Re maestr nde re profet kwin'
2
Taga ngo re profet kwin' xij xa' Israel pola,
taga yo maestr kwin' xij go' naya.
Re xa' ya nagas ko xa' re xgab kwin' yek men sa tya'b men nde axta gab xa' ke nanzolod xa' Jesucrist,
Xa' jwan' mtola' xa'.
Nde jwan' kwin' li sa yenla xa' sin jwan' lux xa'.
2 Nde men toz tyonke xis re jwan' ta lo' xa' ya,
nde xke chan' re xa' ya nixin men xis ned gal' chan' Jesucrist.
3 Lo yaltabla's chan' xa' toblo xa' tmi,
nde kon re yalkwin' kib xa' tmin go'.
Nde re xa' ya mtan'la Dios pen rid xa' xata pola nde na'lya'd xa' lo ne'y.
4 Tak Dios na'nton'ta xken re áng jwan' mbli yalke,
che'la mtel' Dios re áng ya ye'r abil nde tya mtow'yo Dios xa' lo yal'kow,
laja sin wiz sen' taya' re áng ya kwent.
5 Nde taga' na'nton'ta Dios xken reta xa' mbre pola,
che'la mtel' Dios yi xu' toz tir,
xis re xa' xkap nde ben'ta Noé,
xa' jwan' mdej xa gal' kete men lo xned Dios,
nde ti ta gaz men mblya'.
6 Noga sen' mtolux Dios yez Sodoma kon yez Gomorra,
mbyol la kebe' ngolal la di,
jwan' na mbli Dios sa nye men ta yate re xa' ndli jwan' narax.
7 Nde mtola' Dios Lot,
ti mbi' gal',
jwan' na'nxekta ngwi' re jwan' tyola's men ndli re xa' xkapa.
8 Lot xa' gal' ta nzo xij re xa' ya,
reta wiz nabil ncho lazo' xa' lo nchon xa' nde ngwi' xa' reta jwan' narax ndli re xa' xkapa.
9 Dios mne xa tola' Xa' men jwan' nxobyek Xa',
lo sen' nzo men xij re jwan' narax.
Nde mne Dios xa koxa' Dios re xa' xkap sa ya xa' pen sen' sin wiz jwan' nya'b Dios kwent.
10 Nde mas jwan toz yate re men ndli jwan' nda lazon',
nanchola'sta xa' nyebe' men lo xa'.
Ne yek xa' nde ne lazo' xa',
nanzyepta xa' ni xin xa' xis re xa' ngeno yalnyebe' lo be'.
11 Nek re áng chan' Dios,
tenye ngeno xa' mas yalnyebe' nde ne xa',
namnid xa' di's xin xis re yalnyebe' ya nerla ke Dios.
12 Re maestr ya,
nak xaja nak re ma' jwan' nangenta xgab yek na',
ndli kow ma' jwan',
ben'ta nchal ma' nde nchala ma' sa gaj ma'.
Ndodi's xin xa' xis re jwan' nayenta xa',
nde ta xa ndlux ma' ba,
lux xa' lo yalnarax chan' xa'.
13 Nde kix xa' jwan' mblino xa' xa'ga men sa kaya' xa' jwan' nzal' xa'.
Nale ncho lazo' xa',
nde ndlyabe ba ndli xa' re jwan' xkap nya'b bel' xa',
xa' ya nak yantho nde ntosa' xa' wí' sen' ndyob xa' ro mes xij re go' nde nakij toz xa' yalkwin'.
14 Lo ngwi' xa' thi ngol,
se nchola's xa' tyen xa' ngol,
nanchaxilta lazo' xa' ndli xa' jwan' xkap.
Ntokil' xa' re men jwan' nchak rop xgab na' lo jwan' narax,
jwin toz xa' lo yaltabla's,
xa' ya ngete lo yalnayi' chan' Dios.
15 Mdya'b xa',
tak mbla' xa' ned gal'.
Xned profet Balaam xin' Beor mxen xa',
profet ya ndyen li gan tmi lo jwan' narax
16 nde mxentob Dios profet lo nda li profet jwan' narax.
Thi bur mni lo xa' xa ni thi mena,
sa na'ndlid xa' yalkow nzo yek xa'.
17 Re xa' ya nak,
xaja pos ngenta nita,
nde xaja xkow jwan' nche' mbi ba,
nde re xa' ya,
ya lo yal'kow ngin dib adi'.
18 Tak nabta di's bxal' ngen cho sin' li ni xa' nde kon re jwan' ndyen bel' xa' ntokil' xa' re men.
Re men jwan' ta nayenta mbro'te xij re xa' jwan' ta ndli jwan' naraxa,
sa bere xa' ya,
lo jwan' narax.
19 Mbay re xa' ya mbez naxàl' nkete men nde le'ga lo xa' nyebe' re jwan' narax.
Tak jwan' tibla' ndli men jwan' na nyebe' lo men.
20 Mbro'tea xa' lo re jwan' xkap nzo lo izyo re',
lo mbyolo xa' Jesucrist Xa' nyebe' nde Xa' ntolan'.
Nde mda' xa' di's ndli re jwan' narax gan lo xa' tib gob nde bere mblayo xa' lo ne'y,
re xa' ya che' ndryo re jwan' narax lo xa' ke lo jwan' mbli xa' nera'.
21 Mas jwin na'ngyolod xa' ned gal',
ke mbyolo xa'y nde mbere xa' nde mbla' xa' yalnyebe' nayon jwan' mkaya' xa'.
22 Re xa' ya nchote jwan' ta nchab di's:
“Le mbak bere ncha jwan' ngu's mbak nde nguch jwan' ngolo ngod taxa ndlya nguch lo ben tedib gob.”