Thi sondad wen chan' Jesucrist
2
Lu xin' na,
blo ne lazo'a lo reta yalwen jwan' mda' Dios lon' lo ta ndli lazon' Jesús.
2 Re jwan' mbin la mblo'n sen' nzi wi' bro toz men,
jwan' naga' blo' lo tedib ned men jwan' thibla ndo,
xa' jwan' tak tote'd tedib ned men.
3 Jwan' nasa noga' lu bxek reta yalti xajka thi sondad wen chan' Jesucrist.
4 Nekthib xa' jwan' ndlya lo yalsondad nambixta xa' li xa' xaga' sin',
le' xa' mbix xa xobyek xa',
xa' nyebe' lo xa'.
5 Nde taga' re xa' ngo karrel,
nalid xa' gan tez nanxobyekta xa' re jwan' ndablo li xa'.
6 Taga' thi xa' nke toz sin' ngo bin,
nerla xa' ndablo thop jwan' ngok.
7 Bli xgab jwan' ndej na loa,
nde Xa' Nyebe' toxni yek la sa yen la re jwan' re'.
8 Thibla btela's Jesucrist,
Xa' nde lo bin David,
Xa' mbro'xban xij re men nguj.
Jwan' re' nak di's kub jwan' ndlo'n lo re men.
9 Kwent chan' di's kub re' ndori'd na re yalti,
axta lizyi'b mke' xa' na,
xaja' thi men mbli jwan' narax toz,
per le' xki's Dios nangelizyi'btey.
10 Jwan' nasa nxek na lo reta yalti,
tak nke' lazo'n reta men jwan' mblí Dios,
sa no re xa' ya lya' xa' nde keno xa' yalnaban adi' lo yalnaro chan' Jesucrist.
11 Jwan' re nak di's li:
Tez ngujnon' Jesucrist,
taga' banon' Xa';
12 Tez nxek na' lo yalti,
noga' nyebe'n kon Xa'.
Tez gab na' nancholod na' Xa',
noga' Xa' gab nancholod Xa' na'.
13 Tez ngan na' lo Dios,
le' Dios thibka gal' ndo.
Tak le' Dios na'nyed kala's Xa' le'ga Xa'.
Xa ndablo gak thi xa' nke sin' lo Dios
14 Btela's jwan' re' lo re men,
ndo wi' Dios brez yek re xa',
sa na'kweznotra xa' ta xa' ben'ta por re di's ndoja' ndye.
Tak re di's re' ngencho sin' ndliy,
ben'ta ntotiy re men jwan' nchona.
15 Bchal,
gal' nde nambi ryo'toa lo Dios,
xaja thi xa' jwin nke sin',
xa' nangenoda jwan' li ryo'yantho xa' lo rsin' xa',
nde gal' ndlo' xa' di's li chan' Dios.
16 Na'lyat la xij re di's bxey nde re di's narax jwan' nandakta,
tak re men jwan' ta ndyodi's nche'y xa' nde masra' ndlyayo xa' lo re jwan' narax,
17 nde re jwan' ta ndlo' xa' ndrya'sa xaja thi yis tin.
Jwan' na ngote Himeneo nde Fileto,
18 mdya'b xgab xa' mbla' xa' jwan' li,
nde ngetebez xa' le' yalndryoxban ngokley,
nde ngetokan xa' xgab pla men ndli lazo'n Dios.
19 Per Dios mtan' Xa' xki's Xa' xaja thi pto ne ndo jwan' nangwinta,
nde lo pto ya nge di's che' nchab:
“Le' Xa' Nyebe ncholo re men nak men Xa' ”;
nde noga nchaba:
“Reta xa' jwan' ndli lazon' Dios,
ndablo bike tij xa' lo reta jwan' narax.”
20 Len' thi yo ro nanzoda ben'ta jwan' naksa' or nde plat,
noga nzo jwan' naksa' ya nde yo.
Nzo rol jwan' nabe'ta wiz nchak rsin' tak ntak toza nde rola nchak rsin' reta wiz.
21 Jwan' nasa,
tez thi xa' mtombi lazon' lo re jwan' na,
ak xa' xaja thi jwan' ntak toz,
thi men nayon,
thi men ndli sin' lo Xa' Nyebe' nde men thibla ndosa' li reta sin' wen.
22 Bxon' lo re jwan' narax nakij re or yen' nde bli re jwan' gal',
bli lazo'a Dios,
bke' lazo'a reta men nde nabe'z breno reta xa' jwan' nambi lazon' nkwan' Dios.
23 Nalyat la xij re di's bxey nde re di's ndoja' ndye,
tak mnea la,
lo re di's re' nzyal yalbyo.
24 Tak thi xa' ndli sin' lo Xa' Nyebe' na'nda'bloda kwan' xa' yalbyo,
che'la nabe'z ak xa' lo reta men.
Ndablo ak xa' thi xa' jwin ndlo' xki's Dios,
xek xa' re men na'leda nak,
25 nde nado' toxut xa' re men ngi'no xki's Dios,
tak ndaga Dios li zye' xgab re xa' re' sa yolo xa' jwan' li,
26 nde yax xni yek xa',
lya' xa' lo ya' Maxu' ten' ndli xa' jwan' nda lazo' Maxu'.