Rut
Re xa' liz Elimelec nda Moab
1
Jwan' re' ngok len' lin' sen' mnibe' re xa' ngok yek lo re xa' Israel,
zya ngo win dib izyo ya.
Zyasa thi mbi' yez Belén,
lo xyon Judá,
mbro' nda lo xyon Moab kon ngol xa' nde kon chop xin' xa'.
2 Le' xa' bi' ya ndole Elimelec nde sal' xa' ndole Noemí.
Thi xin' bi' xa' ndole Mahlón nde tedib or ndole Quelión.
Re xa' re' nak xa' Efrata jwan' nak Belén lo xyon Judá.
Nde mzin re xa' lo xyon Moab,
tya mblabe xa' ngo xa'.
3 Tya nguj Elimelec sal' Noemí nde mbyan' thib xa' kon rop xin' bi' xa'.
4 Xisa rop or ya mselya',
kon ngol yez Moab,
thib ngol ndole Orfa,
le' tedib ngol ndole Rut.
Nde sen' ngo xob tsi' lin' nzo xa' tya,
5 nguj rop xin' bi' xa',
Mahlón nde Quelión.
Mbyan' tib nyatub Noemí,
ngenta sal' xa' nde ngenta xin' xa'.
Rut nde Noemí
6 Tib wiz,
Noemí mbro'te lo xyon Moab kon rop ngol xix xa',
tak mbin xa' mblat lazo' Jehová re xa' Israel,
men yez Dios.
Ngotab win nde mdobte ngok reta jwan'.
7 Jwan' nasa mbro'te Noemí ten' nzo xa' kon rop ngol xix xa' lo xyon Moab,
nde mbere xa' lo xyon Judá.
8 Nde sen' ndo xa' ned nchab xa' lo rop xix xa':
—Naya,
bere go' liz go',
bya go' lo xna' go'.
Jehová li yalwen lo rop go',
xa mbli go' lon nde lo rop thabol xin' na.
9 Nde Jehová ta' di's selya' go' tib gob nde nabe'z yo go' liz go'.
Nde mda' xa' chut lo rop xix xa',
sa bere ngol liz ngol.
Le' rop ngol mbrez yaj mbin',
10 nde nchab rop ngol:
—Bya go',
xin' got na.
¿Kwan li go' gan tyonke go' xis na?
Na,
ya na'galtra xin' na,
par ak sal' go'.
12 Bere go' liz go' may,
tak ngoxla na par selyan tib gob.
Nde tenye jwan' naga ngembed na,
nde tez na yal' re' selyan,
nde kelo xin' na,
13 ¿cho nye kembed go' axta yalal or sa selya'no go' or?
¿Cho tata yan' go',
na'selyad go' nde kembed go' or?
Na'akta jwan' na xin' got na,
tak mas naro xyan ndonon ke go',
tak Jehová mtel' re jwan' ta ndyak na re'.
14 Nde rop ngol mbrez yaj mbin' tib gob.
Nde lulka Orfa mda' chut lo xna'yin' nde mbere,
le' Rut mbyan' lo xna'yin'.
15 Zyasa Noemí nchab:
—Bwi',
le' xlyon la mbere xa' yez xa',
lo re dios xa'.
Byanke xis xa'.
16 Le' Rut mkab:
—¡Na'nyabta lu lon lan la,
nde yan' tib la!
Tak one ploja ndaa tya ndan,
nde one ploja yoa tya yon.
Yez la ak yez na,
nde Dios la ak Dios na.
17 Ten' gaj la tya gaj na nde tya ga's na.
Nde Jehová toti na tez lan la,
ben'ta yalguj li la' ta rop na'.
18 Nde Noemí mbyen ke Rut ya mtolila xgab na' yanke xis xa',
na'ngentra kwan ngab xa' lo Rut.
19 Nde mdo rop xa' ned,
nda xa' nde mzin xa' Belén.
Sen' ngote rop xa' len' yez Belén,
reta xa' yez ya nzoyen xa'.
Nde re ngol nchab:
—¿Cho nanakta Noemí xa' ba?
20 Zyasa le' Noemí nchab:
—Na'koled go' na Noemí,a
blole go' na Mara,b
tak Dios jwan' ndono dib yalnyebe' mbli ta xyan toz ndyak na.
21 Sen' mbro'n tre'ya re xa' liz na mben nde bro jwan' ndanon,
per na mberen tata nyatub na,
nguj re xa' liz na.
¿Kwan liy ngole go' na' Noemí,
Jehová jwan' ngeno dib yalnyibe' mbli ta ndyak na re xgab re'?
22 Tamod mbere Noemí kon Rut xix xa',
mbro' xa' lo xyon Moab nde mzin xa' Belén sen' ndyobte ndyop cebad.