—Xin' got na,

ndablo kwan na ti xa' ak sal' la sa wen ndaa.

2 Wi' nea,

le' Booz,

xa' ta thabol sal' na',

xa' nak chan' re mos got plo mkea sin'.

Xa' ya,

na yal' re' ya tombi xa' mbis cebad.

3 Naya bli jwan' re':

God nde pse' xab la gok lar mas nawe nya nde blo nit naxe' lad la nde yaa tya.

Per nda wi'a,

nawi' Booz la axta kebe' mne mda^a Booz.

4 Nde sen' gat xa',

wi'a plo gax xa'.

Zyasa ya lit la laryis xis ni xa' nde gax la lo ni xa'.

Nde xa' nye nen' kwan lia.

5 Le' Rut mkab:

—Lin reta jwan' mnibe'a lon.

6 Nde Rut mbro' nda ten' ndryo' kosech,

nde mbli xa' reta jwan' mnibe' xna'yi' xa'.

7 Nde sen' jwin mda rsye' Booz,

nale ngo lazo' xa' nde nda that xa' gax ten' ndobre mbis.

Zyasa Rut nalaska nda ten' naxyat Booz,

nek lud namtesta Rut nde mblit Rut laryis xis ni Booz nde ngox Rut lo ni xa'.

8 Nde rolja yal' gob mbroxkal' mbi' ya nde sen' mbyek xa' tib lad nde mbwi' xa' cho ti ngol naxyat lo ni xa'.

9 Zyasa mnabdi's xa':

—¿Choa?

Le' ngol mkab:

—Na nak Rut,

nzolo go' na.

Bxob go' ro xabis go' xis na,^b

lo ta nchak ta gax go' thabol sal' na,

go' ndablo tola' ná'.

10 Le' Booz nchab:

—¡Dios li ley' la!

Naya,

mas jwan' wen nge lia,

ke re jwan' mblia lo xna'yi'a nera,

na'ngakwan'ta la mas mbyo yen' ke na,

one cho xa' rika o xa' proba.

11 Naya,

nazyebta la xin' got na,

na li re jwan' nya'b la.

Tak reta men yez na re',

ya mnela xa' le' lu nak ti ngol nawe toz.

12 Naya,

tenye na nak xa' nchak ta gax thabol sal' la,

nzo tib xa' mas nchak ta gax xa' ke na.

13 Byan' ncheta na yal' re'.

Ye',

tez xa' ya toyal xa' tola' xa' la,

lo ta nak xa' ta gax la,

ngen kwan liy,

li xay.

Per tez xa' ya na'lid xay,

Jehová ndo wi',

na ta xki's na loa,

na liy.

Naya bdat axta tyuxni.

14 Nde yal' ya mdat Rut lo ni Booz.

Tib wiz tata ben' nakalra' ngoche ngol,

tak Booz nchab:

—Sa ngen cho nye ta mbyed ngol re' ten' ndryo' kosech.

15 Xisa nchab Booz:

—Bta' lo bay jwan' nzob xis la ba nde ne bxena.

Laja ndonden ngola,

le' Booz mchix xop almud mbis cebad mblo xa'y lo bay nde mke' Booz sa xis Rut,

nde ngo Rut ned ndya Rut yez.

16 Lo mzin Rut ten' nzo xna'yi' Rut,

le' xa' mnabdi's lo Rut:

—¿Xa ngotey ten' ngwaa,

xin' got na?

Le' Rut mdej reta jwan' mbli Booz lo Rut.

17 Nde nchaba Rut:

—Re xop almud^c cebad re',

mda' xa' nde ne xa':

“Sa na'bered la lo xna'yi'a tata nyatub la.”

18 Zyasa le' Noemí nchab:

—Xin' got na,

naya,

pkembed nen' xamod yalo yan' jwan' re'.

Tak naya mbi' ya pa kwed xa',

axta kebe' wi' xa' naxut yan' jwan' re'.