3 Ta xa mna'b na loa yan' la Éfeso sen' lo mbro'n ndan Macedonia,

sa nyebe'a lo pla xa' jwan' mbez nak maestr sa nalo'tra' xa' jwan' nanakta xki'spa Dios,

4 neka tob nza xa' lo re di's nta lazo' men,

nde taga' natobnzad xa' lo re bin chan' re men gox ten' nde xa',

bin jwan' nancholoda.

Reta jwan' na ben'ta kwent nkwan' na nde nanaktey jwan' ndli sin' nxyen xa' lo xki's Dios,

le' xa' nxyen sen' ndli lazo' xa' Dios,

jwan' re' nya'b na loa naya.

5 Le' yalnyebe' re' mke sa ke' lazon' tan',

nde jwan' re' nchak sen' nambi lazo' men,

sen' nambi xgab men,

nde sen' ndli'pa lazo' men Dios.

6 Nzo pla xa' mbla' re jwan' re' nde ndanke xa' xis re di's ndoja' ndye.

7 Nchola's xa' gak xa' men ndlo' ley chan' Dios,

nde neka xa' nayenta xa' jwan' ni xa' nde jwan' ndlo' xa'.

8 Mnen' le' ley nabe'z naka tez ndli rsin' mena xa ndabloy.

9 Nde noga mnen',

le' ley namkedey lo re men ndli jwan' gal',

le'y mke lo re xa' jwan' nchixla' ley,

nde nanchonta di's,

lo re xa' jwan' ndli yalnarax nde re xa' nzo'b xken na',

lo re xa' nixin nde ndoja' ndyodi's xis Dios,

lo re xa' jwan' nguj xud na' nde xnan',

lo re xa' guj men,

10 lo re xa' nchaxno xa' jwan' nanakta sal' na',

lo re xa' bi' jwan' nchaxno lega ta bin',

lo re xa' ndliwan' ta men na' sa ko' xa' tmi,

lo re xa' kwin',

lo re xa' nke'yek thi jwan' nde nandlid xa'y,

nde lo reta xa' jwan' nandryoda lazon' jwan' gal' ndlo' xki's Dios.

11 Jwan' re' nak jwan' ndlo' di's wen,

di's naro chan' Dios,

Xa' nabe'z toz nak,

jwan' mtan' no Xa' na sa lo' ney lo re men.

12 Ndan dyux lo Jesucrist Xa' Nyebe' lon',

Xa' jwan' mblone lazo'n,

tak mbwi' Xa' na men tak ke sin' lo Xa' nde mtob Xa' na lo rsin' Xa'.

13 Tenye pola ngok na men mni xin xis Jesucrist,

mchublan Xa' nde mnixin na xis Xa';

le' Dios che'la mblat lazo' Xa' na tak nera nanyet na jwan' mblin,

tak zya tera' li lazo'n Dios.

14 Per le' yalwen chan' Xa' Nyebe',

yalndlipa' lazo' Dios nde yalnke' lazo' jwan' nde lo Jesucrist mbridbe' mda' Xa'y lon.

15 Jwan' re' nak di's li nde nzal' la kaya' men na:

Le' Jesucrist mbye'd lo izyo sa tola' Xa' re men nzo'b xken na',

nde xij re xa' ya,

na nak xa' jwan' mas nzo'b xken na'.

16 Jwan' nasa mblat lazo' Dios na,

na jwan' mas nzo'b xken na',

ngok na men mblo' Jesucrist plopa mxek Xa' na.

Nde mto Xa' na,

sa lo yalnaban chan' na wi' re men nara' li lazon' Dios nde kaya' xa' yalnaban adi'.

17 Jwan' nasa,

Xa' nak Rey adi',

Xa' na'akta wi' men,

Xa' nandluxta,

Xa' ngeno yalnchak nde thibta Xa' nak Dios,

Xa' ya kaya' dib yalnaro nde dib yalne,

thibtane.

Ta aka.

18 Yalnyebe' re' ncholas na lia xin' na Timoteo,

tak ntelas na re di's jwan' mni re wes mtori'd xki's Dios loa pola,

ptela'sa sa le'y la'stoa sa naxut lia rsin' Dios xaja' thi sondad,

19 thibla' bli lazo'a Dios nde naxut bli xgab,

tak pla xa' na'mblid xa'y nde mdya'b xa' lo jwan' ndli lazo' xa'.

20 Ta xa ngote Himeneo nde Lejandr,

xa' jwan' mdaya'n lo Maxu' sa te'd xa' nanixinta xa' xis Dios.