ꞌA₂ liaꞌ₂ qui₂rë₂juɨnꞌ₂ Diú₄ gueiꞌ₅₄ i₂juɨ́g₃
4
Cang₂ guë́₄ jaun₂, ca₂jág₃ táng₃ jniá₂ caun₂ o₄ꞌné₄ rë₂na₄ gueiꞌ₅₄ i₂juɨ́g₃. Jaun₂ ca₂nag₃ jág₁ jaun₂ a₂ca₂nag₃ le₂ꞌuɨg₅₄ a₂néꞌ₂ në₂jag₄ bá₄ jë₁i₂ꞌein₅₄ ŋí₁ trompeta, ca₂juáꞌ₂ tság₅ jniá₂:
―Uɨ́g₂ ja₁lá₃, jaun₂ ꞌë₅₄ ca₂le₃jë́₃ a₂niog₅ lé₂ cang₂ guë́₄ jë₁ma₂lë₅ a₂ma₂në₂jagꞌ₅₄ në₅.
2 Jaun₂ ca₂lë₃ jme₁ꞌen₅₄ jniá₂ le₃quióꞌ₅ Jme₂dsí₂, jaun₂ ca₂jnia₃ caun₂ ne₄ta₁ chíꞌ₅ gueiꞌ₅₄ i₂juɨ́g₃. Ne₄ ne₄ta₁ jaun₂ jme₁guá₄ jan₂ dsa₂.
3 Dsa₂ i₂jme₁guá₄ ꞌéi₂ në́₃, jme₁jniái₂ tág₅ ꞌŋio₅ lɨn₃ në₂jag₄ bá₄ nɨ₁cang₁ tág₅ jaspe o₃ cornalina. Le₃lágꞌ₃ ne₄ta₁ ja₁guá₄ jaun₂ jme₁jniá₂ mɨ₂joꞌ₅₄ si₂ a₂tág₅ lɨn₃, në₂jag₄ bá₄ nɨ₁cang₁ esmeralda.
4 Le₃lágꞌ₃ ne₄ta₁ ja₁guá₄ dsa₂, ca₂jág₃ conꞌ₂ guë́₄ guióg₂-quén₂ ne₄ta₁ ja₁tiánꞌ₄ guión₂-quén₂ guiꞌ₅₄ canꞌ₅₄ i₂le₁lɨn₁ le₁quiꞌ₂ jmáꞌ₃ ꞌmɨꞌ₂ tiog₂, tioꞌ₅₄ coronas a₂lë́₅ jmáꞌ₃ cu₄nióg₄ dsi₅₄.
5 Ja₁chíꞌ₄ ne₄ta₁ jaun₂, qui₂lë́₂ si₁ŋíꞌ₃, chíꞌ₅ co₂mɨꞌ₅₄, quiaꞌ₂ ŋíꞌ₃ në́₃. Ne₄ ja₁chíꞌ₄ ne₄ta₁ jaun₂, jniá₂ guio₃ si₂ nɨ₁tsɨ́₅ a₂cau₂. A₂jaun₂ në́₃ lë́₅ ta₁guion₃ jme₂dsí₂ quián₅ Diú₄.
6 Të₂le₃ ne₄ juɨ₅ ne₄ta₁ në́₃, jniá₂ táng₃ liaꞌ₂ lë́₅ jmɨ₁ŋíꞌ₄ a₂lë́₅ uɨꞌ₂ lɨn₃ juɨ₁liaꞌ₂ uɨꞌ₂ nɨ₁ꞌɨ₂.
Dsi₂jo₂, le₂tan₅₄ le₃lágꞌ₃ ja₁chíꞌ₄ ne₄ta₁, jniá₂ táng₃ quén₂ i₂lɨ́n₅ liaꞌ₂ lɨ́n₅ jáꞌ₂ i₂rë₂canꞌ₂ jmáꞌ₃ mɨ₂ne₄ liaꞌ₂ le₃ne₅₄ liaꞌ₂ le₃coꞌ₅₄ lag₁₂ në́₃.
7 Jë₁le₂ꞌuɨg₅₄ jáꞌ₂ quén₂ ꞌéi₂ në́₃, jniái₂ liaꞌ₂ jniá₂ dsɨ₂ꞌiaꞌ₂ león. Jë₁ca₂të́₂ on₃, jme₁lɨ́n₄ liaꞌ₂ lɨ́n₅ jan₂ guein₂ ca₁juɨ₅. Jë₁ca₂të́₂ ún₂, jniá₂ dsɨ₂ne₅₄ liaꞌ₂ jniá₂ dsɨ₂ne₄ dsa₂ mɨ₂güɨ́g₃. I₂jë₁ca₂të́₂ quén₂ në́₃, jniái₂ liaꞌ₂ jniá₂ i₁mɨg₂ i₂ꞌen₅ güɨg₂.
8 Jë₁le₃quéin₂ le₂jaun₂ në́₃, le₁dsɨ₅₄ jma₃jŋéi₂ tsɨ₁rë₂cu₅ le₂jain₂ le₂jain₂. Qui₂rë₂lióin₃ mɨ₂ne₄ le₃coꞌ₅₄ liaꞌ₂ le₃néꞌ₃ në́₃. Liaꞌ₂ ꞌuë₂-jmɨ₂ bá₄ tsá₃ ꞌna₂ i₁juáꞌ₄:
Jŋió₅ bá₄, jŋió₅ bá₄, jŋió₅ bá₄,
Te₁guiꞌ₅₄ Diú₄ i₂ꞌuanꞌ₂ guë́₄ lɨn₃,
i₂jme₁lɨ́n₄, i₂lɨ́n₅ rë₂në́₃,
i₂lén₂ co₂tan₅₄ bá₄ ján₃.
9 Liaꞌ₂ co₂ráun₂ cuë₅ jáꞌ₂ ꞌéi₂ cuë́ꞌ₅ ti₁ꞌmagꞌ₄ jme₂juɨinꞌ₂ guë́₄ lɨn₃ i₂guá₅ ne₄ ne₄ta₁, i₂chan₂ co₂tan₅₄ në́₃,
10 jaun₂ guë́₄ qui₂tón₂ ꞌuë₃ ta₁guión₂-quén₂ guiꞌ₅₄ canꞌ₅₄ ꞌéi₂, ne₄ i₂guá₅ ne₄ ne₄ta₁, qui₂jme₂juɨinꞌ₂ i₂chan₂ co₂tan₅₄, qui₂dsia₂₃ coronas quióꞌ₅ ꞌuɨg₅₄ ne₄ta₁, juáꞌ₂:
11 Te₁guiꞌ₅₄ Diú₄ quián₂,
ꞌne₂ bá₄ ca₂tɨ́ngꞌ₂ guéiꞌ₁ a₂jme₃juagꞌ₂ dsa₂,
ꞌne₂ bá₄ ca₂tɨ́ngꞌ₂ ꞌéiꞌ₃, juɨ₅bí₂ në́₃.
Ia₁ co₂jaun₂ ca₂rë₃ꞌŋió₃ ꞌauꞌ₂
a₂ca₂rë₃chá₃ ca₂le₃jë́₃ a₂cha₂.