Re xa' nak xin' Dios
3
Bwi' go' plopa bro toz mke' lazo' Xud na' Dios na',
sa naya ndolen' xin' Dios;
jwan' nasa re xa' na'ndlid lazon' Dios nayolod xa' na',
tak nambyolod xa' Dios.
2 Wes na,
ptan' na,
naya nakla na' xin' Dios,
nde tenye tera lo' cho kwan ak na' yoloba,
mnela na' sen' lo ryo'to Jesucrist,
ak na' xaxa nak Xa',
tak xata nya Xa' ta win' Xa'.
3 Nde re men jwan' ngembed jwan' re',
lega xa' nkwan' xa' nambi tyo xa' lo Dios,
ta xa nambi nak Jesucrist.
4 Reta men ndli jwan' narax,
nanxobyekta xa' ley chan' Dios,
tak reta jwan' narax ngi'sa ley chan' Dios.
5 Nde mne go',
le' Jesús mbyed kib reta xken na',
nde na'nchapta Xa' nek tib yalke.
6 Reta men jwan' thibla' ndono Jesús,
nandlid men jwan' narax,
le' reta xa' ndli jwan' narax,
tera yen xa' cho nak Jesús,
neka nzolo xa' Jesús.
7 Xin' bix na,
na'ta'da go' di's kwin'no xa' go',
tak xa' ndli jwan' gal',
gal' nak xa',
xaxa gal' nak Jesús.
8 Tak xa' ndli jwan' narax,
xin' maxu' nak xa',
tak maxu' ndli jwan' narax xata mdobte mdoxkwa' izyo.
Jwan' nasa mbyed Xin' Dios,
mbyed sil Xa' reta jwan' ndli maxu'.
9 Reta men jwan' nak xin' Dios,
nandlid men jwan' narax,
tak le' yalnaban chan' Dios nzo bina len' lazo' men nde na'nyeda li men jwan' narax tak le' men nak xin' Dios.
10 Jwan' re' ndlo' xanya men nak xin' Dios nde xanya men nak xin' maxu',
re xa' jwan' nandlid jwan' gal' nde ngi'no xa' ta men xa',
xa' ya na'nakta xin' Dios.
11 Tak di's re' nak jwan' mbin ner go':
Ndablo ke' lazon' ta men na'.
12 Na'lid na' xa mbli Caín,
xa' ngok xin' maxu' mbij xa' wes xa'.
¿Nde kwan nak yalke mbij xa' wes xa'?
Tak re jwan' mbli xa' naka jwan' narax,
nde le' jwan' mbli wes xa' naka jwan' gal'.
13 Wes na,
ptan' na,
na'yoyenta go' tez re men jwan' nandlid lazon' Dios,
ngi'no xa' go'.
14 Le' na' mnen',
mbron' lo yalguj nde mblan' lo yalnaban,
tak nke' lazon' re ta men na',
le' xa' na'nke'd lazon' ta men na',
tata ben' nzo xa' lo yalguj.
15 Tak re xa' ngi'no ta men na',
nak xa',
xa' guj men.
Nde mnela go' nek tib xa' guj men na'ndonod xa' yalnaban adi'.
16 Lo ta mdaya' Jesús yalnaban chan' Xa' por na',
tamod sa mbyolon' yalke' lazo',
nde taga na',
ndablo tayan' yalnaban chan' na' por re ta men na'.
17 Tez cho xa' nkeno bro jwan' lo izyo re' nde ngwi' xa' ti ta men xa' ndyak yalti,
nde na'ndlata lazo' xa' men ya,
¿xamod keno xa' ya yalke' lazo' chan' Dios len' lazo' xa' sa?
18 Xin' bix na,
le' yalke' lazo' men na'akte ben'ta di's,
nekla ben'ta tyoba ro men,
ndablo li mena nde lipa aka.
19 Che',
sa ncholon' ndon' lo jwan' li,a
nde yo ne lazon' lo Dios,
20 nde tez lazon' mbeza lon' nchap na' yalke,
cho le'a Dios,
mas naro nak Xa' lo lazon',
nde mne Xa' reta jwan'.
21 Wes na,
ptan' na,
tez lazon' nden' na gal' ndon',
zyasa dib la's ndon' lo Dios.
22 Nde choja jwan' nya'b na' lo Xa',
ta' Xa'y,
tak nxobyek na' yalnyebe' chan' Xa' nde ndlin' re jwan' ndryo' lazo' Xa'.
23 Nde jwan' re' nak yalnyebe' chan' Dios:
Ndablo thiptane li lazon' le Jesucrist Xin' Dios nde ke' lazon' ta men na',
xata mnabe' Xa' lon'.
24 Nde le' men ndli jwan' nyebe' Dios,
tibla' ndono men Dios nde tibla' ndono Dios men.
Nde mnen' le' Dios tibla' ndono Xa' na' tak mda' Xa' Mbi Nayon chan' Xa' lon'.