Mbroxban Jesús
16
Sen' lo mbrid wiz jwan' ndryoxkwen men,
le' Mary Magdalen,
Salomé nde Mary xna' Jakob,
mxi' xa' perfum naxe' yalo xa' lad thabol Jesús.
2 Zya nak wiz ner xan' sman,
til' toz sen' ben'ta mke be,
nda re ngol ten' ndob ba'.
3 Nde nchab ngol lo ta ngol:
—¿Cho xa' ta' yan' sa bike ke jwan' now' ro ba'?
4 Nde sen' lo mzin xa' zya mbwi' xa',
le' ke toz jwan' now' ro ba',
mbikelay.
5 Sen' ngote xa' len' ba',
mbwi' xa' tib mbyo yen'a ndob lad ban,
dib mbyo nok lar nakis nde mzyeb toz xa'.
6 Le' mbyo nchab:
—¡Nazyebta go'!
Go' nkwan' Jesús,
Xa' yez Nazaret,
Xa' jwan' mke lo kruz.
Ngenta Xa' nche' mbroxbanla Xa'.
Bwi' go' plo ten' mdi'x men Xa'.
7 Naya bya go' nde guz go' lo re xin' te'd Xa' nde lo Pey,
tak ner Xa' sin lo xyon Galilea nde tya wi' go' Xa',
xatka ne Xa' lo go' zya.
8 Zyasa naban mxon' re ngol,
mbrote xa' len' ba' nde ndya xa' tak mzyeb xa' nde nxid xa';
ngenta kwan ngab xa' lo nek tib men tak mzyeb toz xa'.
Jesús mbroto lo Mary Magdalen
9 Wiz ner xan' sman,
sen' mbroxbanla Jesús,
til' toz mbroto Jesús nerla lo Mary Magdalen,
ngol jwan' mblo'te Xa' gaz mbi narax len' lazon'.
10 Nde ngol re' ngwa teja lo re xa' jwan' mketenke xis Jesús,
tak nabil toz ndyak xa' nde nzi yon' xa'.
11 Nde sen' lo nchab ngol lo xa' mbroxbanla Jesús nde mbwi' ngol Jesús,
na'ndlid lazo' xa'y.
Jesús mbroto lo chop xin' te'd Xa'
12 Ngolo jwan' na,
xa'la nya Jesús mbro'to Xa' lo chop xin' te'd Xa',
sen' lo rop xa' re' nda tib ned ro jwan' nzo len' wan.
13 Nde rop xa' re' mbye'd tej xa'y lo tipla ta xa';
taga nek xki's rop xa' re' nandlid lazo' xa'y.
Jesús mtan' sin' lo re xin' te'd Xa'
14 Ngoxob be',
Jesús mbro'to lo re si' thib xin' te'd Xa',
sen' lo nzi xa' ro mes.
Zya mbrez Jesús yek xa' kwan ndliy nandlid lazo' xa' mbroxbanla Jesús,
ne yek xa',
tak namblid lazo' xa' xki's re xa' jwan' nchab mbroxbanla Jesús nde mbwi' xa' Jesús.
15 Zya nchab Jesús lo xa':
—Wa go' dib nax izyo nde btej go' di's wen chan' Dios lo reta men.
16 Xa' jwan' li lazo'n xki's na nde ryole xa',
Dios tola' xa'.
Le' xa' jwan' nalid lazon' xki's na,
kix xa' xken xa'.
17 Nde reta xa' jwan' li lazo'n xki's na,
toyal li xa' re yalnaro re':
Kon len kote xa' re mbi narax nzo lazo' men nde todi's xa' xa'la di's kub,
18 tez tyen xa' mbel' lo ya' xa' nde tez gu xa' nit kwan',
na'ngenta kwan tyák xa'.
Xob xa' ya' xa' yek re men yiz nde tyak xa'.
Jesús ngwap lo be'
19 Sen' lo mne mdodi'sno Jesús re xin' te'd Xa',
zya xej ngwap Jesús lo be' nde mdob Xa' lad ban Dios.
20 Le' re xa' nak xin' te'd Jesús,
ndolo mbro' xa' nda tej xa' xki's Dios reta lad nde Jesús tatka ndola'sto xa' lo re yalnaro jwan' nda li xa' sa nye men le' xki's Dios naka jwan' lipa.
¡Ta aka!