Ye's brop jwan' mke' apóst Juan
Juan mtel' dyux
1
Na,
xa' gox nin dyux lo xa' got jwan' mblí Diosa nde lo re xin' xa',
xa' jwan' lipa nke' toz lazo'n,
nde nanakte ben'ta na,
noga re xa' mbyolo jwan' liy.
2 Nke' lazo'n go',
tak ren' ndli lazon' jwan li,
nde thiptane yan'na yoy len' lazon'.
3 Nde tyono go' yalwen,
yalndlat lazo' nde yalnabe'z,
chan' Xud na Dios,
nde chan' Jesucrist,
Xa' Nyebe',
Xin' Xud na',
nde ban go' lo jwan' lipab nde lo yalke'lazo'.
Thibla tyo men lo xki's Jesucrist
4 Nale toz ngo lazo'n tak mzyal' na pla xin' la ngete lo jwan' li,
xata mnabe' Xud na' Dios lon'.
5 Nde naya nya'b na loa,
xa' got,c
ke' lazon' re ta men na'.
Jwan' re' nakte yalnyebe' kub jwan' ngeke'n loa,
le'y nak yalnyebe' jwan' ngenola na' pola sen' mdobte mbli lazon' Crist.
6 Nde jwan' re' nak yalke' lazo',
keten' xata nchab yalnyebe' chan' Dios.
Nde yalnyebe' chan' Dios nak,
kete go' lo yalke' lazo',
xata mbin go' pola sen' mdobte mbli lazo' go' Crist.
7 Tak bro toz xa' kwin' ndoyochela lo izyo,
na'ndlid lazo' xa' le' Jesucrist ngok men mbyed lo izyo re'.
Xa' ndli jwan' re',
xa' ya nak xa' kwin' nde ngi'no xa' Crist.
8 Ndawi' toz go',
sa na'tabta go' jwan' ndo lia na' gan lo rsin' na',
sa kaya go' re jwan' yax ka go'.
9 Tak xa' jwan' ndyab nde nanakta xa' tibla' ndo lo xki's Jesucrist,
xa' ya na'ndonoda Dios.
Le' xa' tibla' ndo lo xki's Jesucrist,
xa' ya ndono Xud na' Dios nde Xin' Xa' Jesucrist.
10 Tez nzo xa' nde lo go',
nde na'ndlo'd xa' jwan' nte'd na' lo xki's Jesucrist,
na'kayad go' xa',
neka gab go' lo xa':
¡Wen nde go'!
11 Tak men jwan' gab lo xa':
¡Wen nde go'!,
noga men ya ngeli jwan' narax ndli xa'.
Ndlin xgab yatwi'n go'
12 Nzora jwan' ke'n lo go',
per na'ncholasta na' ben'ta ke' ne lo ye's,
na ndli xgab yatwi'n go' sa yub na' todi's,
sa yopa nale lazon'.
13 Re xa' xin' bel go',
xa' jwan' mblíga Dios,
ni xa' dyux lo go'.
Ta naka.