Crist, nak Xa' ndla'ston'
2
Xin' bix na,
re jwan' re' ngeke'n lo go' sa nalid go' yalke.
Per tez nzo go' ndli yalke,
ngenon' ti Xa' ak ron' jwan' ndla'ston' lo Xud na' Dios,
Xa' ya nak Jesucrist,
Xa' gal'.
2 Nde Jesucrist nak Xa' mdaya' lazon' lo Dios,
sa mbyax reta xken na' nde na'nakte ben'ta xken na',
noga xken reta men nzi dib lo izyoy.
3 Nde jwan' re' mnen' ke nzolon' Xa',
tez xobyek na' re yalnyebe' chan' Xa'.
4 Le' men jwan' mbez:
“Nzolon Dios”,
nde nanxobyekta xa' re yalnyebe' chan' Dios,
xa' ya nak xa' kwin',
nde na'ndonod xa' jwan' li len' lazo' xa'.
5 Le' men jwan' nxobyek xki's Dios,
lazo' men ya ndlo'pa mxyut yalke' lazo' chan' Dios nde che' sa mnen' ndonopa na' Dios.
6 Xa' jwan' mbez tibla' ndono xa' Dios,
ndablo kete xa' xa mkete Jesús.
Yalnyebe' kub
7 Wes na,
ptan' na,
na'ngeket na yalnyebe' kub lo go',
le'n ngeke' yalnyebe' gox nzola nera',
jwan' ngenola go' sen' mdobte mbli lazo' go' Crist.
Le' yalnyebe' re' nzolay pola,
naka di's jwan' mbin go' sen' lo mdobte mbli lazo' go' Xa'.
8 Nde taga,
ngeke'n yalnyebe' re' xaja jwan' kuba lo go',
jwan' re' ndlo'y mod gal' mkete Jesucrist nde taga' gal' ngete go',
tak le' yal'kow ndorid ndaba nde le' xni jwan' nak lipa ndotoxniley.
9 Tez cho xa' mbez ndo xa' lo xni nde ngi'no xa' ta men xa',
xa' ya ben' ndo lo yal'kow.
10 Le' xa' nke' lazon' ta men na',
xa' ya tibla' ndo lo xni nde na'ngenta jwan' cheb xa'.
11 Le' xa' jwan' ngi'no ta men xa',
ndo xa' nde ngete xa' lo yal'kow nde na'nyed xa' plo nda xa',
tak le' yal'kow mtokowa lo xa'.
12 Ngeke'n jwan' re' lo go',
xin' bix na,
tak Dios mton'la reta xken go' por kwent chan' Jesucrist.
13 Ngeke'n jwan' re' lo re go' men gox,
tak mbyolo go' Xa' jwan' nzola axta sen' mdobte mdoxkwa' izyo.
Ngeke'n jwan' re' lo re go',
or yen',
tak go' mbli gan lo maxu'.
Ngeke'n jwan' re' lo re go' mey bix,
tak mbyolo go' Xud na' Dios.
14 Mke'n jwan' re' lo re go' men gox,
tak mbyolo go' Xa' jwan' nzola axta sen' mdobte mdoxkwa' izyo.
Mke'n jwan' re' lo re go',
or yen',
tak ne ndo go' nde le' xki's Dios tibla' ndonoy go' nde mbli go' gan lo maxu'.
15 Na'ke'd lazo' go' yalnarax lo izyo re',
neka re jwan' narax ndli re men.
Tez nzo xa' nke' lazon' re jwan' na,
len' lazo' xa' ya na'ngenta yalke' lazo' chan' Xud na' Dios.
16 Tak reta jwan' re' nzo lo izyo,
re jwan' ndyen bel' men,
re jwan' ndyen ngud lo men nde re xa' nchak naro lo re jwan' toz ngeno xa',
reta jwan' re' na'ndede lo Xud na' Dios,
le'y ndryo' lo izyo re'.
17 Nde re jwan' narax lo izyo re' ndluxa kon re xgab na'y,
per men ndli jwan' ncholas Dios,
men ya mban thiptane.
Xa' ntokan men
18 Xin' bix na,
ndosinla wiza nde xa nchonla go',
le' xa' kwin' mbez nak Crist ndela xa',
taga naya jwan' toz ndoro'tola re xa' kwin' mbez nak Crist,
jwan' nasa mnen' ndosinla wiza.
19 Re xa' re',
mbro' xa' xij na',
per na'nakta xa' men na',
tak tez ngak xa' men na',
nxek xa' ngyan' xa' kon na',
per mbro'te xa' xij na' sa ndlo' ke na'nakta re xa' nak men na'.
20 Le' go' ngeno Mbi Nayon jwan' mda' Crist,
nde nzolola go' reta jwan' chan' Dios.
21 Ngeke'n jwan' re' lo go',
tak nzolo go' kwan nak jwan' li,
na'nakte tak na'nzolod go'y nde go' mne ke lo jwan' li na'ndeda nek tib jwan' kwin'.
22 ¿Cho nak xa' kwin'?
Xa' ta nkala's ke Jesús nak Xa' jwan' mtel' Dios,
xa' re' nak xa' ntokan men,
xa' jwan' nkala's Xud na' Dios nde Xin' Xa' Jesús.
23 Reta xa' jwan' nkala's le' Jesús nak Xin Dios,
xa' ya nandonoda Dios,
nde le' xa' jwan' ndej le' Jesús nak Xin' Dios,
xa' ya ndono Dios.
24 Jwan' ta mbin go' lo sen' mdobte go',
jwan' na tibla' yo lazo' go',
nde tez jwan' mbin go' zya tibla' nzoy lazo' go',
zyasa tibla' ndono go' Dios nde ndono go' Xin' Xa' Jesucrist.
25 Nde jwan' mke'yek Xa' ta' Xa' lon',
jwan' na nak yalnaban adi'.
26 Mke'n jwan' re lo go',
sa ndawi' toz go' lo re xa' jwan' nchola's kwin'no go'.
27 Le' Mbi Nayon jwan' mda' Crist mkaya' go',
tibla' nzoy len' lazo' go'.
Nde na'nakin'ta go' nek tib men lo'y lo go',
tak le'ga Mbi Nayon ndlo' reta jwan' lo go' nde naka jwan' li,
nakte jwan' kwin',
nde xata mblo' Mbi Nayona lo go',
tata tibla' ptono go' Xa'.