2 Zyasa Rut,

xa' yez Moab,

nchab lo Noemí:

—Bta' di's ndan ten' nge men sin',

nda thop na mbis cebad gow,

nen' cho mos lyat lazo' xa' na,

ta' xa' di's tyonke'n xis xa',

sa thop na gow.

Nde Noemí nchab:

—Wa may.

3 Nde Rut mbro',

nda ten' nge re mos sin',

nde mthop Rut re do cebad jwan' mbla' mos.

Nde yalwen ngok lo Rut nak,

ten' ta nge thop Rut do cebada,

nak chan' Booz,

xa' ta Elimelec.

4 Zyasa cho le' Booz mzin mbro' Belén mni dyux lo re mos nde nchab xa':

—¡Dios li ley' re go'!

Nde re mos mkab:

—¡Dios li ley' go'!

5 Zyasa Booz mnabdi's lo xa' nyebe' lo re mos,

nchab:

—¿Cho xin' nak mza' ba?

6 Le' xa' mkab:

—Mza' ba nak xa' yez Moab jwan' ndeno Noemí,

ta mbere mbro' lo xyon Moab.

7 Nde mna'b mza' lon tan di's thop mza' re jwan' mba' lo ya' mos,

nde nge mza' sin' xata mdobte mza' til' la axta naya nek lud tera ryoxkwen mza'.

8 Zyasa nchab Booz lo Rut:

—Btonza jwan' nin loa xin' na,

na'yathopta la cebad xa'ga lo chan' men.

Byan' tre'ya kon re mos got na.

9 Nde jwin wi'a ten' nge re mos na sin',

nde yankea xis re mos got ten' ya xa' sin'.

Na,

ya mnia na lo re mos bi',

sa na'tad xa' xyan yek la.

Nde sen' nchek lazo'a ya yu'a nit nzo re,

nit ya mblo'la mos.

10 Zyasa Rut nado' ngok mdoxub axta mdin' lon' izyo,

nde nchab lo Booz:

—¿Kwan liy taja wen go' lon nde ndli go' kompay na,

tenye nanakta na xa' las go'?

11 Le' Booz mkab:

—Ya mdejla men lon re jwan' mblia lo xna'yi'a xata nguj sal' la,

mbla'a xud la,

xna'a,

las la ten' ngola,

nde ndea yoa tre'ya,

ten' nanzolot la men.

12 ¡Jehová kix re jwan' mblia!

Lo ta nkwan' la yoa len' xil' Jehová,

Dios chan' xa' Israel sa lya'a,

Dios li kompay la nde ta' Dios re jwan' mblia gan.

13 Nde Rut mkab lo Booz:

—Wen toz nak go' lon,

re di's ne go' mbloney lazo'n.

Nabe'z toz ndodi's go',

tenye mas lud ndak na ke lo ti mos got go'.

14 Sen' ngoxob hor wa xwi xa',

Booz nchab lo Rut:

—De' tre'ya,

bxen pan waa nde bwaza len' vinagr.

Nde Rut ngwa mdob xij re xa' nge sin'.

Nde Booz mda' mbis mbyex lo Rut,

nde mda Rut axta kebe' mze len' xa' nde tata mbro'xob jwan' sen' mne mda xa'.

15 Sen' nda thop xa' do cebad tedib gob,

zya Booz mnibe' lo reta mos xa':

—Bta' go' di's thop Rut do cebad xij re ten' nge tobo go' cebad nde na'ko'yantod go' xa'.

16 Nde blote sin' go' pla do cebad nge tobo go' nde bla' go'y sa thop xa'y nde nakweznod go' xa'.

17 Zyasa Rut mthop do cebad tya axta mbla yal' nde sen' mdis xa' cebad jwan' ta mtop xa' ya,

mbro' masra tib gal kil mbis cebad.

18 Nde mbe' xa' re mbis ya,

mbere xa' yez,

nde mblo' xay lo xna'yi' xa'.

Xisa mblote xa' jwan' ta mbro' xob lo jwan' mda xa' ya nde mda' xay lo xna'yi' xa'.

19 Zyasa le' xna'yi' Rut nchab:

—¿Plo ngwaa sin' na wiz?

¿Plo mtop la labaja mbis?

¡Dios ta' masa lo xa' jwan' taja mbli kompay la!

Zyasa mda' Rut kwent lo xna'yi' Rut plo ngwa xa' sin' nde nchab xa':

—Xa' jwan' nak chan' ten' ngwan sin' ndole Booz.

20 Nde Noemí nchab:

—¡Jehová li ley' xa'!

¡Wen toz nak Dios lon' nde lo re xa' nguja'!

Xa' bi' ya,

nchakta gax thabol sal' na' xa',

jwan' nasa no xa' ya nak tib xa' jwan' ndablo tola' na'.^a

21 Nde noga nchab Rut:

—Nega' xa' lon.

“Bke sin' kon re mos got na axta kebe' mdib dib kosech na.”

22 Le' xa' mkab lo xix xa' Rut:

—Jwin toz mod ya xin' got na,

ta'kea sin' kon re mos got xa' nde na'yat la xaga lo rsin' men sa natatid men la.

23 Le' Rut mtop cebad kon re mos got Booz,

axta kebe' mne mbro' kosech cebad nde trig.

Dib tyemp ya,

Rut ngo lo xna'yi' Rut.