2 tya mbla Jesús lo bark.

Zyaga nde tib mbi' mbro' xij re ba',

mbi' ya nzo mbi narax lazon' nde mbro'to xa' lo Jesús.

3 Tak ten' nzi re ba',

tya nak plo ten' nzo xa' nde nek kon kaden ngenta cho men li gan kedo' xa'.

4 Tak nar toz gob mbo men xa',

ya' xa' nde ni xa' kon yib nde kaden,

per nya jwan' na ndli xa' gan ndryo'ta;

nde ngenta cho men li gan tobo xa'.

5 Ndlyabe na yal' tibla ngete xa' len' wan nde xij re ba' mbez xa' nde ntowiy' xa' lad xa' kon ke.

6 Sen' lo mbwi' xa' tij nde Jesús,

zya mke xa' karrel nde mdo xub xa' lo Jesús.

7 Nde mbrezyaj xa',

nchab xa':

—¿Cho kwan ndyaknoa na,

Jesús,

Xin' Dios ndob lo be'?

Nyab na loa ndo wi' Dios,

natotid la na.

8 Tamod nchab xa' lo Jesús,

tak le' Jesús ya nchab la:

—Mbi narax,

bro'te len' lazo' mbi' re'.

9 Nde mnabdi's Jesús lo xa':

—¿Cho lea?

Le' xa' mkab:

—Na ndole Bro toz;^a

Tak bro toztir ná'.

10 Nde mnab toz xa' lo Jesús ke natel'ta Jesús xa',

xa'ga lo xyon men.

11 Nde tya,

gax len' wana nzi bro toz nguch nzi ya.

12 Nde mnab reta mbi narax lo Jesús,

nchaba:

—Btel' ná' lo re nguch par lya ná' len' ma'.

13 Nde zyaga mda' Jesús di's.

Nde le' reta mbi naraxa,

mblay len' reta nguch,

lo reta nguch mer nzi ti chop mil ma' nde mke ma' karrel ngobi ma' lad ke nde mbla ma' len' nitto',

ngwap ma' nit nde nguj ma'.

14 Le' re xa' jwan' nkenap nguch mxon' xa' karrel nde ngwa tej xa'y lo re men nzi yez nde ranch.

Nde reta men ya ngwa twi' xa' jwan' ngok.

15 Sen' lo mzin reta men lo Jesús,

zya mbwi' xa' le' mbi' ta ngo bro toz mbi naraxa xe ndob xa',

nok xab xa' nde mbi yek xa',

zyasa tolo mzyeb re men.

16 Le' re men jwan' mbwi' mtodan' Jesús mbi' ya,

tolo mda' xa' kwent xamod ngotey kon mbi' ta ngo mbi naraxa nde kwan ngotey kon re nguch.

17 Zyasa mnab xa' lo Jesús par ryo'te Jesús laz xa'.

18 Laj ndoyap Jesús lo bark tedib gob,

le' mbi' ta ngo mbi narax lazon' ya,

mnab toz xa' lo Jesús par tyonke xa' xis Jesús.

19 Le' Jesús nandad Xa' di's nde nchab Jesús lo xa':

—Bya liz la,

ten' nzi re xa' taa,

ptej re yalnaro jwan' mbli Dios loa nde xamod mblat lazo' Xa' mbwi' Xa' lu.

20 Zyasa nda xa' nde mdobte mda' xa' kwent ten' nak dib lo xyon Decápolis^b plopa nak yalnaro jwan' mbli Jesús lo xa'.

Nde anta nzoyen re men sen' lo nchon xa'y.

21 Sen' lo mzin Jesús tedib gob ten' nak tib lad ro nitto' kon bark,

zyaga men toz mdyop lo Jesús tya,

yaja rota nit ngoto Xa'.

22 Zya mzin tib xa' ndole Jaíro,

xa' jwan' nyebe' len' yo ten' ndyop men Israel len' yez ya,

sen' lo mbwi' xa' Jesús,

mdo xub xa' nde mbla yek xa' lo ni Jesús.

23 Nde mnab toz xa',

nchab xa':

—Mza' nak xin' na mer gaj or;

de' sa xob la ya'a yek or,

sa dyan' or nde nagajta or.

24 Zyasa nda Jesús kon Jaíro;

nde bro toz men mdonke xis Xa',

anta nga'z men Xa'.

25 Xija nzo tib ngol ndala tib sen lin' thibla' ndlyaj xa' ren.

26 Nde jwan' tozla pen mkete xa' lo re doctor,

axta mbre reta tmin xa' nde tatka ndo yiz,

che'la ndoroy lo xa'.

27 Sen' mbin ngol ndyodi's re men re jwan' nkete li Jesús,

zyasa mbike ngol lad xis Jesús nde mbwal ngol xab Jesús,

28 tak mbli ngol xgab:

“Masa ben'ta gal na xab Jesús,

dyan' na.”

29 Nde zyaga ngotab yiz ren lo ngol,

mden' xa' mbyak xa' nde mblya' xa' lo yiz.

30 Zyaga mden' Jesús le' yalne chan' Xa' mtodan' tib men nde mbwi' Xa' lo re men nde nchab Xa':

—¿Cho mbwal lad xab na?

31 Le' xin' te'd Xa' nchab:

—Bwi',

jwan' toz nga'z men lu nde mbez la:

“¿Cho mbwal lad xab na?”

32 Le' Jesús tatka ngwi' Xa' lo re men jwan' nzi dib ten' ndo Xa',

nyen' cho mbwal lad xab Xa'.

33 Zyasa le' ngol ya,

mzyeb toz xa' nde tolo mxid xa',

tak mne xa' jwan' ngok,

mbike xa' gax lo Jesús nde mdo xub xa' nde mbla yek xa' lo ni Jesús nde mda' xa' kwent gal'.

34 Le' Jesús nchab lo xa':

—Xin' na,

lu ndlipa lazo'a na,

jwan' nasa mblya'a;

nabe'z bya tak mbyak la lo yiz jwan' mxak la.

35 Laj ben' ndotodi's Jesús,

mzin pla xa' jwan' mbro' liz Jaíro nde nchab xa':

—Jaíro,

se nguj mza' xin' la;

natodot la mas lo maestr.

36 Le' Jesús zyaga mbin Xa' jwan' nzi bez men tya nde nchab Jesús lo Jaíro:

—Nazyebta lu,

ben'ta bli lazo'a na.

37 Nde na'ndad Jesús di's ndonke xa'ga men xis Xa',

ben'ta Pey,

Kob nde Juan wes Kob mdonke.

38 Sen' lo mzin xa' liz Jaíro,

mbwi' xa',

anta chepa nzi yon' re men nde nabil toz mbez xa'.

39 Le' Jesús ngote len' yo nde nchab Xa':

—¿Cho kwan ndliy taja nchon' go' nde mbez go'?

Nakta mza' nguj,

ben'ta naxyat mza'.

40 Zya tolo mxino xa' Jesús.

Per zyaga mnabe' Jesús lo re xa',

ryo'te xa' len' yo nde mbe' Jesús xud mza',

xna' mza' kon re yon xin' te'd Jesús nde ngote xa' ten' nax mza'.

41 Nde mxen Jesús ya' mza' nde nchab Jesús di's re':

—Talita kumi^c —di's re' nak:

¡Mza' lud,

na ni loa,

goche'!

42 Nde zyaga ngoche mza' nde tolo mde mza',

axta mzya lazo' re men nde nzoyen toz xa'.

Tib sen lin' nzor.

43 Zyasa mnab toz Jesús lo xa',

nchab Jesús:

—Nek tib lo men nagapta go' jwan' ngok nde pta' go' jwan' wa mza'.