Xa li re men lulka tyemp
3
Taga' ndablo nyea,
sen' ndasin lulka wiz yo yalnathoz,
2 yo men ben'ta ke' lazo' xa' le'ga xa',
nab tmi toblo xa',
xyal'no xa' lazo' xa',
ak naro xa',
ni xin xa' xis Dios,
na'xobyekta xa' xud xa' neka xna' xa',
anatyo xa' ta' xa' dyux,
na'zebta lazo' xa' Dios,
3 neka ke' lazo' xa' ta men xa',
na'lyata lazo' xa' ta men xa',
wa yix xa' ta xa',
natyentobta lazo' xa' lo re jwan' nchola's bel' xa',
xa' xkap tir xa',
yi'no xa' re jwan' wen.
4 Taya' xa' ta xa',
ngok ne lazo' xa' lo jwan' narax,
li xa' xgab ndak toz xa',
masra' kwan' xa' re jwan' ndyen xa' lo izyo nde nakwan'ta xa' Dios.
5 Tyak men na nxobyek xa' Dios,
per nkala's xa' yalnaro chan' Dios.
Nazal'tad la re xa' ya.
6 Tak xij re xa' ya ndryo' re xa' nchote len' liz re men nde nkwin'no xa' re ngol nala xgab na',
ngol jwan' nzo'b toz xken na'.
Re ngol ya nalid gan tyentob lazon' lo re jwan' narax.
7 Thibla' ndote'd ngol nde na'yentirta xa' jwan' li.
8 Ta xa Janes nde Jambres,
mtow' xa' lo jwan' mbli Moisés,
taxa re xa' ya,
ntow' xa' lo jwan' li chan' Dios.
Tibne mblayo xgab xa' lo jwan' narax,
mbro'tal xa' lo jwan' li chan' Dios.
9 Le' re xa' ya na'ryo'd jwan' ndli xa',
tne reta men na'ngenta xgab yek xa',
ta xa ngote Janes nde Jambres.
Lulka jwan' mnibe' Pab lo Timoteo
10 Le' lu,
jwin ngelia re jwan' ndlo'n,
xa ngete'n,
jwan' ntob lon lin,
plopa ndli lazo'n Dios,
plopa' nxek na,
xa nke' lazo'n re men,
xa ne mdon mbri'd na re yalti
11 lo mchubla men na nde mtoti xa' na.
Lu mne jwan' mxak na yez Antioquía,
Iconio,
Listra nde reta yalti jwan' mbrid nda'b na,
nde lo retey mtola' Dios na.
12 Nde noga' re xa' jwan' nchola's xob yek Jesús,
taga rid ndab xa' yalti,
chubla men xa'.
13 Mbay le' re men ndli jwan' narax nde re men kwin',
masra ryo re jwan' narax lo xa',
kwin'no xa' re men nde taga' kwin'no men xa'.
14 Le' lu,
ne bto lo jwan' mte'd la nde ndli lazo'a,
tak mnea la cho re mblo'y loa,
15 nde xata lud la nzoloa xki's Dios jwan' toyal li ak la thi xa' nchen,
nde liy lya'a lo ta ndli lazo'a Jesucrist.
16 Dib nak xki's Dios,
len' lazo' Dios ngola,
sin' toz ndliy ntote'da men,
ntoxuta men,
ntokoxa men,
nde ngoneda men lo jwan' gal',
17 sa reta men jwan' ndli sin' lo Dios,
gak xa' men jwin nchak,
nde keno xa' reta jwan' nakin' xa' sa li xa' reta jwan' wen.