—Ptoli nde pto xtow' re men re'.

4 Nde nchab Jesús lo re xa' nzi tya:

—¿Cho jwin li men tib jwan' wen len' wiz jwan' ndryoxkwen men,

o li men jwan' narax?

¿Cho wen todan' men tib xa' yiz,

o ta' men di's gaj xa'?

Per nek tib xa' nankabta.

5 Zyasa mbwi' nayi' Jesús lo reta xa' jwan' nzi tya nde ngo nabil lazo' Jesús por yalne lazo' re xa' jwan' nzi tya nde nchab Jesús lo men yiza:

—Btoga' ya'a.

Zyaga mtoga' xa' ya' xa' nde taxa mbyan' ya' xa' nde mbyaka.

6 Nde le' re xa' fariseo ngo xa' ned ndya xa' nde zyaga mdyop xa' kon re men Herodes,

sa mdodi's xa' par zyal xa' mod gaj Jesús.

7 Laja le' Jesús nda ro nitto' kon re xin' te'd Xa' nde bro toz men mdoke xis Jesús,

xa' nzi lo xyon Galilea nde Judea.

8 Sen' mbin re men ke naro toz nak re jwan' ndli Jesús nde ndlo' Xa',

zyasa mbye'd reta xa' re' lo Jesús,

men yez Jerusalén,

men nzi lo xyon Idumea,

men nzi tib lad ro yo' Jordán nde re men jwan' nzo re yez nzi lo xyon Tiro nde Sidón.

9 Nde nchab Jesús lo re xin' te'd Xa',

ke tob sa' xa' tib bark yap Jesús,

tak bro toz men nzi tya,

sa nagasta xa' Jesús.

10 Tak bro toz men mtoyak Jesús,

jwan' nasa reta men nayiz anta nga'z ta xa',

nchola's xa' gal xa' lad xab Jesús.

11 Nde re xa' jwan' nzo mbi narax len' lazon',

sen' lo mbwi' xa' Jesús,

mdoxub xa' lo Jesús nde ne mbrez xa':

—Lu nak Xin'pa Dios.

12 Per Jesús mdokox toz Xa' re mbi narax,

nchab Xa':

—Natejta go' cho nak na.

13 Ngolo jwan' na,

Jesús ngwap Xa' yek tib yi' nde mbrez xa' re men jwan' nchola's Xa';

nde ngwa xa' lo Jesús.

14 Zyasa xij re xa' ya mbli Jesús tib sen men,

xa' jwan' tibla tyeno xa' Jesús nde tel' Jesús xa' sa ya tej xa' xki's Dios lo re men.

15 Sa keno xa' yalnyebe' todan' xa' re men yiz nde par kote xa' re mbi narax jwan' nzo lazo' men.

16 Re tib sen xa' ya nak xa' re':

Simón (xa' mdob le Jesús Pey),

17 Jakob nde Juan (rop wes xa' re' nak xin' Zebedeo,

rop xa' re' mdob le Jesús,

Boanerg,

di's re' nak:

“Xin' mdi'”);^a

18 Ti pla xa' nak:

Ndres,

Blib,

Bartol,

Teo,

Max,

Jakob (xin' Alfeo),

Tadeo,

Simón xa' nzo xij partid cananist,^b

19 nde Judas Iscariot (xa' jwan' taya' Jesús lo men par kuj xa' Jesús).

Ngolo mne jwan' re',

zyasa ndya re xa' yo.

20 Nde taxa mdyop bro toz men tya tib gob,

ya nayenta wa Jesús neka re xin' te'd Xa'.

21 Sen' lo mne re xa' liz Jesús jwan' re',

zyasa nda xa' par we xa' Jesús,

tak nchab xa':

—Ndoyosa' yek mbi' re'.

22 Nde mzin pla xa' jwan' mbro' yez Jerusalén xa' nak maestr ndlo' ley xki's Dios nde nchab xa',

ke le' Jesús ndono Maxu' ndole Beelzebu' jwan' nyebe' lo re mbi narax nde por xa' ya sa ndli Jesús gan ngoche Xa' re mbi narax jwan' nzo lazo' men.

23 Zyasa mbrez Jesús re men ya nde mda' Jesús tib kwent nabix lo xa' nde nchab Jesús:

—¿Xamod kote Maxu' lega Maxu'?

24 Tez tib yez ak rol xa' nde yo xa' kon le'ga re ta xa',

naxekta xa',

tlux xa'.

25 Nde tez tib liz men ak rol xa' nde yo xa',

re xa' nzo yo ya naxekta xa'.

26 Nde taga tez Maxu' ak rol xa' nde yo xa' kon miska ta xa',

naxekta xa',

tlux xa'.

27 ’Ngenta cho xa' ligan yote len' liz tib mbi' ne toz,

par we wan' xa' re chan' mbi',

ndablo tobo xa' mbi',

zyasa li xa' gan we xa' re chan' mbi'.

28 ’Nipa na lo go',

ke Dios toyal nton' Xa' re yalke jwan' ndli men nde re di's xin jwan' ni men.

29 Per men jwan' ni xin xis Mbi Nayon chan' Dios,

men ya naton'ta Dios xken na',

nchan' no xa' yalken xa' tiptane.

30 Jwan' re' nchab Jesús lo xa',

tak le' xa' nchab ke Jesús ndono Maxu'.

31 Zyasa mzin xna' Jesús kon re wes xa',

nzita xa' le,

zyasa mbloned xa' tib men par ya chez xa' Jesús.

32 Nde re men jwan' nzi ndob cho Jesús tya,

tib xa' nchab lo Jesús:

—Xna'a nde re wes la nzi le nde nkwan' xa' lu.

33 Le' Jesús mkab:

—¿Cho nak xna'n nde re wes na,

ndyak go'?

34 Nde mbwi' Jesús lo re men jwan' nzi ten' ndo Jesús nde nchab Jesús:

—Bwi' go',

miska go' nak xna'n nde wes na.

35 Tak re xa' jwan' ndli jwan' nchola's Dios,

xa' ya nak wes na,

btan' na nde xna'n.