3 Nde por yalne chan' Dios,

mda' Xa' lon' reta jwan' nakin' na' sa ban na' nde gal' xobyek na' Dios,

lo ta mbli Xa' mbyolon' Xa' jwan' mbrez na' kon yalnaro nde yalwen chan' Xa'.

4 Lo reta jwan' re' mda' Dios xki's Dios,

jwan' naro nde ntak toza lon'.

Sa lo ta mda' Xa' xki's Xa',

noga go' ak xaja nak Xa',

lo sen' mbla'a go' re yalxkap nde jwan' narax nya'b bel' go' ta nzo lo izyo re'.

5 Jwan' nasa taga,

naxax gok go' lo jwan' ndli lazo' go' nde lo jwan' ndli lazo' go' blo go' yalnaxut,

lo yalnaxut nak go' blo go' yalnchak.

6 Nde lo yalnchak blo go' yalkenap lazo' go'^a,

lo yalkenap lazo' go' bxek go' lo re jwan',

lo mxek go' lo re jwan' pseb lazo' go' Dios,

7 lo mzeb lazo' go' Dios nabe'z gok go' lo ta go' nde lo nabe'z nak go' lo ta go',

blo go' yalke' lazo'.

8 Tak tez reta jwan' re' ndono go' nde ndoxena lazo' go',

naxax ak go' nde sin' toz li go' tak ndoyolo go' Jesucrist Xa' nyebe' lon'.

9 Le' men nangenod re jwan' re',

xa' ya nak xaja thi men lud nchoni lon',

nangwid xa',

nde mbyaj yek xa' mbila xa' lo re xken xa' jwan' mbli xa' pola.

10 Jwan' nasa wes na,

ptan' na,

ndablo thibla' pchal go' sa nali tyo go' lo jwan' ta mbrez Dios go' nde mblí Dios go',

tak tez li go' re jwan' re' nek lud na'gabta go' lo re jwan' narax.

11 Tak ta sa dib naxen xyal' yala yote go' ten' nyebe' Jesucrist dib adi',

Xa' mtolan' nde nyebe' lon'.

12 Jwan' nasa na'lat na nde thibla tela's na lo go' re jwan' re',

tenye mnela go'y nde nela ndo go' lo jwan' li ta nzolo go' naya.

13 Laja naban na,

xgab na nak,

gal' ta mbez na yek go' kon re di's re'.

14 Tak mnela na ndogaxla be' lan yalnaban lo izyo re',

ta xa ne Jesucrist Xa' nyebe',

lon.

15 Jwan' nasa chal toz na nin lo go',

sa nayajta re di's re' yek go' sen' ngujla na.

16 Sen' lo mblo' ná' lo go' xa nak yalne nde xa ye'd Jesucrist Xa' nyebe',

namtad lazo' ná' re jwan' mdej ná' lo go',

tak kon ngudlopa ná' mbwi' ná' xni chan' Xa'.

17 Tak lo sen' Dios mbli naro Xa' nde wen mni Dios lo Xa',

zyasa lo xni chan' Dios mbyen mni Dios nchab Dios:

“Xa' re' nak Xin' na jwan' nke' toz lazo'n,

nde Xa' ngo nale lazo'n.”

18 Ná' mbin di's ya mbro' lo be' sen' nzi re ná' Jesús lo yi' nayon.

19 Nde lo re jwan' re' ngenon' re di's gal' ntak toz mdej profet,

nde jwin toz li go' tez xobyek go' jwan' nchab re profet,

tak re di's ya nak xaja thi ki jwan' ntoxni lo yal'kowa laja tuxni nde yed Jesucrist Xa' nak xaja mbel ro toxni len' lazo' go'.

20 Nde noga' ndablo nye go',

nek thib xki's Dios jwan' mdej re profet na'akta tata le' yen mena,

21 tak reta di's ya nangoltey yek profet,

che'la Mbi Nayon chan' Dios mdej lo xa' reta jwan' mni xa'.