞌ₂, i₂nóꞌ₅ ꞌniaꞌ₂ ja₁con₂ jniá₂ i₂liá₃ cu₄nióg₄ a₂rë₂lag₄ quianꞌ₅₄ si₂, ia₁jaun₂ guë́₄ dsónꞌ₂ le₃changꞌ₂ dse₃; i₂liá₃ ꞌniaꞌ₂ tsɨ́ngꞌ₂ tiog₂ a₂qui₁quɨꞌ₅₄, ia₁jaun₂ tsá₃ le₃jniá₂ a₂o₂guíꞌ₃ a₂rë₂cuángꞌ₃. I₂liá₃ mɨ́₅ ꞌágꞌ₄ jme₁neꞌ₄ ia₁jaun₂ jnio₂, lé₂ jagꞌ₅₄.

19 Të₂jén₅ jniá₂ tsɨ́ngꞌ₂ táng₃ juɨ₅ dse₃ ca₂le₃jɨ́n₃ i₂ꞌnióg₃. Juɨ₁lenꞌ₅₄ bá₄ ꞌniaꞌ₂ dsa₂ i₂dsen₅₄ dsɨ́₅ jaun₂ në́₃, juɨ₁dsi₂quénꞌ₅ ꞌauꞌ₂.

20 ¡Jag₄! La₂ chénꞌ₅ jniá₂ o₄ꞌné₄ të́₅; chi₂juaꞌ₂ chan₂ i₂ca₂nág₂ jág₁ quió₃, niá₅ o₄ꞌné₄ në́₃, jaun₂ bá₄ ꞌú₄ dsi₂néi₂ quióꞌ₅, guëꞌ₅₄ co₂lë₅ quiainꞌ₅₄.

21 Juɨ₁liaꞌ₂ i₂ca₂tióꞌ₃, cuë́₄ jma₃caun₂ ja₁tiainꞌ₃ cau₅ quió₃ ne₄ta₁ ja₁gua₄ jniá₂, juɨ₁liaꞌ₂ ca₂tió₃ jniá₂, jaun₂ ca₂gua₃ con₂ Ŋeꞌ₃ ne₄ta₁ quióꞌ₅.

22 Juɨ₁liaꞌ₂ i₂le₁dsɨ₅₄ rë₂gua₅₄, juɨ₁nei₅₄ a₂juáꞌ₂ Jme₂dsí₂ tsɨ́ꞌ₅ ca₂le₃jɨ́n₃ guáꞌ₅.