—Nalit na'y len' wiz ni re',

sa na'akxolta re men.

3 Laj nzo Jesús yez Betania,

zya ngwa Xa' liz Simón,

xa' jwan' mxak yiz tin ndole lepra.

Sen' lo nzi xa' ro mes zya mzin tib ngol ndeno tib bot naksa' ke ndole alabastro,^c

sey nzo perfum naxe' nde nap toza,

perfum re' naksa' napta tib ned aceit ndole nardo.^d

Zyasa mdi's ngol yen bot nde mblo ngola yek Jesús.

4 Ngo pla xa' nayi' xija,

nchab xa' lo ta xa':

—¿Cho kwan ndliy taja ntoti ngol perfum ba?

5 Ndablo ntho mena nde ta'y tmi jwan' nsina' men dib ti lin',

tmi ya ta' men lo re xa' prob,

tamod mdodi's xa' xis ngol.

6 Le' Jesús nchab lo xa':

—Bla' go',

¿cho kwan ndliy taja mbez go' lo ngol?

Yalwen mbli ngol lon.

7 Re men proba tatka nzino go' xa' nde choja wiz nchola's go' la'sto go' xa',

toyala;

per na,

lud ndal na kon go'.

8 Nde ngol re' jwan' naja mbli xa' gan mbli xa',

tak perfum ta mken xa' mblo xa' yek na,

tli sin' na sen' lo ga's na.

9 Nipa na lo go',

one ploja todi's men di's wen chan' Dios dib nax izyo,

no jwan' ta mbli ngol re',

tej mena sa tibla tela's men ngol.

10 Tib xa' jwan' nak lo re tib sen xin' te'd Jesús,

ndole Judas Iscariot,

ngwa xa' lo re ngwley' jwan' nyebe',

sa todi's xa' taya' xa' Jesús.

11 Sen' lo mbin re xa' jwan' re',

ndyen toz xa' nde mke'yek xa' kix xa' ka Judas.

Zyasa ndolo nkwan' Judas mod nyen' xa taya' xa' Jesús.

12 Wiz ner sen' nchal ni ncha xa' pan ngenta lebadur nde wiz yaga nguj xa' mbakxil',

ma' yon lo ni chan' Pask,^e

zyasa re xin' te'd Jesús nchab lo Xa':

—¿Plo nchola's la ya toxkwa' ná' jwan' wan' nal Pask re'?

13 Le' Jesús mbloned chop xin' te'd Xa' nde nchab Xa':

—Wa go' Jerusalén nde tya yosib go' tib xa' bi' ndano tib ré^f nit.

Ptonke go' xis xa',

14 nde ten' ndob yo sin xa',

tya nyabdi's go' lo xa' nak liz yo,

gab go':

“Le' Maestr nyabdi's:

¿Plo ta' go' wa rsye'no Xa' re xin' te'd Xa' na ni Pask re'?”

15 Zya lo' xa' lo go' tib yo chop xta',

xta' gap ten' naksa'la;

tya btoxkwa' go' jwan' wán'.

16 Zyasa ngwa rop xa' nak xin' te'd Jesús,

mzin xa' len' yez nde xata nchab Jesús lo xa' ta ngoka nde tya mtoxkwa' xa' jwan' wa xa' lo ni chan' Pask.

17 Sen' lo mbla yal',

zyasa ndano Jesús re tib sen xin' te'd Xa' tya.

18 Nde sen' mblatob re xa' ro mes,

laj nzi ya xa',

zya nchab Jesús:

—Nipa na lo go',

xij go' re' nzo tib xa' jwan' ndob yanon naya,

xa' ya taya'n lo re men nchola's kuj na.

19 Zyasa ndolo ngo nabil lazo' re xa' nde tib tiba xa' mnabdi's,

nchab xa':

—¿Cho nay?

20 Le' Jesús nchab:

—Xij re tib sen go' re',

ndob tib go' jwan' tipta ndo gaz pan na' len' yen na,

xa' yay.

21 Le' xki's Dios nchabka,

le' Xin' Mbi' mbye'd lo izyo re' naki'nka gaj Xa'.

¡Nde le' xa' jwan' taya' Xin' Mbi' mbye'd lo izyo re',

nalat nya xa'!

Wen nda xa' tez na'ngalta xa'.

22 Laj nzi ya re xa',

zya mxen Jesús pan nde mbli ley' Xa'y mda' Xa' dyux lo Dios,

mblirol Xa'y nde mda' Xa'y lo re xin' te'd Xa',

nchab Xa':

—Bda go'y,

jwan' re' nak bel' na.

23 Taga,

mxen Xa' jwan' nzo nit ub,

mda' Xa' dyux lo Dios nde mda' Xa'y lo re xin' te'd Xa',

zya ngu' re xa'y.

24 Nde nchab Jesús:

—Jwan' re' nak ren na,

ren re' mda' nakub Dios xki's Xa' lo go',

tak ren re' xyoy par bro toz men.

25 Nipa na lo go',

jwan' re' nak lult gob ngun nit ub nde axta kebe' sin na ten' nyebe' Dios,

tya gun' nit kub.

26 Sen' ngolo mbil' xa' ti salmo,

zya mbro' xa' nda xa' ten' ndole kox ya Olib.

27 Zya nchab Jesús lo re xin' te'd Xa':

—Nayal' re',

tak rop xgab go' nde la' go' na;

tak lo xki's Dios nchab:

“Guj na xa' nkenap mbakxil' nde rya's reta mbakxil'.”^g

28 Lo sen' ryoxban na,

nerla na sin lo go' ten' nak xyon Galilea.

29 Zyasa le' Pey nchab lo Jesús:

—¡Tenye reta xa' la' lu,

na na'latka na lu!

30 Le' Jesús mkab lo Pey,

nchab Xa':

—Nipa na loa nayal' re',

sen' tera kwez ngidte' mbrop gob,

lu mbyon la gob gab la,

nancholot la na.

31 Le' Pey masra' mdosa' nde nchab Pey:

—Nalat na lu,

tenye gajnon la.

Nde taga nchab reta xa'.

32 Ngolo jwan' na,

zya nda xa' ten' ndole Getsemaní,

sen' lo mzin xa' tya,

Jesús nchab lo re xin' te'd Xa':

—Ncheta bre go',

laja na nda todi'sno Dios.

33 Nde mbe' Jesús Pey,

Jacob nde Juan,

zya mdobte nabil toz ngo lazo' Jesús nde narax mxak Xa'.

34 Nde nchab Xa':

—Jwan' toz nabil nzo lazo'n,

nden' na gaj na;

ncheta byan' go' nde brena go'.

35 Tya mde Jesús tud nde mdoxub Xa' kebe' ndin' yek Xa' izyo,

mnab Xa' lo Dios,

nyen' cho toyal naridndapta Xa' lo yalti.

36 Nchab Xa':

—¡Pay,

Xud na!

Lu reta jwan' tak lia;

natad la di's rid na lo re yalti re',

per nagaktay xaja ncholas na,

gaka xaja nchola's la.

37 Zya mbere Jesús ten' nzi re yon xin' te'd Xa' nde ngosib Jesús xa' nzi yat xa';

Jesús nchab lo Pey:

—Simón,

¿cho seba naxyat la?

¿Cho nek lud naxekta la tyobnaa?

38 Brena go' nde ptodi'sno go' Dios,

sa nakwin'nod Maxu' go';

le' xbin go' ndosa'y liy yalwen nde le' bel' go' naxektay.

39 Zyasa bere ngwa todi'sno Jesús Dios tib gob nde di's yaga nchab Xa' lo Dios.

40 Sen' mbere Xa' tib gob,

taxa ngosib Xa' re xin' te'd Xa' nzi yat,

tak na'xekta xa' mkal' nde nanyet xa' kwan kab xa' lo Jesús.

41 Sen' lo ngoxob mbyon gob mbere Jesús,

zyasa nchab Xa':

—¿Cho tatka nzi yat go' nde nzi roxkwen go'?

¡Naya wache go'!

Tak mzin hor le' Xin' Mbi' mbye'd lo izyo re' yoga Xa' lo ya' re men nzob xken'.

42 Bwi' go',

gax la nde xa' jwan' taya'n,

wache go',

ndan'.

43 Ben' ndotodi's Jesús,

zya mzin Judas,

tib xa' jwan' nak xin' te'd Jesús,

ndeno xa' bro toz men,

cho xa' ndeno mached nde cho xa' ndeno ya,

reta xa' re' mtel' re ngwley' jwan' nyebe' nde maestr ndlo' ley xki's Dios nde re xa' jwan' nak sin' lo men Israel.

44 Tak xa' jwan' taya' Jesús,

mbyan' di'sla xa' lo reta men ndano xa',

nchab xa':

—Tib Xa' jwan' tan chut lad kwat na,

Xa' yay;

zya tyen go' Xa' nde natad go' di's lya' Xa'.

45 Nde sen' lo mzin Judas,

zyaga mbike xa' lo Jesús nde nchab xa':

—¡Maestr!

Nde mda' xa' chut lad kwat Jesús.

46 Zyaga mbro' reta men nde mxen xa' Jesús.

47 Le' tib xa' jwan' ndono Jesús tya,

mblo'te xa' kuchi nde mcho' xa' nza tib xa' jwan' nak sin' lo mbol ngwley' ro.

48 Le' Jesús mkab,

nchab Xa':

—¿Cho kwan ndliy ndexen go' na,

xaja ndyen men tib xa' wan' na,

ndeno go' mached nde ya?

49 Reta wiz mdon xij go' mblo'n xki's Dios ten' ndob yodo',

nde nandenta go' na;

mbay che'ga mod gaka,

sa ak jwan' nchab lo xki's Dios.

50 Zyasa le' reta xin' te'd Jesús mxon' xa',

mbla' xa' tib nya Jesús.

51 Le' tib mbyo yen' jwan' ngetenke xis Jesús,

ben'ta tib ble lar wen nachal mbyo;

nde no mbyo ya ngoga lo ya' xa'.

52 Nde mbli mbyo gan mbro'ngib mbyo lo ya' xa',

mbyan'ta xab mbyo nde tata chey' mbyo mxon' mbyo.

53 Zyasa mzin no xa' Jesús ten' ndob mbol ngwley' ro;

nde tya mdyop re ngwley' jwan' nyebe',

reta xa' jwan' nak sin' lo men Israel nde re xa' jwan' nak maestr ndlo' ley xki's Dios.

54 Le' Pey tij,

tij mdonke xa' xis Jesús mzin xa' ta' nak lo le ten' ndob mbol ngwley' ro;

tya mbla Pey xij re xa' jwan' nkenap yodo',

nzi bis xa' lo ki.

55 Le' re xa' jwan' nak ngwley' nyebe' nde reta ta nak sin' xa',

mkwan' xa' nyen' cho yalke nchap Jesús sa taya' xa' Jesús lo yalguj,

nde na'ngasalta xa' nek tib yalke.

56 Tenye nar xa' mdej di's kwin' xis Jesús nde lega xa' nginyo xa' ta xa' tak na'ndejta xa' tipta jwan'.

57 Zyasa mdoli pla xa' mdej di's kwin',

nchab xa':

58 —Mbin ná' che' mni xa' re':

“Sil na yodo' ta mtoxkwa' re mena nde len' sonta wiz toxkwan tiba nde nakta men toxkwa'y.”

59 Nde taga na'nchapta xa' tipta di's,

lega xa' nginyo xa' ta xa'.

60 Zyasa mdoli mbol ngwley' ro,

xij re men nzi tya nde mnabdi's xa' lo Jesús nchab xa':

—¿Cho ngenta kwan kab la?

¿Cho li jwan' ta mbez re men re' xisla?

61 Le' Jesús xe ndo nde na'nkabta Xa'.

Le' mbol ngwley' ro bere mnabdi's xa' lo Jesús,

nchab xa':

—¿Cho lu nak Crist,

Xin' Dios Nayon?

62 Le' Jesús nchab:

—Nay;

nde wi' go',

le' na,

Xin' Mbi' mbye'd lo izyo re',

tyob na lad ban Dios ten' nzo yalne toz nde lo be' ryo'n yed na xij xkow.^h

63 Zyasa le' mbol ngwley' ro,

mched xa' xab xa',

tak mxitin lazo' xa' nde nchab xa':

—¿Cho kwan ndliy ngembedra' ná' men ta' kwent?

64 ¡Mbinla go',

di's xin mni Xa' xis Dios!

¿Xa ngwi' go' jwan' re'?

Zyasa reta xa' nchab:

—¡Liga nchap Xa' yalke,

ndablo gaj Xa'!

65 Nde zyaga,

nzo men ndolo mzuk lo Jesús nde mtow' xa' lo Jesús zya mdin xa' Jesús nde nchab xa':

—¡Btej,

nyen' cho nke'y choa!

Le' re xa' jwan' nkenap yodo' taga mdin xa' Jesús.

66 Le' Pey ndo lo le lad la nde tya nda rid tib ngol nge sin' lo mbol ngwley' ro.

67 Sen' lo ngoni lo ngol ten' ndo sen Pey lo ki,

zyasa xe mbwi' ngol lo Pey nde nchab ngol:

—No lu mketenke xis Jesús,

xa' yez Nazaret.

68 Le' Pey mka's nde nchab:

—Nanzolot na Xa',

nanyet na kwan ta mbez la.

Nde mbro'te Pey le;

zyasa mbrez ngidte' tib gob.

69 Le' ngol mbwi' lo Pey tedib gob nde nchab ngol lo re xa' nzi tya:

—No xa' re' mketenke xis Jesús.

70 Bere mka's Pey tedib gob.

Lud la ndatey,

re xa' nzi tya bere nchab xa' lo Pey:

—Luga nak tib xa' ta mketenke xis Jesús;

lu nak men Galilea,

tak taxa ndyodi's la.

71 Le' Pey tolo mni xin nde nchab Pey:

—¡Dios ndo wi',

nanzolot na Xa' ta ndej go' lon ba!

72 Zyaga mbrez ngidte' mbrop gob.

Zya mtela's Pey di's jwan' nchab Jesús lo Pey:

“Sen' lo tera kwez ngidte' mbrop gob,

le' lu mbyonla gob gab la nanzolot la na.”

Zyasa mtela's Pey jwan' na nde mbin' Pey.