Xamod ndablo ak re xa' tyo lo yodo'
3
Di's li jwan' re':
tez cho xa' ncholas tyo lo yodo',
sin' wen nchola's xa' li xa'.
2 Per xa' ya nakin' toz,
gal' kete xa',
thita ngol tyobno xa',
wi' toz xa' xa kete xa',
nde wi' toz xa' xa ban xa',
wen xyo'b xki's xa',
ta' xa' yo ten' kwed men,
nde jwin toz tote'd xa' men.
3 Nandabloda gu xa' nit xtus,
nagakta xa' men nkwan' yalbyo,
ndablo gak xa' men naxal',
nabe'z nde nado' ak xa' nde na'tyabla'sta xa' tmi.
4 Jwin nyebe' xa' liz xa',
li xa' xobyek re xin' xa' xa' nde gal' gak or;
5 (tak tez liz xa' na'akta nyebe' xa',
¿xa ak kenap xa' re men nzi len' yodon' Dios?);
6 na'ndabloda thi xa' kub lo' xki's Dios,
tak nday lya yalnaro len' lazo' xa' nde yote xa' xa ngote Maxu'.
7 Nde taga' wen ndablo xyo'b xki's xa' lo re men jwan' nandlid lazon' Dios,
sa naryo'yanthod xa' nde nagapta xa' lo ya' Maxu'.
Re jwan' ndablo li re xa' ndli sin' lo yodo'
8 Taga re xa' ndli sin' lo yodo'a ndablo gal' li xa' sa wen wi' men xa',
na'akta xa' men rop ro,
nandablod ak xa' men guy,
na'sinad xa' tmi jwan' nde mod narax.
9 Ndablo nambi ak xgab xa' nde tyonke xa' xis jwan' li mblo'to Dios lon'.
10 Re xa' jwan' ta nchola's li sin' ya',
nerla ndablo ak be' xa',
tez ngobe' nambi ndo xa',
toyal li xa' sin' lo yodo'.
11 Taga' ngol xa',
ndablo gal' ak ngol,
nandabloda ak xa' men nakij di's yix,
ndawi' xa' xa kete xa',
nde thibla' gal' tyo xa' lo reta jwan' ndli xa'.
12 Re xa' bi' ndli sin' lo yodo',
ndablo thita ngol tyobno xa',
nde ndablo naxut koned xa' re xin' xa' nde re men nzo len' liz xa'.
13 Tak re xa' jwin ndli rsin' na' lo yodo',
ndli xa' gan xob yek men xa',
nde re jwan' re' ngone lazo' xa' sa tej xa' xki's Jesucrist lo re men.
Xki's Dios jwan' nzo naga's
14 Te'nyega nkelon mer ya twi'n la,
ngeke'n ye's re' loa,
15 sa tez ndolen' na,
nyea xamod ndablo kete men xij yez Dios,
men jwan' nak yodon' Dios nayenaban,
men yez Dios jwan' ndenke' nde nak xan' jwan' li chan' Dios.
16 Ngen plo ngan jwan' re',
naro toz nak jwan' nzo naga's ta ndli lazon':
Crist mbye'd lo izyo xaja' thi men
Nambi mblo'to Mbi Nayon Xa'.
Mbwi' re áng Xa'.
Mbyaj xki's Xa' xij re men dib lo izyo,
Mbli lazon' men Xa',
Nde mkaya' Dios Xa' lo be' kon dib yalnaro.