Mna'b go' lo Dios por re men
2
Jwan' mas nakin' ndablo li go' nak,
mna'b go' lo Dios por reta men.
Btodi'sno go' Dios sa la'sto Dios xa',
brez go' lo Dios sa lat lazo' Dios xa' nde bta' go' dyux lo Dios por reta xa'.
2 Ndablo nya'b go' por re xa' nyebe' lo re yez',
por re xa' nak sin' ro lo yez sa nabe'z yo na' nde ngenkwan yo,
sa naxut ban na' xa nda'bloy.
3 Tak jwan' re' nak jwan' wen nde jwan' ndryo' lazo' Dios,
Xa' ntolan',
4 Xa' nchola's lya' reta men nde yolo men jwan' li.
5 Tak ben'ta nzo thita Dios nde thita mbi' ntorid xki's men lo Dios,
le' mbi' re' nak Jesucrist,
6 Xa' mda'ya' lazon' sa lya' reta men.
Nde mbli Xa'y be' jwan' ndablo aka.
7 Jwan' nasa mto Xa' na,
nak na xa' ndej xki's Dios nde apost (ndowi' Jesucrist,
nankwi'nta na) sa lo'n jwan' lipa' lo re xa' nanakta yez Israel nde xa ndablo li lazo' xa' Dios.
8 Ncholas na reta men bi' todi'sno xa' Dios one plo ndo xa',
nayod yalnayi' lazo' xa',
nde nakwesnod xa' ta men xa',
che'la lit xa' ya' xa' lo Dios,
nde kenap lazo' xa' lo reta jwan' narax.
9 Nde taga' re men got naxu'ta gok xab xa',
naxut tyokwa' xa' nde kwek lazo' xa';a
nde naku'd xa' yisyek xa' ben'ta por yalxna,
neka li rsin' xa' jwan' or,
nek mbega' ndyob xnib,
nde neka re lar naptoztir.
10 Che'la kwan' xa' li xa' re yalwen,
xajka ngol jwan' liga nxob yek Dios.
11 Le' ngol ndablo xe tyob nza xa' jwan' ndlo' xa' lo xa',
nde xobyek xa'.
12 Tak nandat na di's re ngol tote'd xa' men,
nde neka nyebe' xa' lo re xa' bi',
che'la xe tyob xa'.
13 Tak nerla mtoxkwa' Dios Adán nde xis mtoxkwa' Xa' Ev.
14 Nde namkwinod Maxu' Adan,
che'la le' Maxu' mkwin'no Ev,
nde mbli Ev jwan' narax.
15 Per le' ngol lya' xa' lo tyan xa' xin' xa',
tez thibla li lazo' xa' Dios,
thibla ke' lazo' xa' men,
thibla nayon nde nali nkete xa'.