Xbi chan' Dios nde xbi chan' maxu' xa' ntokan men
4
Wes na',
ptan' na,
nanakta re xa' jwan' mbez ndono Xbin Dios,
li lazo' go',
ndablo blibe' go' nyen' cho liga Xbin Dios ndono xa'.
Tak lo izyo re' jwan' toz ndoyoche re xa' kwin' mbez ndyodi's xa' xki's Dios.a
2 Nde mod re' yolo go' xa' ndono Xbin Dios.
Reta xa' mbez Jesucrist mbyed lo izyo ngok Xa' ti men,
xa' ya ndono Xbin Dios.
3 Le' xa' nambezta Jesucrist mbye'd ngok men lo izyo re',
xa' ya nandonoda xbin Dios,
nde xbi ya nak xbin xa' ngino Crist,
xbi jwan' mbinla go' yed nde le' xbi ya nzolay lo izyo re' naya.
4 Xin' bix na,
go' nak xin' Dios nde mbli go' ngoyo re xa' kwin' ya,
tak Xa' jwan' nzo len' lazo' go' naro toz nak yalnyebe' chan' Xa' lo xbi jwan ndono re xa' kwin' ya.
5 Tak re xa' ya ndli xgab jwan' lo izyo re',
nde jwan' lo izyo ndyodi's xa',
nde re men ndli xgab jwan' lo izyo,
nchon xa' xki's xa' ya.
6 Na' nak xin' Dios,
nde re xa' jwan' ndli lazon' Dios,
nchon xa' xki's na',
le' xa' jwan' na'nakta xin' Dios,
na'nchonta xa' xki's na',
nde jwan' re' sa yolon' xanya xa' ndono Xbi li nde xanya xa' ndono xbi kwin'.
Dios nak yalke' lazo'
7 Wes na,
ptan' na,
ke' lazon' re ta men na',
tak yalke' lazo' nak chan' Dios.
Reta xa' jwan' nke' lazon' ta mena,
xa' ya nak xin' Dios,
nde nzolo xa' Dios.
8 Le' xa' na'nked lazon' ta men na',
tera yolo xa' Dios,
tak Dios nak yalke' lazo'.
9 Che',
sa mblo' nke' lazo' Dios na',
sen' mtel' Xa' thib nya tir Xin' Xa' jwan' ngeno Xa',
mbyed lo izyo re' nde Xin' Xa' mbli sa ngenon' yalnaban.
10 Jwan' re' nak yalke' lazo':
Na'nakte na' mke' lazon' Dios,
Dios mke' lazo' Xa' na' jwan' nasa mtel' Xa' Xin' Xa' Jesús mdaya' lazon' lo Dios,
sa mbyax reta xken' na'.
11 Wes na,
ptan' na,
tez ta mke' lazo' Dios na',
noga na' ndablo ke' lazon' re ta men na'.
12 Ngenta cho tera wi' yub Dios,
per tez nke' lazon' re ta men na',
Dios nzo lazon' nde le' yalke' lazo' chan' Dios ndlo'pa mxyuta len' lazon'.
13 Jwan' re' sa mnen' ke tibla' ndonon' Dios nde Dios tibla' ndono Xa' na',
tak mda' Xa' Mbi Nayon chan' Xa' lon'.
14 Nde yub ná' mbwi' ná' nde ndej ná',
Xud na' Dios mtel' Xa' Xin' Xa',
tola' reta men.
15 Re xa' jwan' mbez le' Jesús nak Xin' Dios,
tibla' ndono Dios xa' ya,
nde taga tibla' ndono xa' Dios.
16 Naya mbyolon' nde ndli lazon' plopa nke' lazo' Dios na'.
Dios nak yalke' lazo',
nde men jwan' tibla' ndono yalke' lazo',
tibla' ndono xa' Dios nde taga tibla' ndono Dios xa'.
17 Che',
sa liga len' lazon' ndlo'pa mxyut yalke' lazo' chan' Dios,
sa sen' sin wiz kwezke Dios jwan' mblin',
zya dib la's yo lazon',
tak xa nak Jesucrist,
taga nak na' lo izyo re'.
18 Ten' nzo yalke' lazo' tya na'ngenta zeb,
che'la jwan' nak yalke' lazo' ngotey yalzeb,
tak le' yalzeb ndeno yalti.
Nde jwan' nasa,
lazo' xa' ta nzyeba tera lo' xyut yalke' lazo' chan' Dios.
19 Na' nke' lazon' Dios,
tak ner Dios mke' lazo' Xa' na'
20 Tez nzo xa' mbez:
Nke' lazo'n Dios,
nde ngi'no xa' ta men xa',
xa' ya ndokwin'.
Tak xa' jwan' na'nked lazon' ta men xa',
jwan' ngwi' xa',
¿xa nye ke' lazo' xa' Dios jwan' na'ngwid xa'?
21 Nde Jesucrist mtan' yalnyebe' re' lon':
Xa' jwan' nke' lazon' Dios,
noga ta men xa' ndablo ke' lazo' xa'.