Ye's ner jwan' mke' apóst Juan
Di's nda' yalnaban
1
Tej ná' lo go' jwan' nzola xata mdobte nera,
jwan' mbin ná',
jwan' mbwi' lo ná',
jwan' mne ná' nde kon ya' ná' mbwal ná' jwan' nak Di's nda' yalnaban.
2 Tak le' yalnaban mbro'toy lo men nde mbwi' ná'y,
nde nda' ná' kwent chan' na'y nde ndej ná' le'y nak yalnaban adi',
le'y ndo kon Xud na' Dios nde mbro'toy lo ná'.
3 Jwan' mbwi' ná' nde mbin ná',
jwan' naxa ndotej ná' lo go',
sa thita gak na',
nde lipa thita gak na' kon Xud na' Dios nde kon xin' Xa' Jesucrist.
4 Jwan' re' ngeke' ná' lo go',
sa thiptane yo nale lazo' reta na'.
Dios nak xni
5 Jwan' re' nak jwan' mbin ná' mdej Jesucrist lo ná' nde jwan' naga ndeja ná' lo go':
Dios nak xni,
nde na'ndonod Xa' nek lud yal'kow.
6 Tez gab na',
thita nak na' kon Xa',
nde ngeten' lo yal'kow,
nkwin' na' nde na'ngelid na' jwan' gal'pa.
7 Per tez ngeten' lo xni,
ta xa ndo Dios lo xni,
zyasa thita gak reta na',
nde ren chan' Xin' Xa' Jesús,
tombiy na' lo reta xken na'.
8 Tez gab na' na'ngenod na' yalke,
le'ga lazon' nge kwin'non',
nde nandlid na' jwan' gal'.
9 Per tez xobdol na' reta xken na' lo Dios,
mnega na' le' Dios nak Xa' gal',
ton' Xa' reta xken na' nde tombi Xa' na' lo reta jwan' narax mblin'.
10 Tez gab na',
tera lin' yalke,
zyasa ndlilal na' Dios Xa' kwin',
tak tera' lipa lazon' xki's Xa'.