3 —Bin go' jwan' re':

Mbro' tib xa' nda cha's mbis bin.

4 Sen' lo ndo cha's xa' mbis bin,

nzo mbis ngob ro ned,

zyasa mbye'd mbyin nde mda mbyina.

5 Tipla mbis ngob xij ke te' ngenta bro yo jwan' nasa naban toz mblena,

6 per sen' lo mbla toz be,

mbol' la tak nangenta loxa nde mbiza.

7 Tipla mbis ngob xij yis;

nde mas mxyen yis,

mtow' yis yek ne'y nde tamod sa nandopta lo ne'y.

8 Le' tipla mbis jwan' ngob lo yobe'b,

mblen na,

mxyen na nde nawe mdob lo ne'y,

choy mda' galbsi' mbis axta songal mbis nde nzoy mda' axta tib ayo' mbis kad tiba.

9 Zyasa nchab Jesús lo xa':

—¡Go' jwan' ndob nzan' par gona,

bin go'y!

10 Sen' lo mbyan' tipta Jesús,

zyasa pla xa' jwan' ngete nke xis Jesús nde kon re tib sen xin' te'd Jesús,

mnabdi's xa' lo Jesús nyen' xamod nak kwent nabix jwan' mda' Xa'.

11 Zyasa nchab Jesús:

—Ben'ta lo go' ngoxkan Dios re di's nagan jwan' nak yalnyebe' chan' Dios;

per re men jwan' ngete axisa nab kwent nabix tej men re jwan' lo xa'.

12 Tamod tenye plopa ngwi' xa',

nawi'd xa'y,

tenye plopa nchon xa'y,

nayenta xa'y;

jwan' nasa nasyed xgab xa' lo Dios nde naton'ta Dios xken xa'.

13 Zyasa nchab Jesús lo xa':

—¿Cho nangyenta go' kwent nabix re'?

¿Xomodka yen go' reta kwent nabix sa?

14 Le' xa' jwan' nda cha's mbis bin nak xa' jwan' ncha's xki's Dios.

15 Tak nzo men nak xaja ned ten' ngob mbis bin.

Men ya,

nchon xa' xki's Dios,

sen' ngolo mbin xa'y zyasa nde Maxu' nde nkib Maxu' xki's Dios ta ngobin lazo' xa'.

16 Nzo men nak xaja izyo ke,

ten' ngob mbis bin.

Men ya,

nchon xa' xki's Dios nde zyaga nale toz ncho lazo' xa' tak mkaya' xa' xki's Dios.

17 Ma nangyenta bro lox xki's Dios len' lazo' xa',

nak xa' men plata wiz,

tak sen' lo nde cho yalti lo xa' o ngi'no men xa' xke chan' xki's Dios nde tamod zyaga ndla' xa' xki's Dios.

18 Nzo men nak xaja izyo xij yis ten' ngob mbis bin.

Men ya,

nchon xa' xki's Dios,

19 per ndli toz xa' xgab re jwan' lo izyo re' nde ndyen xa' tmi nde ndyabla's xa' keno xa' bro toz jwan',

reta jwan' re' mas nxyen len' lazo' xa' nde tamod nchaj xki's Dios len' lazo' xa'.

20 Per nzo men nak xaja izyo be'b ten' ngob mbis bin.

Men ya,

nchon xa' xki's Dios nde nkaya' xa'y dib nzo lazo' xa',

nak xa' xaja mbis bin jwan' nawe ndob lon' nde bro toz jwan' nda'y,

choy nda' galbsi' mbis,

axta songal mbis nde axta por ayo' mbis nda' kad tiba.

21 Nde noga nchab Jesús:

—¿Cho nzo men ndeno tib xni nde tow' xa' yek nay kon tib xi be' o tob xa'y xan' lon'?

¿Cho nanakta tob xa'y gap sa par ta'y xni?

22 Tak reta jwan' nzo nagas sin wiz troxoba nde reta jwan' nzo ka'slo,

le'y ryoxobka lo xni.

23 ¡Tez nzo go' ndob nzan' par gon go'y,

bin go'y!

24 Nde noga nchab Jesús:

—Bke' nza go' jwan' nin lo go' naya,

xaja nchix go' jwan' lo men,

taga ta' Dios lo go' nde axta masrey kaya' go'.

25 Tak men ngenolay,

xa' ya kaya' masrey;

Nde men nangenoday,

axta jwan' lud ngeno xa' yiba lo xa'.

26 Nde noga nchab Jesús:

—Chemod nak yalnyebe' chan' Dios,

xaxa nak tib mbi' jwan' mblo bin mbis lo izyo.

27 Ben'ta nchàt xa' yal' nde nchoche xa' mduxni,

le' mbis ndo lena,

ndo xena nde nanyed xa' xamod ndo yaka.

28 Tak izyo ndli sa ndlyena,

nerla ndryoxoba nde nxyena,

sen' lo mne mxyena zya ndryo' do lo ne'y,

nde se lo do ndryoxob mbis.

29 Nde sen' lo ngol mbis,

zyasa thop xa'y,

tak mzin wiz par dyopa.

30 Nde noga nchab Jesús:

—¿Cho tib jwan' tipta nak kon yalnyebe' chan' Dios,

o cho tib kwent nabix tej na,

sa yen go'y?

31 Lal naka kon tib mbis mostaz,

tak mbis re' nak mas mbis bix lo reta mbis jwan' ngobin men.

32 Nde sen' lo nzo bina zya nxyena nde ncholala mas ya ro lo reta jwan' bin nde taja ndryas xoda,

axta re mbyin toyal toxkwa' ma' lyed lo xod na'y.

33 Mod re' ndlo' Jesús xki's Dios lo men,

napta re kwent nabix,

tamod ndej Xa'y axaja nchen mena.

34 Nde napta kwent nabix mdodi's Xa' lo reta men;

per sen' lo leta xa' nzi zyasa ben'ta lo xin' te'd Xa' ngoxkan Xa' nyen' xamod naka.

35 Miska wiz ya sen' lo ndalala yal',

Jesús nchab lo xin' te'd Xa':

—Ndan' tib lad ro nitto'.

36 Zyasa mbla' xa' reta men nzi tya nde ngwap xa' lo bark jwan' nzola Jesús nde nda xa';

Nde xisa mdoke tipla bark jwan' nzi tya.

37 Sen' lo ganla nda xa' lo nitto' zyasa mxyob tib mbi toz lo nit,

axta len' bark nchote bde ya ndosey nzo nit.

38 Le' Jesús naxyat lad xan' bark ben'ta tib almwad ndob yek Xa';

zyasa mblo' xkal' xa' Jesús nde nchab xa':

—Maestr,

¿cho nandlid la xgab le' na' gaj tak ndolan' len' nitto'?

39 Zyasa ngoche Jesús nde mbrez Xa' lo mbi nde bde,

nchab Xa':

—¡Xe bre go'!

Zyasa ngotab mbi nde ngotab bde lo nit.

40 Nde nchab Jesús lo xa':

—¿Kwan ndliy mzyeb toz go'?

¿Cho nandlid lazo' go' Dios?

41 Zyasa mzyeb toz xa' nde nchab xa' lo ta xa':

—¿Cho Xa' re',

axta mbi nde nitto' nchona di's ro Xa'?