Di's wen chan' Jesucrist jwan' mke' Marcos
Juan Bautist mda' xa' kwent chan' xki's Dios
1
Mod re' mdobte di's wen chan' Jesucrist,
Xin' Dios.
2 Xaja nchab lo ye's mke' Isaías,
xa' jwan' mbye'd ta' xki's Dios pola,a
di's jwan' nchab Dios lo Crist:
Bwi' nche' tel na tib xa' todi's xki's na,
xa' jwan' nda siblo loa,
xa' ya nda siblo sa li xa' tyosa' re men.
3 Nde nchen mbez xa' izyo biz,
nchab xa':
“Ptoxkwa' go' xned Xa' Nyebe';
nali bdix go' xned Xa'.”b
4 Nde tamod mbro'to Juan,
mzin xa' izyo biz nde mda' xa' kwent lo men,
nchab xa':
Bla' go' re jwan' narax nak go' nde ryole go',
sa ton' Dios xken go'.
Jesús es bautizado (Marcos 1.4-11)
5 Nde reta xa' jwan' nzi lo xyon Judea nde reta xa' nzo yez Jerusalén mzin xa' lo Juan nde mxobdol xa' reta xken xa' nde mblole Juan xa' len' yo' Jordán.
6 Le' xab Juan naksa' yis lad kamey nde sint nachal len' Juan nak yid;
le' ma' ncha Juan nak ma' bix jwan' nchat lo wan nde nchu' Juan mzin nzo wan.
7 Nde mda' Juan kwent,
nchab Juan:
—Xis na nde tib Xa' ro mas ndak ke na nde nansal'ta na neka par goten yalyid ni Xa'.
8 Na,
lipa ben'ta len' nit mblolen go';
per Xa' kole go' kon Mbi Nayon.
Ryole Jesús
9 Len' wiz ya,
Jesús mbro' yez Nazaret ten' nak lo xyon Galilea,
zyasa mzin Xa' lo Juan nde mblole Juan Xa' len' yo' Jordán.
10 Nde sen' lo mdoli Jesús len' nit zyasa mbwi' Xa' mxyal' lo be' nde xaja tib palom mbla Mbi Nayon yek Jesús.
11 Nde axta lo be' mbyen mni Dios,
nchab Xa':
—Lu nak Xin' na jwan' toz nke' lazo'n la;
nde lu ngo nale lazo'n.
Taja nchola's Maxu' tab xa' Jesús lo xned Dios
12 Zyaga le' Mbi Nayon mbe'y Jesús ten' nagan lad izyo biz.
13 Nde tya mkete Jesús cho' wiz ten' nzo re ma' wan nde taja nchola's Maxu' tab xa' Jesús lo xned Dios.
Nde re áng chan' Dios mkenap Jesús tya.
Jesús mdobte mke rsin' Dios
14 Sen' lo mblola xa' Juan liz yib,
zyasa mbere Jesús lo xyon Galilea nde tya mda' Xa' di's wen lo yalnyebe' chan' Dios,
15 nde nchab xa':
—Naya ngoxob tyemp nde le' yalnyebe' chan' Dios ndo gax;
bla' go' re jwan' narax nak go' nde bli lazo' go' di's wen chan' Dios.
Jesús mbrez tap xa' god mbel
16 Jesús ngete ro nitto' Galilea,
mbwi' Jesús ndo Simón kon Ndres rop wes xa',
nge gobi xa' yed len' nitto';
tak le' xa' nak men god mbel.
17 Zyasa nchab Jesús lo xa':
—De' go' nde ptonke go' xis na,
sa lilal na go' men god,
sa li go' gan men par Dios.
18 Zyaga mbla' xa' yed nde mdonke xa' xis Jesús.
19 Miska tya mde xa' tud nde mbwi' Jesús ten' ndo Jakob kon Juan xin' Zebedeo,
taga lo bark nzo xa',
nge ke'bde xa' yed.
20 Zyasa mbrez Jesús rop xa' nde zyaga mdonke xa' xis Jesús,
mbla'ta xa' xud xa' Zebedeo len' bark kon re mos.
Tib mbi' ndono mbi narax
21 Zyasa mzin xa' yez Capernaum nde sen' lo ngoxob wiz jwan' ndryoxkwen men,
le' Jesús ngote len' yo ten' ndyop men Israelc jwan' ndob yez ya nde tolo mtote'd Xa' re men.
22 Nde reta men nzoyen xa' mbwi' xa' re jwan' ndlo' Jesús;
tak Jesús mblo' Xa'y xajka tib men jwan' ngeno yalnyebe' ba,
namblo'd Xa'y xa ndlo' re xa' jwan' nak maestr ndlo' ley xki's Dios.
23 Nde miska tya ndo tib mbi' nzo mbi narax len' lazon' nde ne mbrez xa',
24 nchab xa':
—¡Aah!
¿Cho kwan ndyaknoa ná',
Jesús nzo Nazaret?
¿Cho ndea par lux la ná'?
Mnen cho nak la,
lu nak tib Xa' Nayon mtel' Dios.
25 Zyaga mbrez Jesús lo mbi narax,
nchab Xa':
—¡Btow' roa nde bro'te len' lazo' mbi' re'!
26 Nde le' mbi naraxa,
jwan' toz mdoxida mbi' ya nde zyasa mbrezyaja mbro'tey len' lazo' mbi'.
27 Nde reta men nzi tya nzoyen xa',
nchab xa' nde mnabdi's xa' lo ta xa':
—¿Cho kwan jwan' re'?
¡Tib mod kub naka,
tak kon yalnyebe' ni Xa' lo re mbi narax nde nxobyeka xki's Xa'!
28 Nde jwan' toz mxyob xki's Jesús dib plo ten' nak lo xyon Galilea.
Jesús mtodan' xna'sap Pey
29 Sen' lo mbro' xa' len' yo ten' ndyop men Israel,
zya ngwa xa' liz Simón nde Ndres kon Jakob nde Juan.
30 Le' xna'sap Simón jwan' toz nzo xlye nde nax xa',
zyasa nchab mena lo Jesús.
31 Le' Jesús mbike gax ten' nax xa',
mxen Jesús ya' xa' nde mbliche Jesús xa';
nde tata mod zyaga mbyib xlye lo xa',
nde le' xa' mda' yej mda re xa'.
Bro toz men yiz mdodan' Jesús sen' lo ngwad wiz
32 Sen' lo ngwadla wiz,
ya ndakowla izyo,
zyasa tolo mbye'dno xa' reta men yiz lo Jesús nde re men jwan' nzo mbi narax.
33 Reta men nzo yez ya mdyop xa' ro yo ten' mbled Jesús.
34 Nde bro toz men mtodan' Jesús choja re yiz jwan' ndyak men nde taja mblo'che Xa' re mbi narax jwan' nzo lazo' men.
Per nandat Jesús di's ni re mbi narax,
tak nzoloy Jesús.
Jesús mketeta' kwent xki's Dios dib Galilea
35 Til' toz tata ben' nakow nya tud ngoche Jesús nde nda xa' tij tib plo ten' nagan nya nde tya mdodi'sno Xa' Dios.
36 Le' Simón nde kon ti pla xa',
ngwa kwan' xa' Jesús.
37 Nde sen' lo mzyal xa' Jesús,
nchab xa':
—¡Reta men nkwan' xa' lu!
38 Le' Jesús nchab:
Ndan' re yez jwan' nzi gax nche',
sa tan kwent xki's Dios lo men;
tak par jwan' na ndal na.
39 Nde mkete Jesús reta yez jwan' nzi lo xyon Galilea ngwa ta' Xa' kwent xki's Dios len' re yo jwan' ndyop men Israel nde taja mblo'che Xa' re mbi narax jwan' nzo lazo' men.
Jesús mtodan' tib xa' ndyak yiz tin ndole lepra
40 Tib wiz mzin tib xa' lo Jesús ndyak yiz tin ndole lepra anta ndoye bel' lad xa',
mdoxub xa' nde mnab xa' lo Jesús,
nchab xa':
—Mnen ke tlia gan todan' la na lo yiz re',
tez nchola's la lia ley,
bliy.
41 Zyasa mblat lazo' Jesús mbwi' Xa' mbi' ya nde mxob ya' Xa' yek mbi' nde nchab Xa':
—Toyala,
le'a dyan'.
42 Nde sen' lo ta nchab Jesús lo xa',
zyaga mbyib yiz dib xa' nde mbyak xa'.
43 Zyaga mbloned Jesús xa' nde mnab toz Jesús lo xa',
nchab Jesús:
44 —Nek tib lo men nagapta lu jwan' re',
jwan' ndablo lia,
wa lo ngwley' sa wi' xa' lu nde be' ma' yon jwan' nyebe' Moisés,
par nye re men ke mbyak la lo yiz.
45 Per sen' lo ndya xa',
tolo mda' xa' kwent lo re men ke Jesús mtodan' xa',
jwan' nasa ya nangakta ngete Jesús len' nek tib yez jwan' nzi tya,
tamod sa mas mbyan' Jesús tij ro yez plo ten' na'ngenta men,
per axta tya nzin re men nda xa' lo Jesús,
ndryo' xa' reta lad.