Filemón
Pab ni dyux
1
Na Pab,
nge'n lizyi'b tak ndej na xki's Jesucrist.
Na nde wes Timoteo ngeke'n ye's re' loa,
wes Filemón ta thita sin' ngen'.
2 Ni ná' dyux lo ptan' na' Apia,
lo wes Arquipo ta thita nchal na' ngen' sin' nde noga lo reta wes jwan' ndyop liz la.
3 Yalwen nde yalnabe'z chan' Xud na' Dios nde chan' Jesucrist Xa' Nyebe' ndono re go'.
Yalwen chan' Filemón nde ndlipa lazo' xa' Dios
4 Reta sen' ndyodi'snon Dios tibla' ntela's na ndej na lu nde ndan dyux lo Xa'.
5 Tak nchon na jwan' toz ndli lazo'a Jesucrist nde nke' lazo'a Xa' nde taga ndlia lo reta men nak xin' Dios.
6 Nya'b na lo Dios sa tatka tyo nea lo jwan' ndlia nde lo jwan' ndlipa lazo'a sa yoloa reta jwan' wen li men sen' lo nzolo men Jesucrist.
7 Nale toz nzo lazo'n nde ngo nea lazo' ná' kon yalwen chan' la tak lu wes na,
ngo nalea lazo' re men,
xa' jwan' nak yez Nayon chan' Dios.
Pab ndla'sto Onésimo
8 Jwan' nasa,
tenye kon yalnyebe' chan' Crist toyal tir nyebe'n loa nyen' kwan ndablo lia,
9 per mas jwin nya'b na loa kon yalwen chan' Jesucrist.
Na Pab,
ngoxla na nde naya nge'n lizyi'b kwent ndan xki's Jesucrist,
10 naya nya'b na loa la'stoa xa' jwan' nak xaja xin' na,
ndole Onésimo,
tak na mdej xki's Dios lo xa' sa ngol nakub xa' laj nge'n lizyi'b re'.
11 Pola loa,
ngok xa' ti men ngen cho rsin' nde naya lo rop na' sin' toz ndli xa'.
12 Naya ngetel' na xa' loa,
jwan' nasa pkaya' xa' xaja kaya'a na.
13 Nchola's na tyentob na xa' nche',
sa le' xa' li sin' lon ta nangenta lu,
laja nge'n lizyi'b kwent ndej na di's wen chan' Dios.
14 Per na'lit nay tez nakapta lu di's,
tak nancholasta na lia xgab na ngenabe'y loa.
Ndablo li ley dib nzo lazo'a.
15 Tak nzo pa jwan' re' mbli sa mxon' Onésimo lud loa,
sa naya tiptane kaya'a xa',
16 nde na'akta xa' ben'ta men li sin' loa,
le' xa' ak mas ke ti men li sin',
xaja ti wespa la jwan' nke' toz lazo'a.
Na,
nke' toz lazo'n xa',
le' lu ndablo masra' ke' lazo'a xa',
xajka wes la lo izyo re',
nde wes la lo xki's Dios.
17 Nde naya,
tez ngwi'a na xajka thi wes la,
pkaya' Onésimo xaja kaya'a na.
18 Tez nzo kwan mblino xa' lu,
tez nda'b xa' loa,
na kixa.
19 Na,
Pab,
yub na ngeke'n di's re' loa,
na kixa.
Tezka tela's la,
noa nda'b lon,
tak na mdej xki's Dios loa.
20 Ta naka wes,
nya'b na loa bli jwan' re' kon yalwen chan' Xa' Nyebe',
bla'ston sa yo nale lazo'n lo xned Xa' Nyebe'.
21 Nke'n ye's re loa,
tak mnen nchon la di's nde mnen tlia masra' jwan' wen,
jwan' nanit na loa.
22 Nde noga,
nya'b na loa blaj thi ten' yan' na,
tak mnen Dios nchon xki's go' nde ya twi'n go'.
Pab mni dyux lo xa'
23 Epafras ntel' dyux lo re go',
xa' jwan' thipta nge rop ná' lizyi'b tak ndej ná' xki's Jesucrist.
24 Nde noga Marcos,
Aristarco,
Demas nde Luk ntel' xa' dyux lo re go',
tak re xa' re' ndla'ston lo sin'.
25 Le' yalwen chan' Jesucrist ndo kon re go'.
Ta aka.