Pke' nza go', xa' rik
5
Go',
xa' rik,
bin go' jwan' re':
bin' go' nde brez yaj go' tak yalti toz ye'd lo go'.
2 Tak reta jwan' toz ta ngeno go',
tolo gaba nde le' re xab go',
tolo wa mbexa.
3 Le' reta tmin go' jwan' or nde plat tolo gas yotoy.
Nde le' yoto ya tay kwent chan' go' lo Dios yoloba,
nde xaja ntol' bel la tol' la dib go'.
Bro toz jwan' ngethop go' nde ndosin gax la wiz lux izyo'.
4 Bwi' go',
le' reta tmi jwan' namdixta go' mka re men jwan' mke sin' lo go',
tmi ya ngebez yaj xis go';
nde Dios mbinla Xa' plopa nalat mbez re men jwan' mke sin' lo go'.
5 Lo izyo re' nkeno go' reta jwan' ncholas go',
nde ndoja re jwan' ndli go';
nde mtocha' go' go',
xaja tib ma' jwan' mzin la wiz kuj xa' ba.
6 Nde ngen cho yalke nchap re men wen,
mtoti go' xa' nde mbij go' xa' nde nek lud namchalta xa' lya' xa' lo ya' go'.
Bxek go' nde ptodi'sno go' Dios
7 Jwan' nasa re go' wes,
bxek go' kebe' sin wiz ye'd Xa' Nyebe'.
Bwi' go' lo ti xa' ngo bin,
xa nxek xa' nde mbed xa' sen' lo lya yi ner sa ko xa' bin nde kebe' ngwat yi nthop xa' jwan' ngok.
8 Taga go',
ptoli go' xgab go' nde bxek go';
tak Xa' Nyebe' ndosin gaxla wiz ye'd xa'.
9 Wes,
na'wayixta go' ta go',
sa naxyopta xken go' lo Dios;
tak Xa' Nyebe' ndola ro yo.
10 Wes na,
pte'd go' lo re xa' jwan' mbyed ta' xki's Dios pola,a
xa mxek xa' lo reta yalti.
11 Naya nche' win',
nabe'z toz nda re xa' nxek lo yalti.
Nchon la go' plopa mxek Job lo re yalti,
nde mne go' xa mbli ley' Dios Job,
tak le' Xa' Nyebe' nabe'z toz Xa' nde ndlat lazo' Xa' men.
12 Reta jwan' re',
wes na,
sen' lo tej go' tib jwan' li,
nandabloda tej go' lo be' neka izyo nde neka xaga' jwan';
jwan' ndablo gab go' tez li go'y,
gus go' “mbay”,
tez nalid go'y,
nakapta go' di's li go'y sa nakwan'ta go' xken go' lo Dios.
Xamod todi'sno men Dios
13 Tez xanya go' ndyak yalti,
ptodi'sno go' Dios.
Nde tez xanya go' nale nzo lazon',
bil' go' lo Dios.
14 Tez nzo go' nayiz,
brez go' re xa' nak sin' lo yodo' sa nya'b xa' lo Dios sa dyan' men yiz,
nde lo le Xa' Nyebe' ka'b xa' aseyt yek xa' ta nayiza.
15 Nde le' todi'sno xa' Dios lipa lazo' xa' Dios,
zyasa dyan' men ta nayiza nde le' Xa Nyebe' liche Xa' men yiz;
nde tez xa' yiza nzob xken xa',
Dios ton' na.
16 Jwan' nasa,
bxobdol go' xken go' lo ta go',
nde taga' mna'b go' lo Dios por re ta go',
sa dyan' go'.
Xa' gal' ndo lo Dios,
xki's xa' ya jwan' toz ndli nde naxax nchon Diosa.
17 Elías ngok xa' tib men xajka na' re',
nde mna'b xa' lo Dios dib nzo lazo' xa' sa na'lyad yi,
nde nandlad yi lo izyo dipta tson lin' narol.
18 Bere mna'b xa' lo Dios nde taxa mbla yi tib gob nde ngok re jwan' bin lo izyo.