Btej xki's Dios lo re men
4
Ndowi' Dios nde Jesucrist Xa' jwan' nya'b kwent lo xa' naban nde xa' nguj sen' lo yed xa' xajka Rey,
nya'b toz na jwan' re' loa.
2 Btej xki's Dios lo reta men,
thibla' bteja,
sen' toyala nde tenye sen' natoyaltey,
ptoxut men,
ptokox men,
ptoni men,
bxek xa' nde gal' blo'y lo xa'.
3 Tak sin wiz re men na'nyed lazo' xa' gon xa' jwan' gal' ndlo' xkis Dios,
nde anta che' nchola's xa' ngon xa' jwan' nda lazo' xa',
kwan' xa' bro toz maestr kwin' lo' ben'ta jwan' nchola's xa'.
4 Na'tobnzatra' xa' jwan' li ndlo' xkis Dios,
le' xa' tob nza re di's nta lazo' men.
5 Le' lu,
ndawi' toz la xa ketea,
bxek reta yalti,
thibla btej dis wen chan' Jesucrist lo re men,
jwin bli sin' jwan' mdaya' Dios loa.
6 Tak na ndosa'a gaj xaja thi jwan' yon lo Dios,
ndosin gaxla be' yon ned.
7 Mchal na mblin reta sin' jwan' mda' Dios lon,
nde mblin gan ngoloy,
thibla mdon lo jwan' ndli lazo'n.
8 Nde naya ngembed na,
ta' Xa' Nyebe' thi koron jwan' mblin gan,
tak gal' mkete'n lo Xa',
Xa' gal' nya'b kwent,
nde nanaktey ben'ta lon ta' Xa'y,
noga ta' Xa'y lo reta xa' jwan' nale nzo lazon' ngembed kebe' sin wiz bere Xa'.
Pab nya'b yatwi Timoteo Pab.
9 Pken nde pchal ye'd twi'a na.
10 Tak Demas,
mbla' xa' na,
mas mtoblo xa' jwan' lo izyo re',
nde nda xa' Tesalónica.
Crescente nda Galacia nde Tito nda Dalmacia.
11 Ben'ta Lucas ndonon,
bkwan' Marcos nde de'no xa',
tak nakin' na xa' lo rsin' Dios.
12 Le' Tíquico mbloned na yez Éfeso.
13 Sen' lo ye'd la,
ye'dnoa kaxkem jwan' mtan na yez Troas,
liz Carpo,
nde ye'dnoa reta libr nde jwan' mas nakin'na ye'dnoa nak yez naksa' yid ma'a.
14 Le' Lejandr xa' rer,
jwan' toz mtoti xa' na.
Xa' Nyebe' kix lo xa' xata mbli xa'.
15 Noga lu,
ndawi' toz la kon xa',
tak jwan' toz nayi' xa' ta ndlon' xki's Dios lo reta men.
16 Sen' ngwa ner na lo xa' nak sin' sa tola'n lazo'n,
sa nye xa' ngencho yalke nchap na,
zya nek tib xa' na'mblastod na,
che'la mbla' reta xa' na.
Nya'b na lo Dios torid Dios re jwan' na yek Dios.
17 Per le' Xa' Nyebe' mbla'sto na,
nde mblone Xa' lazo'n,
sa mdoyal mdej na xki's Dios xata naka,
nde tamod sa gon reta men jwan' nanakta men yez Israel.
Nde tamod mtola' Xa' Nyebe' na ro yalguj,b
18 nde tola' Xa' na lo re jwan' narax,
kenap Xa' na sa sin na plo nyebe' Xa' lo be'.
¡Xa' kaya' yalnaro naya nde thibtane!
Ta aka.
Lult dyux jwan' ni Pab lo Timoteo
19 Ta' dyux na lo Prisil nde lo Akila,
nde lo re xa' liz Onesíforo.
20 Erasto mbyan' yez Corinto nde le' Trófimo mtan na yez Mileto tak nayis xa'.
21 Pken ye'd la nal tera' tyobte be' xyo'b yop.
Eubulo,
Pudente,
Lino,
Claudia nde reta wes ntel' xa' dyux loa.
22 Jesucrist Xa' Nyebe' tyonoa,
nde yalwen chan' Xa' tyono reta go'.
Ta aka.