Ye's ner jwan' mke' apost Pedr
Pedr mni dyux
1
Na Pedr,
apost chan' Jesucrist.
Ngeke'n ye's re' lo re go' jwan' ngetendra's nzo xa'ga izyo,
xaja men nzo ten' nanakta laz na',
lo xyon Ponto,
Galacia,
Capadocia,
Asia nde Bitinia.
2 Re go' jwan' ax mblí Xud na' Dios xata nzo yek Dios axta pola.
Nde Mbi Nayon mbli nayon go',
sa xobyek go' Dios nde kon ren Jesucrist yach go' lo re xken go'.
Pkaya' re go' reta yalwen nde yalnabe'z chan' Dios.
Yalnaban jwan' ngembed na'
3 Nabe'z nak Dios,
Xud Jesucrist Xa' Nyebe' lon',
tak jwan' toz mblat lazo' Dios na',
mbli Xa' ngol nakub na' sa kayan' yalnaban jwan' liga ngembed na',
lo ta mbro'xban Jesucrist xij re xa' nguj.
4 Sa kaya' go' jwan' ndin' go',
ta nzosa' lo be',
jwan' nanchasa'da,
nancha'yoda nde nandluxta.
5 Nde kon yalne chan' Dios nkenap Xa' go' sa lya' go',
sen' sin lulka wiz,
lo ta ndli lazo' go' Xa'.
6 Jwan' nasa nale toz blo lazo' go',
nde tenye naya ndablo rid go' nar ned yalti jwan' ben'ta nde rid ndab,
7 sa lo' ke ndlipa lazo' go' Xa',
tak ta xa ndlino men ora,
ndablo yoy lo bel sa yobe' cho liga ora nde tenye or ndluxa,
le' lo ta ndli lazo' go' ba mas ntaka lo or tak nandluxtey.
Sa sen' ye'd Jesucrist,
tamod ndyen Xa' li lazo' go' Xa',
sa li naro Xa' jwan' ndli lazo' go' nde wen wi' Xa'y.
8 Nde tenye tera wi' go' Jesucrist nke' lazo' go' Xa'.
Tenye nangwi'd go' Xa' ndli lazo' go' Xa' nde nale toz nzo lazo' go' kon ti yalnale jwan' na'zyalta di's koxkan men.
9 Tak mne go',
jwan' ngetoblo go' lo ndli lazo' go' Jesucrist,
nak lya' go'.
10 Axta pola re profet mte'd xa' nde jwin toz mbral xa',
xamodpa tola' Dios men,
zyasa mdej profet lo re men xamodpa ta' Dios yalwen chan' Dios lo re men.
11 Nde por Xbin Crist ax mnela xa' re yalti tyak Crist nde re yalnaro jwan' ye'd lo ngolo re yalti ya.
Nde mkwan' xa' nye xa' nyen' choy nde polpa ak re jwan' mdej Xbin Crist jwan' nzo lazo' xa'.
12 Lo re profet ya,
mdej Dios ke naktey par xa',
le'y nak par na'.
Naya reta jwan' re' mnela go' por re men jwan' ndej di's wen chan' Jesucrist por yalnibe' chan' Mbi Nayon jwan' nde lo be'.
Re jwan' re',
nchola's re áng nye xa' xamodpa naka.
Dios ngebez nambi kete men
13 Jwan' nasa ptosa' go' nde jwin bli go' xgab jwan' li go'.
Nde thiptane ptob go' xgab go' lo jwan' ta' Dios lo go',
sen' ye'd Jesucrist tak wen nak Dios.
14 Xajka mdyen' nchon toz di's,
na'keted go' lo jwan narax ta nya'b lazo' go' ndli go' zya,
lo sen' tera yolo go' Dios.
15 Che'la,
ta xa nayon Xa' jwan' mbrez go',
taga nayon pkete go' lo re nak jwan' li go'.
16 Tak lo Xki's Dios nchab:
“Gok nayon go',
tak nayon nak Na.”
17 Go' mbez Xud go' nak Dios jwan' lal nya'b kwent lo reta men lo re jwan' ndli men,
jwan' nasa ndablo pseb lazo' go' Xa' laja ndarid go' lo izyo re'.
18 Tak Dios mtola' go' lo re jwan' mte'd go' lo xud go' jwan' ngen cho sin' li,
nde mne go',
Dios mtola' go' per nakte kon or nek plat jwan' ndlux,
19 che'la kon ren ntak toz tir chan' Crist jwan' mxo Xa' lo nguj Xa',
xaja thi mbakxil' nambi tir nde nadan'.
20 Nde sen' tera tyoxkwa' izyo,
nakla ta tyak Xa',
nde naya mbridla Xa'y,
tak nke' lazo' Xa' go'.
21 Nde Crist mbli sa ndli lazo' go' Dios,
Xa' jwan' mblo'xban Crist xij re xa' nguj nde mda' Dios yalnaro lo Crist,
sa jwan' ta ndli lazo' go' nde jwan' nkembed go',
aka lo Dios.
22 Naya ngolo mbi xbin go',
kwent mxobyek go' jwan' gal' ta nda' Mbi Nayon sa lipa ke' lazo' go' re wes go' nde ptan' go'.
Jwan' nasa dib ben go' nde dib nzo lazo go' pke' lazo go' reta ta men go'.
23 Tak ngol nakub go',
per nangoltra go' lo bin jwan' ndlux,
le' go' ngol lo xki's Dios jwan' nak yalnaban adi'.
24 Tak lo Xki's Dios nchab:
Reta men nak xa nak wan,
nde yalxna chan' men nak xa nak ye' lo wan.
Le' wan mbis nde nchab yen' ney.
25 Le' xki's Dios adi' naka.
Nde di's ya nak di's wen chan' Jesucrist jwan' mbyaj lo go'.