2 Le' Pilat mnabdi's lo Jesús,

nchab xa':

—¿Cho lu nak Rey lo men Israel?

Jesús mkab nde nchab Xa':

—Lu ney.

3 Le' re ngwley' jwan' nyebe' jwan' toz mke' xa' yalke yek Jesús.

4 Zyasa mnabdi's Pilat lo Jesús tedib gob,

nchab xa':

—¿Cho ngenta kwan kab la?

¡Wi',

plopa yalke nge ke' men yek la!

5 Le' Jesús tatka na'nkabta Xa';

jwan' nasa nzoyen toz Pilat.

6 Re lin',

sen' nchal ni chan' Pask,

zya ngote Pilat tib xa' nke liz yib nde re mayez gab nyen' cho xa' ryo'te.

7 Ngo tib xa' ndole Barrabás nzo liz yib nde tipla ta xa',

tak re xa' re' mbij men sen' lo mbyo xa' re xa' nak sin' ro pola.

8 Zyasa mzin reta men lo Pilat,

nde nab xa' sa ryo'te tib xa' nke liz yib,

xaga ndli xa'y reta lin'.

9 Le' Pilat nchab lo reta men:

—¿Cho nchola's go' la'n Xa' ta nak Rey lo men Israel re'?

10 Ta nchab Pilat,

tak mne Pilat,

le' re ngwley' jwan' nyebe' ngi'no xa' Jesús,

jwan' nasa mdaya' xa' Jesús lo Pilat.

11 Le' re ngwley' jwan' nyebe' mtokil'la xa' bro toz men sa nyab xa' lo Pilat ke sye' xa',

Barrabás ryo'te liz yib.

12 Le' Pilat bere mnabdi's lo reta men:

—¿Cho kwan nchola's go' li non Xa' ta mbez go' nak Rey lo men Israel re'?

13 Le' reta men mbrez:

—¡Bke' go' Xa' lo kruz!

14 Le' Pilat mkab lo xa':

—¿Cho yalke nchap mbi' re'?

Zya ne toz mbrez reta men:

—¡Bke' go' Xa' lo kruz!

15 Le' Pilat nchola's yan' wen lo re men,

jwan' nasa mda' Pilat di's mbro'te Barrabás liz yib nde mnabe' Pilat kin re sondad Jesús nde yake' xa' Jesús lo kruz.

16 Zyasa re xa' nak sondad mbe' xa' Jesús lo le chan' yolow ten' ndob Pilat nde mbrez xa' reta ta sondad xa'.

17 Zya mxen xa' tib lar konch,^a

mxob xa'y xis Jesús nde mdoxkwa' xa' tib koron yis,

mdob xa'y yek Jesús.

18 Nde mdobte mblo's xa' Jesús nde reta xa' mbrez:

—¡Naro nak Rey men Israel!

19 Zyasa mxen xa' tib ya mke' xa' yek Jesús,

mzuk xa' lo Jesús nde mdoxub xa' lo Xa' xaja lo tib rey.

20 Sen' lo mne mblo's xa' Jesús,

zya mkib xa' xab rey xis Jesús nde mxob xa' lega xab Jesús xis Jesús nde mbro'teno xa' Jesús sa nda ke' xa' Jesús lo kruz.

21 Zyasa ndano xa' Jesús nde ned mzyal' xa' tib mbi' mbro' lo sin' wan ndole Simón,

xud Lejantr nde xud Ruf xa' yez Ciren,

le' re sondad mnabe' xa' lo Simón sa we xa' kruz Jesús.

22 Tamod mzin no xa' Jesús ten' ndole Gólgota.

(Di's re' nak:

Sij yek men.)^b

23 Zya mda' xa' lud nit ub nos mirr^c gu Jesús nde nangud Xa'y.

24 Sen' lo mke'la sondad Jesús lo kruz zya ndolo mdij xa',

nyen' xanya xab Jesús din' tiba xa'.^d

25 Sen' ndekela wiz zya mke' xa' Jesús lo kruz.

26 Nde yek kruz mke' xa' tib ble ya nchab lon':

“REY LO RE MEN ISRAEL.”

Tak jwan' na nak yalke gaj Jesús.

27 Nde noga chop xa' wan' mke lo kruz zya,

tib xa' mke lad ban Jesús nde tib xa' mke lad beg.

28 Nde ngok jwan' nchab lo xki's Dios pola:

“Tipta mblilal men Xa' xij xa' nzob xken'.”^e

29 Nde re men ndarid tya ndlo's xa' Jesús nde nkwin xa' yek xa',

mbez xa' lo Jesús:

—Maga lu mbez,

sil la yodo' chan' Dios nde len' son wiz toxkwa'a le tedib gob.

30 Tez liga jwan' toz ndlia,

ptola' lega lu,

bla lo kruz.

31 Nde noga re ngwley' jwan' nyebe' nde re xa' nak maestr ndlo' ley xki's Dios,

taga ndlo's xa' Jesús nde nchab xa' lo ta xa':

—Mtola' Xa' xa'la men nde na'akta tola' Xa' lega Xa'.

32 Tez liga Dios mtel' Jesús,

nak Xa' Rey lo men Israel,

ndablo lya Xa' lo kruz naya,

ta nzi win' re' sa li lazon' Xa'.

Nde no xa' jwan' nke lo kruz cho Jesús,

taga mblo's xa' Jesús.

33 Sen' rolja wiz,

mblato yal'kow dib nax izyo axta rolja bzye.

34 Nde nda rolja bzye zya mbrez yaj Jesús nchab Xa':

—Eloi,

Eloi,

¿lama sabaktani?

(Di's re' nak:

Dios na,

Dios na,

¿Cho kwan ndliy mbla'a na?)^f

35 Nde pla xa' nzi tya mbin xa' ta mbrez Jesús zya nchab xa':

—Bwi' go',

ngebez Xa' Elías.^g

36 Zyasa mbro' tib xa',

mbwaz xil' lo nit ub mbyál nde mtob xa'y tib lo ya sa ta' xa'y gu Jesús nde nchab xa':

—Kwed na' nyen' cho tyed la Elías Xa' lo kruz.

37 Zyasa mbrez toz Jesús nde nguj Xa'.

38 Le' lar nge ten' Nayon len' yodo',

arolja mcheda xata gap nde axta la.

39 Le' xa' jwan' nyebe' lo tib ayo' sondad,

ndowi' xa' sen' mbrez Jesús nde nguj Xa',

zyasa nchab xa':

—Liga,

Xa' re' nak Xin'pa Dios.

40 Tij nzi wi' pla ngol tya;

xija ndo Mary Magdalen,^h

Salomé nde Mary xna' Jakob or yen' wes José.

41 Re ngol re' mdonke xis Jesús,

sen' ngwa Xa' lo xyon Galilea,

mbli ngol sin' lo Xa';

nde tipla ngol mdonke xis Xa' sen' ngwa Xa' Jerusalén.

42 Lexa wiz ya re xa' Israel ndablo toxkwa' xa' jwan' wa xa' tedib wiz sen' ndryoxkwen men nde ya mzyela izyo.

43 Zyasa tib xa' yez Arimatea ndole José nanzyepta xa' mbike xa' lo Pilat,

tak no xa' nak tib sin' ro lo yolow nde ndala ngembed xa' pol yed Yalnyebe' chan' Dios,

jwan' nasa ngwa nab xa' lo Pilat sa ya la xa' thabol Jesús lo kruz nde ya ka's xa' Xa'.

44 Le' Pilat nzoyen toz sen' mbin xa' ngujla Jesús;

zya mbrez Pilat xa' jwan' nyebe' lo sondad nde mnabdi's Pilat lo xa':

—¿Cho li nguj la Jesús?

45 Le' xa' nchab:

—Liy,

ya ngujla Xa'.

Zyasa mda' Pilat di's lo José sa ya la xa' thabol.

46 Zya ngwa ka José tib lar wen jwan' nap toz nde mbla xa' thabol lo kruz,

mchal lar xa' Xa' nde mka's xa' thabol len' tib ba' naden' len' ke nde tib ke ro mtub xa' mtow' xa' ro ba'.

47 Le' Mary Magdalen nde Mary xna' José,

taja nda wi' xa' plo mka's xa' thabol Jesús.