2 —Pken wa Nínive yez ro ba,

nde kwez la yek re men yez ya por re xken xa',

tak axta lon mzin re jwan' narax ndli xa'.

3 Nde le' Jonás che'la mxen ned sa xyon' xa' lo Jehová,

mdola xa' mzin xa' yez Jope,

nde leja nda ro' ti bark nda Tarsis,

mdi'x xa' sa we bark xa' sin xa' Tarsis,

tya nda xon' xa' tij lo Jehová.

4 Sen' nzo xa' len' bark nzob lo nitto',

Jehová mtel' thi mbi toz mxyo'b lo nitto' nde ngok ti yalnathos toz lo nit,

zyasa mbli xa' xgab le' bark ched.

5 Zyasa re xa' nge sin' len' bark mzyeb toz xa',

nde kad tib xa' mbrez xa' lo dios xa' nde mblo'te xa' re jwan' nzo len' bark,

mblobi xa'y lo nitto',

sa xyax bark.

Le' Jonás zel'la' ndate mbla axta xan' bark tya ngox xa' nde sij toz mdat xa'.

6 Le' xa' nak xwan' bark ngwa xa' ten' naxyat Jonás nde nchab xa':

—¿Kwan nax lia ba lora mkal'?

¡Nabanka goche' nde brez lo Dios la!

Ta' tlat lazo' xa' na' nde tola' xa' na'.

7 Zyasa le' re xa' nge sin' len' bark nchab xa' lo re ta xa':

—Bike go' gax sa liben' nen' cho xis ndenke jwan' narax re'.

Lo sen' mblibe' re xa',

mbro' xob ke xis Jonás ndenke jwan' narax.

8 Zyasa nchab xa':

—Btej kwan ndliy ndenke jwan' narax re' xis na'.

¿Cho sin' nchap la,

nde cho le yez la?

¿Plo nak laz la?

¿Cho lo bin ndea?

9 Le' Jonás mkab:

—Na nak xa' Hebreo,

nde nzeb lazo'n Jehová,

Dios ndob lo be',

Xa' jwan' mdoxkwa' nitto' nde izyo.

10 Nde le' re mbi' ya mzyeb toz xa' nde nchab xa':

—¿Kwan naka ta nya jwan' mblia?

Nde mnela xa' ke Jonás nda xon' lo Jehová,

tak le'ga le' Jonás mdeja lo xa'.

11 Zyasa nchab xa':

—¿Cho kwan lino ná' lu sa kwexe nitto'?

Ma le' nitto' masra ndo yak nayi'.

12 Nde Jonás nchab lo xa':

—Bxen go' na nde blobi go' na lo nitto' sa kwexe nitto'.

Tak mnen ke na nchap yalke ta nde yalnathos toz re' xis go'.

13 Nde re mbi' ya mchal xa' se're xa' bark ro yux per nandlid xa' gan tak le' nitto' masra' nayi'.

14 Zyasa mbrez xa' lo Jehová nde nchab xa':

—Naya nya'b ná' loa Jehová,

ke na'luxta lu ná' por xken mbi' re' nde na'ke'd la yalke yek ná' ta kuj ná' mbi' re',

tez ngen cho yalke nchap xa' tak lu Jehová mblia xa ncholas la.

15 Nde mxen xa' Jonás,

mblobi xa' Jonás lo nitto' nde nitto' mbrexe,

ya na'ngaknayitra nitto'.

16 Zyasa mzeb toz lazo' re mbi' ya' Jehová,

nde mbij xa' ma' lo Jehová nde mda' xa' xki's xa' lo Jehová.

17 Mbayna le' Jehová ngenola ti mbel toz,

nde mdab mbel ya Jonás,

tya ngo Jonás len' mbel son wiz nde son yal'.