Jesús mtodan' tib xa' na'akta win
2
Mbrid pla wiz Jesús ndya yez Capernaum tib gob;
nde sen' lo mbin re men le' Jesús nzo yo.
2 Zyaga men toz mdyop tya,
ya nagalta len' yo kwe men axta ro yo nzi xa';
nde taja ndo ta' Jesús kwent xki's Dios lo re men.
3 Tya mzin thap xa' ndeno xa' thib men nayiz na'akta win.
4 Per ma bro toz men nzi tya,
jwan' nasa nandlid xa' gan mbike xa' gax lo Jesús,
zyasa ngwap xa' yek yo,
mblibe' xa' ten' ndo Jesús,
tya mched xa' lud yek yo nde mbla xa' men yiza kon dib ya lon' xa'.
5 Sen' lo mbwi' Jesús lo re xa' re',
liga ndlipa lazo' xa' Jesús,
zyasa nchab Jesús lo men ta nayiza:
—Xin' na,
reta xken la ya mdyon'la.
6 Tya ndob pla xa' jwan' nak maestr ndlo' ley xki's Dios,
mbli xa' xgab len' lazo' xa':
7 “¿Xamod ta mbez Xa' ba?
Nchola's Xa' ak Xa' Dios.
¿Cho men ligan ton' xken ta men?
Ben'ta Dios ndli gan.”
8 Per zyaga mne Jesús xgab jwan' mbli re mena len' lazo' xa' nde nchab Jesús lo xa':
—¿Cho kwan ndliy ta nya xgab ndli go' len' lazo' go'?
9 Mne go' lon.
¿Cho kwan mas nale' gab na lo men yiz re':
“Re xken la ya mdyon' la,”
o gab na:
“Goche',
bxen lon' la nde pte”?
10 Per naya lo'n lo go',
ke le' Xin' Mbi' mzin lo izyo re' ngeno Xa' yalnyebe' dib lo izyo par ton' Xa' xken men.
Zyasa nchab Jesús lo men ta nayiza:
11 —Naya nin loa,
goche',
bxen lon' la nde bya liz la.
12 Zyasa le' men yiza zyaga ngoche xa',
mxen xa' lon' xa' nde mbro'te xa' xij reta men,
zyasa reta men jwan' toz nzoyen xa' nde mni xa' di's wen xis Dios,
nchab xa':
—¡Tera win' tib jwan' taja mbwin' naya!
Jesús mbrez Leví xa' ndole Mateo
13 Ngolo jwan' re',
mbro' Jesús nda Xa' ro nitto' tib gob.
Nde reta men nda lo Xa' tya nde taja ndlo' Jesús xki's Dios lo xa'.
14 Sen' lo ndarid Jesús mbwi' Xa' ten' nge Levi' xin' Alfeo sin',
ngethop xa' tmi low jwan' nchax lo izyo nde nchab Jesús lo xa':
—Btoke xis na.
Nde zyaga mdo li xa' nde mdoke xa' xis Jesús.
15 Ngolo jwan' na,
sen' lo ndatha Jesús kon re xin' te'd Xa' liz Leví,
bro xa' jwan' nthop tmi chan' izyo nde re xa' jwan' narax nzob xki's na',
reta xa' re' nzi ya kon Jesús ro mes,
tak bro toz xa' mdonke xis Jesús.
16 Zyasa pla xa' jwan' nak maestr ndlo' ley xki's Dios nde xa' nak fariseo,
sen' lo mbwi' xa' ndob ya Jesús kon re mena,
zyasa ngwa mnabdi's xa' lo xin' te'd Jesús,
nchab xa':
—¿Xamod nak jwan' re',
Maestr go',
ncha Xa' kon re men nthop tmi nde kon re men nzob xken na'?
17 Sen' lo mbin Jesús jwan' re',
Jesús nchab lo xa':
—Re xa' nadan' nanaki'nta xa' men todan' xa',
re xa' nayiz xa' ya nakin' xa' men par todan' xa'.
Taga,
nandalta na par bez na re men jwan' ndyak gal' ndo,
na ndal ngebez na re men jwan' liga mne nzob xken'.
Mnabdi's xa' lo Jesús xamod nak ke men yalze
18 Le' re xa' nak xin' te'd Juan nke xa' yalze nde noga re xa' fariseo nke xa' yalze.
Mzin tib wiz mbye'd pla xa' lo Jesús nde nchab xa':
—¿Kwan ndliy,
xin' te'd Juan nde xin' te'd fariseo ndli xa' yalze nde le' re xin' te'd la nandlid xa' yalze?
19 Le' Jesús nchab lo xa':
—Bli go' xgab jwan' re'.
¿Cho toyal tib lo yalselya' ke men yalze sen' lo le' mbyo selya' ndo tya?
Laj ben' ndo mbyo tya natoyalta ke men yalze.
20 Per sin tib wiz le' mbyo mselya' ya na'ngenta,
zyasa ke xa' yalze.
21 ’Ngenta cho men ngibde tib ble lar kub lad lar gox;
per tez nzo xa' liy,
le' lar kub mbey nde cheda lar gox,
zyasa masra' cheda.
22 Nde taga ngenta cho men ko nit ub kub len' tib ye gox jwan' naksa' yid ma';
per tez nzo xa' koy tya,
le' nit ub kub cheda ye gox nde le' nit ub xyoy nde le' ye ya yaja ngosa'y;
Jwan' nasa le' nit ub kub ndablo yoy len' tib ye kub.
Re xin' te'd Jesús nthop xa' trig len' wiz jwan' ndryoxkwen men
23 Tib wiz jwan' ndryoxkwen men,
mbrid ndab Jesús kon re xin' te'd xa' tib plo ten' ndo trig,
zyasa le' xin' te'd Jesús tolo mthop xa' trig tya.
24 Zyasa pla xa' fariseo nchab xa' lo Jesús:
—Bwi',
¿Cho kwan ndliy re xin' te'd la ngeli xa' jwan' nandabloda li men naya len' wiz ndryoxkwen men?
25 Per Jesús mkab lo xa':
—¿Cho tera lab go' xki's Dios jwan' mbli David sen' lo mkeno xa' yalti nde msib ndyan' xa' kon re men jwan' nzino xa' tya?
26 Le' David ngote xa' len' liz Dios nde mda xa' pan jwan' Nayon nzi tya,
pan jwan' ben'ta re xa' nak ngwley' toyal way;
nde noga mda' Davida mda re xa' jwan' ngete kon xa'.
Jwan' na ngok sen' Abiatar nak mbol ngwley' ro.
27 Noga nchab Jesús lo xa':